S&P ҚДБ рейтингін "BBB-/A-3" тәуелсіз деңгейіне дейін көтерді, болжам – "Тұрақты"
Сонымен қатар, ұлттық шкала бойынша Банктің рейтингі "kzAAA" деңгейіне дейін көтерілді.
НҰР-СҰЛТАН. 9 ҚЫРКҮЙЕК - S&P Global Ratings халықаралық рейтингтік агенттігі Қазақстанның Даму Банкінің шетелдік және ұлттық валютадағы міндеттемелері бойынша ұзақ мерзімді және қысқа мерзімді кредиттік рейтингтерін "BBB-/A-3" тәуелсіз деңгейіне дейін көтерді, болжам – "Тұрақты", деп хабарлайды KAZAKHSTAN TODAY Қазақстанның Даму Банкінің баспасөз қызметіне сілтеме жасап.
Сонымен қатар, ұлттық шкала бойынша Банктің рейтингі "kzAAA" деңгейіне дейін және оның басым қамтамасыз етілмеген облигацияларының рейтингі "BBB-" дейін көтерілді, - деп хабарлады ҚДБ.
Рейтингтің өзгеруі мемлекетпен байланысты ұйымдардың (МБҰ) сыртқы борыш деңгейін мониторингтеу үшін арнайы комиссия құруды қоса алғанда, МБҰ-ның борыштық міндеттемелері бойынша алдағы төлемдерін үкіметтің мониторингтеу үдерісінде соңғы төрт жылда болған жақсартулармен байланысты.
Агенттіктің деректеріне сәйкес, Банктің міндеттері басым энергетикалық емес секторларға инвестициялар арқылы Қазақстан экономикасының дамуына ықпал ету болып табылады, бұл "Бәйтерек" тобының жалпы стратегиясымен тығыз байланысты.
S&P Global Ratings агенттігінің талдаушылары ҚДБ пайда алуға емес, мемлекеттік саясат міндеттерін орындауға бағдарланғанына қарамастан, Банк операциялық шығыстарды және тартылатын қаржыландыру құнын жабу үшін жеткілікті пайданы қамтамасыз етуге тырысатынын атап көрсетеді. Осылайша, соңғы 5 жыл ішінде Банктің қызметі тиімді болды, меншікті капиталдың рентабельділік коэффициенті (return on equity) орта есеппен 2,3% құрады.
Кредиттік рейтингті егеменді деңгейге дейін көтеру – бұл Банктің қаржылық тұрақтылығын растаудың бір түрі, бүгінде ҚДБ-ның елдің тұрақты және қалыптасқан қаржылық даму институты болып саналуының айқын көрсеткіші. Біздің халықаралық инвесторларымыз бен серіктестеріміз бізге сенеді, бұл Банкке сұраныс жыл сайын өсіп келе жатқан еурооблигацияларды сәтті орналастыруға мүмкіндік береді", - деп атап өтті Басқарма төрағасының қаржыны басқару мәселелері жөніндегі орынбасары Дмитрий Бабичев.
Естеріңізге сала кетейік, Даму Банкі 2017 жылғы желтоқсанда, 2018 жылғы сәуірде, 2020 жылғы ақпанда және 2021 жылғы мамырда теңгелей еурооблигациялармен төрт рет табысты шыққан жалғыз қазақстандық эмитент. Бұл шетелдік инвесторлардың Қазақстанға және оның даму институттарына деген жоғары сенімін айғақтайды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
Қазақстан мен Ауғанстан арасындағы тауар айналымы 545,2 млн $ құрады
Олжас Бектенов Ауғанстанның сауда және өнеркәсіп министрінің міндетін атқарушы Нуриддин Азизимен сауда-экономикалық ынтымақтастықты нығайту мәселелерін талқылады, деп хабарлайды Үкіметтің баспасөз қызметінен.
Қазақстан Республикасының Премьер-министрі Олжас Бектенов Астана халықаралық форумына қатысу үшін келген Ауғанстан сауда және өнеркәсіп министрінің міндетін атқарушы Нуриддин Азизимен кездесу өткізді. Онда сауда-экономикалық ынтымақтастықты нығайту мәселелері талқыланды. Көлік-логистика, геологиялық барлау, ауыл шаруашылығы, цифрландыру, денсаулық сақтау, білім беру және тағы басқа салалардағы өзара іс-қимылды кеңейтуге назар аударылды.
Отандық тауарлар экспортын әртараптандыруға баса назар аудара отырып, сауда-экономикалық ынтымақтастықты жандандыру жөніндегі шаралар қаралды. Қазақстан Ауғанстанның негізгі сауда серіктестерінің ондығына кіреді. Өткен жылы тауар айналымы $545,2 млн-ды құрады, оның ішінде қазақстандық өнімнің экспорты - $527,7 млн.
Тургунди-Герат трансауған темір жолын салу мәселелері талқыланды. Жобаны іске асыру өңір үшін стратегиялық маңызға ие. Ауғанстан Орталық және Оңтүстік Азия арасындағы көпір болып саналады және "Солтүстік-Оңтүстік" дәлізінің тиімділігін арттыруда маңызды рөл атқара алады. Ауғанстан аумағында қатты пайдалы қазбаларды геологиялық барлау, өндіру және өңдеу бойынша бірлескен жобаларды іске асыруға отандық компаниялардың қатысу жоспарлары қаралды.
Цифрландыру саласында қазақстандық тарап Ауғанстанда жаңа технологияларды енгізу бойынша консультациялар мен стратегияларды бірлесіп әзірлеуді жалғастыратын болады.
Қазақстан өңірдің орнықты дамуы үшін халықаралық қоғамдастықтың күш-жігерін шоғырландыруға ұмтылады. Бүгінде еліміз Ауғанстанның негізгі сауда серіктестерінің ондығына кіреді және Ауғанстандағы азық-түлік дағдарысын еңсеру бойынша халықаралық серіктестермен және ұйымдармен белсенді ынтымақтасады. Қазақстан Ауғанстан нарығына астық пен ұнның сенімді жеткізушісі болып қала береді. Астықтың басқа түрлерін, мал шаруашылығы өнімдерін, кондитерлік және ұн өнімдерін жеткізуді бастауға дайынбыз. Жалпы, біз тауарлар номенклатурасын кеңейтуге мүдделіміз. Сол үшін Гераттада "Қазақстанның сауда үйін" аштық және Кабулда да қазақстандық сауда үйін ашуға ниеттіміз", - деді Олжас Бектенов.
Нуриддин Азизи Ауғанстанның Қазақстанмен бірлескен жобаларды іске асыру саласындағы өзара іс-қимылды кеңейтуге мүдделілігін жеткізді. Кездесуге қатысушылар қазақстандық ауыл шаруашылығы техникасын Ауғанстан нарығына экспорттау перспективаларын ерекше атап өтті.
Қазақстан біз үшін сауда саласындағы маңызды әріптес болып саналады. Бұл бағытта біз бірлесіп іске асыруға болатын әлеуетті көріп отырмыз. Бізді IT саласындағы қазақстандық технологиялар, ауыл шаруашылығы саласындағы өндіріс қызықтырады. Сіздердің өнімдеріңіздің сапасы басқа елдермен салыстырғанда ең жоғары.Қазақстанда өндірілетін ауыл шаруашылығы техникасына да қызығушылық бар", - деп атап өтті Нуриддин Азизи.
Бұдан бөлек, жақында Алматыда ашылған БҰҰ Өңірлік орталығының Орталық Азия және Ауғанстан үшін орнықты даму мақсаттары жөніндегі қызметіне назар аударылды, ол өңірдің тұрақтылығын нығайтуға және қарқынды дамуына елеулі үлес қосады.
Кездесу қорытындысы бойынша тараптар барлық перспективалы бағыттар бойынша жан-жақты өзара тиімді ынтымақтастықты нығайту ниеттерін жеткізді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстанның қаладан мүше мемлекеттермен тауар айналымы $11,4 млрд-ты құрады
Қазақстан Республикасының Премьер-министрі Олжас Бектенов Қазақстанға Астана халықаралық форумына қатысу үшін келген Түркі мемлекеттері ұйымының Бас хатшысы Кубанычбек Өміралиевпен кездесу өткізді, деп хабарлайды Үкіметтің баспасөз қызметінен.
Онда жоғары деңгейде қол жеткізілген уағдаластықтарды жүзеге асыру мәселелері, сондай-ақ ТМҰ-ға мүше мемлекеттер арасындағы өзара ынтымақтастықты одан әрі кеңейту жолдары талқыланды. Қазіргі уақытта ұйым аясында өзара іс-қимылдың жаңа форматтары құрылып, әлеуметтік саясат, қоршаған ортаны қорғау, өнеркәсіп, ғылым, технология және инновация сияқты басқа да салалар бойынша жұмыс жүргізілуде.
Сауда-экономикалық ынтымақтастықты жандандыруға және өзара жеткізілімдер ауқымын кеңейтуге назар аударылды. 2024 жылы Қазақстанның ТМҰ-ға мүше мемлекеттермен тауар айналымы $11,4 млрд-ты құрады. Сонымен қатар қолда бар әлеует ағымдағы көрсеткіштерден едәуір кең екені атап өтілді. Осыған байланысты Қазақстан Республикасының Президенті Қасым-Жомарт Тоқаев сауда қатынастарын одан әрі дамытуға бағытталған жеке құжат әзірлеуге бастамашы болды.
Кездесу барысында гуманитарлық бастамалар да талқыланды. Ақтау түркі әлемінің мәдени астанасы болып жарияланды, осы жылдың маусым айынан бастап Алматы ТМҰ-ның жастар астанасы болады. Түркі мәдениеті мен тарихи мұрасын сақтауға және насихаттауға бағытталған іс-шаралар жоспарланған.
Кездесу қорытындысы бойынша тараптар тиімді ынтымақтастықты одан әрі дамытуға толық ықпал етуге дайын екендіктерін жеткізді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
ХВҚ Қазақстандағы инфляцияны 2025 жылы 10,5% деңгейінде болжайды
Қазақстанға арналған миссияның қорытындысы бойынша Халықаралық Валюта Қорының қорытынды мәлімдемесі жарияланды, деп хабарлайды ҚР Ұлттық банкінің баспасөз қызметінен.
15-23 мамыр аралығында Қазақстан Халықаралық валюта қорының (бұдан әрі - ХВҚ) миссиясын қабылдады. Сапар қорытындысы бойынша қорытынды мәлімдеме жарияланды, ол ағымдағы экономикалық жағдайға шолу, экономиканың даму перспективалары мен негізгі ұсынымдарды қамтиды.
Миссияның пікірінше, Қазақстанда қызмет көрсету, көлік, құрылыс, өңдеу және өндіру өнеркәсібі секторларындағы жоғары белсенділік аясында жоғары экономикалық өсу сақталып отыр. Сондай-ақ, мемлекеттік инфрақұрылымдық инвестициялардың өсуі мен цифрлық технологиялар, ЖИ, агроөнеркәсіптік кешен және логистика саласындағы инвестициялық жобалардың іске асырылуы байқалады.
Экономика үшін тәуекел тудыруы мүмкін факторлардың қатарында ірі инфрақұрылымдық жобаларды іске асырудағы кідірістерге байланысты өсудің ықтимал баяулауы, инфляциялық қысымның күшеюі және сауда протекционизмінің күшеюі аясында белгісіздік байқалады. Қосымша тәуекелдерге мұнай бағасының төмендеуі және Қазақстанның сауда әріптес елдерінде өсудің баяулауы жатады.
Бұдан бөлек, ХВҚ сарапшылары осы жылдың сәуір айында инфляцияның үдеуін атап өтті және оның 2025 жылы 10,5% деңгейінде сақталуын болжайды. ХВҚ инфляцияны Ұлттық Банктің нысаналы деңгейіне дейін төмендету мақсатында тежеуші ақша-кредит саясатының маңыздылығын атап өтті.
ХВҚ миссиясы макропруденциалдық саясатты қатаңдату жоспарларын оң бағалады, бұл тұтынушылық несиелеудің өсуі аясында қаржылық тұрақтылық үшін тәуекелдерді азайтуға ықпал етуі керек.
ХВҚ миссиясының IV бабы бойынша сапары осы жылдың қыркүйегінде өтеді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Сарапшылар инфляция мен базалық мөлшерлеме бойынша болжамдарын қайта қарады
Қазақстан Ұлттық Банкі сарапшылар қауымдастығы арасында жүргізілген кезекті макроэкономикалық сауалнаманың нәтижесін жариялады, деп хабарлайды агенттіктің баспасөз қызметінен.
Brent маркалы мұнайдың бағасы, ЖІӨ, инфляция, базалық мөлшерлеме, тауарлар мен қызметтердің экспорты және импорты, сондай-ақ теңге бағамы - сауалнаманың негізгі параметрі болды.
Мұнай бағасы мен экономикадағы өсім
Осы жылдың мамыр айында сауалнамаға қатысқандар мұнай бағасына қатысты сценарийлік шарттарды қайта қарады. 2025 жылға Brent маркалы мұнайдың медианалық бағасы 75,0-тен 69,3 АҚШ долларына дейін төмендеді. 2026 және 2027 жылдарға арналған күтулер тиісінше 66,0 және 66,2 АҚШ доллары деңгейінде тұрақтанды.
Қазақстан экономикасының 2025 жылға арналған өсу қарқыны бойынша болжамдары 4,7%-тен 5,0%-ке дейін жоғары қарай қайта қаралды. 2026 және 2027 жылдарға арналған күтулер өзгеріссіз қалды - тиісінше 4,5% және 4,3%.
Инфляция және базалық мөлшерлеме
Сауалнамаға қатысқандардың инфляциялық күтулері жоғарылау үрдісін жалғастыруда. 2025 жылға арналған болжам 10,6%-тен 10,7%-ке, 2026 жылға - 9,0%-тен 9,4%-ке, 2027 жылға - 6,1%-тен 6,8%-ке дейін көтерілді.
Инфляция бойынша болжамдардың өзгеруіне байланысты базалық мөлшерлемеге қатысты күтулер де қайта қаралды. 2025 жылдың соңына арналған медианалық болжам 15,9%-тен 16,3%-ке дейін, 2026 жылға - 14,3%-тен 14,5%-ке дейін, 2027 жылға - 11,5%-дан 12,0%-ға дейін көтерілді.
Сауалнамаға қатысқан респонденттердің құрамы туралы
Сауалнамаға Қазақстан бойынша макроэкономикалық көрсеткіштерді талдаумен және болжаумен айналысатын 14 ұйым қатысты. Респонденттердің арасында нарықтың кәсіби қатысушылары, зерттеу институттары, халықаралық ұйымдар, сондай-ақ рейтингтік агенттіктер бар.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстан мен Франция арасындағы тауар айналымы рекордтық көрсеткішке жетті
Премьер-министр Олжас Бектенов екі елдің бизнес-қоғамдастығының 300-ден астам өкілі қатысқан Қазақстан-Франция инвестициялық форумын ашты, деп хабарлайды Үкіметтің баспасөз қызметінен.
Форумның күн тәртібінде сауда-экономикалық қатынастарды, көлік, энергетика және өнеркәсіптік әлеуетті дамыту, азық-түлік қауіпсіздігі мен денсаулық сақтау саласындағы ынтымақтастық, қалаларды тұрақты дамыту және қалалық ортаның сапасын жақсарту, сондай-ақ ТКШ және туризм салаларын нығайту мен әртараптандыруға арналған кең ауқымды мәселелер тұр.
Өткен жылы екі ел арасындағы тауар айналымы 31%-ға артып, $5,5 млрд рекордтық көрсеткішке жетті, оның ішінде экспорт көлемі $3,6 млрд-ты құрады. Қазақстандағы француз инвестициясы $20 млрд-қа жақындады, елімізде француз капиталының қатысуымен 200-ден астам компания белсенді жұмыс істеп келеді.
Бүгінде Қазақстан Франция үшін жетекші серіктес саналады, Орталық Азия елдерімен барлық сауданың 80%-ға жуығы оның үлесіне тиесілі.
Форумды ашқан Премьер-министр Олжас Бектенов екі мемлекет басшылары деңгейіндегі сенімді қарым-қатынастар нәтижесінде екіжақты байланыс стратегиялық әріптестіктің кеңейтілген деңгейіне көтерілгенін атап өтті.
Франциямен ынтымақтастық - Қазақстанның сыртқы саясатындағы негізгі басымдықтардың бірі және Еуропалық Одақ шеңберіндегі серіктестігіміздің ажырамас бөлігі. Біздің елдеріміз берік саяси байланыстармен, белсенді үкіметаралық және парламенттік диалогпен, сондай-ақ қарқынды сауда және инвестициялық өзара іс-қимылмен ерекшеленетін берік әрі көпқырлы серіктестікке ие", - деп атап өтті Олжас Бектенов.
Премьер-министр Қазақстанның оңтүстігінде қуаты 1 ГВт болатын Тotal Energies компаниясымен жел электр стансасын салу, Alstom компаниясы ұсынған өндірісті оқшаулау және теміржол секторына жаңа инвестиция, Air Liquide компаниясының Павлодар МХЗ-дағы сутегі энергетикасы бойынша жобасы, Danone, Lactalis және Lidea және т. б. қатысуымен тамақ және сүт өнеркәсібін дамыту сияқты негізгі бірлескен жобаларға тоқталды.
Қазақстан Транскаспий халықаралық көлік бағытын дамытуға және ЖИ, фармацевтика, туризм және су ресурстарын басқару сияқты секторлардағы ынтымақтастыққа мүдделі.
Сондай-ақ Астана мен Алматыда француз мектептерінің ашылуы, Абай атындағы ҚазҰПУ-дағы Lumière орталығының және Лотарингия университеті филиалының жұмысын қоса алғанда, білім беру және ғылыми кооперациядағы ілгерілеушілік атап өтілді.
Олжас Бектенов Қазақстан шетелдік әріптестер үшін қолайлы инвестициялық ахуал жасауға толық ниетті екенін атап өтті. Қазіргі уақытта Қазақстан ұсынып отырған инвесторлар үшін мүмкіндіктерге, құқықтық кепілдіктер, салықтық жеңілдіктер, арнайы экономикалық аймақтарға және АХҚО-ға назар аударылуда.
Форум Қазақстан мен Франция президенттері арасындағы уағдаластықтарының іс жүзіндегі жалғасы болуға және іскерлік ынтымақтастықты кеңейтуге, жаңа инвестициялық жобаларды іске қосуға және екі елдің бизнесі арасындағы байланыстарды нығайтуға бағытталған.
Іс-шара қорытындысы бойынша энергетика, көлік, денсаулық сақтау және су ресурстары салаларындағы келісімдерді қоса алғанда, бірқатар құжатқа қол қою жоспарланған.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
ChatGPT Қазақстанда ҚҚС төлеуші болды
ChatGPT Қазақстанда ҚҚС төлеуші болды, деп хабарлайды Қазақстан Республикасы Қаржы министрлігінің Мемлекеттік кірістер комитетінің баспасөз қызметінен.
2022 жылдан бастап Қазақстанда цифрлық қызметтерге салық - "Google салығы" сәтті енгізілді. Бұл шара ел нарығында жұмыс істейтін трансұлттық ІТ-компанияларға әділ салық салу жолындағы маңызды қадам болды.
Жаһандық цифрлық платформалармен өзара іс-қимылды жетілдіру аясында 2025 жылғы мамырдан бастап OpenAI, L.L.C. компаниясы шартты түрде тіркелді. Бұл - жасанды интеллект саласындағы жетекші америкалық ұйым, кеңінен танымал ChatGPT интеллектуалдық жүйесінің әзірлеушісі.
ChatGPT - бұл жасанды интеллектіге негізделген чат-бот. GPT (Generative Pre-trained Transformer) тілдік моделі негізінде жұмыс істейді және келесідей мүмкіндіктерге ие:
сұрақтар мен өтініштерді түсіну;
мағыналы әрі қисынды жауаптар құрастыру;
аударма, хат жазу, кодтау, оқу және басқа да салаларда көмек көрсету.
ChatGPT-ті виртуалды көмекші, кеңесші, сұхбаттасушы немесе шығармашылық пен жұмысқа арналған құрал ретінде пайдалануға болады.
Енді Қазақстан аумағындағы жеке тұлғаларға қызмет көрсеткені үшін ChatGPT Қазақстан Республикасының салық заңнамасына сәйкес қосылған құн салығын төлейтін болады.
Комитет цифрлық секторда ашықтықты қамтамасыз ету, заңнаманы сақтау және тиімді салық салу бағытында жұмысын жалғастырады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстан сегіз жылдан кейін Вьетнамға астық жеткізуді қайта бастады
Азық-түлік келісімшарт корпорациясы көлемі 15 мың тонна қазақстандық жоғары сапалы бидайдың бірінші партиясын Вьетнамға жөнелтуді бастады, деп хабарлайды Қазақстан Республикасы Ауыл шаруашылығы министрлігінің баспасөз қызметінен.
Контейнерлік пойыз Ақмола облысының астық қабылдау кәсіпорындарынан жөнелтіледі. Жеткізу мультимодальды схема бойынша жүзеге асырылады: алдымен, астық теміржол бойынша Достық - Алашанькоу шекара өткелі арқылы Қытайдың Ляньюнган халықаралық теңіз портына жеткізіледі, содан кейін теңіз кемелеріне тиеліп, Вьетнамның Hai Pong портына жіберіледі.
Азық-түлік келісімшарт корпорациясы" ҰК" АҚ Басқарма төрағасы Асылхан Джувашев атап өткендей, астықты Вьетнамға жөнелту компания үшін тарихи маңызға ие. Оңтүстік-Шығыс Азия нарығына шығу экспорттық бағыттарды әртараптандыру және қазақстандық ауыл шаруашылығы өнімдерін халықаралық нарықтарға ілгерілету жөніндегі стратегияны іске асыруда маңызды кезең болады.
Соңғы бес жылда ұлттық оператор Қазақстан үшін басым нарықты бекіту мақсатында Қытайға жыл сайын 200 мың тоннаға жуық астық жеткізді. Биыл біз жеткізу географиясын кеңейту арқылы экспорт көлемін ұлғайтуды жоспарлап отырмыз. Қазірдің өзінде Марокко Корольдігіне 60 мың тонна азық-түлік бидайы жөнелтілді. Оңтүстік-Шығыс Азияға келетін болсақ, бұл нарық жоғары әлеуетке ие және қазақстандық ауыл шаруашылығы өнімдерін өндірушілер үшін перспективалы болып табылады", - деп атап өтті Асылхан Джувашев.
Естеріңізге сала кетейік, қазақстандық астықтың Вьетнамға соңғы жөнелтілуі 2017 жылы болды. Содан кейін жеткізу көлемі небәрі 720 тоннаны құрады.
Азық-түлік келісімшарт корпорациясы алыс шетел нарықтарындағы позицияларды нығайтуға бағытталған экспорттық саясатты қалыптастыруда. Назарда - Еуропалық одақ елдері, MENA аймағы (Таяу Шығыс және Солтүстік Африка), сондай-ақ Оңтүстік-Шығыс Азия.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.