Мемлекет басшылары Қазақстан Президентін Наурыз мерекесімен құттықтайды
ҚХР Төрағасы Си Цзиньпин өзінің құттықтау жеделхатында Қытай мен Қазақстан ынтымақтастықтың әртүрлі саласында табысты нәтижелерге қол жеткізгенін және бұл екі мемлекеттің халықтарына зор пайда әкелгенін жазған.
НҰР-СҰЛТАН. 21 НАУРЫЗ - Қасым-Жомарт Тоқаевтың атына Наурыз мерекесіне орай шет мемлекеттердің басшыларынан және халықаралық ұйымдардың жетекшілерінен құттықтау хаттар мен жеделхаттар келіп түсуде, деп хабарлайды KAZAKHSTAN TODAY Ақорданың баспасөз қызметіне сілтеме жасап.
ҚХР Төрағасы Си Цзиньпин өзінің құттықтау жеделхатында Қытай мен Қазақстан ынтымақтастықтың әртүрлі саласында табысты нәтижелерге қол жеткізгенін және бұл екі мемлекеттің халықтарына зор пайда әкелгенін жазған. Сондай-ақ Си Цзиньпин келесі жылы екі ел де өзара орнатқан дипломатиялық қатынастарының 30 жылдығын атап өтетініне тоқталып, қытай-қазақ қатынастарын жаңа деңгейге көтеру мақсатында стратегиялық сабақтастықты одан әрі қолдап, тереңдетудің маңызды екенін айтқан.
Мен қытай-қазақ қатынастарын дамытуға баса мән беремін. Сізбен бірге Қытай мен Қазақстан арасындағы дәстүрлі достықты нығайтып, екі елмен оның халықтарының игілігі жолындағы өзара тиімді ынтымақтастықты тереңдету үшін күш жұмылдыруға дайынмын", – делінген ҚХР Төрағасының жеделхатында.
Өзбекстан Президенті Шавкат Мирзиёев құттықтау хатында екі ел алдағы уақытта Өзбекстан мен Қазақстан арасындағы тұрақты дамып келе жатқан өзара стратегиялық серіктестікті кеңейте алатынына және достас екі халыққа ортақ мүддені көздейтін өте жақсы нәтижелерге қол жеткізетініне сенім білдірген.
Қырғызстан Президенті Садыр Жапаров Қазақстан мен Қырғызстан арасындағы бауырластық қатынастар мен өзара тиімді ынтымақтастықтың тату көршілік, стратегиялық серіктестік пен одақтастық негізінде екі халықтың мүдделерін көздей отырып, одан әрі нығаятыны және дамитыны жөнінде жазған.
Тәжікстан Президенті Эмомали Рахмон өз құттықтауында екі мемлекет арасындағы өзара тиімді ынтымақтастыққа бағытталған қарым-қатынастар қастерлі Наурыздың мәңгілік дәстүрі негізінде қарыштап дамып, кеңейіп, жаңа мән-мазмұнмен тереңдей беретініне сенім білдірген.
Түрікменстан Президенті Гурбангулы Бердімұхамедов жеделхатында Қасым-Жомарт Тоқаевқа және бауырлас Қазақстан халқына бақыт, шаттық және жаңа табыс тілеген.
Әзербайжан Президенті Ильхам Әлиевтің жолдаған құттықтау хатында Әзербайжан мен Қазақстан арасындағы қарым-қатынастар Наурыз құндылықтарын өте қатты қастерлейтін халықтарымыздың ерік-жігерінің арқасында кеңейіп, нығая береді деп сенемін делінген.
Армения Президенті Армен Саркисян берік достық пен өзара түсіністікке негізделген Армения мен Қазақстанның жан-жақты қатынастары дәйекті түрде одан әрі дами беретініне сенім білдірген.
Иран Президенті Хасан Рухани өзінің жеделхатында Наурыз екі мемлекеттің халықтары үшін жаңа мүмкіндіктерге жол ашып, әлемнің барлық еліне қуаныш, игілік, тыныштық әкеледі деп үміттенетінін айтқан.
Израиль Президенті Реувен Ривлиннің жеделхатында Наурыз бен Пасха мерекелерін тойлау сияқты бабаларымыздың ежелгі дәстүрлері екі елді жақындастырады және екіжақты қарым-қатынастарды нығайтудың берік негізі болады деп жазылған.
Ауғанстан Президенті Ашраф Ғани Наурыз мерекесімен құттықтай отырып, достық қатынастарды, бірлік пен экономикалық өсімді қолдауға бағытталған ірі аймақтық бағдарламалар мен жобалар аясындағы ынтымақтастықты одан әрі дамытуға ниетті екенін нақтылаған.
Палестина Президенті Махмуд Аббас Қасым-Жомарт Тоқаевқа зор денсаулық, бақыт тілеп, бауырлас Қазақстан халқының берекесі артып, өсіп-өркендей беруіне ниеттестік білдірген.
Шанхай ынтымақтастық ұйымының Бас хатшысы Владимир Норовтың жеделхатында күн мен түн теңелетін көктем мерекесінің адам мен табиғат арасындағы өзара үйлесімге ықпал етіп, достық пен ынтымақтастықтың алтын көпірі болатыны, сондай-ақ, мәдениеттер мен өркениеттер диалогын байытып, дамытатыны, қауіпсіз әрі гүлденген болашақ қалыптастыруға септігін тигізетіні, оның "Шанхай рухы" қағидаттарына толық сай келетіні айтылған.
Ұжымдық қауіпсіздік шарт ұйымының Бас хатшысы Станислав Зась Қазақстанның ҰҚШҰ аясындағы одақтастық іс-қимылдар механизмін нығайтуға, Ұжымдық қауіпсіздік шарт ұйымына мүше мемлекеттердің халықаралық және өңірлік алаңдардағы күш-жігерін үйлестіруге қосқан елеулі үлесін атап өткен.
ТМД Дінаралық кеңесінің Теңтөрағасы Кавказ мұсылмандары басқармасының Төрағасы Шейх-уль-ислам Аллахшүкір Паша-Заденің жеделхатында Наурыз мерекесі Алла Тағаланың бізге берген нығметі және табиғат пен тіршіліктің қайта түлеп, көктемгі күн мен түннің теңелетін қуанышты сәті екені айтылған. Сонымен қатар ол әрбір отбасына бейбітшілік, құт-береке тілеп, барша Қазақстан халқының өсіп-өркендей беруіне ниеттестік білдірген.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
Қаржы министрлігі мемлекеттік қызметшілерге берілетін сыйақы туралы мәлімдеме жасады
Қазақстан Республикасы Үкіметінің 2001 жылдың 29 тамызындағы №1127 қаулысына сәйкес мемлекеттік қызметшілерге сыйақы төлеу, материалдық көмек көрсету, лауазымдық айлықақыларына үстемеақылар белгілеу бюджет қаражатын үнемдеу есебінен ғана жүзеге асырылады.
Осы қаулы арқылы шығыс баптарының нақты тізбесі айқындалған. Олардың есебінен үнемдеу қалыптасқан жағдайда ғана сыйақы төленуі мүмкін (іссапарларға, коммуналды және көлік қызметтеріне, байланыс қызметтеріне, үй-жайларды жалға алуға және т.б. шығыстар бойынша үнемдеу).
Бүгінде аталған қаулыға, сондай-ақ басқа да заңнамалық актілерге сыйақыларды шектейтін өзгерістер енгізілмегендіктен мемлекеттік қызметшілерге сыйақыларды беруге тыйым салатындай негіз жоқ, деп хабарлады министрліктің баспасөз қызметінен.
Қаржы министрлігінің осыған дейінгі хабарламасында Үкімет қаулысының нормаларын бұлжытпай ұстану қажеттігі және бағдарлама әкімшілерінің қызметкерлерді тізбеде көрсетілгендерден бөлек бюджеттік баптардан қаражатты сыйақыға пайдалануға жол бермеу туралы айтылған болатын.
Инвестициялық жобаларды іске асырудан және/немесе мемлекеттік аппараттың жұмысына әсер етпейтін материалдық активтерді сатып алудан үнемделген қаражат бюджетке қайтарылуға тиіс.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстанда IT-мамандарға арналған жаңа виза түрі іске қосылды
Цифрлық даму министрлігі халықаралық мамандарды тарту және Қазақстанның цифрлық экономикасын дамытуға бағытталған Digital Nomad Visa (DNV) бағдарламасының іске қосылғаны туралы жариялайды. Бұл виза әлемнің түкпір-түкпіріндегі мамандарға Қазақстанда заманауи цифрлық қызметтер мен жоғары деңгейлі жайлылықты пайдалана отырып, өмір сүру және жұмыс істеуге мүмкіндік береді, деп хабарлайды ҚР ЦДИАӨМ баспасөз қызметінен.
Digital Nomad Visa IT-мамандарға арналған, Қазақстанды қашықтан жұмыс істеуге ыңғайлы хаб ретінде ұсынады. Бағдарлама жоғары жылдамдықты интернетке қолжетімділік, озық цифрлық қызметтер және бизнесті жүргізудің жеңілдігі маңызды кәсіби мамандарды тартуға бағытталған.
Digital Nomad Visa артықшылықтары:
- Икемді визалық режим: Визаны беру және ұзарту рәсімдерінің жеңілдетілуі.
- 5G және спутниктік байланысқа қолжетімділік: Ел аумағында тұрақты байланыс қамтамасыз етілген.
- Жергілікті мәдениетпен интеграция: Бейімделуге, тұрғын үй іздеуге және кәсіби байланыстар орнатуға көмек көрсету.
- Мемлекеттік қолдау: Бизнесті жеңілдету және инновациялық жобаларға қатысу мүмкіндігі.
Digital Nomad Visa - Қазақстанды цифрлық көшпенділер үшін халықаралық орталыққа айналдыруға бағытталған маңызды қадам. Бағдарлама жұмыс істеуге ыңғайлы жағдайлар мен жоғары өмір сүру деңгейін қамтамасыз етеді, бұл инновациялық экожүйелерді дамытуға және әлемнің түкпір-түкпіріндегі мамандармен тәжірибе алмасуға ықпал етеді",- деп Цифрлық даму министрі Жаслан Мәдиев атап өтті.
Digital Nomad Visa бағдарламасы қазірдің өзінде қолжетімді және Қазақстанда жұмыс істеуге және өмір сүруге бірегей мүмкіндіктер береді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақконцерт әртістері Чехияда өнер көрсетті
Роза Бағланова атындағы "Қазақконцерт" мемлекеттік академиялық концерттік ұйымының Қазақ мемлекеттік симфониялық оркестрі Чехияның ең беделді сахналарының бірі - "Рудольфинум" концерт залында өнер көрсетті, деп хабарлайды Қазақстан Республикасының Мәдениет және ақпарат министрлігінің баспасөз қызметінен.
Әлемнің белді сахналарының бірінде қазақстандық және әлемдік классикалық музыканың жауһарлары орындалды.
Концерт халықаралық аренада еліміздің мәдени имиджін нығайту және Қазақстан мен Чехия арасындағы дипломатиялық байланыстарды дамыту мақсатында ұйымдастырылды. Рухани кеш - екі ел арасындағы мәдениетаралық ынтымақтастыққа деген ұмтылыстың айқын көрінісі.
Еліміздің жетекші музыкалық ұжымдарының бірегейі - Қазақ мемлекеттік симфониялық оркестрінің құрамы асқан виртуоз шеберлер мен камералық музыкалаудың үздік әлемдік дәстүрлерін дамытып жүрген кәсіби музыканттардан құралған.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Таяу Шығыстағы жағдайдың шиеленісуіне байланысты Ливаннан қазақстандықтар эвакуацияланды
аяу Шығыс өңіріндегі шиеленістің күшеуіне байланысты Президент Қасым-Жомарт Тоқаевтың тапсырмасы бойынша Қазақстанның тиісті мемлекеттік органдардың қатысуымен Ливаннан ҚР азаматтарын және олардың отбасы мүшелерін елге эвакуациялау шаралары жүзеге асырылды, деп хабарлайды ҚР Сыртқы істер министрлігінің баспасөз қызметінен.
Аталған операция Ыстанбұл және Дубай қалалары арқылы ұйымдастырылып, нәтижесінде 2024 жылғы 17-31 қазан аралығында Бейруттан Астана мен Алматы қалаларына 41 адам аман-есен жеткізілді.
Эвакуация әскери қақтығыс аймағында қалған Қазақстан Республикасы азаматтарының құқықтары мен мүдделерін қорғау мақсатында жүргізілді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Каспий теңізіне шамамен 17 миллиард текше метр су жіберілді
Жыл басынан бері Жайық өзені арқылы Каспий теңізіне 16,7 миллиард текше метр су жіберілді, деп хабарайды Қазақстан Республикасы Су ресурстары және ирригация Министрлігінің баспасөз қызметінен.
Толығырақ, Жайық өзенінің орташа көпжылдық ағыны 9,46 текше шақырымды құрайтын. Бірақ, биылғы жылы су көлемі орташа жылдық нормадан асып түсті.
Айта кетейік, өзен ағыны Ресейдегі Ириклин су қоймасынан жіберілген су көлеміне байланысты қалыптасады.
Жыл басынан бері Министрлік өкілдері Ресей, Қытай және Орталық Азия елдерінен келген әріптестерімен трансшекаралық өзендер мәселелері бойынша 28 кездесу өткізді. Су тасқыны кезеңінде су көлемін реттеу бойынша келіссөздер күшейтілген режимде жүргізілетін болады",- деп атап өтті су ресурстары және ирригация министрлігінің ресми өкілі Мөлдір Әбдуәлиева.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.