Алматы хайуанаттар бағында қонжық дүниеге келді
Оның ата-анасы - Яшин мен Уссури бізге өткен жылдың мамыр айында Ресейден әкелінді.
Сурет: хайуанаттар бағының бейнесінен скриншот
Біз тағы бір жақсы жаңалығымызбен бөліспекпіз. Зообағымызда гималай қонжығы туылды. Оның ата-анасы - Яшин мен Уссури бізге өткен жылдың мамыр айында Ресейден әкелінді. Бұл осы аюлар жұбындағы тұңғыш төл. Біз бұған ерекше қуаныштымыз", - деп хабарлады хайуанаттар бағында.
Кішкентай қонжық 18 қаңтарда туылған. Бес айдай ол анасымен арнайы бөлмеде тұрды.
Осы кезеңде біз анасы мен қонжықты мазаламадық. Уссури өз қонжығына ерекеше мейірім көрсетіп, өсіріп келеді. Қонжық өсіп, жетіліп, күш-қуат жинаған соң ғана олар үлкен қоршауға ауыстырылды", - деп атап өтті хайуанаттар бағында.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
Депутат бұралқы иттерді эвтаназия әдісімен ұйықтату нормасын ұсынды
Елімізде жыл сайын 38 мыңнан астам адамды ит қабады. Бұл туралы Мәжіліс депутаты Еділ Жаңбыршин мәлім етті, деп хабарлайды Inform.kz.
- Өткенде ғана Маңғыстау өңірінде болған оқиға барша ата-аналардың уайымын күшейтті. Өздеріңіз де естіп-біліп отырсыздар, 16 жастағы бала итке таланып, ауыр жағдайда ауруханаға түсті. Біреулер "қазір ештеңеге таң қалуға болмайды, онда тұрған не бар?" деуі мүмкін, бірақ мәнісіне терең үңілсек, бұл оқиға бірнеше қоғамдық проблеманың бетін ашып берді... Соңғы кезде балаларды қойып, бұралқы иттер ересектерге шабуыл жасаған оқиғалар да көбейіп кетті. Сонда бұралқы, аш иттерді тыя алмасақ, жас бала мен қорғансыз кәрілерді олардан қорғай алмасақ, біз кімбіз?! Бұралқы иттер туралы сөз болса, жануарлар құқығын қорғаушы кейбір ұйымдар өре тұрады. Түсінеміз, олар ЮСАИД сияқты батыстық ұйымдардан алған гранттарының ақшасын ақтауы керек болар. Бірақ, жануарлар құқығы Адам құқығынан жоғары болғаны ма?! Адамның қауіпсіздігі бірінші орында тұруы тиіс, - деді Е. Жаңбыршин Үкімет басшысының атына жолдаған сауалында.
Оның айтуынша, қолданыстағы заңнама аясында бұралқы иттерді ұстап, оларға стерилизация, екпе жасап, қайтадан бос жіберу қарастырылған. Бірақ мұндай практика қоғамды алаңдатып отырған проблеманың шешімін табуға көмектеспеді.
- Ресми статистикаға сүйенсек, елімізде жыл сайын 38 мыңнан астам адамды ит қабады. Ойланып қараңыздаршы, сонда күніне 104 адамды ит талайды. Ал оның кемінде жартысы - 14 жасқа дейінгі балалар. Бұл - ресми цифрлар, қорқынышты әрі сұмдық статистика. Бірнеше Мәжіліс депутаттары болып, осы мәселені реттеу үшін заң жобасын әзірлеп, Парламентте талқылап жатырмыз. Өйткені босатып жіберген бұралқы ит қоғамға қауіпті және экономикалық жағынанда тиімсіз болып тұр, - деді депутат.
Оның сөзіне қарағанда, қала мен ауылда бұралқы иттер санының азаймай отырғанының бір себебі - оларды асырап алған адамдардың жауапсыздығы.
- Бұралқы иттерді арнайы үй-жайларда ұстап, оларды күтіп-бағуға мемлекеттік бюджеттен қыруар ақша бөлінеді. Есептеп көріңіздер, мектепте бір баланы тамақтандыруға мемлекеттік бюджеттен күніне 840 теңге бөлінеді, ал бір итті стерилизация, вакцинация, чиппен және операциядан кейін күтіп ұстауға 20 мыңнан 40 мыңға дейін қаржы керек екен. Әділет қайда? Адамға деген жанашырлық қайда?
Сондықтан, "Жануарларға жауапкершілікпен қарау туралы" ҚР заңына біздер ұсынған иесіз, бұралқы иттерді 15 күннен соң эвтаназия әдісімен ұйықтату нормасы - гуманистік шешім деп білемін. Бұл АҚШ, Жапония, Израиль, Франция, Ұлыбритания, Литва сияқты әлемнің көптеген елдерінде қолданылатын әдіс. Осыған орай, қоғамда қажетсіз дау көтеріп жүрген кейбір "жануар құқығын" қорғаушылар ең алдымен адам құқығы мен адам қауіпсіздігі деген мәселені еске алсын. Тіпті, олар ақбөкендер мен Каспийдің ит балығы мыңдап қырылғанда неге бастарын бұғып үндемей қалды? Әлде батыста отырған "дирижерлері" гранттарын тек иттер мен мысықтарды қорғау үшін берді ме?, - деді Еділ Жаңбыршин.
Оның пайымынша, бұралқы иттердің мәселесін қоғамда жүйелі түрде шешу үшін Үкімет тиісті мәселелерді қолға алуы керек:
- Біріншіден, өздерін "зооқорғаушылармыз" деп тіркелген барлық ұйымдардың қандай көздерден және қандай мақсатта қаржы алғанын тексеру қажет;
- Екіншіден, азаматтарды, Парламент депутаттары мен мемлекеттік қызметкерлерді әлеуметтік желілер мен БАҚ-да балағаттап, қаралау, жала жабу фактілерін зерттеп және зерделеп, оларды ұйымдастырып отырған тұлғаларды анықтап, олардың іс-қимылына құқықтық баға берілуі тиіс.
- Қолданыстағы заңның аясында көшедегі бұралқы иттерді жаппай ұстап, қамау шараларын алсын, агрессия көрсеткендерін және жұқпалы аурумен ауратындарына эвтаназия жасау мүмкіндіктерін қарастырсын, - деді депутат
Еске салсақ, биыл қаңтар айында Маңғыстау облысында жасөспірімді ит талап тастады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Мұқағали Мақатаевтың туған күніне орай ақынның өлеңіне жазылған жаңа ән радиодан шырқалды
Қазақтың көрнекті қаламгері Мұқағали Мақатаевтың туған күніне орай Қазақстан радио арналарының эфирінде ақынның "Махаббатым өзімде" өлеңіне жазылған әннің тұсаукесері өтті, деп хабарлайды ҚР Мәдениет және ақпарат министрлігінің баспасөз қызметінен.
Әннің музыкасын композитор Қадылбек Жағыпаров жазса, оны Темірбек Жүргенов атындағы Қазақ ұлттық өнер академиясының түлегі, жас көрермен музыкалық театрының актрисасы Мақпал Дүйсен орындады.
Музыкалық туындының жарыққа шығуына Қазақстан Республикасының Мәдениет және ақпарат министрлігі қолдау көрсетті.
Әннің премьерасы "Qazaq Radiosy" және "Shalqar Radiosy" радиостанцияларының эфирінде орындалды.
Айта кетейік, биыл Мұқағали Мақатаевтың туғанына 94 жыл толып отыр.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Ұлттық парктегі көлдердің айдындарында көлік құралдарын пайдалануға тыйым салынды
Бурабай" мемлекеттік ұлттық табиғи паркі Қазақстан Республикасы Ауыл шаруашылығы министрінің 2010 жылғы 1 қыркүйектегі № 555 бұйрығымен бекітілген "Жеке тұлғалардың ерекше қорғалатын табиғи аумақтарда болу қағидаларына" сәйкес, Ұлттық парктердің су айдындарында, соның ішінде Бурабай көлінің бетіндегі мұз басқан айдында квадроциклмен жүруге тыйым салынғанын хабарлайды.
Бурабай" МҰТП дирекциясы Ұлттық парк аумағында бизнестің мұндай түрін жүргізуге рұқсат берілмегенін еске салады. Суқоймалардың маңында "Көлге кіруге тыйым салынады" ақпараттық тақталар орнатылған.
Күн сайын Ұлттық парктің инспекторлық құрамы Ақмола облыстық полиция департаменті Бурабай аудандық полиция бөлімінің өкілдерімен бірлесіп, табиғат қорғау заңнамасының бұзылуына жол бермеу үшін рейдтік іс-шаралар өткізеді.
Биыл 1 қаңтар мен 5 ақпан аралығында жалпы қолданыстағы жолдан Бурабай көлінің мұзайдынына квадроциклдер шығып кетуіне байланысты 8 факті тіркелді. Барлық жағдайда көлік құралдары тәркіленіп, иелеріне әкімшілік айыппұл салынды.
Бурабай" МҰТП ұжымы Ұлттық саябаққа келушілерден табиғатқа жанашырлық танытуды, ықтиятпен қарауды сұрайды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Елордада 8-9 ақпанда демалыс күнгі жәрмеңке өтеді
Астанада 8-9 ақпанда кезекті қалалық ауыл шаруашылығы жәрмеңкесі өтеді, деп хабарлайды Астана қаласы әкімдігінің баспасөз қызметінен.
Мұнда Қазақстанның түрлі өңірлерінен - Ақмола, Абай, Шығыс Қазақстан және Қызылорда облыстарынан жергілікті фермерлер мен өндірушілердің өнімдері ұсынылатын болады.
Қала тұрғындары мен қонақтары жеміс-жидек пен көкеніс, ет, ұн және сүт өнімдерін, кондитерлік өнімдерді, табиғи шырын, жем және т.б. сатып ала алады.
Іс-шаралар Нұрғиса Тілендиев даңғылы, 12а мекенжайы бойынша "Koktal" сауда-ойын-сауық орталығында өтеді.
Жәрмеңке әр демалыс күндері 10:00-ден 22:00-ге дейін жұмыс істейді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.