17.03.2021, 22:40 11957

Қазақстан мен Қытай 2021 жылға арналған тасымалдау көлемін келісуге кірісті

Талқылау үшін басты тақырып ҚХР-мен шекарада жүктерді өткізу, тасымалдау процесіне қатысушылардың халықаралық келісімдер нормаларын орындауының мәселелері болады.

Нұр-Сұлтан. 17 наурыз. Kazakhstan Today - Қазақстан мен ҚХР 2021 жылға арналған тасымалдау көлемін келісуге кірісті, деп хабарлайды Kazakhstan Today "ҚТЖ-Жүк тасымалы" ЖШС баспасөз қызметіне сілтеме жасап.

Кеше бейнеконференцбайланыс режимінде ТЖЫҰ Жүк тасымалы жөніндегі комиссиясының кезекті отырысы басталды. Күн тәртібінде: өткен жылғы тасымалдау көлемін орындау қорытындыларын шығару және 2021 жылға арналған экспорттық, импорттық және транзиттік жүктерді тасымалдау көлемдерін тоқсан, жүк түрлері және әрбір шекара өткелі бойынша бөле отырып келісу. Пленарлық отырыстардың негізгі тақырыптары – жүк айналымының жоспарланған көлемін орындау бойынша техникалық және ұйымдастыру іс-шараларын әзірлеу", - деп хабарлайды"ҚТЖ-Жүк тасымалы" ЖШС баспасөз қызметінде.

Кеңес жұмысына Қазақстан, Қытай Халық Республикасы, Ресей Федерациясы, Вьетнам Социалистік Республикасы, Корей Халық Демократиялық Республикасы және Моңғолия теміржол әкімшіліктерінің өкілдері қатысуда.

Кеңестің бірінші күні 2020 жылдың қорытындысы бойынша ҚХР-дан Қазақстанға теміржол көлігімен жүк тасымалдау көлемі 2019 жылдың деңгейіне қарағанда 13% өскендігі және 7,6 млн.тоннаны құрағаны атап өтілді. Кері бағытта өткен жылдың көрсеткішіне қарағанда 30% артып, 14 млн.тоннаға жеткен.

ҚТЖ-Жүк тасымалы" ЖШС Бас директорының бірінші орынбасары Қанат Көбесов өзінің құттықтау сөзінде талқылау үшін басты тақырып ҚХР-мен шекарада жүктерді өткізу, тасымалдау процесіне қатысушылардың халықаралық келісімдер нормаларын орындауының мәселелері болатынын атап өтті.

Өткен жылдың қараша айынан бастап ҚХР тарапынан карантиндік шаралардың енгізілуіне байланысты Қытай соның ішінде дәнді дақылдар да бар жабық вагондарды қабылдамайды. Ресейде де осындай жағдай қалыптасты", - ескертті компанияда.

Комиссия өз жұмысын 19 наурызда аяқтайды. Келіссөздердің қорытындысы ТЖЫҰ комиссиясы кеңесінің хаттамасына қол қоюмен аяқталады.

Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.

тақырып бойынша жаңалықтар

14.11.2024, 15:50 82476

ІІМ мопедтерге нөмірлік белгілердің қашан берілетінін хабарлады

ІІМ өкілдері ОКҚ алаңында өткен баспасөз конференциясында түсіндіргендей, 3 қазанда мопедтерге мемлекеттік тіркеу нөмірі белгілерін беруді көздейтін заңға қол қойылды, деп мәлім етті ОКҚ брифингінде ҚР ІІМ Әкімшілік полиция комитетінің төрағасы Қайсар Сұлтанбаев.

Осылайша, мопедтер механикалық көліктерге теңестіріледі, сәйкесінше олардың бұзушылықтары автоматты тіркеу жүйелерімен, сондай-ақ күнделікті жол қозғалысын қадағалау кезінде полиция қызметкерлерімен анықталады. Заң 4 сәуірде күшіне енеді.

Мопедтерді тіркеуді келесі жылы бастаймыз. 1 қаңтардан бастап азаматтар арнайы ХҚКО-ға жүгіне алады. Мопед жүргізушілері әртүрлі бұзушылықтар үшін неге 4 сәуірден бастап жазаланады? Неге осындай уақыт беріліп отыр? Себебі жаңа заң бойынша мопед жүргізушілерінде А1 санатындағы жүргізуші куәлігі болуы керек. Егер біреуде жүргізуші куәлігі болмаса, оларға оқуға, жүргізуші куәлігін алуға, белгіленген тәртіппен мопедтерін тіркеуге және мемлекеттік нөмір белгілерін алуға уақыт қажет", - деп түсіндірді ҚР ІІМ Әкімшілік полиция комитетінің төрағасы Қайсар Сұлтанбаев ОКҚ алаңында өткен баспасөз конференциясында.

Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.

14.11.2024, 15:44 82701

Қала сыртындағы жолдарда қамту мақсатында "жасырын" патрульдеу енгізілді

Қала сыртындағы жолдарда қамту мақсатында "жасырын" патрульдеу енгізілді. Қазір олардың саны 300-ге жуық, деп хабарлады Орталық коммуникациялар қызметінде өткен баспасөз мәслихатында ҚР ІІМ Әкімшілік полиция комитетінің төрағасы Қайсар Сұлтанбаев.

Қала сыртындағы трассаларда қауіпсіздік мәселелерін шешу үшін патрульдік автокөліктер жол ережелерін бұзуды тіркейтін борттық жүйелермен жабдықталды. Қазір олардың саны 300 жуық.

Бір экипаждың өнімділігі 15 патрульдің жұмысымен сәйкес келеді. Еліміздің тұрғындары олардың жұмысы туралы біледі және олардың жолда жүруі жүргізушілерді тәртіпке келтіреді", - деді ҚР ІІМ Әкімшілік полиция комитетінің төрағасы Қайсар Сұлтанбаев ОКҚ алаңында өткен баспасөз конференциясында.

Оның айтуынша, қала сыртындағы жолдарда қамту мақсатында "жасырын" патрульдеу енгізілді, яғни сәйкестендіру белгілері жоқ полиция көлігінің салонында автоматты камералар орнатылды. Елді мекендердің ішінде осы тектес камералар автобустардың салондарында және жедел жәрдем көліктеріне де орнату жоспарланып отыр. Бұл көлік жүргізу мәдениетін арттыруға және жазаның бұлтартпаушылық принципін қамтамасыз етуге мүмкіндік береді.

14.11.2024, 15:36 83071

Қазақстан мен Өзбекстан арасында алғашқы теміржол туры іске қосылады

Қазақстан мен Өзбекстан арасында алғашқы теміржол туры іске қосылады, деп хабарлайды ҚР Туризм және спорт министрлігінң баспасөз қызметінен.

Қазақстанда "Жібек жолы" атты жаңа теміржол туры іске қосылады. "Алматы - Түркістан - Ташкент - Алматы" бағыты бойынша алғашқы рейс 2024 жылдың 16 қарашасында жолға шығады.

Төрт күнге халықаралық теміржол туры туристерге ежелгі қалалардың атмосферасына еніп, Ұлы Жібек жолының ізімен саяхаттауға мүмкіндік береді. Маршрут Түркістан мен Ташкенттің басты көрікті жерлерін қамтиды. Туристерге ыңғайлы болу үшін тур бағдарламасында гид қызметі, тамақтану, көлік қызметі және кіру билеттері қарастырылған.

Бірлескен күш-жігердің нәтижесінде екі елді байланыстыратын ерекше теміржол туры іске қосылмақ. Аталған тур біздің азаматтарымыз бен елдеріміздің мәдени байлығы мен тарихи мұрасына қызығушылық танытатын шетелдік туристер үшін ыңғайлы әрі қолжетімді болмақ. Бұл Қазақстан мен Өзбекстан арасындағы мәдени байланыстарды нығайту мен туризмді дамытудағы маңызды қадам", - деп атап өтті ҚР Туризм және спорт вице-министрі Ержан Еркінбаев.

Сондай-ақ саяхатшылар Орталық Азия аумағындағы ең көне қалалардың бірі - Отырар қаласымен таныса алады. Тур бағдарламасына Арыстан-баб кесенесіне, "Әзірет Сұлтан" тарихи-мәдени қорық-музейіне, Орталық Азиядағы өз кезегінде ең үлкен "Керуен-Сарай" туристік кешеніне бару кіреді. Ташкенттегі тур аясында қаланың тарихи нысандарымен ғана емес, сонымен қатар заманауи дамуымен де танысуға болады.

Халықаралық турды "Tau Komek Travel", "Тұран Қазақстан Тревел", "Grand Soluxe Travel Company", "SkyWay Travel", "Kompas", "KhanTuran Travel" компанияларымен бірлесіп "Жолаушылар тасымалы" АҚ іске асырады. Ал "Kazakh Tourism" ҰК" АҚ маршруттың халықаралық деңгейде насихатталуына қолдау көрсетедi.

14.11.2024, 15:30 83441

Қазақстан 2026 жылы Өңірлік Климаттық саммит өткізеді

2024 жылғы 13 қарашада Әзербайжанның астанасы Баку қаласында БҰҰ-ның Климаттың өзгеруі жөніндегі конференциясында (СОР29) Qazaqstan павильонында "Климаттық диалог: 2026 жылғы өңірлік rлиматтық саммитке барар жолда" атты алғашқы іс-шара өтті. Сессияға Қазақстан Республикасының Экология және табиғи ресурстар министрі Е. Нысанбаев, Тәжікстан Республикасының Үкіметі жанындағы қоршаған ортаны қорғау Комитетінің төрағасы Б. Шерализ, Президент Кеңесшісі - Қазақстан Республикасы Президентінің халықаралық экологиялық ынтымақтастық жөніндегі арнайы өкілі З. Сүлейменова, сондай - ақ халықаралық ұйымдардың өкілдері Ф.Лапекорелла - ЭЫДҰ Бас директорының орынбасары, Т. Еріксон - Жасыл климаттық қордың Орталық Азия бойынша өңірлік директоры, И. Старрост - GIZ жобалық менеджері, Қ. Әбуов - Климаттың өзгеруі саласындағы өңірлік ынтымақтастықтың перспективаларын талқылау үшін Азия даму банкінің жобалық менеджері қатысты.

Аймақтық Климаттық саммит климаттың өзгеруіне қарсы күрес бойынша бірлескен стратегиялар мен шешімдерді әзірлеуге арналған алаң болады. Қазақстан ашық және сындарлы диалог үшін жағдай жасауға, сондай-ақ озық тәжірибелер мен инновациялармен алмасуға жәрдемдесуге ұмтылады.

Саммитті өткізу бастамасын Қазақстан Республикасының Президенті Қасым-Жомарт Тоқаев БҰҰ Бас Ассамблеясының 78-ші сессиясында жариялады, деп хабарлайды Қазақстан Республикасы Экология және табиғи ресурстар министрлігінің баспасөз қызметінен.

Министр өз сөзінде климаттық өзгерістер ұжымдық және үйлестірілген тәсілді талап ететінін атап өтті. "Климаттың өзгеруі шекараны білмейді. Біз барлығымыз осы жаһандық сынақпен күресу үшін күш біріктіруіміз керек", - деп атап өтті ол.

Министр сондай-ақ халықаралық серіктестерге алғыс білдіріп, олардың Климаттық бастамаларды табысты іске асырудағы және Саммит өткізудегі маңызды рөлін атап өтті. Өз кезегінде халықаралық ұйымдар қолдау көрсетуге дайын екендіктерін білдірді.

Аймақтық Климаттық саммит - климаттық сын-қатерлермен күресуге көмектесетін тиімді және бейімделгіш шешімдерді әзірлеуге бағытталған Климаттық саясат саласындағы ынтымақтастықтың жаңа дәуірінің басталуы.

14.11.2024, 15:01 83936

Қазақстан "Серпін" бағдарламасын іске асыру жұмысын күшейтуге ниетті

ҚР Премьер-министрінің орынбасары Тамара Дүйсенованың төрағалығымен өткен кеңесте "Серпін" бағдарламасының іске асырылу барысы қаралды, деп хабарлайды Үкіметтің баспасөз қызметінен.

Әлеуметтік жобаның мақсаты еліміздің оңтүстік өңірлерінен келген жастарды оқытып, кадр жетіспеушілігі байқалып отырған Қазақстанның солтүстік, орталық және шығыс аймақтарына жұмысқа орналастыруға бағытталған.

Облыс әкімдерінің орынбасарлары жоба аясында атқарылып жатқан шаралар туралы айта келе, шешуді қажет ететін мәселелерді ортаға салды. Вице-премьер бағдарламаны жүзеге асырудағы негізгі мәселе жауаптылардың нақты, адрестік жұмысының жоқтығы екенін атап өтті. Жобада қамтылатын жастар анықталғанымен, аймақтардағы жұмыс берушілерге нақты қандай мамандықты меңгерген кадрлар қажет екені нақтыланбаған.

Бұл мәселені шешу үшін Ғылым және жоғары білім министрлігінің жанынан республикалық жобалық кеңсе және кадрларға қажеттілікті нақтылау үшін жұмыс берушілермен, жұмыспен қамту орталықтарымен, университеттермен және колледждермен өзара іс-қимыл жасайтын өңірлік кеңселер құрылды. Оқуды бітіргеннен кейін міндетті түрде жұмысқа орналасатын мамандарды даярлау үшін нақты оқу орындарын таңдау маңызды қадам болады", - деп атап өтті Тамара Дүйсенова.

Республикалық жобалық кеңсеге ҚР Парламентінің депутаты Мұрат Әбенов, ал өңірлік офистерге облыс және Астана, Алматы, Шымкент қалалары әкімдерінің орынбасарлары жетекшілік етеді. Оңтүстік аймақтарда кәсіби бағдарлау ісіне ерекше мән берілетін болады. Бүгінде салалық министрлікпен Түркістан, Жамбыл, Алматы, Қызылорда және Жетісу облыстарының мектептері мен колледждерінің тізімі анықталды. Бағдарлама аясында осы өңірлердің жастарын Ақмола, Павлодар, Қостанай, Шығыс Қазақстан, Солтүстік Қазақстан, Абай, Қарағанды және Ұлытау өңірлерінде оқытып, жұмыспен қамту қарастырылған.

14.11.2024, 14:47 84196

Қазақстанның Арнайы операциялар күштерінің бөлімшелері Өзбекстанда Hanjar-2024 оқу-жаттығуына қатысуда

Қазақстанның Арнайы операциялар күштерінің бөлімшелері Өзбекстанда Hanjar-2024 оқу-жаттығуына қатысуда, деп хабарлайды Қазақстан Республикасы Қорғаныс министрлігінің баспасөз қызметінен.

Жизақ облысындағы Орталық әскери округтің "Фориш" полигонында басталған Hanjar-2024 ("Қанжар-2024") тактикалық-арнайы оқу-жаттығуы 20 қарашаға дейін жалғасады.

Іс-шаралар екі ел әскери қызметшілерінің тығыз ынтымақтастығын, қалалық жағдайда арнайы операция жүргізуде тәжірибе алмасуды және заңсыз қарулы құралымдарды жоюды көздейді.

Hanjar-2024 ("Қанжар-2024") тактикалық-арнайы оқу-жаттығуы арнайы мақсаттағы бөлімшелерді жауынгерлік әзірліктің жоғары дәрежесіне келтіруді, оларды жауынгерлік қолдануға дайындауды және арнайы операцияны бірлесіп жүргізуді қоса алғанда, үш кезеңге жоспарланған.

Бірлескен іс-қимылдар барысында Қазақстан мен Өзбекстанның әскери қызметшілері әртүрлі қару түрлерінен ату, шартты тұрғындар тұратын жерлерде жауынгерлік іс-қимылдар жүргізу дағдыларын пысықтайды, сондай-ақ операцияға егжей-тегжейлі талдау жүргізеді.

Оқу-жаттығу аясында ұлттық тағамдар күндері, Достық футбол матчы және Самарқан қаласына экскурсия жоспарланған.

Ең көп оқылғаны