ИИДМ ағымдағы жылы көмір бағасы туралы айтты
Министрдің айтуынша, биыл разрездер бағаны былтырғы деңгейде ұстап тұр.
Мысалы Шұбаркөл разрезі былтырғы бағаны төмендетті. Былтыр 6 264 теңге болса, биыл 6 160 теңгеден сатып жатыр. Қалғандары тұрақты былтырғы бағамен ұстап тұр. Қазақстан темір жолымен де келістік. Олар да тарифті өсірмейтін болды. Ең төмен баға Солтүстік Қазақстан облысында бір тоннасына 14,5 мың теңге болса, Батыс Қазақстанда 21 600 теңгеге дейін жеткен. Ақмола облысында Атбасарда "Қаражыра" көмірі 14,5 мың теңге, "Шұбаркөл" көмірі 15 мың теңге, Степногорскте "Шұбаркөл" көмірі 22 мың теңге, ал ең шалғай ауылда 25 мың теңгеге дейін барады", - деді Өскенбаев Үкімет отырысында.
Айтуынша, қазір ауылдарға көмірді қолжетімді бағамен жеткізу үшін әкімдіктермен және жүк тасу компанияларымен жұмыс жүргізіліп жатыр. 2022-2023 жылдарға коммуналдық-тұрмыстық қажеттілік пен халық үшін көмірдің қажеттілік жоспары әзірленді.
Осы жоспарға сәйкес тұтыну көлемі шамамен 9,6 млн тоннаны құрайды. Оның ішінде коммуналдық-тұрмыстық секторға – 2,6 млн тонна, тұрғындарға – 7 млн тонна. 3 қыркүйектегі жағдай бойынша, қажеттіліктің жылдық жоспарына қатысты (2022 жылғы 1 мамырдан 2023 жылғы сәуірге дейін) коммуналдық-тұрмыстық сектор – 49,9%, тұрғындар – 30,9% көмір қорымен қамтамасыз етілді.
Разрездерде көмір толық мөлшерде бар, көмірді өндіру жоспарлы түрде жүргізіліп жатыр, разрездердегі көмірдің бағасы өткен жылғы деңгейде қалуда", - деді Өскенбаев.
Бұған дейін Смайылов көмірмен дүрлікпе жағдайына жол бермеуді тапсырған болатын.
Ақпарат көзі: sputnik.kz
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
Алматыда халықаралық логистикалық хаб ашылды
Алматыда ZHETYSU заманауи контейнерлік терминалы ашылды. Ауқымды инфрақұрылымдық жоба "ҚТЖ" ҰК" АҚ еншілес компаниясы - "Кедентранссервис" АҚ мен Xi’an Free Trade Port Construction and Operation қытайлық компаниясы арасындағы халықаралық әріптестік нәтижесінде жүзеге асты, деп хабарлайды Rail-news.kz.
Негізгі көлік магистральдарының қиылысу нүктесінде бола отырып, жобалық қуаты жылына 115 000 ЖФБ болатын терминал жүк ағындарын шоғырландырудың стратегиялық орталығына және Қазақстанның ең ірі импорттық хабына айналады. Терминал көлік байланысын күшейтеді және логистикалық шығындарды азайтады.
Ашылу күні терминалға Сиандағы (ҚХР) Қазақстан-Қытай жүк терминалынан жөнелтілген алғашқы контейнерлік пойыз келді.
Іс-шараға "Самұрық-Қазына" АҚ Басқарма Төрағасы Нұрлан Жақыпов, Алматы қаласының әкімі Дархан Сатыбалды, Шэньси провинциясы (ҚХР) партия комитеті хатшысының орынбасары, Шэньси провинциясының губернаторы Чжао Ган және басқалар қатысты.
Қазақстан Орталық Азия мен Каспий өңірінің толыққанды көліктік-логистикалық хабына айналуға ұмтылуда. Біз Қорғас пен Сиандағы Құрғақ порттар, Ляньюнгандағы халықаралық логистикалық хаб, Құрық және Ақтау теңіз порттары сияқты ауқымды инфрақұрылымдық жобаларды іске асыра, осы бағытта сенімді түрде жүре отырып, халықаралық дәліздер бойында логистиканы дамытып жатырмыз. Алматыда жаңа терминалдың ашылуы - стратегияның бір бөлігі", - деп атап өтті "Самұрық-Қазына" АҚ Басқарма Төрағасы Нұрлан Жақыпов.
Бұл терминалдың ашылуы - екі елдің "Бір белдеу және бір жол" аясындағы ынтымақтастығының символдық жобасы ғана емес, сонымен қатар экономикалық интеграцияның негізгі драйвері. Бұл Қытай, Қазақстан және Еуразия арасындағы экономикалық өзара іс - қимылдың тұрақты өсуін қамтамасыз ететін халықаралық логистикалық хаб", - деп атап өтті Xi'an Free Trade Port Construction and Operation Co., Ltd. бас директоры Юань Сяоцзюнь.
Терминал аумағында салтанатты ашылу аясында стратегиялық ынтымақтастық пен экологиялық жауапкершілікті нығайтудың белгісі ретінде екі ел өкілдері ағаш отырғызды.
Анықтама: Терминалдың жалпы ауданы 9,8 га. Контейнер алаңы 9200 м2 құрайды және 1 101 TEU дейін бір реттік сақтауға арналған. Қойма үй - жайларының ауданы 23 400 м2-ге жетеді, коммерциялық автокөліктерге арналған тұрақ аймағы-8 900 м2.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Болгария екі теңіз портын Транскаспий халықаралық көлік дәлізіне қосылуға ниетті
Болгария екі теңіз портын Транскаспий халықаралық көлік дәлізіне қосылуға ниетті, деп хабарлайды Ақорданың баспасөз қызметінен.
Мемлекет басшысы бүгінгі келіссөз мазмұнды болғанына, нақты уағдаластықтарға қол жеткізілгеніне мән берді.
Атап айтқанда, сауда-экономика және инвестиция саласындағы байланыстың ауқымын кеңейтуге баса назар аудардық. Екі ел арасындағы алыс-беріс өсіп жатыр, бұл - жақсы үдеріс. Елімізде 60-қа жуық болгар компаниясы бар. Олар түрлі салада табысты жұмыс істеп жатыр. Дегенмен елдеріміздің экономикалық әлеуеті бұдан әлдеқайда жоғары. Сондықтан бұл көрсеткішті ұлғайта түсуге мол мүмкіндік бар. Біз өзара сауда-саттық көлемін арттыра түсуге келістік. Қос мемлекеттің мүддесіне сай келетін жаңа инвестициялық жобаларды пысықтауға уағдаластық. Әсіресе, мұнай-газ, жаңартылатын энергия, "жасыл" энергетика, атом өнеркәсібі, цифрландыру, инновация, жасанды интеллект, ғарыш саласы, ауыл шаруашылығы, денсаулық сақтау, мәдени-гуманитарлық байланыстар және туризм сияқты салаларда бірлескен жобаларды жүзеге асыру маңызды екенін атап өттік", - деді Президент.
Сондай-ақ көлік-логистика секторындағы байланысты дамыту мәселесіне назар аударылды.
Тараптар бүгінде стратегиялық сауда жолының біріне айналған Транскаспий халықаралық көлік дәлізі жобасына Болгарияның "Бургас" және "Варна" теңіз порттарын қосу мәселесін қарастыруға келісті.
Мемлекет басшысы бұл жұмысқа екі елдің Экономикалық ынтымақтастық жөніндегі үкіметаралық комиссиясы баса мән беру қажет деп санайды. Президент Комиссия аясында Көлік-логистика саласындағы ынтымақтастық жөніндегі бірлескен жұмыс тобын құруды ұсынды.
Бұдан бөлек, Болгарияның ғарыштық зерттеулер мен технологиялар, қорғаныс өнеркәсібі саласындағы озық тәжірибесін зерделеп, бірлесе жұмыс істеуге дайын екенімізді жеткіздім. Елімізге Президент Румен Радевпен бірге Болгарияның ірі кәсіпкерлері келді. Бүгін бизнес форум өтеді, бірқатар коммерциялық құжатқа қол қойылады. Бизнес-форумға біз, екі ел басшылары да қатысатын болдық. Бұл екіжақты ынтымақтастыққа айрықша мән берілетінін аңғартады. Біз елімізде жұмыс істегісі келетін Болгария компанияларына қолайлы жағдай жасауға дайынбыз. Мен іскер топтардың ықпалдастығын нығайту үшін "Қазақстан - Болгария" іскерлік кеңесін құруды ұсындым", - деді Қасым-Жомарт Тоқаев.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстан мен Қытай дәнді және майлы дақылдарды жеткізу көлемін 200 мың тоннаға дейін ұлғайтпақ
Қазақстан мен Қытай ауыл шаруашылығы саласындағы сауда-логистикалық ынтымақтастықты нығайтуда, деп хабарлайды Ауыл шаруашылығы министрлігінің баспасөз қызметінен.
Азық-түлік келісімшарт корпорациясы мен Қытайдың "Сиань Ай Цзюй" өнеркәсіптік тобы Қазақстанның ауыл шаруашылығы өнімдерін Қытай нарығына өңдеу және экспорттау саласындағы ынтымақтастықты кеңейту жөнінде меморандумға қол қойды. Сәуір айында Ұлттық оператор Қытай тобына тиесілі Солтүстік Қазақстан облысындағы зауытқа 10 мың тонна көлемінде сынақ партиясын жөнелтті. Ендігі жерде тараптар ұзақмерзімді серіктестікті дамытып, дәнді және майлы дақылдар жеткізу көлемін 200 мың тоннаға дейін ұлғайтуды көздеп отыр.
Келісім аясында Солтүстік Қазақстан облысында Қытай нарығына бағытталған қазақстандық астықтан тағамдық және мал азығына арналған ұн, өсімдік майы және басқа да өнімдерді өндіру көзделген. Қазақстандық азық-түлік өнімдері бүгінде Сиань қаласының супермаркеттерінде кеңінен ұсынылып, жергілікті тұрғындар арасында сұранысқа ие.
Астық өңдеу кәсіпорындарына тұрақты жеткізілімді қамтамасыз ету үшін ұлттық астық операторы бұл жобаға қазақстандық ауыл шаруашылығы өндірушілерін тарту мүмкіндігін қарастырып жатыр.
Бұған қоса, Сиань қаласында Азық-түлік келісімшарт корпорациясы мен халықаралық Чаньба құрғақ портының операторы арасында тағы бір меморандумға қол қойылды. Бұл логистикалық хаб Азия мен Еуропаның 45 еліне теміржол арқылы жеткізуді қамтамасыз етеді. Қытай тарапы қазақстандық компаниялардың қатысуымен контейнерлік және мультимодальды тасымалдарды кеңейтуге қызығушылық танытты.
Жеткен келісімдер қазақстандық өнімдерді шетел нарықтарына, соның ішінде Оңтүстік-Шығыс Азияға ілгерілету үшін жаңа мүмкіндіктер ашады. Бұл Мемлекет басшысының тапсырмалары мен ҚР Ауыл шаруашылығы министрлігінің өңдеуді дамыту, экспорт географиясын кеңейту және агроөнеркәсіптік кешен өнімдерінің қосылған құнын арттыру жөніндегі басымдықтарына сәйкес келеді.
Экспорттық жеткізілімдердің икемділігін қамтамасыз ету мақсатында Азық-түлік келісімшарт корпорациясы балама бағыттарды да пысықтап жатыр. Жақында өткен "Қытай - Еуропа" теміржол тасымалдары жөніндегі халықаралық конференция аясында қазақстандық астықты Баку порты арқылы Қара теңіз бен Түркия бағытында транзиттеу перспективалары талқыланды. Сонымен қатар, өнімді ауыстырып тиеу үшін Бакиндегі астық терминалы инфрақұрылымын пайдалану мүмкіндігі қарастырылуда.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстан Бахрейнге әуе қатынасы ашты
Бахрейнге әуе қатынасы ашылуда, деп хабарлайды Көлік министрлігінің баспасөз қызметінен.
Көлік министрлігі ұшулар географиясын кеңейту және қолданыстағы бағыттар бойынша ұшулар санын арттыру бойынша тұрақты жұмыс жүргізуде.
Биылғы жылдың 5 маусымынан бастап "Fly Arystan" әуе компаниясы Алматы - Манама (Бахрейн) бағыты бойынша маусымдық рейстерді орындай бастайды. Рейстер аптасына бір рет орындалады.
Бахрейнге әуе қатынасының ашылуы екі ел арасындағы туризм, мәдени және сауда-экономикалық ынтымақтастықты одан әрі дамытуға ықпал етеді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Ұлттық Банк базалық мөлшерлемені 16,5 пайыз деңгейінде сақтап қалды
Қазақстан Республикасы Ұлттық Банкінің Ақша-кредит саясаты комитеті базалық мөлшерлемені +/- 1 п.т. дәлізімен жылдық 16,5% деңгейінде белгілеу туралы шешім қабылдады. Шешім қабылданғанда нақты деректер, жаңартылған болжамдарды талдау мен инфляция тәуекелдерінің балансын бағалау көрсеткіштері ескерілді, деп хабарлайды ҚР Ұлттық банкінің баспасөз қызметінен.
Мамыр айының қорытындысы бойынша жылдық инфляция 11,3%-ға жетті. Соңғы айларда бағаның өсуінне түрткі болған негізгі қозғаушы фактор - реттелетін тарифтер мен нарықтық қызметтердің айтарлықтай қымбаттауына байланысты сервистік инфляция болып отыр. Бағаның өсу қарқыны азық-түлік тауарлары бойынша да жеделдегені байқалды. Мамырда айлық инфляция тарихи динамикадан айтарлықтай асып, 0,9% болды. Базалық және маусымдық әсерлерден тазартылған инфляция көрсеткіштері бір жылға есептегенде тиісінше 10,1%-ды және 11,4%-ды құрады. Осының барлығы тұтынушылық сұраныстың қайта артуынан, өндіріс шығындарының өсуінен, сондай-ақ фискалдық ынталандырудың жалғасуынан бағаға қысым сақталып отырғанын көрсетеді. Мамырда халықтың инфляциялық күтулері сәуірдегі 12,2%-ға қарағанда 14,1%-ға дейін өсті. Бұл келешек инфляцияға қатысты құбылмалылық пен белгісіздік сақталып қалғанын көрсетеді.
Сыртқы сектор тарапынан да бағаға қысым күшейе түсті. Бұл Ресейдегі жоғары инфляцияның сақталуына, жоғары сұраныс пен валюталық ауытқулар аясында әлемдік азық-түлік бағасының өсе түсуіне, сондай-ақ сауда қақтығыстарының күшеюінен және шикізат тауарлары бағасының құбылмалылығынан туындаған жоғары белгісіздікке байланысты. Жаһандық баға орнықты түрде өсу үрдісінде қалды. Сауда-саттықтағы шиеленіс инфляциялық тәуекелдерді күшейтіп, өнеркәсіп пен қызмет көрсету секторында іскерлік белсенділікті тежей түсті. Осы жағдайларда нарық тарапынан саясатты одан әрі жұмсартуға қатысты күтулер болғанымен, орталық банктердің риторикасы әлі де ұстамды қалпын сақтап отыр.
Базалық сценарий аясында Brent маркалы мұнайдың бағасы болжамды кезеңнің соңына дейін орта есеппен барреліне 60 АҚШ долларына дейін төмендеу жағына қайта қаралды. Сценарий шарттары бағаның нақты динамикасын және мұнай нарығындағы ұсыныстың сұраныстан асып кету ықтималын ескере отырып түзетілді.
2025 және 2026 жылдарға арналған инфляцияға қатысты болжам қайта қаралды. 2025 жылы инфляция - 10,5-12,5%, 2026 жылы - 9,5-11,5% шегінде болады деп күтіледі. 2027 жылдың қорытындысы бойынша инфляция деңгейі 5,5-7,5%-ға дейін төмендейді. Бұл тежеуші сипаттағы ақша-кредит саясаты мен алдағы салық-бюджет консолидациясы аясында бюджеттік қолдау шараларының біртіндеп қысқаруы нәтижесі болмақ.
2025-2026 жылдар аралығында инфляция болжамын көтеру жағына қайта қарау азық-түлік бағасының өсуіне, сұраныс салдарынан жоғары инфляциялық қысымның орын алуына және мұнай бағасының төмендеуіне негізделеді. Ішкі сұраныстың күшеюі, сыртқы инфляцияның жеделдеуі және инфляциялық күтулердің тұрақсыздығы болжамның негізгі тәуекелдері болып қалуда.
Ұстамды қатаң ақша-кредит саясаты мен фискалдық қатаңдатудың жоспарлы шаралары инфляцияны тежеуге ықпал етеді. Бұл ретте ЖЖМ бағасының нақты өсу қарқынына, фискалдық тәртіптің күшеюіне (Ұлттық қордан қаражат алуды төмендету жөніндегі жоспарларды іске асыруды қоса алғанда), сондай-ақ реттелетін бағалар мен ҚҚС мөлшерлемелерінің көтерілуінен болатын жанама әсерге байланысты белгісіздік сақталып отыр.
2025 жылы Қазақстан экономикасының өсу болжамы ішкі сұраныстың күшеюіне және инвестициялық белсенділіктің өсуіне байланысты 5-6%-ға дейін көтерілді. 2026 жылға арналған болжам 4-5% деңгейінде жаңартылды. Бұл 2025 жылғы біршама өсуді және мұнай бағасының алдыңғы болжаммен салыстырғанда төмендеу сценариі аясында экспорт өсімінің баяулауын ескереді. 2026 жылы экономикалық өсім ішкі сұраныс пен мұнай өндіру көлемінің артуы есебінен сақталады. Кейін өсім Үкімет жоспарлаған құрылымдық реформалардың сәтті жүзеге асуына байланысты болады. Олардың қатарында негізгі капиталға салынатын инвестиция көлемін ұлғайту, тікелей шетелдік инвестицияларды тарту және экономиканы либерализациялау шаралары бар.
Қалыптасқан жоғары инфляция бұрын болжанған уақыттан да ұзақ уақыт бойы ұстамды қатаң ақша-кредит шарттарын сақтауды талап етеді. Тәуекелдер балансы проинфляциялық жаққа ауысқан. Бұл базалық мөлшерлемені 2025 жылдың соңына дейін қазіргі деңгейде сақталу ықтималдығын арттырады. Қалыптасқан жағдайды сақтау инфляциялық күтулерді тұрақтандыруға, баға өсімінің үдеуіне жол бермеуге және инфляцияны 5%-дық ортамерзімді мақсатқа жету жолында орнықты траекторияға қайтаруға бағытталған. Ұлттық Банк қажет болған жағдайда базалық мөлшерлемені көтеруі де мүмкін.
Ұлттық Банк коммуникациялық саясатты кеңейту аясында ағымдағы болжамды раундтан бастап базалық мөлшерлеме бойынша шешімдерді талқылау қорытындыларының қысқаша мазмұнын жариялай бастайды. Бұл шара әлемдік тәжірибеге сай келеді және ақша-кредит саясатының ашықтығы мен болжамдылығын арттыруға бағытталған.
Қабылданған шешімге түрткі болған факторлар мен болжамдар туралы мейілінше толық ақпарат 2025 жылғы 11 маусымда Ұлттық Банктің ресми интернет-ресурсында[1] орналастырылатын Ақша-кредит саясаты туралы баяндамада ұсынылады. Қазақстан Республикасы Ұлттық Банкінің Ақша-кредит саясаты комитетінің базалық мөлшерлеме бойынша кезекті жоспарлы шешімі 2025 жылғы 11 шілдеде Астана қаласының уақытымен сағат 12:00-де жарияланады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.