Бектұров АХҚО басқарушысы болып тағайындалды

18.06.2025, 17:26 3406

Бектенов моноқалаларды дамыту мәселелері бойынша республикалық кеңес өткізді

Қазіргі уақытта елімізде шамамен 1,5 млн адам тұратын 20 моноқала бар. Ұлттық экономика министрлігінің деректері бойынша олардың үлесіне өнеркәсіп өндірісі көлемінің үштен бірінен астамы тиесілі - 2024 жылдың қорытындысы бойынша бұл көрсеткіш 36,4%-ды құрады, деп хабарлайды Үкіметтің баспасөз қызметінен.

Мемлекет басшысының 2024 жылғы Қазақстан халқына Жолдауындағы моноқалалардың экономикасын әртараптандыру жөніндегі тапсырмасын жүзеге асыру шеңберінде 78 көрсеткіш негізінде әлеуметтік-экономикалық дамуға талдау жүргізілді. Индустриалды аймақты құру, жеңілдікпен несиелеу және басқа да жұмыстардың нәтижесінде моноқала мәртебесінен шыққан Саран қаласының оң тәжірибесі ескерілді. Нәтижесінде моноқалалар үш топқа жіктелді, олардың әрқайсысы үшін басым шаралар айқындалды. Олардың қатарында инженерлік және әлеуметтік инфрақұрылымды жаңғырту, өркендеудің жаңа бағыттарын анықтау, IT, АӨК, туризм және ғылым салаларынындағы инвестициялық жобаларды іске асыру, көлік дәліздері бойындағы сервистік қызметті дамыту, индустриялық және шағын өнеркәсіптік аймақтар қалыптастыру шаралары бар. Жаңа өндірістік қуатты орнықты жүктеуге бағытталған отандық өндірушілермен ұзақмерзімді келісімшарттар мен офтейк-келісімдер тетігін одан әрі дамытуға және қолдануға ерекше назар аударылды.

Премьер-министр Екібастұз қаласы экономикасын көтерудің және әртараптандырудың орнықты серпінін атап өтті. Бұл ретте 800-ден астам жұмыс орнын аша отырып, құны 138,4 млрд теңге болатын ферроқорытпа зауытын салу жобасын іске қосу, сондай-ақ индустриялық аймақ қалыптастыру маңызды рөл атқарды.

Моноқалалар "өсуге ықпал ете алатын" аймақтарға айнала алады. Біз бұған "жасыл" технологиялар мен цифрлы инфрақұрылымның немесе креативті экономиканың даму мүмкіндіктері ретінде қарауымыз керек. Болашақ индустриясы осындай шағын қалаларда бастау алуы керек. Моноқалалардың экономикасын әртараптандыруға баса назар аудару қажет. Бұл олардың экономикасын көтеруге және моноқалалар қатарынан шығуына мүмкіндік береді. Мысалы, қазіргі уақытта Екібастұз экономикалық құрылымы әртүрлі, көпсалалы қалаға айналуда. Яғни, ол үшін моноқала мәртебесі өзекті емес. Заманауи стандарттарға сәйкес келетін жаңа инфрақұрылымдық саясат құру бойынша жұмысты күшейту қажет", - деп атап өтті Олжас Бектенов.

Сондай-ақ Премьер-министр тұрақты дамудың негізгі шарты жұмыс орындарын құру және кәсіпкерлер мен инвесторлар үшін қолайлы жағдай жасау екеніне тоқталды.

Ең басты мәселе - моноқалаларға инвесторлар тарту. Біз әрине әрбір қалада аурухана, мектеп, стадион және басқа да әлеуметтік нысандар сала аламыз, бірақ жұмыс болмаса, ешкім ол жақта тұрмайды. Сондықтан инвесторлар тартуымыз керек, оларға қажетті жағдай жасау қажет. Оларға бос тұрған ғимараттарды, жер телімдерін ұсынып, жаңа кәсіпорындар ашуға жағдай жасау керек. Егер мұндай тәсіл болмаса, онда ешқандай даму болмайды. Сондықтан ең басты мәселе - инвесторлар тарту. Біз қазір Саран, Екібастұз және басқа қалаларда нәтижелер бар екенін көріп отырмыз, бірақ бұл бағытта белсендірек жұмыс істеу керек", - деп атап өтті Олжас Бектенов.

Бұл ретте бизнесті қолдау жүйесінде жергілікті деңгейде қосымша құралдарды қолдану маңызды. Атап айтқанда, әлеуметтік-кәсіпкерлік корпорациялардың (ӘКК) жұмысының маңыздылығы және олардың экспортқа бағытталған бастамаларды жүзеге асыруға қатысуын қамтамасыз ету қажеттігі атап өтілді.

Жүйелі трансформацияны қамтамасыз ету үшін Премьер-министр бірқатар нақты тапсырма берді. Осы жылдың 1 желтоқсанына дейін Қарағанды және Атырау облыстарының әкімдіктері Балқаш және Құлсары қалаларында индустриялық аймақтар құру бойынша жұмысты жеделдетуі тиіс, Ұлытау және Ақтөбе облыстарының әкімдіктері Сәтбаев пен Хромтау қалаларындағы индустриялық аймақтарды іске қосу бойынша жұмысты күшейтуі қажет.

Облыс әкімдіктерінің алдына Өнеркәсіп және құрылыс министрлігімен бірлесіп, биылғы 1 қазанға дейін моноқалаларда шағын өнеркәсіптік аймақтар бағдарламасын іске асыру үшін дайын өндірістік алаңдарды айқындау міндеті қойылды.

Самұрық-Қазына" қоры мен "Бәйтерек" холдингіне облыс әкімдіктерімен бірлесіп, 1 желтоқсанға дейін моноқалаларда, оның ішінде "Энергетикалық және коммуналдық секторларды жаңғырту" ұлттық жобасын жүзеге асыру шеңберінде ұзақмерзімді шарттар мен офтейк-келісімшарттарды кеңінен таратуды қамтамасыз ету тапсырылды.

Ұлттық экономика, Цифрлық даму, Ауыл шаруашылығы, Туризм және спорт, Ғылым және жоғары білім министрліктері мен облыс әкімдіктері биылғы 1 желтоқсанға дейін нақты инвестициялық жобаларды ескере отырып, моноқалалардағы экономика өсімінң жаңа драйверлерін айқындау бойынша шаралар әзірлеуі қажет. Ғылым және жоғары білім министрлігі әкімдіктермен бірлесіп, биылғы 1 қазанға дейін моноқалалардағы техникалық мамандар тапшылығын азайту мәселесін пысықтауы керек.

Сондай-ақ Көлік министрлігіне өңір әкімдіктерімен және "ҚазАвтоЖол" ҰК" АҚ-мен бірлесіп, биылғы 1 қазанға дейін ірі көлік дәліздерінің бойында орналасқан моноқалалардағы сервистік қызметті дамыту жөнінде ұсыныстар енгізу тапсырылды.

Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.

18.06.2025, 17:15 4196

Жоғары аудиторлық палата 154 млрд теңгеге қаржылық бұзушылықтар анықтады

Жоғары аудиторлық палата 154 млрд теңгеге қаржылық бұзушылықтар анықтады, деп хабарлайды мәжілістің баспасөз қызметінен.

2024 жылы Ішкі мемлекеттік аудит комитеті 360 аудиторлық іс-шара жүргізді. Анықталған қаржылық бұзушылықтардың жалпы сомасы 81 млрд теңгені құрады. Қаржылық бұзушылықтардың ең көп көлемі республикалық бағыныстағы квазимемлекеттік сектор субъектілерінде (46 млрд теңге), республикалық бюджеттен қаржыландырылатын мемлекеттік мекемелерде - (23,1 млрд теңге) анықталды.

Жоғары аудиторлық палата 214 нысанда шамамен 11 триллион теңгені құрайтын 27 аудиторлық іс-шара жүргізді. Жалпы сомасы 154 млрд теңгені құрайтын қаржылық бұзушылықтар, 708 млрд теңге бюджет қаражатын тиімсіз жоспарлау мен тиімсіз пайдалану, сондай-ақ 10 мыңнан астам рәсімдік бұзушылықтар анықталды. 135 млрд теңге өтеу мерзімімен өтелді.

Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.

18.06.2025, 12:20 4946

Тоқаев қорғаныс министрінің орынбасарын тағайындады

Тоқаев қорғаныс министрінің орынбасарын тағайындады, деп хабарлайды Ақорданың баспасөз қызметінен.

Мемлекет басшысының өкімімен Қайрат Әнуарбекұлы Садықов Қазақстан Республикасы Қорғаныс министрінің орынбасары - Қарулы Күштері Әуе қорғанысы күштерінің бас қолбасшысы лауазымына тағайындалды

Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.

18.06.2025, 10:12 5756

Елімізде қайтарылған активтер қаражаты есебінен 400-ден астам әлеуметтік нысан салынуда

Оның ішінде 9 білім беру нысаны, спорт саласындағы 3 нысанды, денсаулық сақтау саласындағы 162 жобаны, сумен жабдықтау саласындағы 159 жобаны қоса алғанда, 333 жоба іске асырылуда

Елімізде қайтарылған активтер қаражаты есебінен 400-ден астам әлеуметтік нысан салынуда, деп хабарлайды Үкіметтің баспасөз қызметінен.

Қазіргі таңда жалпы құны 318 млрд теңгені құрайтын 406 жобаны қаржыландыру мақұлданды. Оның ішінде 9 білім беру нысаны, спорт саласындағы 3 нысанды, денсаулық сақтау саласындағы 162 жобаны, сумен жабдықтау саласындағы 159 жобаны қоса алғанда, 333 жоба іске асырылуда.

Барлық жоба Мемлекет басшысының әлеуметтік маңызы бар инфрақұрылымды дамыту жөніндегі тапсырмасы аясында жүзеге асырылуда. Білім беру нысандары сапалы білімнің қолжетімділігін арттыруға ықпал етеді. Спорт нысандары бұқаралық спортты дамытуға және салауатты өмір салтын қалыптастыруға бағытталған.

Шалғайдағы елді мекендерде медициналық көмек көрсету үшін "Ауылда денсаулық сақтауды жаңғырту" бағдарламасы аясында медициналық мекемелер құрылады. Су құбыры желілерінің құрылысы 2025 жылға дейін еліміздің барлық қаласы мен ауылын 100% таза ауыз сумен қамтамасыз етудің стратегиялық мақсатына сәйкес келеді, бұл - халықтың тұрмыс сапасын жақсарту жолындағы маңызды қадам.

Өңірлерде қайтарылған активтер қаражаты есебінен білім беру мекемелері, спорт кешендері, денсаулық сақтау және сумен жабдықтау нысандарының құрылысы белсенді түрде жалғасуда.

Астанада ескі стадионның орнына Қ.Мұңайтпасов атындағы жаңа стадион салынуда. Жабық спорт ғимараты мүгедектігі бар азаматтарға арналған орындарды қосқанда, 3598 орынға есептелген. Құрылыс UEFA халықаралық стандарттарына сәйкес жүргізілуде.

Алматыда қайтарылған қаражат есебінен сумен жабдықтау жүйесін салу бойынша 9 жоба жүзеге асырылуда.

Шымкент қаласындағы "Сайрам көмекші мектеп-интернат-колледжі" кешенінің тәрбиеленушілері үшін қайтарылған қаражатқа 300 орындық жатақхана салынады.

Шығыс Қазақстан облысында қайтарылған активтерге ауқымды жоба жүзеге асырылуда. Мемлекет басшысының тапсырмасы бойынша Арнаулы мемлекеттік қордан Гематология орталығының құрылысын аяқтауға қаражат бөлінді.

Бас ғимаратта заманауи медициналық жабдықтармен зертханалар, радиациялық диагностика, кардиология, кардиохирургия, гематология, сүйек кемігін трансплантациялау және күрделі соматика бөлімшелері жабдықталады. Жаңа Орталық науқастарға емдеудің және оңалтудың озық әдістеріне қол жеткізуге мүмкіндік береді.

Сонымен қатар қайтарылған активтер есебінен өңірде тағы 8 жоба іске асырылуда, оның 2-еуі - денсаулық сақтау және 6-ауы - сумен жабдықтау саласында.

Солтүстік Қазақстан облысында бүгінде өңірді сумен жабдықтауды жақсартуға бағытталған жобалар жүзеге асырылуда. Арнаулы мемлекет қор қаражаты есебінен Соколов, Булаев және Пресновский топтық су құбырларын қайта жаңарту, сондай-ақ Көкшетау топтық су құбырына қосылған Айыртау ауданы мен Шал ақын ауылдық елді мекендеріне жаңа су құбырлары мен бұрмалар салу жүріп жатыр.

Қарағанды облысында 7 ауданда 51 денсаулық сақтау объектісін - дәрігерлік амбулаторияларды, сондай-ақ фельдшерлік-акушерлік және медициналық пункттерді салу жоспарлануда.

Ақмола облысында денсаулық сақтау, сумен жабдықтау және спорт саласында 38 жоба жүзеге асырылуда. Қайтарылған активтер есебінен екі медициналық нысан ашылды. Аршалы ауданының Арнасай ауылында 2 мыңнан астам адамға қызмет көрсететін дәрігерлік амбулатория пайдалануға берілді, ал Бұланды ауданының Алтынды ауылында фельдшерлік-акушерлік пункт салынды. 1 мыңнан астам азаматы бар үш елді мекеннің тұрғындары уақтылы медициналық көмекке сене алады.

Ақтөбе облысында қайтарылған активтер есебінен жаңа білім беру және денсаулық сақтау объектілері салынады. Өңірде 12 әлеуметтік маңызы бар жоба жүзеге асырылуда. Солардың бірі - Ақтөбе қаласындағы ерекше балаларға арналған арнайы балабақша.

Қордан Абай облысында 24 әлеуметтік маңызы бар нысанды жүзеге асыруға қаржы бөлінді. Өңірде жаңа сумен жабдықтау желілері, сондай-ақ медициналық мекемелер салынады.

Атырау облысында денсаулық сақтау, білім беру және сумен жабдықтау салаларында бір нысаннан салынады.

Жетісу облысында білім беру, денсаулық сақтау және сумен жабдықтау салаларында 22 жобаны жүзеге асыру жоспарланған.

Алматы облысында жаңа спорт нысандары, сумен жабдықтау желілері мен медициналық мекемелер салынады. Үкіметтің шешімімен бөлінген қаражат Кеген ауданы Жалағаш ауылында спорт кешенін салуға бағытталды.

Жамбыл облысында қайтарылған қаражатқа 19 жоба салынады. 4 жоба денсаулық сақтау жүйесі желісі бойынша, тағы 15 жоба сумен жабдықтау желілерін салу бойынша.

Батыс Қазақстан облысында жыл соңына дейін 25 жобаны тапсыру жоспарлануда. Бұл медициналық және фельдшерлік-акушерлік пункттер, дәрігерлік амбулаториялар, сондай-ақ су құбырларын салу бойынша жобалар.

Маңғыстау облысында қайтарылған активтерге 1 денсаулық сақтау нысаны салынады.

Қостанай облысында сумен жабдықтау желілері түбегейлі жаңартылады. Сондай-ақ өңірде бір денсаулық сақтау және білім беру нысандарын салу жоспарлануда.

Түркістан облысында қайтарылған активтерге бір білім беру объектісін салу, сондай-ақ өңір тұрғындарын сумен қамтамасыз ету бойынша 35 жобаны іске асыру жоспарланған.

Павлодар және Қызылорда облыстарында сумен жабдықтау желілері мен медициналық мекемелердің құрылысы бойынша жобаларды іске асыру жоспарлануда.

Ұлытау облысында жаңа білім беру, денсаулық сақтау және сумен жабдықтау нысандары салынады.

Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.

18.06.2025, 09:54 6216

Қазақстанның оңтүстігіндегі аграршыларға су беру көлемі ұлғайтылды

Қазақстанның оңтүстігіндегі аграршыларға су беру көлемі ұлғайтылды, деп хабарлайды Қазақстан Республикасы Су ресурстары және ирригация Министрлігінің баспасөз қызметінен.

Бүгінгі таңда "Қазсушар" РМК филиалдары Алматы, Жамбыл, Қызылорда, Түркістан және Жетісу облыстарының диқандарына 3 млрд 73 млн текше метрден астам су берді. Бұл былтырмен салыстырғанда 335 млн текше метрге көп. 2024 жылдың осы кезеңінде 2 млрд 738 млн текше метр су жеткізілген болатын.

Алматы облысының шаруаларына 50 млн текше метрден астам су берілді, бұл бір жыл бұрынғыдан 6 млн текше метрге артық. Жамбыл облысының диқандарына 135 млн текше метрден астам су берілді, бұл өткен бір жылмен салыстырғанда шамамен 50 млн текше метрге артық. Ал Жетісу облысындағы су пайдаланушыларға 196 млн текше метр суармалы су жіберілді.

Қызылорда облысының диқандарына 1 млрд 280 млн текше метрден астам су берілді, бұл бір жыл бұрынғыдан 74 млн текше метрге артық. Түркістан облысының шаруа қожалықтарына 1 млрд 412 млн текше метрге жуық су берілді. Бұл былтырмен салыстырғанда 234 млн текше метрге артық.

Қазіргі уақытта жоғарыда аталған бес облыста 348 мың гектардан астам егістік алқаптары суарылды. Оның 25 817 гектары Алматы облысына, 42 600 гектары Жамбыл облысына, 33 674 гектары Жетісу облысына, 126 300 гектары Қызылорда облысына, 119 900 гектары Түркістан облысына тиесілі.

Су ресурстары және ирригация министрі Нұржан Нұржігітовтің тапсырмасымен ведомство мамандарынан құралған төрт жұмыс тобы құрылды. Олар судың заңсыз пайдаланылуын анықтайды, сондай-ақ Қазақстанның оңтүстігінде суды үнемдеу, реттеу және бөлу мәселелері бойынша мониторинг жүргізеді. Сонымен қатар су үнемдеу технологияларын енгізу, ылғал сүйгіш дақылдардың көлемін қысқарту және түнгі суару әдісін қолдану бойынша түсіндіру жұмыстары жүргізілуде. Каналдар арқылы суды кезекпен жіберу кестелері әзірленіп, іске асырылып жатыр", - деді Су ресурстары және ирригация бірінші вице-министрі Нұрлан Алдамжаров.

Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.

17.06.2025, 16:42 29021

Энергетика министрлігі энергия объектілерін жаңғыртуға 210 млрд теңге инвестициялайды

Қазақстан Республикасының Энергетика министрлігі 2025 жылдың бірінші жартыжылдығында еліміздің электр және жылу желілерін жаңғыртуға бағытталған 75 ірі жобаны жүзеге асыру үшін 210 миллиард теңге бөлуді жоспарлап отыр, деп хабарлайды Қазақстан Республикасы Энергетика министрлігінің баспасөз қызметінен.

Ауқымды бағдарламаның мақсаты - маңызды инфрақұрылымның тозуын айтарлықтай төмендету және миллиондаған қазақстандықтарды жылу және электр қуатымен тұрақты қамтамасыз ету.

Энергетика және коммуналдық секторларды жаңғырту жөніндегі Ұлттық жоба аясындағы іріктеу нәтижелерін Энергетика министрлігі Электр энергетикасын дамыту департаментінің директоры Асылжан Мусин Power Central Asia + China аймақтық энергетикалық форумында жариялады.

Үкімет бекіткен Ұлттық жобаның негізгі мақсаты - энергетикалық активтердің тозу деңгейін 40%-ға дейін төмендету арқылы бүкіл жүйенің сенімділігін арттыру.

Бұл - әрбір қазақстандық отбасының жайлы өмірі мен қауіпсіздігіне, кәсіпорындарымыздың үзіліссіз жұмысына және экономикамыздың тұрақты болашағына тікелей инвестиция. Біз үздік қаржы құралдарын тартып, отандық өндірушілерге басымдық береміз. Әрбір жұмсалған теңге Қазақстанның игілігіне жұмыс істеуі тиіс", - деп атап өтті Асылжан Мусин.

Бірінші жартыжылдық аясында келесі жобалар іріктелді:

Электр желілерін жаңғыртуға бағытталған 47 жоба - 90 млрд теңге;

Жылумен қамтамасыз ету жүйелерін жаңартуға арналған 28 жоба - 120 млрд теңге.

Жоба аясында ұлттық экономиканы қолдауға ерекше назар аударылған. Электр энергетикасы саласындағы жаңа өндірістерді жергіліктендіру және отандық өнімдерді міндетті түрде пайдалану жаңа жұмыс орындарын құруға және қазақстандық біліктілікті дамытуға мүмкіндік береді.

Энергетика министрлігі азаматтардың өмір сүру сапасын арттыру және елдің энергетикалық қауіпсіздігін нығайту мақсатында стратегиялық маңызы бар нысандарды жүйелі түрде жаңғыртуды жалғастырады.

Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.

17.06.2025, 10:35 42736

Алматы қаласында SIM KIDS жобасы ресми түрде іске қосылды

Жоба пилоттық сынақ кезеңінен сәтті өтіп

Алматы қаласында SIM KIDS жобасы ресми түрде іске қосылды, деп хабарлайды ҚР Бас прокуратурасының баспасөз қызметінен.

Бұған дейін Бас Прокурордың тапсырмасы бойынша 2023-2025 жылдарға арналған балаларды зорлық-зомбылықтан қорғау, суицидтің алдын алу және олардың құқықтары мен әл-ауқатын қамтамасыз ету жөніндегі Кешенді жоспарға кәмелетке толмағандарды интернеттегі деструктивті контенттің зиянды әсерінен қорғауға бағытталған ұсыныстар әзірленгені хабарланған болатын.

Осы бастама аясында Алматы қаласының прокуратурасы TELE2/ALTEL байланыс операторымен бірлесіп "SIM KIDS" пилоттық жобасын іске қосты.

Бұл интернетке қауіпсіз және бақыланатын қол жеткізуді қамтамасыз ететін арнайы балалар SIM-картасы.

Карта автоматты түрде зиянды контентті бұғаттайды, ата-аналарға баланың қосымшалардағы белсенділігін бақылауға мүмкіндік береді және дыбыссыз режимде болса да, баламен байланыста болуды қамтамасыз етеді.

Жоба пилоттық сынақ кезеңінен сәтті өтіп, қазіргі уақытта барлық ниет білдірушілер үшін қолжетімді.

Есіңізде болсын балалардың қауіпсіздігі қарапайым шешімдер мен ересектердің бейжай қарамауынан басталады.

Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.

17.06.2025, 10:29 43116

Қазақстан мен Қытай сейсмикалық қауіпсіздік орталығын құрады

Ақордада Қазақстан Республикасының Төтенше жағдайлар министрлігі, Алматы қаласының әкімдігі және Қытай Халық Республикасының Жер сілкіністері жөніндегі басқармасы арасында Сейсмикалық қатерлерді азайту саласындағы өзара түсіністік пен ынтымақтастық туралы меморандумға қол қойылды, деп хабарлайды Ақорданың баспасөз қызметінен.

Қазақстан тарапынан меморандумдармен алмасудың ресми рәсіміне Қазақстан Республикасының Төтенше жағдайлар министрі генерал-майор Шыңғыс Әрінов, ал қытай тарапынан - Қытай Халық Республикасының Қазақстан Республикасындағы Төтенше және Өкілетті Елшісі Хан Чунлинь қатысты.

Аталған орталық жер сілкіністері туралы ерте ескерту жүйелерін интеграциялау, сейсмология ғылымы мен технологияларын дамыту, сондай-ақ Қазақстан мен Қытай арасында сейсмикалық ақпаратпен нақты уақыт режимінде алмасу бағытында жұмыс істейтін болады.

Бұл ынтымақтастық ықтимал табиғи апаттардың салдарын азайтуға мүмкіндік беріп, азаматтарды дер кезінде және нақты түрде хабардар етуді қамтамасыз етеді.

Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.

Бектұров АХҚО басқарушысы болып тағайындалды

тақырып бойынша жаңалықтар

Ең көп оқылғаны

Өзекті

Қазақстанның оңтүстігіндегі аграршыларға су беру көлемі ұлғайтылды