Қазақстандықтарды алдап келген алаяқтардың call-орталығы жойылды
Астанада полиция қызметкерлері қазақстандықтарды алдап келген алаяқтардың call-орталығын жойды, - деп хабарлайды Polisia.kz.
Астана қаласында интернет-алаяқтардың жалған нөмірлерден қоңырау шалып, қазақстандықтарды алдап келген call-орталығы жойылды. Киберқылмыспен күрес басқармасы жүргізген жедел-іздестіру шараларының нәтижесінде автокөлік пен жылжымайтын мүлік ұтысын пайдаланып, азаматтарды алдаған бес адамнан тұратын топ ұсталды. Қылмыстық әрекет жасаған күдіктілер интернет-дүкендердің бірінен 2000-нан астам қазақстандықтың жеке деректерін қамтитын клиенттік базаны сатып алған.
Алаяқтар жұмыс кеңсесін қаладағы бизнес-орталықтардың бірінен жалға алып, жас азаматтарды жұмысқа тартып, оларды абоненттерге тізім бойынша қоңырау шалуға міндеттеген. Әңгіме барысында қоңырау шалушы адам көлік немесе пәтер ұтып алғанын хабарлап, "сыйлықты алу үшін" салық төлеу қажет екенін айтып, 180 мыңнан 1 млн теңгеге дейін ақша аударуды сұраған.
Офиске тінту жүргізу барысында 7 ноутбук, SIP-телефон арқылы қоңырау шалуға және операторлардың дауысын өзгертуге мүмкіндік беретін бағдарламалар, құлаққаптар мен микрофондар және Wi-Fi роутерлер тәркіленді. Қазіргі уақытта 10 жәбірленуші анықталды, келтірілген жалпы шығын 7 млн теңгеге жуық.
Аталған дерек бойынша қылмыстық іс қозғалды, күдіктілер уақытша ұстау изоляторына қамалды. Полиция қызметкерлері алаяқтық топтың басқа да құрбандарын анықтау жұмыстарын жалғастыруда.
Астана қаласының полиция департаменті белгісіз адамдардан "жүлде ұтқаныңыз" туралы қоңыраулар түскен жағдайда сақ болуға, ақпаратты ресми интернет-ресурстардан тексеруге және қызмет не тауардың бар екеніне көз жеткізбей ешқандай алдын ала төлем жасамауға кеңес береді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
Қызылорда облысында "HRT" атауымен белгілі қаржы пирамиданың қызметі тоқтатылды
Қаржылық мониторинг агенттігінің Қызылорда облысы бойынша департаменті "HRT" атауымен белгілі қаржы пирамиданың қызметін тоқтатты, деп хабарлайды ҚР ҚМА баспасөз қызметінен.
Ұйымдастырушылар азаматтарға заңды инвестициялық жоба ретінде ұсынылған схеманы жарнамалап, оған электросамокаттарды сатып алу және оларды Еуропа елдерінде жалға беру арқылы пайда табуға болады деп сендірген.
Жобаға қатысу үшін қатысушылардан арнайы "HRT" шотына криптовалюта аудару талап етілген.
Негізгі шарт - кем дегенде екі жаңа салымшы тарту болатын.
200-ден астам азамат жобаға 50 АҚШ долларынан 35 мың АҚШ долларына дейінгі қаражаттарын салып, ай сайын 1 200 АҚШ долларына дейін сыйақы алып отырамыз деп үміттенген.
Заңсыз алынған кірістің жалпы сомасы 28 млн теңгеден асты.
Тергеу барысында күдіктілер салымшылардың ақшасына екі автокөлік - "BMW 530I Xdrive" және "Changan Alsvin" сатып алғаны анықталды. Аталған көліктерге сот санкциясымен тыйым салынды.
Күдіктілерге қатысты үйқамақ ретіндегі бұлтартпау шарасы қолданылды.
Сонымен қатар қазіргі уақытта "HRT" қаржы пирамидасының құрылымдық бөлімшелерін еліміздің жеті өңірінде - Ақтөбе, Алматы, Атырау, Жамбыл облыстарында, сондай-ақ Астана және Алматы қалаларында құру фактісі бойынша сотқа дейінгі тергеп-тексеру жүргізілуде.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қостанай облысыда заңсыз микроқаржылық қызмет фактісі бойынша сотқа дейінгі тергеп-тексеруді жүргізілуде
ҚМА Қостанай облысы бойынша департаменті заңсыз микроқаржылық қызмет фактісі бойынша сотқа дейінгі тергеп-тексеруді жүргізуде, деп хабарлайды ҚР ҚМА баспасөз қызметінен.
Күдікті алты жыл бойы тиісті лицензиясыз, "OLX" және "Instagram" мобильді қосымшалары арқылы пайызымен қарыз берумен айналысқан.
Заңсыз әрекеттер заңды түрінде көрсетіліп, онда нақты берілген сомадан әлдеқайда жоғары сандар көрсетілген. Өйткені оған жылдық 100%-ға дейін алдын ала есептелген сыйақылар енгізілген.
Қарыздың қайтарылуын қамтамасыз ету мақсатында қарыз алушылардың мүлкі кепілдікке қойылған.
🖊 Аталған схема бойынша күдікті жалпы сомасы 556 млн теңгеден асатын 72 мәміле жасаған.
Солардың бірі - Рудный қаласының зейнеткерімен жасалған келісім. Ол күдіктіден емделуге қажет деп 13,2 млн теңге көлемінде қарыз алғаны туралы келісімге отырған. Келісім шарттарына сәйкес, зейнеткер екі жыл бойы ай сайын 600 мың теңгеден төлеуге міндеттелген.
Алайда, іс жүзінде ол қолына тек 6 млн теңге ғана алған, ал қалған 7,2 млн теңге алдын ала есептелген пайыз ретінде көрсетілген. Қарызды қамтамасыз ету үшін ол өзінің жалғыз пәтерін кепілдікке қоюға мәжбүр болған.
Мұндай ауыр әрі әділетсіз талаптар азаматтар үшін үлкен қауіп тудырады, олар алдану арқылы өз мүлкінен айырылып қалу қаупіне ұшырайды.
🔨 Сот санкциясымен күдіктінің жалпы құны 154 млн теңге болатын мүлкіне тыйым салынды. Олардың ішінде 6 жеке тұрғын үй, 3 автокөлік ("TANK 500", "TOYOTA CAMRY", "MITSUBISHI FIGHTER") бар.
Тергеп-тексеру жұмыстары жалғасуда.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Жаңаөзен тұрғынынан 508 кг бекіре балығы тәркіленді
Жаңаөзенде жергілікті тұрғыннан бекіре балығы тәркіленді, - деп хабарлайды Polisia.kz.
ІІМ "Заң мен Тәртіп" принципі бойынша жұмысты жалғастыруда. "Бекіре" жедел-профилактикалық іс-шарасы барысында Маңғыстау облысының криминалдық полиция қызметкерлері Жаңаөзен қаласында сирек кездесетін балықтарды заңсыз сақтаған жергілікті тұрғынды ұстады. Ер адамнан жарты тоннадан астам бекіре тәркіленді. Қылмыстық кодекстің 339-бабы бойынша сотқа дейінгі тергеу басталды", - деді ІІМ криминалдық полиция департаментінің бастығы Қанат Нұрмағамбетов.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
"Қазселденқорғау" ММ облыстық филиалының басшысы сотталды
Төтенше жағдайлар министрлігінің Қазселденқорғау" ММ облыстық филиалының басшысы сотталды, деп хабарлайды Cыбайлас жемқорлыққа қарсы іс-қимыл агенттігінің баспасөз қызметінен.
Шығыс Қазақстан облысында Өскемен қаласының № 2 сотымен "Төтенше жағдайлар министрлігінің Қазселденқорғау" ММ облыстық филиалының басшысы С. Станбековке қатысты үкім жарияланды.
Ол қала тұрғынын филиалға жалған жұмысқа орналастыру арқылы 2,7 млн теңге жымқырғаны үшін кінәлі деп танылды.
Оған мемлекеттік қызметте және квазимемлекеттік секторда лауазымдарды атқару құқығынан өмір бойына айыра отырып, 3 жыл мерзімге бас бостандығынан айыру түріндегі жаза тағайындалды.
Сот актісі заңды күшіне енген жоқ.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.