Қазақстанда үшжақты комиссияның жұмысы күшейтіледі
ҚР Премьер-министрінің орынбасары Тамара Дүйсенованың төрағалығымен әлеуметтік әріптестік пен әлеуметтік және еңбек қатынастарын реттеу жөніндегі республикалық үшжақты комиссияның отырысы өтті. Оған орталық мемлекеттік органдар, кәсіподақтар бірлестіктерінің, жұмыс берушілер одағының өкілдері және облыс әкімдерінің орынбасарлары қатысты, деп хабарлайды Үкіметтің баспасөз қызметінен.
Комиссия отырысында "Qarmet" АҚ компаниясының еңбек қауіпсіздігін қамтамасыз ету және қызметкерлері үшін еңбек жағдайларын жақсарту бойынша атқарған жұмыстары қарастырылды. Ол туралы кәсіпорын бас директоры Вадим Басин баяндады.
Оның сөзінше, компания өндірістік жарақаттанудың алдын алу және еңбек қауіпсіздігі деңгейін арттыруға бағытталған бірнеше жобаны жалғастырды. Нәтижесінде уақытша еңбекке жарамсыздықпен жарақаттанған жағдайлар саны 2023 жылмен салыстырғанда 60%-ға төмендеді. Еңбек қауіпсіздігі саласындағы инновациялық жүйелер енгізілді, оның ішінде тиісті процестерді автоматтандыру ісі бар.
Кәсіпорын қызметкерлерінің 63,7%-ы міндетті әлеуметтік медициналық сақтандыру келісімшарттарын жасасты, бұл өткен жылмен салыстырғанда 50%-ға көп.
Qarmet" компаниясы сондай-ақ мемлекеттік еңбек инспекторларымен белсенді ынтымақтастықта жұмыс істеп, еңбек қауіпсіздігі саласындағы бұзушылықтарды жоюға бағытталған тексерулер жүргізеді.
Вице-премьер кәсіпорын жұмысына оң баға беріп, қолға алынған шараларды жалғастыру қажеттігін атап өтті. Сондай-ақ еңбек қауіпсіздігі концепциясы аясында қарастырылған шараларға баса мән беру керектігін айтты.
Кеңес барысында салалық және аймақтық деңгейдегі үшжақты комиссиялардың жұмысына қатысты сын айтылды.
Еңбек қатынастары саласындағы жағдай үшжақты комиссиялардың жұмысын күшейту қажеттігін айқындап тұр. Көрсеткіштерде оң өзгерістер болғанымен, көңіл көншітерлік деп айта алмаймын. Мәселенің салдарымен емес, себептерімен жұмыс істеу қажет. Осы ретте комиссияның жұмыс органы ретінде Еңбек және халықты әлеуметтік қорға министрлігіне аймақтық және салалық органдардың жұмысын талдап, жоспарланған шаралардың орындалуын қатаң бақылауды тапсырамын", - деп атап өтті Тамара Дүйсенова.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
Қазақстандықтар ел банктерінде 5 триллион теңгеден астам қаражатты шетел валютасында сақтайды
Бүгінде теңгенің әлсіреп тұрғаны анық, осы орайда халықтың шетел валютасындағы салымдарына шолу жасадық. Ағымдағы жылдың 1 қарашасындағы жағдай бойынша жеке тұлғалардың ел банктеріндегі шетел валютасындағы салымдары 5,3 трлн теңгені құрады. Бір жыл ішінде бұл сома өзгере қойған жоқ, ал жыл басынан бері тіпті 3%-ға кеміді, деп хабарлайды Ranking.kz.
Десек те, көрсеткіштің төмендеуі бүкіл секторда байқалмады. Жалпы, жыл басынан бері алты банк оң динамика көрсетті, олардың тек үшеуі Қазақстандағы ірі ЕДБ болып табылады.
Еліміздегі үздік банктердің арасында жыл басынан бері халықтың шетел валютасындағы салымдарының ең жоғары өсімі Bereke Bank-те тіркелді: салымдар бірден 30,2%-ға, 65,5 млрд теңгеге дейін артты. Қаржы институтының көрсеткіштеріне қарағанда, ол тек шетел валютасындағы салымдар бойынша ғана емес, сондай-ақ депозиттердің барлық түрлері бойынша да (валютаға қарамастан) үздік көрсеткішке қол жеткізіп отыр.
Екінші орынға Банк ЦентрКредит орналасты, ондағы шетел валютасындағы салымдар 3%-ға көбейді. Үздік үштікті Jusan Bank түйіндеді: жыл басынан бері 1,9%-ға өсім көрсетті.
Жоғарыда аталған банктер ғана үздік нәтиже көрсете алды, еліміздегі қалған ірі банктерде сегмент бойынша салымдардың теріс динамикасы байқалды.
Жалпы алғанда, ҚР ЕДБ-дағы халықтың шетел валютасындағы салымдарының динамикасы әртүрлі факторға байланысты. Біріншіден, мұндай салымдар табыс табудан гөрі жинақтау құралы ретінде қызмет етеді. Тиісінше, халық өнімнің тиімді шарттарына емес, қаржы институтына деген сенімге баса назар аударады. Екіншіден, банктердегі салымдардың динамикасы ұлттық валюта бағамының ағымдағы жағдайына, сондай-ақ халықтың болашақ бағам туралы болжамдарына байланысты.
Естеріңізге салсақ, 2024 жылғы 22 желтоқсандағы жағдай бойынша АҚШ долларының бағамы 523 теңгені құрады - жыл басынан бері ұлттық валюта 15,4%-ға немесе 70 теңгеге жуық шамада әлсіреді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Көлік министрлігі авиациялық оқиғаны тергеу жөніндегі Комиссия құрды
Деректерді ұсыну және азаматтық авиациядағы және эксперименттік авиациядағы авиациялық оқиғалар мен инциденттерді тергеу қағидаларына сәйкес Көлік министрлігі авиациялық оқиғаны тергеу жөніндегі Комиссия құрды, деп хабарлайды ҚР Көлік министрлігінің баспасөз қызметінен.
Ведомствоның көліктегі оқиғалар мен инциденттерді тергеу департаментінің қызметкерлері авиациялық оқиға орнында. Тергеп-тексерудің қырдағы кезеңі аясында жұмыстар жүргізілуде.
Қазақстанға Әзербайжан Республикасы Азаматтық авиация мемлекеттік агенттігінің делегациясы , сондай-ақ Azerbaijan Airlines (AZAL) авиакомпаниясының өкілдері келді.
Жұмыстар Әзербайжанның авиациялық билігімен бірлесе жүргізілуде.
Сондай-ақ, Қазақстанға Embraer әуе кемесін өндіруші компания өкілдері және CENIPA (авиациялық оқиғаларды тергеу және алдын алу орталығы, Бразилия) ұшып келеді.
Ақтау қаласына Премьер-Министрдің орынбасары Қанат Бозымбаев бастаған Үкіметтік комиссия құрамында ҚР Көлік министрі Марат Қарабаев, көлік вице-министрі Талғат Ластаев, көліктегі оқиғалар мен инциденттерді тергеу департаментінің директоры Нұржан Малаев, Азаматтық авиация комитетінің төрайымы Салтанат Томпиева, "Қазаэронавигация" РМК бас директоры Нұржан Ахметов келді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Ақтау қаласы маңында болған қайғылы оқиғаның себеп-салдарын тексеру үшін Үкіметтік комиссия құрылды
Үкімет қаулысымен Ақтау қаласы әуежайының маңында болған Az Airlines әуе компаниясының Embraer 190 ұшағының апатқа ұшырау себептерін тексеру бойынша Үкіметтік комиссия құрылды. Тиісті қаулыға Премьер-министр Олжас Бектенов қол қойды, деп хабарлайды Үкіметтің баспасөз қызметінен.
Комиссия құрамына Премьер-министрдің орынбасары, Маңғыстау облысының әкімі, төтенше жағдайлар, көлік, сыртқы істер, ішкі істер, еңбек және халықты әлеуметтік қорғау, денсаулық сақтау министрліктерінің басшылығы, Бас көлік прокуроры кірді.
Комиссияға оқиға орнына дереу ұшып барып, ұшақтың апатқа ұшырау себептерін жан-жақты тексеруді қамтамасыз ету, қаза тапқандардың отбасыларына және зардап шеккендерге алғашқы көмек көрсету шараларын қабылдау тапсырылды.
Қазақстан Үкіметі Әзербайжан Үкіметімен болған оқиғаның себептерін жан-жақты тергеу және алғашқы көмек көрсету бойынша бірлесіп жұмыс істеуде.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.