Екібастұз ГРЭС-1 компаниясына 33 млрд теңгеден астам айыппұл салынды
Сурет: www.gov.kz
Тексеру барысында 2018-2020 жылдарға арналған парниктік газдар шығарындыларына квоталар бөлудің ұлттық жоспарындағы белгіленген рұқсат етілген квоталар көлемінен асып кету бөлігінде экологиялық заңнаманы бұзушылық анықталды", - деп хабарлады ҚР Экология, геология және табиғи ресурстар министрлігінің баспасөз қызметі.
Парниктік газдар шығарындыларына квоталар саудасының қолданыстағы жүйесі шеңберінде кәсіпорынмен өтелмеген квота көлемі 2 млн тоннадан астам СО2 құрады.
Заңнама талаптарына сәйкес, кәсіпорын экологиялық заңнамада белгіленген мерзімде нарықта квоталар сатып алу арқылы жетіспейтін квоталар көлемін жабуға мәжбүр болды.
Аталған бұзушылық негізінде ҚР ӘҚБтК-нің 329-бабына сәйкес әкімшілік құқық бұзушылық туралы хаттама толтырылды. Айыппұл сомасы 33 301 625 мың теңгені құрайды", - деп толықтырды ведомствода.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
Қазіргі құлдық: жәбірленушілердің саны үштен бір есеге өсті
Қазақстанда адам саудасына байланысты қылмыс деңгейі жоғары күйінде қалып отыр. ҚР Бас прокуратурасының Құқықтық статистика және арнайы есепке алу жөніндегі комитетінің (БП ҚСжАЕК) деректері бойынша ағымдағы жылдың бірінші тоқсанында адам трафигіне байланысты 116 қылмыстық құқық бұзушылық тіркелді - 2024 жылдың қаңтар-наурыз айларындағы көрсеткішпен бірдей десе де болады (112). Бұл өте көп. Былтырғы жыл осы саладағы қылмыстардың рекордтық санымен ерекшеленгенін айта кетейік. Мұндай қылмыстар бойынша қылмыстық істердің көп болуының өзі теріс деп айтуға болмайды. Қылмыстың бұл түрінің жасырын сипатын ескеретін болсақ, керісіншесін айтуға болады, деп хабарлайды ranking.kz.
Адам саудасына байланысты қылмыстар ҚР Қылмыстық кодексінің бірнеше баптарына жатады. Бұл баптар қылмыскерлердің көздеген мақсаттарына - жыныстық немесе еңбек құлдығына, балаларды сатуға, сондай-ақ барлық байланысты құқық бұзушылықтарға тікелей қатысты. Сонымен, 2025 жылдың бірінші тоқсанындағы статистикаға сай тіркелген 116 қылмыстық құқық бұзушылықтың 54-і "Жезөкшелiкпен айналысуға арналған притондар ұйымдастыру немесе оларды ұстау және жеңгетайлық" бабына қатысты. Ең жиі кездесетін қылмыстардың үштігінде "Бас бостандығынан заңсыз айыру" (20) және "Адам ұрлау" (18) баптары бойынша сараланған қылмыстар да бар. "Адам саудасы" бабына тікелей қатысты қылмыстар ересектер мен кәмелетке толмағандар бойынша 6 қылмыстан тіркелді.
Polisia.kz порталының ақпараты бойынша ағымдағы жылдың бірінші тоқсанында ҚР ІІМ қызметкерлері өткізген "STOP-трафик" акциясының үш күнінің өзінде осы санаттағы 40 түрлі қылмыс тіркелді. Ең сорақыларының ішінде - Қарағанды облысында анасының қыздарын қарт адамға азғындық әрекеттер жасау үшін сатуы, Абай облысының шаруа қожалықтарында құл еңбегіне пайдалану үшін адам саудасы.
2025 жылдың бірінші тоқсанында адам саудасынан зардап шеккендердің саны 34,1%-ға өсті. 59 адам жәбірленуші деп танылды, оның 84,7%-ы - әйелдер мен қыздар. "Адам саудасы" және "Кәмелетке толмағандар саудасы" баптарына қатысты қылмыстардан тікелей 19 құрбан зардап шекті, соның ішінде 11 жасқа дейінгі 5 қыз. Бұл жерде әңгіме тек жыныстық құлдықта қолданылатын қыздар туралы ғана емес, сонымен бірге сәбилердің саудасы жайлы да болып отыр. БАҚ-та, әдетте, жекелеген қылмыстық істер туралы айтылады, бірақ іс жүзінде олардың саны жетіп артылады. Балаларды баласыз ерлі-зайыптыларға сатады, бағасы 100 мыңнан 2 миллион теңгеге дейін барады деп хабарлайды БҰҰ ақпараттық орталығы.
Ағымдағы жылдың бірінші тоқсанында ең көп зардап шеккендер "Адамды ұрлау" және "Бас бостандығынан заңсыз айыру" баптарына қатысты ең көп таралған қылмыстар бойынша болды. Үш айда олардың саны 30 адамнан асты.
2024 жылдағы адам саудасы туралы БҰҰ баяндама авторларының аналитикалық қорытындыларына сай мұндай сатып алу-сатудың мақсаты, көбінесе, тікелей құлдық болып табылады. Әлем 200 жылдан астам уақыт бойы адам бостандығына қарсы қылмыстық көзқараспен күресіп келеді, бірақ қазіргі қоғам үшін мұндай қылмыстардың жасырын деңгейі әлі де жоғары. Құрбандардың саны бүкіл әлем бойынша ондаған мыңнан асады. Өткен жылы 31 желтоқсанда жарияланған халықаралық ұйымның есебінде 2022 жылғы сандар келтірілген. Әлемдегі жалпы тенденция мынадай: адам саудасының құрбандары санының өсуі жалғасуда. Екі жыл ішінде зардап шеккендер саны 43%-ға артты.
Баяндамада адам саудасының негізгі мақсаты бұрынғыдағыдай сексуалдық қанау емес, бірінші кезекте, мәжбүрлі еңбекке тарту екені айтылған. Бұл ретте көптеген елдерде құқық қорғау жүйесі құлға айналдырылған құрбандарды анықтауда нәтиже көрсете бермейді. Ал мұндай істер ұзақ тергеледі және сотта да ұзақ қаралады: орташа мерзімі - 3 жыл.
Бұл себептен адам саудасына қатысты істерді сотта қарау нәтижесінде жыныстық қанауға қатысты қылмыстық істер бірінші орынға шығады. 2022 жылы дүние жүзінде осы саладағы үкімдердің 70%-дан астамы жезөкшелікпен айналысуға тарту үшін адам сатуға қатысты болды. Жалпы алғанда, дәл осындай қылмыстардың үлесі 36%-ды құрайды. Деректер әлемнің 156 еліндегі 65,3 мыңнан астам құрбандардың сауалнамаларына негізделген.
Біз жоғарыда келтірген Қазақстан бойынша статистика адам трафигі проблемасының ішкі жағын ғана көрсетеді. ҚР аумағында өз елінің азаматтарын немесе жұмыс істеуге келген мигранттарды ұрлап, сататын адамдардың болуымен қатар, шетелде қиын жағдайға тап болып, зардап шеккен қазақстандықтар да бар. Олардың нақты саны белгісіз, БАҚ-та соңы жақсы аяқталған бірлі-жарым жағдайлар ғана жарияланады. Мәселен, сәуір айында Мьянмада құлдыққа түскен ҚР-ның төрт азаматы Қазақстанға оралды. Зорлық-зомбылықпен қорқытып, оларды алаяқтық байланыс орталықтарында жұмыс істеуге мәжбүрлеген. Қазақстандықтардан басқа құлдықта Өзбекстанның екі азаматы және Қырғызстаннан жеті азамат болған. Зардап шеккендер ол жерге шетелде жалақысы жоғары жұмыс орындары туралы хабарландыруларға қызығып барған деп хабарлайды Baigenews.kz.
БҰҰ 2022 жылға арналған трансұлттық трафик бойынша осындай статистиканы келтіреді. Адам саудасының құрбандарының жалпы санының 31%-ы - Африкадан, 13%-ы - Шығыс Азия мен Тынық мұхиты аймағынан келгендер. Басқа елде құлдыққа түскен Шығыс Еуропа мен Орталық Азиядан келген құрбандардың үлесі 8%-ды құрады. Талдау анықталған 28,5 мың адам саудасы құрбанынан алынған сауалнамалар негізінде жүргізілді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстанда медициналық көмектің бірыңғай пакеті құрылады
Қазақстанда медициналық көмектің бірыңғай пакеті құрылады, деп хабарлайды төменгі палатаның баспасөз қызметінен.
Мәжіліс міндетті әлеуметтік медициналық сақтандыру мәселелері бойынша заң жобасын бірінші оқылымда мақұлдады. Жобаны Үкімет Мемлекет басшысының 2024 жылғы 2 қыркүйектегі жолдауын іске асыру үшін әзірлеген. Ол міндетті медициналық сақтандыру жүйесін жетілдіруге бағытталған.
Заң жобасында тегін медициналық көмектің кепілдік берілген көлемі және міндетті медициналық сақтандыру жүйесінде көрсетілетін медициналық қызмет түрлерін ажырата отырып, медициналық көмектің бірыңғай пакетін құру ұсынылады. Атап айтқанда, Денсаулық сақтау министрлігіне Денсаулықты қорғау мемлекеттік қоры (жедел, шұғыл, паллиативтік көмек, жұқпалы және әлеуметтік маңызы бар ауруларды емдеу) аясында медициналық көмек көрсетілетін аурулардың тізбесін анықтау өкілеттігі беріледі.
Сондай-ақ Үкімет алғашқы медициналық-санитарлық көмек аясындағы қызметтерді медициналық көмектің кепілдік берілген көлемі пакетінен міндетті медициналық сақтандыру пакетіне ауыстыруды ұсынып отыр. Мысалы, мамандарды қабылдау, медициналық оңалту, профилактикалық тексерулер, иммундау, репродуктивті денсаулықты қорғау шаралары міндетті медициналық сақтандыру аясында қамтамасыз етіледі.
Бұл тәсілді депутаттық корпус қолдамады.
Осыған орай депутаттар медициналық көмектің кепілдік берілген көлемі пакетінде алғашқы медициналық-санитарлық көмектің негізгі тізбесін: әлеуметтік маңызы бар аурулардың алдын алу, диагностикалау және емдеу қызметтерін сақтауды ұсынды. Яғни, туберкулез, АИТВ, қатерлі ісік, созылмалы вирусты гепатит, бауыр циррозы, психикалық және мінез-құлық бұзылыстары, жедел миокард инфарктісі (алғашқы алты ай ішінде), инсульт (бір жыл ішінде), аутоиммундық аурулар, эпилепсия және басқа да аурулармен ауыратын адамдарға тегін медициналық көмектің толық спектрін алуға кепілдік беріледі.
Сонымен қатар депутаттардың бастамасымен азаматтардың сақтандыру мәртебесіне қарамастан медициналық көмекке қолжетімділігін қамтамасыз ету үшін медициналық көмектің кепілдік берілген көлемі пакеті аясында бастапқы емдеу кезіндегі негізгі медициналық көмек те сақталады. Яғни, емханаға келген әрбір азаматқа дәрігердің алғашқы кеңесі беріледі деген сөз.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
2025 жылы еліміздегі жол құрылысына 780 млрд теңгеден астам жұмсалмақ
2025 жылы еліміздегі жол құрылысына 780 млрд теңгеден астам жұмсалмақ, деп мәлім етті Орталық коммуникациялар қызметінің брифингі барысында "Қазавтожол" Басқарма Төрағасы Дархан Иманашев.
Биыл еліміздің көлік инфрақұрылымының маңызды бағыттарын қамтитын ауқымды жол-құрылыс маусымы басталады. Жол саласын жаңғырту мақсатында 8800 шақырым автомобиль жолдарында түрлі жөндеу жұмыстары жүргізілмек. "ҚазАвтоЖол" ҰК" АҚ басқарма төрағасы Дархан Иманашевтың ОКҚ алаңында хабарлауынша, оның ішінде 2100 шақырымда құрылыс және қайта жаңарту жұмыстары, 460 шақырымда күрделі жөндеу жұмыстары 6300 шақырымда орташа жөндеу жұмыстары жоспарланған.
Бұл жұмыстарды орындауға шамамен 10 мың бірлік жол-құрылыс техникасы, 27 асфальтбетон зауыты және 25 мың маман жұмылдырылады. Жобаларды іске асыру барысында 9,4 млн тонна асфальтбетон қоспасы, 12 мон текше метр қиыршық тас және 500 мың тонна битум қолдану көзделген.
Барлық жобаны жүзеге асыру үшін шамамен 781 млрд теңге көлемінде қаржы қарастырылған. 2025 жылғы жол-құрылыс маусымы аясында қайта жаңарту және құрылыс жобаларымен 2100 шақырым автожол қамтылмақ. Оның ішінде 1100 шақырымда 10 өтпелі жобаның құрылыс жұмыстары жүзеге асырылып жатыр. Аталған жобалардың аясында жолдарды абаттандыру, карьерлерді рекультивациялау, өндіріс базалары мен уақытша айналма жолдарды салу бойынша негізгі жұмыстар аяқталуда. 1 мың шақырымда 7 жаңа жобаны жүзеге асырып жатырмыз. Олар: Қарағанды - Жезқазған, Ақтөбе - Ұлғайсын, Атырау - Доссор, Қызылорда, Рудный, Сарыағаш және Петропавл қалаларының айналма жолдары", - деді спикер.
2025 жылдың басым жобалары ретінде Қалбатау - Майқапшағай және Қызылорда - Жезқазған автожолдарын қайта жаңарту учаскелері анықталған. Жылдың соңына дейін жоспарланған 2100 шақырым жолдың 1100 шақырымында негізгі жұмыстарды аяқтау көзделген.
Күрделі жөндеу жұмыстарымен жалпы ұзындығы 460 шақырымды құрайтын 47 нысан қамтылмақ. Бұл жұмыстарға 8,5 млрд теңге қаржы көзделген. Жыл соңына дейін 174 шақырымды құрайтын 5 учаскені пайдалануға беру жоспарда бар. Сондай-ақ 6300 шақырымды құрайтын 233 нысанда орташа жөндеу жұмыстары жүргізіледі. Қаржыландыру көлемі - 203 млрд теңге. Құрылыс маусымының аяғына дейін кемінде 2 мың шақырым автожол пайдалануға берілмек.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.