Қазақстан 2026 жылдан бастап 100 млн тоннадан астам мұнай өндіруді жоспарлап отыр
Қазақстан 2026 жылдан бастап 100 млн тоннадан астам мұнай өндіруді жоспарлап отыр, деп мәлім етті Қазақстанның энергетика министрі Алмасадам Сәтқалиев.
Мұнай-газ кешенінде елдің дамуында республика бойынша мұнай өндірудің 65%-ды құрайтын үш ірі кен орны маңызды рөл атқарады. Жобаларға жалпы тікелей инвестициялар игеру басталғаннан бері шамамен $185 млрд құрады. Болжам бойынша 2026 жылдан бастап ірі жобаларды іске асыру есебінен мұнай өндірудің жыл сайынғы көрсеткіштері 100 млн.тоннадан астам көлемде күтілуде", деп мәлім етті министр.
Теңізшевройл мұнай өндірудің жылына 12 млн.тоннаға өсуін қамтамасыз ететін Болашақ кеңейту жобасын іске асыруда.
Қарашығанақта 5-ші компрессор бойынша жұмыстар аяқталды, шикі газды кері айдаудың 6-шы компрессорын енгізу бойынша жұмыстар жүргізілуде, бұл өндіру сөресін жылына 11-12 млн.тонна деңгейінде ұстауды қамтамасыз етеді.
Сонымен қатар кен орнында қуаттылығы 4 млрд.м3 газды құрайтын газ өңдеу зауытын (бұдан әрі - ГӨЗ) салу жобасы іске асырылуда. Аяқталу мерзімі - 2028 жылдың соңы.
Қашағанда қуаттылығы жылына 1 млрд. м3 ГӨЗ құрылысы жүргізілуде, ол 2026 жылдан бастап мұнай өндіруді 1 млн.тоннаға ұлғайтуды көздейді.
Бұдан басқа, 2029 жылы қуаттылығы жылына 2,5 млрд.м3 ГӨЗ салу есебінен мұнай өндіру деңгейінің 2 млн.тоннаға өсуін қамтамасыз ету көзделіп отыр.
Жалпы алғанда, үш ірі жобада мұнай өндіру республика бойынша барлық мұнай өндірудің 70%-ды құрайтын болады, оған шамамен $17 млрд инвестицияланады.
Сонымен қатар, жер қойнауының перспективалы учаскелері бойынша геологиялық барлауға 2030 жылға дейін $5 млрд инвестиция салынады, бұл 2040 жылға қарай 11 млн.тонна мұнай өндіруді қамтамасыз етеді.
Жалпы алғанда, мұнай өндіруге салынған инвестициялар 2030 жылға қарай ірі кен орындарында шамамен $21 млрд құрайды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
Қазақстан еурооблигациялар шығару арқылы $2,5 млрд қарыз алды
Қазақстан еурооблигациялар шығару арқылы $2,5 млрд қарыз алды, деп хабарлайды Қазақстан Республикасы Қаржы министрлігінің баспасөз қызметінен.
Ағымдағы жылғы 24 маусымда Қазақстан Республикасы халықаралық капитал нарығына 2,5 млрд. АҚШ долларындағы егеменді еурооблигацияларды орналастырды, оның ішінде:
- 7 жыл мерзімге 1,35 млрд АҚШ доллары сомасындағы транш, купондық мөлшерлемесі - 5%;
- 12 жыл мерзімге 1,15 млрд АҚШ доллары сомасындағы транш, купондық мөлшерлемесі - 5,5%.
Ұсыныстың алдында Қазақстан Республикасы Қаржы министрлігі Лондонда роудшоу өткізіп, оған шамамен 180 ірі инвестор қатысты. Еурооблигацияларға деген сұраныс ұсыныстан екі есе асып түсті, бұл Еуропа, АҚШ, Азия және Таяу Шығыс елдерінен келген әртараптандырылған әрі сапалы инвесторлардың жоғары қызығушылығын көрсетті.
Мұнай бағасының күрт төмендеуі, геосаяси тұрақсыздық және базалық мөлшерлемелердің құбылмалылығы сияқты күрделі нарықтық жағдайларға қарамастан, Қаржы министрлігі өте бәсекеге қабілетті табыстылықпен орналастыруға қол жеткізді. Алынған кірістілік деңгейі несиелік рейтингі жоғары (A/AA) Польша, Сауд Арабиясы және Чили сияқты елдердің көрсеткіштерімен салыстыруға келеді және BBB рейтингіндегі Мексика, Венгрия мен Перу сияқты елдерден айтарлықтай төмен болды.
Атап айтқанда, Қазақстан биылғы жылы A/BBB рейтингіндегі елдер арасында ең төменгі мөлшерлемелердің бірімен облигацияларды орналастыру бойынша рекорд орнатты.
Мұндай тиімді табыстылық деңгейлеріне елдің мықты макроэкономикалық көрсеткіштері - тұрақты экономикалық өсім, төмен мемлекеттік қарыз және жоғары сыртқы резервтер арқасында қол жеткізілді.
Мемлекет басшысының бастамасымен жүргізіліп жатқан салық-бюджет саласындағы реформалар мен саяси өзгерістер халықаралық инвесторлардың Қазақстанға деген сенімін едәуір арттырды.
Бұл орналастыру болашақта ұлттық компаниялар мен жеке сектор эмитенттердің шығарылымы үшін бенчмарк белгілеуге мүмкіндік берді.
Еурооблигациялар Лондон қор биржасында, Астана халықаралық қаржы орталығының биржасында және Қазақстан қор биржасында листингке енгізіледі.
Орналастыру нәтижесінде Қаржы министрлігі бұрын шығарылған және бұрын тартылған еурооблигацияларды толық көлемде қайта қаржыландырды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Тоқаев: сарапшылар алдағы жылдары әлемдік ЖІӨ өсімінің шамамен 2,9%-ға дейін баяулауы мүмкін деп болжайды
Мемлекет басшысы Шетелдік инвесторлар кеңесінің 37-ші пленарлық отырысын өткізді, деп хабарлайды Ақорданың баспасөз қызметінен.
Қасым-Жомарт Тоқаев Шетелдік инвесторлар кеңесі мемлекет пен оның халықаралық серіктестері арасындағы стратегиялық ықпалдастықтың сенімді платформасы ретінде алдағы уақытта да қызмет көрсете беретінін атап өтті.
Аталған форум жиырма жылдан астам уақыт бойы Қазақстанда инвестицияға бағдарланған экожүйе қалыптастыруда маңызды рөл атқарып келеді. Біз Кеңестің белсенді қатысуымен елімізде инвестициялық ахуалды жақсартуға, ашықтықты арттыруға және кәсіпкерлік жүргізу шарттарын жеңілдетуге бағытталған кешенді реформаларды одан әрі жалғастыруға ниеттіміз", - деді Мемлекет басшысы.
Президенттің айтуынша, сарапшылар таяу жылдары жаһандық ІЖӨ өсімі шамамен 2,9 пайызға дейін баяулайтынын болжап отыр.
Бүгінде инфляциялық қысымның күшейгені, жаһандық жеткізу тізбегіндегі кедергілердің және іскерлік ортадағы бағдарсыздықтың артқаны байқалады. Мұндай үрдістер әлем экономикасының перспективасын нашарлата түсуі ықтимал. Бұл халықаралық сындарлы диалогтың қажет екенін көрсетеді. Қазақстан секілді елдердің экономикасы осындай сын-қатерлер кезінде сыртқы дағдарыстарға төтеп бере алды. Биылғы бес айда Қазақстан экономикасы 6 пайызға өсті. Оған көлік және логистика, құрылыс, сауда, тау-кен өнеркәсібі және өңдеу салалары көп үлес қосты", - деді Президент.
Қасым-Жомарт Тоқаевтың пікірінше, Қазақстанның стратегиялық тұрғыдан орналасуы, адами капиталы және реформаларды жан-жақты жүргізуі инвесторларға да, ұлттық экономикаға да мол мүмкіндік береді. Президент инвесторлардың мәселесін "осы жерде және дәл қазір" қағидаты бойынша жедел шешуге бағытталған Инвестициялық штаб қызметіне тоқталды. Аталған штаб 70 миллиард долларды құрайтын 137 инвестициялық жобаға қолдау көрсетті. Сондай-ақ заңнамаға инвесторлардың проблемасын жүйелі түрде шешуді көздейтін 140 түзету енгізуге бастамашы болды.
Инвесторлар құқығын қорғауға арналған арнайы "прокурорлық сүзгі" механизмі енгізілді. Биылдан бастап мемлекеттік органдар Бас прокуратураның алдын ала келісімінсіз инвесторларға қатысты тексеру жүргізуге, әкімшілік іс қозғауға, талап арыз беруге немесе қандай да бір шектеу қоюға құқылы емес.
Біз Ұлттық цифрлық инвестициялық платформаны іске қостық. Ол инвестицияларға қатысты мемлекеттік қызметтерді "бір терезе" қағидаты бойынша біріктіріп, кеңес беруден бастап рұқсат алуға дейінгі барлық үдерісті қамтиды. Бұдан бөлек, іскерлік белсенділікті ынталандыру және экономикаға жеке инвестиция тарту үшін жаңа Салық кодексі Сенат қарауына енгізілді. Құжат жергілікті өндірісті дамытатын инвесторларға мақсатты жеңілдіктер беруді және қосылған құны жоғары өнім экспорттаушыларды қолдауды қарастырады", - деді Президент.
Мемлекет басшысы инвесторлармен ықпалдастықтың перспективалы бағыттарына, атап айтқанда, Қазақстанның индустриялық әлеуетін дамыту мәселесіне тоқталды.
Тау-кен саласы - еліміздің өңдеу өнеркәсібінің негізгі тірегі болып қала береді. Қазақстан тау-кен өнеркәсібі мен металлургияның жаһандық маңызын түсіне отырып, инвесторларға ашық, жан-жақты заңнама арқылы тұрақты әрі қолайлы юрисдикция қалыптастырды. Жүргізіліп жатқан реформалардың нәтижесінде еліміздегі геологиялық барлау жұмыстарына әлемдік ірі ойыншылар - Rio Tinto, Fortescue, Ivanhoe, First Quantum және Tech Resources компаниялары келді. Жаңа Салық кодексінде шикізатты ел ішінде терең өңдеуді ынталандыратын роялти тәртібі қарастырылады. Еліміздің бай минералды-шикізаттық базасы, жер қойнауын пайдаланудағы заманауи заңнамасы мен ашық салық жүйесі жаһандық тізбектегі маңызды минералдарды жеткізу бойынша стратегиялық орнымызды қамтамасыз ететініне сенімдіміз", - деді Президент.
Қасым-Жомарт Тоқаев Қазақстанның шикізатты терең өңдеу және жаңа буындағы өнеркәсіптік өндіріс құру жолында батыл қадам жасағанына назар аударды. Мемлекет басшысы Қазақстан теміржол саласына арналған машина жасау бойынша Wabtec, Alstom және Stadler компанияларымен табысты ынтымақтастық орнатқанын жеткізді. Атап айтқанда, Alstom компаниясы елімізде сервистік орталықтар салып, 2028 жылдан бастап локомотивтердің жаңа буынын шығаруды жоспарлап отыр. Wabtec компаниясы балама отынмен жүретін жылжымалы құрамға 200 миллион доллар инвестиция құйды. Ал Stadler Rail кәсіпорны өндірістік қуаты жылына 100 вагон шығаратын зауыт салды.
Қасым-Жомарт Тоқаев Қазақстанның агроөнеркәсіп кешенінің жоғары әлеуетіне тоқталды. Еліміз егістікке және жайылымға жарамды жер көлемі жағынан әлемде алтыншы орынды иеленеді, сондай-ақ астық экспорты бойынша жетекші он мемлекеттің қатарына кіреді. Мемлекет басшысы PepsiCo, Fufeng Group және Dalian Hesheng сияқты шетелдік инвесторлардың табысты қызметін мысалға келтіріп, олардың жергілікті өнімге тұрақты сұраныс қалыптастырып, озық технологияларды енгізіп жатқанын айтты.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Шығыс Қазақстан мен Тверь облысы ПХЭФ-2025 меморандумына қол қойды
Шығыс Қазақстан облысының әкімі Нұрымбет Сақтағанов бастаған ШҚО делегациясы XXVIII Петербург халықаралық экономикалық форумы аясында Ресей Федерациясының Тверь облысының бизнес-құрылымдарының өкілдерімен бірқатар кездесулер өткізді, деп хабарлайды Шығыс Қазақстан облысының әкімдігінің баспасөз қызметінен.
Келіссөздерге Тверь облысы тарапынан "Завидово Форест" ЖШҚ, "Парма" ЖШҚ, "ЭКИПЦЕНТР" ЖШҚ сынды кәсіпорындар қатысты.
Шығыс Қазақстан облысы делегациясының құрамында облыстық туризм басқармасының басшысы Ержан Сембинов, цифрландыру және архивтер басқармасының басшысы Қайрат Бимагамбетов, сондай-ақ Күршім ауданының әкімі Мейіржан Әлбеков болды.
Сапар барысында делегация "Экспофорум" конгресс-көрме орталығында да болды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстанда өнеркәсіп өндірісінің көлемі 6,4 пайызға өсті
2025 жылдың алғашқы 5 айының қорытындысы бойынша өнеркәсіп өндірісінің көлемі 6,4%-ға өсті, тау-кен өнеркәсібінде 7,8%-ға және өңдеу өнеркәсібінде 6%-ға артты, деп хабарлайды Қазақстан Республикасы Өнеркәсіп және құрылыс министрлігінің баспасөз қызметінен.
2025 жылдың қаңтар-мамыр айларында өңдеу өнеркәсібінің негізгі салаларында оң динамика байқалады: қара металургияда (+3,4%), машина жасауда (+10,5%), тамақ өнімдерін шығаруда (+10,5%), мұнай өңдеуде (+11,3%), химия өнеркәсібінде (+9,9%), құрылыс материалдарын өндіруде (+10,3%), резеңке және пластмасса бұйымдарында (+4,8%), дайын металл бұйымдарында, машиналар мен жабдықтардан басқа (+17,5%), жеңіл өнеркәсіпте (+2,7%) және жиһаз өндірісінде (+6,8%).
Машина жасау саласы 10,5% деңгейінде өсім көрсетуде, оның ішінде басқа көлік құралдарын шығару (+6,9%), ауыл шаруашылығы техникасы (+2,1%), электр жабдықтары (+28,8%), компьютерлерді, электрондық және оптикалық жабдықтарды шығару (1,8 есе), машиналарды жөндеу және орнату (+18,8%) салаларының өсуі байқалады. Ауыл және орман шаруашылығы тракторларының өндірісі (+53%), астық оратын комбайндар (+129,7%), жатқыштар (+66,7%), мұнай-газ жабдықтары (+30,6%), жеңіл автокөліктер (+1,4%), автобустар (+3,8%), арнайы техника (+65,1%), локомотивтер (+3,4%), жүк вагондары (+242,6%) өндірісі артты.
Қара металлургияда 5 ай ішінде өндіріс көлемі 3,4%-ға өсіп, ферроқоспалардың өндірісі (+3,8%), шойын (+12,8%), болат (+5,9%) және жазық прокат (+11,9%) өсті.
Жеңіл өнеркәсіпте өндіріс көлемі 2,7%-ға өсіп, киім өндірісі (+7%) артса, тоқыма бұйымдары (-2,7%) төмендеді. Теріден және оған қатысты өнімдер өндірісінде (-13,4%) қысқарту байқалды.
Химия өнеркәсібінде өндіріс көлемі 9,9%-ға өсіп, полипропилен өндірісі (+65,8%), металлургиялық хром оксиді (+4%), аммофос (+92,2%), күкірт қышқылы (+3,5,2%) және жуғыш заттар (+6,2%) өндірісі артты.
Құрылыс материалдарын өндіру 10,3%-ға өсті, бұл отқа төзімді өнімдер (+1,2%), цемент (+13,2%), сілті (+8,1%), құрылысқа арналған бетон бұйымдары (+17,8%), бетон конструкциялары, дайын бетон, құрылыс ерітінділері (+15%), ескерткіштер, безендіру және құрылысқа арналған өңделген тас (+30,8%) және цемент, бетон немесе жасанды тас плиткалары, кірпіштер және ұқсас өнімдер (+12,3%) өндірісінің өсуімен байланысты.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.