Бірінші тоқсанда Қазақстанның ЖІӨ өсімі 4,9% құрады - Смайылов
Барлық негізгі бағыттар бойынша оң динамика қалыптасуда
Сурет: Depositphotos
Астана. 19 ақпан. KAZAKHSTAN TODAY - Қазақстан экономикасының өсуі осы жылдың I тоқсанында 4,9%-ды құрады. Бұл туралы ҚР Премьер-Министрі Әлихан Смайылов Мемлекет басшысының төрағалығымен өткен елдің әлеуметтік-экономикалық даму мәселелері жөніндегі кеңесте мәлімдеді.
Әлихан Смайылов бүгінгі таңда ұлттық экономика қолайсыз сыртқы жағдайларға бейімделе отырып, орнықты өсу жолына шыққанын атап өтті. Сонымен қатар әлемдегі санкциялық текетірестің күшеюі, логистикалық тізбектердің бұзылуы, жоғары инфляция мен азық-түлік тауарларына бағаның өсуі жаһандық экономиканың баяулауына үлкен әсер етуде. Атап айтқанда, Халықаралық валюта қоры 2023 жылы әлемдік инфляция болжамын 7%-ға дейін көтерді, ал жаһандық экономиканың өсу болжамын 2,8%-ға дейін төмендетті.
Сыртқы күрделі ахуалға қарамастан, 2022 жылы экономикамыздың нақты өсуі 3,2%-ды құрады. Елімізге $28 млрд тікелей шетелдік инвестициялар тартылып, 18% өсім қамтамасыз етілді. Негізгі капиталға салынған инвестициялардың нақты көлемі 8%-ға ұлғайды. Сыртқы сауда айналымы 32%-ға өсіп, $134 млрд болды", - деді Премьер-Министр.
Оның айтуынша, жұмыс істейтін шағын және орта кәсіпкерлік субъектілерінің саны 27%-ға артып, 1,8 млн-нан асса, осы секторда жұмыспен қамтылғандардың жалпы саны 13%-ға өсіп, 3,9 млн адамға жетті. Нәтижесінде экономикадағы ШОБ үлесі қазірдің өзінде 36%-ды құрады (бір жыл бұрын 33,5%).
Үкімет басшысы биыл қабылданған шаралар экономиканың тұрақты дамуын қамтамасыз етуге мүмкіндік бергенін атап өтті. Мәселен, қаңтар-наурыз айларында ЖІӨ-нің нақты өсімі 4,9%-ды құрады. Барлық негізгі бағыттар бойынша оң динамика қалыптасып отыр: құрылыста - 16%, саудада - 12%, көлік саласында - 8%, өңдеу өнеркәсібінде - 5,4% өсім тіркелді.
Сонымен қатар негізгі капиталға салынған инвестициялардың нақты көлемі үш айда 16%-ға, ал мемлекеттік бюджет кірісі 24%-ға артты. Бұл өз кезегінде, ағымдағы жылға арналған республикалық бюджетті нақтылау кезінде әлеуметтік төлемдерге, денсаулық сақтау мен білім беру салаларын, нақты сектор мен инфрақұрылымды дамытуға қосымша 2,2 трлн теңге бөлуге мүмкіндік берді.
Сондай-ақ Қазақстанның халықаралық резервтері $94 млрд құрады. Атап айтқанда, өткен жылдың басынан бері Ұлттық қордың активтері $3 млрд-қа өсіп, $58 млрд-қа жетті.
Премьер-Министр халықаралық рейтингтік агенттіктер Қазақстанның инвестициялық рейтингін сенімділік деңгейінде растағанын, ал Standard&Poor's агенттігі биылғы наурыз айында экономикамызға қатысты өз болжамын жақсартқанын айтты.
Осы жылдың қорытындысы бойынша біз экономикалық өсімді 4%-дан асыруымыз керек. Сонымен бірге ішкі нарықты отандық тауарлармен қамтамасыз ету, азық-түлік бағасын тұрақтандыру және халықтың әл-ауқатын көтеру - біз үшін маңызды міндеттер", - деп түйіндеді сөзін Әлихан Смайылов.
Астанада Президенттің төрағалығымен әлеуметтік-экономикалық даму мәселелері бойынша кеңес өтуде.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
Асхат Хасенов Атырау мұнай өңдеу зауытының жоспарлы алдын алу жұмыстарына дайындығын тексерді
Сурет: КазМунайГаз
ҚазМұнайГаз" ҰК АҚ (ҚМГ) Басқарма төрағасы Асхат Хасенов Атырау мұнай өңдеу зауытында болып, биылғы 1 қазанда басталып, 25 қазанға дейін жалғасатын жоспарлы алдын алу жұмыстарына дайындық барысын тексерді. Бұл туралы «ҚазМұнайГаз» ҰК АҚ хабарлады.
Бұл жұмыстар аясында жабдықтарға міндетті техникалық куәландырулар мен сараптамалар жүргізу көзделген (1174 дана қысыммен жұмыс істейтін ыдыстар мен аппараттар, 46 пеш, 1458 дана технологиялық құбыр желілері). Бұдан бөлек әртүрлі қондырғыларда 316 тоннадан астам катализатор алмастырылады.
Ең күрделі әрі негізгі операция - баяу кокстеу қондырғысының реакторларындағы конусты түптерді ауыстыру болмақ. Бұл үшін зауыт аумағында жүккөтергіштігі 750 тонна болатын екі бірегей кран орнатылуда. Сонымен қатар реакторларда болашақта жабдық сенімділігін арттыру үшін инновациялық болжамды диагностика жүйесі іске қосылады.
Жалпы жұмыстарға 1 880 маман және 62 бірлік арнайы техника жұмылдырылады.
Жоспарлы алдын алу жұмыстары кезінде жанар-жағармайдың ішкі нарықтағы тұрақтылығын сақтау және мұнай өнімдерін жөнелтуді қамтамасыз ету үшін зауыт жеткілікті көлемде тауарлық өнім қорын қалыптастыру бойынша барлық қажетті шараларды қабылдап жатыр.
Айта кетсек, 2025 жылдың сегіз айында жеңіл мұнай өнімдері өндірісінің үлесі рекордтық көрсеткішке жетіп, 77,5% құрады, ал өңдеу тереңдігі - 88,6% болды. Дизель отынының (+15%) және авиаотынның (+13%) өндіріс жоспары артығымен орындалды. Соның нәтижесінде кәсіпорын бюджетке 129 млрд теңге аударып, жоспарлы көрсеткіштен 24 млрд теңгеге артық түсімді қамтамасыз етті.
Сонымен қатар жиын барысында зауыттың жылдық өңдеу көлемін 6,1 млн тоннаға дейін арттыру және жөндеуаралық кезеңді 36 айға дейін ұзарту сияқты кәсіпорын дамуының стратегиялық міндеттері талқыланды. Қаржылық тиімділікті арттыру жұмыстары да атап өтілді.
Атырау мұнай өңдеу зауыты алдында жоспарлы алдын алу жұмыстарын сапалы өткізу, өндіріс тиімділігін арттыру, барлық технологиялық қондырғылардың қауіпсіз әрі тұрақты жұмысын қамтамасыз ету міндеті тұр.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
ҚР өңірлеріндегі азық-түлік, көрсетілетін қызмет, тауарлар: тамызда баға қалай өзгерді
Сурет: Depositphotos
Тамызда елде жылдық инфляция 12,2% болды (шілдеде - 11,8%). Жылдық инфляция 17 өңірде жеделдеп, 3 өңірде баяулады, деп хабарлайды ҚР Ұлттық банкінің баспасөз қызметінен.
Тамызда азық-түлік тауарларының бағасы жылдың мәнде 11,7% (шілдеде - 11,2%) болды. Осы топ тауарларының бағасы Ұлытау облысында (14,8%) ең жоғары, ал Алматы қаласында (8,7%) ең төмен өсті.
Тамыздың қорытындысы бойынша азық-түлікке жатпайтын тауарлардың бағасы жылдың мәнде 9,7%-ға (шілдеде - 9,5%) өсті. Ең жоғары мән Абай облысында (12,6%), ең төменгі мән Алматы қаласында (7,5%) тіркелді.
Тамызда ақылы көрсетілетін қызмет бағасы жылдың мәнде 15,3%-ға дейін жеделдеді (шілдеде - 14,9%). Сонымен қатар Маңғыстау облысында (9,8%) жалпы республикалық деңгейден баға біршама төмен өсті.
Тамызда айлық инфляция ел бойынша 1,0%-ға өсті.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
ҚТЖ-да астық тасымалдау талқыланды
Сурет: railways.kz
ҚТЖ" ҰК" АҚ-да астық тасымалдаушылар операторларының, экспедиторлардың, Ауыл шаруашылығы министрлігінің, "Атамекен" ҰКП, Ақтау және Құрық порттарының, сондай-ақ астық терминалдары өкілдерінің қатысуымен биылғы егіннің астығын тасымалдау мәселелері бойынша кеңес өтті, деп хабарлайды "Қазақстан темір жолы" ҰК" АҚ баспасөз қызметінен.
Маркетингтік кезең шеңберінде (2024 жылғы қыркүйек - 2025 жылғы тамыз) астық тасымалдау көлемі 13,3 млн тоннаны құрады, оның 10,2 млн тоннасы экспортқа бағытталды. Маркетингтік кезеңде астық жүктерінің 1 670 бағыты қалыптастырылып, жөнелтілді, экспорттық маршруттар Қытайға, Ақтау порты арқылы және Орталық Азия елдеріне бағытталды.
Астықты тасымалдау үшін 13,8 мыңға жуық астық тасымалдаушы (өткен жылмен салыстырғанда 20% артық), 16,5 мың жабық вагон бар, сондай-ақ ТМД елдері операторларының 2 мыңнан астам вагоны қосымша тартылды.
ҚТЖ негізгі: Достық - Мойынты, Бейнеу - Ақтау, Жетіген - Алтынкөл, Семей - Павлодар және т.б. бағыттарды жаңғыртудың ауқымды бағдарламасын іске асыруда. Жобаларды іске асыру желінің өткізу қабілетін едәуір арттыруға мүмкіндік береді.
ҚТЖ-да тасымалдауды үйлестіру жөніндегі астық штабы жұмыс істейді, ал жол бөлімшелерінде астық топтары жұмыс атқаруда.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.