Қазақстан азаматының цифрлық паспорты мобильді қосымшада қолжетімді болды
Қазіргі уақытта "ҚР азаматының паспорты" цифрлық құжатын Қазақстан Республикасының аумағында ғана пайдалануға рұқсат етіледі.
Астана. 10 қараша. KAZAKHSTAN TODAY - EGov Mobile мобильді қосымшасында жаңа цифрлық құжат – "ҚР азаматының паспорты" қолжетімді. Электрондық құжатты тек Қазақстан азаматтары ғана қолдана алады, деп хабарлайды "Ұлттық ақпараттық технологиялар" АҚ баспасөз қызметі.
Цифрлық паспортты eGov mobile қосымшасында жеке куәлікке ұқсас сәйкестендіру үшін пайдалануға болады. Қазіргі уақытта "ҚР азаматының паспорты" цифрлық құжатын Қазақстан Республикасының аумағында ғана пайдалануға рұқсат етіледі.
Цифрлық құжатта қате мәліметтер анықталған жағдайда "қате туралы хабарлау" батырмасын басу арқылы тиісті мемлекеттік органға e-Otinish арқылы өтініш беруге болады.
Жаңа құжатты цифрлық жеке куәлікпен тең дәрежеде пайдалануға рұқсат етіледі. Мәселен, егер сіз жеке куәлікті жоғалтып алсаңыз немесе жарамдылық мерзімі өтіп кетсе, цифрлық паспортты балама құжат ретінде пайдалануға болады",- деп атап өтті "Ұлттық ақпараттық технологиялар" АҚ Басқарма Төрағасы Ростислав Коняшкин.
Жаңа цифрлық құжатты табу үшін eGov Mobile қосымшасында авторазицияда өтіп, басты беттегі "Цифрлық құжаттар" бөліміндегі құжаттар тізімінен "ҚР азаматының паспортына" басу қажет.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
ҚазҰУ археологтары сақ дәуірінің алтын жүзігін тапты
Әл-Фараби атындағы ҚазҰУ-дың археологиялық экспедициясы сақ дәуіріне жататын алтын әшекейлерді тапты. Тарих факультетінің деканы, профессор Досбол Байғонақовтың жетекшілігімен Алматы облысының Ұйғыр ауданында қазба жұмыстары жүргізілді, деп хабарлайды Қазақстан Республикасы Ғылым және жоғары білім министрлігінің баспасөз қызметінен.
Тоғызбұлақ ауылының маңында ерте темір дәуіріне жататын қорғандар зерттелді. Мамандар ауылдың оңтүстік бөлігінде орналасқан және 20-дан астам қорғаннан тұратын Тоғызбұлақ-1 және Тоғызбұлақ-2 қорымдарында далалық зерттеулер жүргізді. Археологиялық нысандардың негізгі бөлігі тізбектеле орналасқан және солтүстіктен оңтүстікке бағытталған элиталық қорғандарға жатады. Тоғызбұлақ-2 қорымы ауылдың солтүстігінде орналасқан және жалпы саны 30-дан асатын түрлі қорғандардан тұрады.
Тарих ғылымының докторы, профессор Досбол Байғонақовтың айтуынша, Тоғызбұлақ-1 қорымындағы далалық зерттеулер барысында төрт қорған, ал Тоғызбұлақ-2 қорымында екі археологиялық нысан қазылды. Тоғызбұлақ-1 қорымындағы №3 және №4 қорғандардың үйіндісінен алтын әшекейлердің табылуы айтулы жаңалық болды. №4 қорғаннан ер мен әйелдің сүйектері табылды. Сүйек қалдықтарының жанынан керамикалық ыдыстар, темір заттар, тас келсап, жануарлар сүйектері, алтын тізбектің сынығы, әртүрлі алтын пластиналар және т.б. табылды.
№3 қорғанның үйіндісінен адамның сүйек қалдықтары, сондай-ақ алтын пластиналар табылды. Олардың арасында арыстанның суреті салынған алтын жүзік ерекшеленеді. Мұндай артефактілер сирек кездеседі. Салмағы 8 грамға жуық жүзік алтын құймасынан жасалған. Жүзіктегі арыстанның бейнесі синкретизммен тығыз байланысты. Бір қарағанда әйелдің жүзін, арыстанның тұмсығы мен жалын, тіпті бұқаны, қошқарды көруге болады, олардың таңбасы ежелгі тайпаларда кең тараған. Мамандардың айтуынша, мұндай жерлеу орындары мен артефактілер Қазақстан аумағында мекендеген сақ тайпаларына тән. Табылған қазбалар шамамен б.з.д. IV-III ғасырларға жатады.
Тоғызбұлақ-1 және Тоғызбұлақ-2 қорымдарынан табылған заттар ерте темір дәуірімен мерзімделеді және қазіргі Ұйғыр ауданының аумағы сақ мәдениеті орталықтарының бірі болғанын дәлелдейді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстанда алғаш рет студенттер арасында қолдан жасалған көліктер жарысы өтті
Жетісу облысының Жыланды ауылында инженерия, робототехника және болашақ технологиялары саласындағы ең жарқын жастар фестивальдерінің бірі "Zhýlandy Fest - 2025" өтті. Бұл шараға еліміздің түкпір-түкпірінен 200-ден астам дарынды оқушы мен студент қатысты, деп хабарлайды Қазақстан Республикасы Ғылым және жоғары білім министрлігінің баспасөз қызметінен.
Іс-шара үш бағытты қамтыды: Future Race - болашақтың экологиялық жарысы (Жыланды - Төңкеріс бағыты бойынша), Zhýlandy International First Championship халықаралық робототехника турнирі, Open Day университеттер жәрмеңкесі.
Көпшіліктің ерекше қызығушылығын тудырған "Future Race" байқауында мектеп оқушылары мен студенттер құрастырған 9 тәжірибелік электромобиль жарыс жолына шықты. Қатысушылар тек жылдамдық үшін ғана емес, тұрақты көлік пен жаңартылатын энергия көздерін пайдалану бойынша өз инженерлік шешімдерін көрсету үшін де бақ сынады. Жеңімпаздар көлік жылдамдығы мен жұмсалған энергия көлемі негізінде анықталды.
Future Race жеңімпаздарының қатарында 1-орынды Bulan командасы, Назарбаев Университеті жеңіп алса, 2-орын ALT Alash командасына тиесілі болды, 3-орынды Назарбаев Университетінің BBC командасы иеленді, 4-орын - Shalqar командасы, ҚБТУ, 5-орынға Zhel Zhylandy Engineering Legion командасы, Жыланды ауылындағы лицей-интернат ие болды.
Шара аясында өткен Open Day университеттер жәрмеңкесі аясында еліміздің алдыңғы қатарлы жоғары оқу орындары өздерінің білім беру бағдарламаларын ұсынды. Олардың қатарында SDU Университеті, Абай атындағы Қазақ ұлттық педагогикалық университеті, Алматы технологиялық университеті, С.Сейфуллин атындағы Қазақ агротехникалық зерттеу университеті, Логистика және көлік академиясы, әл-Фараби атындағы Қазақ ұлттық университеті және басқа да оқу орындары бар.
Фестиваль қонақтары NASA байқауларының жеңімпаздарынан зымыран жасау бойынша шеберлік сабақтарына қатысу мүмкіндігіне ие болды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Вице-министр Қытайда өткен ШЫҰ ғылыми кеңесінде Қазақстанды таныстырды
Вице-министр Динара Щеглова Қытайда өткен ШЫҰ ғылыми кеңесінде Қазақстанды таныстырды, деп хабарлайды Қазақстан Республикасы Ғылым және жоғары білім министрлігінің баспасөз қызметінен.
12 маусымда Қытай Халық Республикасының Чэнду қаласында ҚР Ғылым және жоғары білім министрлігінің делегациясы вице-министр Динара Щеглованың басшылығымен Шанхай ынтымақтастық ұйымына (ШЫҰ) мүше мемлекеттердің ғылым және технология саласындағы министрліктері мен ведомстволары басшыларының 9-кеңесіне қатысты.
Кеңес аясында ШЫҰ-на мүше мемлекеттердің жасанды интеллектті дамыту жөніндегі ынтымақтастық бағдарламасын іске асыруға арналған Жол картасы бекітіліп, 2030 жылға дейінгі ғылыми-техникалық және инновациялық ынтымақтастық жөніндегі іс-қимыл жоспарының жобасы қаралды. Кеңес соңында қорытынды хаттамаға қол қойылды.
Сондай-ақ делегация "Бір белдеу, бір жол" бастамасы аясында өткен Ғылым және технология саласындағы Екінші министрлік конференцияға қатысып, вице-министр Динара Щеглова ШЫҰ аясындағы Қазақстанның ғылыми-техникалық ынтымақтастыққа қатысты басым бағыттары жөнінде баяндама жасап, аймақтың тұрақты дамуына ғылыми бастамаларды біріктірудің маңыздылығын атап өтті.
Конференция аясында Қытай Халық Республикасының Ғылым және технология министрінің орынбасары Линь Синьмен екіжақты кездесу өтіп, ғылым саласындағы ынтымақтастықты тереңдету, зерттеу инфрақұрылымын дамыту тәжірибесімен алмасу және қолданбалы зерттеулерді қолдау мәселелері талқыланды.
Бүгінде Қазақстан мен Қытай арасындағы ғылым және жоғары білім саласындағы ынтымақтастық жан-жақты әрі тұрақты сипатқа ие. Екі ел университеттері арасында 200-ден астам келісім жүзеге асырылып, халықаралық ғылыми жобалар орындалып келеді. Ауыл шаруашылығы, биотехнология, жасанды интеллект, сейсмология және экологиялық қалпына келтіру сияқты басым бағыттар бойынша бірлескен зертханалар құрылды. Сонымен қатар академиялық ұтқырлық, ғылыми тағылымдамалар мен бірлескен зерттеулерді қолдау бағдарламалары іске асып жатыр. Қазақстан-Қытай технология трансфері орталығын құру бастамасы да даму үстінде.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.