Әлемдік шахмат тәжі үшін матчтың екінші партиясында Ян Непомнящий жеңіске жетті
Астанада шахматтан әлем чемпионаты өтуде
Сурет: kazchess.kz/Сергей Алексеенок
Астана. 11 ақпан. KAZAKHSTAN TODAY - Бүгін классикалық шахматтан биылғы әлем чемпионатындағы Ян Непомнящий мен Дин Лижэнь арасындағы 2-партияда жеңіс алғашқысына бұйырды. Бұл туралы ҚР Мәдениет және спорт министрлігі Спорт және дене шынықтыру істері комитетінің Спортты дамыту дирекциясы хабарлады.
Ресейлік гроссмейстер бұл жолы қара тастармен ойнады. Ойын 29 жүріске созылып, үш жарым сағатта аяқталды. Осылайша, Непомнящий есепте алға шықты. Есеп: 1,5 - 0,5. Кеше екі шахматшы алғашқы партияда тең түскен.
Чемпионат жайлы
FIDE-нің 2023 жылғы классикалық шахматтан әлем чемпионы атағын Дин Лижэнь мен Ян Непомнящий 7 сәуір мен 1 мамыр аралығында еліміздің бас қаласында сарапқа салады. Барлық 14 ойын St. Regis Astana қонақ үйінде өтеді. Әр 2 турдан кейін демалысқа бір күн беріледі. Осы 14 партия/матч барысында алғаш болып 7,5 балл жинаған шахматшы жеңімпаз атанады. Егер тең түссе, тай-брейкке дейін барады.
Бұл финалдың жүлде қоры - 2 миллион еуро. Жеңгені осы қаржының 60%-ын алса, 2-орын алған гроссмейстер қалғанына ие болады.
Ереже бойынша ойын кезінде алғашқы 40 жүріске 120 минут бөлінеді. Сосын, қалған 40 жүріске бір сағат берілмек. Ал 61-жүрістен бастап әр ойыншының еншісінде 30 минут қалады. Бұл аралықта олардың тасын қимылдатуға 30 секунд уақыты болады.
Айта кетейік, осыған дейін шахмат тарихында 16 чемпион шыққан. Астанада әлемнің 17-чемпионы анықталады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
Жеңіл атлетикадан әлемдік турнирде Қазақстан құрамасы екі медаль жеңіп алды
Астанада World Athletics Indoor Tour Gold сериясының кезеңі аяқталды. Жеңіл атлетикадан әлемдік турнирде Қазақстан құрамасы екі медаль жеңіп алды, деп хабарлайды ҚР Ұлттық Олимпиада комитетінің баспасөз қызметінен.
Бұл жетістіктің авторлары - Елизавета Матвеева мен Игорь Косолапов. Екі спортшы да биіктікке секіруде үшінші нәтиже көрсетті.
Ал Давид Ефремов (60 метрге кедергілермен жүгіру), Дэйзи Джепкемей (3000 метр) және Надежда Дубовицкая (биіктікке секіру) жүлдеге бір қадам жетпей қалды.
Өз елімізде өнер көрсетуді өте жақсы көремін, себебі бізде жанкүйерлердің ерекше ықыласы бар. Мұндай жарыстарда бұл қатты сезіледі. Әрине, адамдарға әлем жұлдыздарын көру қызық. Бірақ сонымен бірге біздің спортшыларымызға жанкүйер болып жатқанын сезесің. Бұл өте жағымды. Барлық жанкүйерлерімізге алғыс айтқым келеді. Алаңда болғандарға, теледидар алдында отырғандарға да рақмет айтамын.
Жүлдегерлер қатарына енбегеніме қарамастан, нәтижеме ризамын. Себебі бұл - маусымдағы алғашқы жарыс, дайындық қиын болды. Бірақ жақсы өнер көрсеттім деп айта аламын. Әрине, бұл менің ең жақсы нәтижем емес, бірақ жарақаттан кейін жүктелген міндеттерге дайындалуға мүмкіндігім болмады. Дегенмен, 184 сантиметрге секірдім. Өзімді мақтан тұтамын (күледі).
Осылайша, қысқы турнирлерде өнер көрсетуімді аяқтаймын. Дәрігерлермен, бапкерлермен кеңесе отырып, толық емделіп, жазғы маусымға дейін денсаулығымды жақсартуға және дайындалуға шешім қабылдадық. Жүктемелерді ағзам көтере алатындай етіп қабылдауға тырысамыз, әрі бұрынғыдай жарыстарды өткізіп алмауға жұмыс жасаймыз", - деді жабық алаңдағы әлем чемпионатының қола жүлдегері Надежда Дубовицкая.
Айта кетсек, Astana Indoor Meet for Amin Tuyakov Prizes жарысында барлық фавориттер жеңіс тұғырына көтеріле алмады. Мысалы, екі дүркін Олимпиада чемпионы Андре Де Грасс (Канада) және Олимпиада ойындарының күміс жүлдегері, үш дүркін әлем чемпионы Ниа Али (АҚШ) жүлдесіз қалды. Танымал кедергімен жүгіруші Али жарақатына байланысты іріктеу кезеңін сәтті аяқтай алмады.
Өзімді керемет сезінемін. Қысқа қашықтықтағы спринт менің бағытым емес. Алайда нәтижеме ризамын. Өткен жылы да алтыншы орын алған едім (күледі). Мұнда болғаныма қуаныштымын. Жанкүйерлер өте керемет, көптеген адамдар суретке түсуімді сұрады… Азияда қаншалықты көп жанкүйер бар екенін білдім. Фантастикалық атмосфера. Ал өнер көрсетуге келсек, бәрі тамаша. Бұл тек бастамасы. Алда көптеген жарыс бар. Соның ішінде Токиода өтетін әлем чемпионаты. 100 және 200 метрге жүгіру жоспарымда бар. Барлығы енді басталды (күледі)", - деді Андре Де Грасс.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Мемлекет басшысы QazSwimAcademy спорт орталығының жұмысымен танысты
Қасым-Жомарт Тоқаев Астана қаласындағы заманауи QazSwimAcademy спорт орталығына барды, деп хабарлайды Ақорданың баспасөз қызметінен.
Орталық директорының айтуынша, бірегей кешенде спортшыларды даярлауға қажетті барлық жағдай жасалған. Ересектер мен балалар ұзындығы әртүрлі бес бассейнде жаттыға алады. Оның бірі 50 метрлік болса, екеуі 25 метрлік және екеуі 10 метрлік жүзу жолақтары бар бассейндер. Топтық жаттығулар 25 бағыт бойынша жүргізіледі. Сонымен қатар мұнда кәсіби жаттығу залы да бар.
Академияны жоғары технологиялық үлгіде жабдықтауға баса назар аударылған. Бассейндерге судың құрамы мен реагенттердің мөлшеріне автоматты түрде талдау жүргізетін әрі тиімді залалсыздандыру мен қауіпсіздіктің жоғары деңгейін қамтамасыз ететін испандық қондырғы қойылған.
Бұдан бөлек, нысан жүзуге қажетті машықтарды шыңдап, бұлшық еттерді ширататын арнаулы жаттығу құралдарымен жабдықталған.
Президент жас спортшылармен әңгімелесіп, мемлекет спорт инфрақұрылымдарын дамытуға ерекше мән беретінін айтты.
Келешекте табысты болуларыңызға және олимпиада чемпионы атануларыңызға тілектеспін. Спорттың денсаулықты жақсартуда, сондай-ақ халықаралық жарыстарда еліміздің даңқын шығаруда маңызы өте зор. Сіздердің жеңімпаз спортшы әрі еліміздің лайықты азаматы болатындарыңызға сенемін", - деді Қасым-Жомарт Тоқаев.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Астанада шаңғы маусымы ресми түрде ашылды
Астанадағы Орталық саябақта шаңғы тебу маусымы ресми түрде ашылды. Осыған орай шаңғыдан жарыс өтті, деп хабарлайды Астана қаласы әкімдігінің баспасөз қызметінен.
Шаңғы жарысы бірнеше жас ерекшелігі бойынша 500 метр және 2,5 км қашықтықта өтті.
Биылғы қыс шаңғы жарысын өткізуге өте ыңғайлы. Шаңғы маусымының ашылуын осы уақытқа жоспарлаған себебіміз - ауа райына байланысты. Тағы да айтарымыз, қардың қалыңдығы шаңғы жолын жоғары деңгейде жасауға мүмкіндік беріп отыр. Шаңғы - қысқы спорттардың арасында ең танымалдарының бірі. Астанамызда шаңғы спортымен айналысатын адамдардың саны өте көп. Бүгін де шаңғы маусымының ашылуына еңбектеген баладан еңкейген қарияға дейін қатысып жатыр. Ең қарт қатысушымыз 83 жаста. Шаңғы жарысынан бөлек, шаңғы маусымының ашылуында белбеу күресі, қол күресі, арқан тартыс, гір тасын көтеру бәсекесінен сайыс ұйымдастырылды", - деді Астана қаласы әкімдігінің "Спорттық-бұқаралық іс-шараларды өткізу дирекциясы" КММ спорттық-бұқаралық іс-шараларды жоспарлау бөлімінің басшысы Көлбай Жанбек.
Бүгінгі шаңғы маусымында қатысушылар 7 жас санаты бойынша сынға түсті.
Шаңғы маусымындағы адамның көптігі жақсы әсер сыйлайды. Өзім жүзумен айналысамын. Ал қысқы мезгілде шаңғыға ден қоямын. Бір жылдан бері шұғылданғанымның арқасында төзімділігімді арттырдым. Спорттағы жетістігім өмірге де септігін тигізетініне сенімдімін", - деді шаңғы маусымының ең жас қатысушыларының бірі, 9 жастағы Кеңшілік Ахмет.
Спорттық шараның соңында әр жас шамасына қарай жүлдегерлер дипломдармен, медальдармен және бағалы сыйлықтармен марапатталды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.