Елордада бала күтімімен отырған аналар арасында Арбалар шеруі өтті
Астанадағы Ботаникалық бақта Арбалар шеруі өтті. Қызықты іс-шараға қаладағы кішкентай балалары бар ата-аналар қатысты, деп хабарлайды Астана қаласы әкімдігінің баспасөз қызметінен.
Көпшілік назарын аударған іс-шараға балалар арбасымен жүрген ата-аналар қуана қатысты. Қызықты іс-шара бағдарламасында кәсіби нұсқаушылар мен фитнес-жаттығулар, стретчинг те қамтылды.
Арбалар шеруі ата-аналар арасындағы өзара қарым-қатынасты нығайта түсіп, жаңа таныстыққа жол ашты. Екі сағатқа созылған шеру көптің көңілінен шығып, қатысушылар сыйлықтарға ие болды. Атап айтқанда, қатысушыларға жөргектер, балалар дүкеніне 100 мың теңгеге сертификаттар табысталды.
Ұйымдастырушылардың бірі Әлия Өмірханованың айтуынша, Funny sport аясында ұйымдастырылған шеру - кішкентай балалары бар аналарға арналған спорттық іс-шара. Бұл олардың баламен үйде отырған кездегі өміріне бір көңілді әсер беріп, табиғат аясында осындай жарыстар арқылы бой жазып, серпіліп қалуына септігін тигізді.
Баламен үйде отырған әйелдер үшін бұл бір ерекше оқиға болды. Арбаға салып балаларымызды таза ауаға жиі шығарып тұрамыз, бірақ ол кезде әркім өзімен-өзі бөлек жүреді. Бұл шеру сондай ата-аналардың басын қосты. Түрлі дене жаттығуларын жасадық, сыйлықтар алдық. Ұйымдастырушыларға рақмет", - деді елордалық көп балалы ана Әсемгүл Жолбасарова.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
Үкімет су тасқынын болжау үшін батиметриялық зерттеулерге қаражат бөлді
Қазақстан Үкіметі су тасқынын болжау үшін батиметриялық зерттеулерге қаражат бөлді, деп хабарлайды Үкіметтің баспасөз қызметінен.
Президенттің су тасқыны кезеңіне дайындық жөніндегі тапсырмаларын іске асыру шеңберінде Үкімет резервінен батиметриялық зерттеулер жүргізуге шамамен 576 млн теңге бөлінді. Тиісті қаулыға ҚР Премьер-Министрі Олжас Бектенов қол қойды.
Бөлінген қаражат Су ресурстары және ирригация министрлігіне бағытталады. Қаржыландырудың негізгі бөлігі жабдықтар мен техникалық жарақтарды сатып алуға, сондай-ақ зерттеулер жүргізу жөніндегі қызметтерге арналатын болады. Атап айтқанда, қаражатты "Қазсушар" ШЖҚ РМК "Су метрология" филиалына тікелей еліміздің солтүстік, батыс және орталық өңірлерінің су тасқыны қаупі бар учаскелеріне батиметриялық түсірілім жүргізуге бағыттау жоспарланып отыр.
Республикалық маңызы бар су қоймаларына батиметриялық зерттеу жүргізуді қоса алғанда, жұмыстар 2025 жылы жалғасады. Алынған деректер ҚР Цифрлық даму, инновациялар және аэроғарыш өнеркәсібі министрлігі мен "Қазақстан Ғарыш Сапары" ҰК" АҚ-ға су тасқынын болжау және модельдеу ақпараттық жүйесіне енгізу үшін беріледі.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Алматыда көлік шығарындыларының сапасын талдау үшін спектрометрлер орнатылды
Экология және қоршаған орта басқармасы Алматы қаласының мамандандырылған табиғат қорғау прокуратурасымен және Алматыда цифрлық технологияларды енгізу жөніндегі компаниямен бірлесіп, тестілік режимінде көлік құралдарының пайдаланылған газдарындағы заттарды өлшеу және талдау үшін пайдаланылатын мамандандырылған аспаптар - спектрометрлер орнатылды, деп хабарлайды Алматы қаласы әкімдігінің баспасөз қызметінен.
Спектрометрлер жолдың қарама-қарсы жақтарына тар учаскелерде орнатылады, көлік құралын тоқтатудың қажеті жоқ, нақты уақыт режимінде (жарық сәулелерінің көмегімен) өтіп бара жатқан көліктердің шығарындылары туралы деректерді жинайды. Процесті автоматтандыру адам факторын жоққа шығарады.
Спектрометрлер көмірқышқыл газы, көміртегі оксиді, азот оксидтері, көмірсутектер және аммиак сияқты заттардың концентрациясын анықтай алады және оптикалық тығыздық арқылы дизельді көліктердің түтінін бағалайды.
Қазіргі уақытта жоба Алматы автопаркі шығарындыларының орташа мәндерін анықтауға бағытталған. Болашақта Sergek бейнебақылау жүйесімен интеграциялау кезінде бұл технология автомобильдердің шығарындылардың рұқсат етілген нормаларынан асатын мемлекеттік нөмірлерін автоматты түрде анықтауға мүмкіндік береді.
Әзірлеушілердің айтуынша, бұл инновациялық жоба ауа сапасының мониторингін жақсартуға және қалалық жағдайда пайдаланылатын автомобильдер үшін экологиялық стандарттардың сақталуына ықпал етуге арналған. Ұқсас жүйелер бүгінде әлемде тиімді жұмыс істейді, мысалы, EDAR (Emissions Detection and Reporting) және Opus технологиялары Мадрид, Венеция, Берлин, Франкфурт, Лондон, Брюссель, Париж және басқа да ірі қалаларда сәтті енгізілді.
Бастама Алматыдағы ауа сапасын жақсарту жөніндегі іс-шаралардың бір бөлігі болып табылады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстан мен Өзбекстан әуе кеңістігін қорғауда бірлескен оқу-жаттығу өткізді
Қазақстан мен Өзбекстан Әскери-әуе күштерінің әскери қызметшілері мен Әуе шабуылына қарсы қорғаныс мамандарының қатысуымен 10-14 қыркүйек аралығында "Ашық аспан-2024" халықаралық жедел-тактикалық командалық-штабтық оқу-жаттығуы өтіп жатыр, деп хабарлайды ҚР Қорғаныс министрлігінің баспасөз қызметінен.
Оқу-жаттығу достас елдер әскери басқару органдарының үйлесімділігін арттыруға, Әуе шабуылына қарсы қорғаныс күш-құралдарын бірлесіп қолдану мәселелерін пысықтауға, жауынгерлік кезекшілік атқарудың ерекше жағдайларында командирлердің әскери бөлімдерді басқару бойынша практикалық дағдыларын үйренуге бағытталған.
Оған майдан тікұшақтары, армия және әскери-көлік авиациясының ұшақтары, сондай-ақ Әуе шабуылына қарсы қорғаныс әскерлерінің күш-құралдары қатысып жатыр. Оқу-жаттығу барысында Әскери-әуе күштерінің ұшқыштары Қырғызстан мен Тәжікстанның әуе кеңістігінде де ұшу жаттығуларын орындайды.
Ашық аспан-2024" жедел-стратегиялық командалық-штабтық оқу-жаттығуы ҚР Қарулы күштері Әуе қорғанысы күштерінің бас қолбасшысы авиация генерал-лейтенанты Дәурен Қосановтың басшылығымен өту үстінде.
Осындай оқу-жаттығуларды тұрақты түрде өткізіп тұрамыз. Олар достас елдердің әскери қызметшілеріне әуе шабуылына қарсы қорғаныс, жауынгерлік есептоптарды үйлестіру жөніндегі бірлескен міндеттерді орындау кезінде практикалық тәжірибе жинақтауға, оған қоса екі елдің қорғаныс қабілетін арттыруға мүмкіндік береді", - деп атап өтті Д. Қосанов.
Оқу-жаттығудың ерекшелігі мемлекеттік шекара немесе әуе кеңістігін пайдалану қағидалары бұзылған жағдайларда Әуе қорғанысы күштерінің командалық пункттерімен және шектесіп жатқан мемлекеттердің (Қырғызстан, Тәжікстан және Өзбекстан) басқару пункттерімен өзара іс-қимыл жасау тәртібін пысықтау болды.
Бұдан басқа, "Ашық аспан-2024" бірлескен оқу-жаттығуы шеңберінде Тәуелсіз мемлекеттер достастығының біріккен әуе шабуылына қарсы қорғаныс жүйесі шеңберінде әскерлерді қарсылас авиациясының соққыларын тойтару жөнінде практикалық іс-қимылдарға дайындау жүргізілуде.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.