Тоқаев әскерилер мен құқық қорғау органдарының қызметкерлеріне ордендер мен медальдар тапсырды
Қасым-Жомарт Тоқаев жиынға қатысушыларды Отан қорғаушы күнімен және Жеңіс мейрамымен құттықтап, халқымыздың ерлік дәстүрін танытатын қос мереке биыл Тәуелсіздігіміздің 30 жылдығы аясында өтіп жатқанын айтты.
Егемендіктің қадір-қасиеті – жердің тұтастығы мен елдің тыныштығында. Осы асыл құндылықтарды Қарулы Күштеріміз қас қақпай күзетіп тұр. Тәуелсіздік жылдарында Тұңғыш Президентіміз, Елбасы Нұрсұлтан Әбішұлы Назарбаевтың арқасында мемлекетіміздің мықты қорғаныс жүйесін қалыптастырдық. Әскеріміздің бес қаруын сайладық. Сарбаздарымыздың жауынгерлік рухын көтеріп, кәсіби машығын шыңдадық. Бүгінде армиямыз – елдігіміздің берік қалқаны, Тәуелсіздігіміздің мызғымас тұғыры", – деді Президент.
Қасым-Жомарт Тоқаев Қазақстанның бейбітшілік пен тұрақтылықты қалайтын мемлекет екенін атап өтті. Бірақ ұлттық мүддеге нұқсан келтіретін кез-келген әрекетке тойтарыс бере аламыз. Соңғы уақытта жер жүзінде түрлі қақтығыстар көбейіп кетті.
Сарапшылар алпауыт мемлекеттер арасындағы тартыстарды қырғи-қабақ соғыс кезеңіндегі ахуалмен теңестіруде. ТМД аумағында, тіпті, іргелес көрші елдерде жанжалдар пайда болып жатыр. Ескі дауларға қазіргі түйткілдер қосылып, жағдай күрделене түсті. Бұл – бәрімізді алаңдатып отырған мәселе. Сондықтан арқаны кеңге салмай, ұлттық қорғаныс ісінде темірдей тәртіп сақтауымыз керек. Біздің әскеріміз және барлық Күштік құрылымдар сырттан келген қауіп-қатерге тойтарыс беруге әрдайым сақадай-сай дайын болуға тиіс", – деді Мемлекет басшысы.
Президент өз сөзінде армия мен Күштік құрылымдар еліміздің егемендігі мен ұлттық қауіпсіздіктің басты кепілі саналатынын айтты. Жаһандық өзгерістер мен геостратегиялық тұрақсыздық жағдайында әлемде әскери қызметшілердің рөлі бірнеше есе арта түседі. Бүгінде Қазақстанды өзге жұрттар өңірлік және халықаралық тұрақтылықтың ұйытқысы ретінде мойындайды. Әскери қызметшілер БҰҰ-ның бітімгершілік миссиясы аясында өздеріне жүктелген міндетті табысты атқаруда. Ал ұлттық қауіпсіздік органдарының қызметкерлері "Жусан" арнайы операциясын мінсіз орындады. Полиция мен прокуратураның қызметі кезең-кезеңімен жетілдіріліп келеді.
Менің тапсырмам бойынша құқық қорғау жүйесін реформалау жұмыстары басталды. Оның тиімді жүзеге асырылуы халықтың билік институтына деген сенімін едәуір арттырып, қоғамдағы құқықтық тәртіп пен әлеуметтік әділдікті нығайтуға септігін тигізеді. Еліміздің қорғаныс қабілетін күшейту үшін мемлекет әскери дайындық пен Қарулы Күштерді жабдықтауға баса мән береді. Әскери қызметшілердің, құқық қорғау органдары қызметкерлерінің жалақысы өсіп, әлеуметтік тұрғыдан қорғалуы біртіндеп жақсарып келеді. Әскери қызметшілерге жан-жақты қолдау көрсету мемлекеттің айрықша назарында болады", – деді Мемлекет басшысы.
Қасым-Жомарт Тоқаев елімізде өз өмірін Отан қорғауға арнаған кәсіби мамандар аз емес екенін ерекше атап өтіп, бүгінгі марапат пен алғысты барша әскери қызметшілерге, Күштік құрылым қызметкерлеріне көрсетілген шынайы құрмет деп бағалады.
Сіздердің отаншылдық рухтарыңыз, ең алдымен, жас ұрпақ үшін жақсы үлгі-өнеге. Олар сіздерге қарап бой түзейді. Сіздер ерен еңбек пен нағыз ерлікті паш етіп келесіздер. Жоғары мемлекеттік марапаттар Отан алдындағы қызметтеріңізге жаңа жігер береді деп сенемін", – деді Президент.
Мемлекет басшысы барлық әскери қызметшілер мен құқық қорғау органдары қызметкерлеріне Отан алдындағы адал қызметі үшін алғыс айтты.
Салтанатты рәсім барысында Марат Құсайыновқа, Руслан Шпекбаевқа генерал-лейтенант әскери атағы; Айдар Аймұрзинге, Рүстем Ақбалинге, Нұрлан Алдияровқа, Алмаз Ахмадиевке, Серік Борамбаевқа, Мереке Күшікбаевқа, Қуанышбек Үштаевқа генерал-майор әскери атағы; Айбар Дуанбаевқа, Шыңғыс Қоңқашевқа, Руслан Сейсембаевқа ұлттық қауіпсіздік генерал-майоры арнаулы атағы; Мұрат Баймұқашевқа, Оңал Бекиевке, Ақынқали Дәрменовке, Арыстанғани Заппаровқа, Нұрлан Мәсімовке, Марат Төлебаевқа полиция генерал-майоры арнаулы атағы; Жанат Ешмағамбетовке әділет генерал-майоры арнаулы атағы; Қайрат Әбдіхановқа, Жарқынбек Бақашбаевқа, Мақсат Қожабаевқа, Серік Шалабаевқа 3-сыныпты мемлекеттік әділет кеңесшісі сыныптық шені; Нұрлан Шабдарға 3-санатты жоғары біліктілік сыныбы берілді.
Сондай-ақ, рәсім барысында жоғары мемлекеттік наградалармен марапаттау рәсімі өтті.
Сонымен қатар іс-шара барысында І дәрежелі "Даңқ" орденімен Мемлекеттік күзет қызметі бастығының орынбасары Талғат Мұхтаров;
ІІ дәрежелі "Даңқ" орденімен Ұлттық қауіпсіздік комитетінің Қарағанды облысы бойынша департаментінің бастығы Кендебай Адамбеков, Сыбайлас жемқорлыққа қарсы іс-қимыл агенттігі төрағасының бірінші орынбасары Олжас Бектенов, Ұлттық ұлан "Батыс" өңірлік қолбасшылығының қолбасшысы Арман Жұмағалиев наградталды.
Бұдан бөлек І дәрежелі "Айбын" ордені Ұлттық қауіпсіздік комитеті департамент бастығының орынбасары Әділжан Алшыновқа, Қазақстан Республикасы Қарулы Күштері Бас штабы Инженерлік әскерлер департаментінің бастығы Нұрлан Қонысовқа;
ІІ дәрежелі "Айбын" ордені Ішкі істер министрлігі Шығыс Қазақстан облысының полиция департаменті Өскемен қаласының полиция басқармасы патрульдік полиция батальонының инспекторы Нұржан Кәкеевке, Бас прокуратураның департамент бастығы Серік Кәріпбековке, Қаржылық мониторинг агенттігі Тергеу департаментінің басшысы Саят Саукомбековке, Төтенше жағдайлар министрлігі Өртке қарсы қызмет комитеті төрағасының орынбасары Марат Хасеновке;
ІІІ дәрежелі "Айбын" ордені Мемлекеттік күзет қызметінің Айрықша мақсаттағы күштері "Батыр" президенттік полкінің маманы Евгений Пивеньге табысталды.
Ал Ішкі істер министрлігі Жамбыл облысының полиция департаменті Жергілікті полиция қызметі басқармасының аға инспекторы Диляфруз Кинжеханова "Құрмет" орденімен марапатталды.
Ішкі істер министрлігінің Көліктегі полиция департаменті Қызылорда станциясындағы желілік полиция бөлімінің аға инспекторы Дархан Әбдікәрімов, Төтенше жағдайлар министрлігі Қостанай облысы төтенше жағдайлар департаменті Өрт сөндіру және авариялық-құтқару жұмыстары қызметі № 5 өрт сөндіру бөлімінің бөлімше командирі Владимир Беляков, Төтенше жағдайлар министрлігі Нұр-Сұлтан қаласы төтенше жағдайлар департаменті Өрт сөндіру және авариялық-құтқару жұмыстары қызметі № 6 мамандандырылған өрт сөндіру бөлімінің аға өрт сөндіруші-құтқарушысы Айдархан Кемаладинов, Ішкі істер министрлігі Алматы облысының полиция департаменті Талдықорған қаласының полиция басқармасы патрульдік полиция ротасының инспекторы Дәурен Нәрікбаев, Ішкі істер министрлігінің Батыс Қазақстан облысы бойынша қылмыстық-атқару жүйесі департаменті РУ-170/1 мекемесінің бақылаушысы Абылай Төлеев "Ерлігі үшін" медалімен наградталды.
"Жауынгерлік ерлігі үшін" медалі Қорғаныс министрлігінің 18 404 әскери бөлімі десанттық-шабуылдаушы батальонының командирі Жасұлан Байбарақовқа, Қорғаныс министрлігі 15 632 әскери бөлімінің командирі Жанат Бектұрғановқа, Қазақстан Республикасы Қарулы Күштері Бас штабының департамент бастығы Елнұр Бисембаевқа, Қорғаныс министрлігі 14 776 әскери бөлімінің аға офицері Максим Добросельскийге, Қорғаныс министрлігінің 21 450 әскери бөлімі мотоатқыштар батальоны ротасының технигі – аға механигі-жүргізушісі Нұржан Жарияқұлға, Қорғаныс министрлігінің 21 814 әскери бөлімі зымыран-артиллериялық кемесінің (3-дәрежелі) командирі Бауырғали Имашевқа, Қазақстан Республикасы Қарулы Күштері Әуе қорғаныс күштері қолбасшысының басқармасы жауынгерлік даярлық басқармасының аға инспекторы-ұшқышы – бағыт аға офицері Ерлан Қозғұловқа, Ұлттық қауіпсіздік комитетінің басқарма бастығы Шынаркүл Сейдахметоваға берілді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
Дубайда "Астана Опера" спектаклін 12 мың көрермен тамашалады
Астана Опера" балет труппасы Дубайда хореограф Юрий Григорович қойған П.Чайковскийдің "Щелкунчик" балетін сахналады. ҚР Мәдениет және ақпарат министрлігінің қолдауымен өткен бұл гастрольдер елордалық театрдың биылғы шетелдік турларының қорытындысы болды, деп хабарлайды ҚР Мәдениет және ақпарат министрлігінің баспасөз қызметінен.
Қойылымның хореографиясы бастапқыдай қалуы үшін "Астана Опера" труппасымен гастроль алдында Юрий Николаевич Григоровичтің ассистенттері Руслан Пронин мен Оксана Цветницкая жұмыс істеді.
Спектакльді театрдың симфониялық оркестрі италиялық маэстро Джузеппе Акуавиваның жетекшілігімен сүйемелдеді.
Айта кету керек, спектакльдің былтырғы жетістігінен кейін "Астана Опера" балет труппасының көркемдік жетекшісі, әлемдік балет жұлдызы Алтынай Асылмұратова бастаған қазақстандық труппаны Дубай театры қайта шақырды.
Астана Опера" труппасының "Дубай Операда" "Щелкунчик" балетімен келіп, қайта өнер көрсетіп жатқанына қуаныштымыз. Былтыр табысқа толы жыл болды. Сол кездегі труппаның керемет өнерінен кейін, біз оларды тағы да шақырдық. Таңғажайып қойылым, талантты әртістердің өнерін тамашалағанымызға өте қуаныштымыз", - деді "Дубай Опера" директоры Паоло Петрочелли.
Керемет қойылым! Спектакльдің көркемдігіне тәнті болдым. Мехикодан Дубайға арнайы "Щелкунчикті" көру үшін ұшып келдім. Осынау керемет опера театры залында барлық костюмдерді, декорацияларды және жарқын түстерді көру мүмкіндігіне ие болғаныма өте қуаныштымын. Бұл труппаның жоғары деңгейдегі өнерін тамашалауға керемет мүмкіндік болды", - деді Артуро Перес Ривера.
Еске сала кетейік, алғашқы қойылым 19 желтоқсанда сәтті өтті. Алда әлі үш гастрольдік күн бар - 20, 21 және 22 желтоқсан. Бұл күндері жетекші солистер көрерменді ертегінің сиқырлы әлеміне жетелейді. Айта кету керек, труппа 6 спектакль ұсынады, олардың әрқайсысы аншлагпен өтеді деп күтілуде. Қойылым күндері көрермен ғажайып атмосфераны сезінуге мүмкіндік алады. Хореограф дайындаған жеке нөмірлер, атап айтсақ мүлгіген қысқы табиғаттың таңғажайып бейнесін көз алдыңа әкелетін ақ ұлпа қар бүршіктерінің биі ересектерге де, балаларға да зор әсер қалдырады. Классикалық хореография, символизм, қиял-ғажайып бейнелер мен Симон Вирсаладзенің көркемдік безендіруі бұл балетті шынымен ұмытылмастай етеді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстан ІІМ басшысы Әзірбайжанның Ішкі істер министрімен кездесті
Әзірбайжан Ішкі істер министрлігінің делегациясы жұмыс сапарымен Қазақстанның полиция ведомствосында болды, - деп хабарлайды Polisia.kz.
Ержан Саденов пен Вилаят Эйвазов қылмысқа қарсы күрес саласындағы өзара іс-қимылдың, оның ішінде есірткінің заңсыз айналымына, киберқылмысқа, экстремизм және басқа да қатерлерге қарсы күрестің басым мәселелерін талқылады.
Кездесуге қатысушылар қызметтің көптеген бағыттары бойынша екіжақты ынтымақтастықтың оң нәтижелерін атап өтті. Жедел ақпарат алмасу және оң жұмыс тәжірибесімен бөлісу бойынша серіктестікті дамыту перспективалары айқындалды.
Сондай-ақ іс-шара аясында Әзірбайжан ІІМ делегациясы құқықтық тәртіпті қамтамасыз етуде қолданылатын цифрлық шешімдермен танысты. Кездесу қорытындысы бойынша екі елдің министрлері хаттамаға қол қойды, онда қазіргі заманғы сын-қатерлерге қарсы іс-қимылды нығайту жөніндегі шаралар нақтыланған.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстан Ұлттық Банкі доллар айырбастау туралы мәлімдеме жасады
Қазақстан Ұлттық Банкі (бұдан әрі - ҚҰБ) 1996 - 2013 жылдар аралығындағы кезеңде шығарылған қолма-қол АҚШ долларын ЕДБ айырбастау пункттерінің және банктік емес айырбастау пункттерінің айырбастаудан бас тарту фактілері бойынша азаматтардан түсетін шағымдардың жиілеп кеткені туралы хабарлайды.
Осыған байланысты ҚҰБ бұл банкноталардың заңды төлем құралы болып табылатынын және олардың түпнұсқалығы расталған және зақымдануы болмаған жағдайда Қазақстанның айырбастау пункттерінде комиссиясыз қабылданатынын еске салады.
Қазақстан аумағында қолма-қол шетел валютасымен айырбастау операцияларын жүзеге асыру тәртібі туралы.
Егер банкноталар бүлінбеген болса және айналыста жарамсыз деп танылмаған жағдайда ҚР заңнамасында қолма-қол шетел валютасын айырбастау үшін комиссиялар көзделмеген.
Айырбастау пункттері алынатын комиссияны айырбастауға қабылданатын банкноталар төлемге қабілетсіз немесе одан әрі айналысқа жарамсыз болған жағдайда ғана белгілеуі мүмкін екенін атап өтеміз.
Егер айырбастау пункті комиссия алса немесе шетел валютасын шыққан жылына қарай қабылдаса, валюта айырбастаудан негізсіз бас тартса, сол айырбастау пункті орналасқан жердегі Ұлттық Банктің аумақтық филиалына шағымдану қажет. Шағыммен қатар барлық қажет ақпарат пен құжатты қоса көрсету керек, бұл заңға сәйкес шара қолдануға мүмкіндік береді.
ҚҰБ аумақтық филиалдарының байланыс деректері жөніндегі ақпаратты ҚҰБ-тың ресми интернет-ресурсынан табуға болады.
Қазақстан аумағында қолма-қол шетел валютасымен кассалық операцияларды жүзеге асыру тәртібі туралы.
Қазақстан Республикасындағы банктер және банк қызметі туралы" ҚР Заңының (бұдан әрі - Банктер туралы заң) 30-бабы 2-тармағының 2) тармақшасына сәйкес банк операцияларына депозиттерді қабылдау, жеке тұлғалардың банктік шоттарын теңгемен және шетел валютасымен ашу және жүргізу жатады.
Касса операциялары мен банкноталарды, монеталарды және бағалы заттарды инкассациялау ережелеріне сәйкес, банк мынадай касса операцияларын жүзеге асырады: клиенттен қолма-қол ақша қабылдау және клиентке қолма-қол ақша беру. Бұл операциялар банк туралы заңның 30-бабында көрсетілген банк операцияларын және басқа да операцияларды орындау үшін жүргізіледі.
Осылайша, ЕДБ кассалық операцияларды жүзеге асырғаны үшін алынатын комиссияларды өздерінің ішкі тарифтік саясатына сәйкес белгілеуге құқылы.
Бұл ретте Банктер туралы заңға сәйкес банктер мен банк операцияларының жекелеген түрлерін жүзеге асыратын ұйымдар сыйақы мөлшерлемелері мен комиссияларды, сондай-ақ банк қызметтерін көрсеткені үшін тарифтерді ҚР заңдарында белгіленген шектеулерді ескере отырып өз бетінше белгілейді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
ҚМА Кинологиялық орталығының мамандары мен иісшіл иттер қоғамдағы заңдылық пен тәртіпті орнатуға өз үлесін қосуда
ҚМА Кинологиялық орталығының мамандары мен иісшіл иттер қоғамдағы заңдылық пен тәртіпті орнатуға өз үлесін қосуда, деп хабарлайды ҚМА баспасөз қызметінен.
Экономикалық және қаржылық қауіпсіздікті қамтамасыз ету, контрабандаға қарсы күрес және заң мен тәртіпті сақтау Агенттіктің басым міндеттері болып қала береді.
Бұл жағдайда қызметтік-іздестіру иттері де өз көмегін көрсетті.
Ағымдағы жылдың басынан бері Агенттік иттердің көмегімен есірткіні заңсыз тасымалдаудың 33 фактісін анықтады.
Табылған есірткінің жалпы салмағы 17 келі, оның ішінде:
- марихуана/каннабис - 5,2 кг. (20 факт);
- гашиш/гашиш майы - 11,5 кг. (11 факт);
- көкнәр сабаны, тетрагидроканнабинол және басқа да синтетикалық есірткі түрлері.
Сонымен қатар, осы кезеңде Еуразиялық экономикалық одақтың кедендік шекарасы арқылы декларацияланбаған валютаны заңсыз өткізудің 17 фактісі анықталды.
Анықталған валютаның жалпы сомасы 529 152 АҚШ доллары мен 9 500 еуроны құрады.
Оның ішінде 15 жағдай Алматы қаласында, 2 жағдай Маңғыстау облысында тіркелген.
Еске салайық, 2023 жылы кинологиялық орталық мамандары есірткі транзитінің 29 фактісін және валютаны заңсыз шығару әрекетінің 18 фактісін анықтаған.
ҚР ҚМА кинологиялық қызметі қаржылық мониторинг агенттігінің бөлімшесі, ал оның мамандары арнайы дайындалған жедел қызметкерлер болып табылады. Оларға Қазақстан Республикасының мемлекеттiк шекарасы арқылы есiрткi мен валютаның, оларды өткiзудiң қауiптi бағыттарында контрабанданың жолын кесу үшiн арнайы дайындалған қызметтiк-iздестiру иттерiн дайындау және пайдалану мiндетi жүктелген.
Кинологиялық орталықта дайындалған жануарлар тек Агенттіктің бөлімшелеріне ғана емес, сонымен қатар басқа да құқық қорғау органдарына, арнайы қызметтерге, әскери полицияға, ҰҚК ШҚ және Авиациялық қауіпсіздік қызметіне жіберіледі.
Кинологиялық орталықта мемлекеттік кірістер және құқық қорғау органдарының қызметкерлерінен, сондай-ақ Ауғанстан, Өзбекстан, Қырғызстан, Түркіменстан, Тәжікстан және Моңғолиядан келген 1000-нан астам кинологтар оқытылды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Ұлттық қордың Швециядағы активтерін қайтару және жаңа мүмкіндіктер - Ұлттық Банк Стати заявление бойынша мәлімдеме жасады
Қазақстан Ұлттық Банкі Қазақстан Республикасының Үкіметі, Қазақстан Ұлттық Банкі және Стати тараптары арасындағы сот дауларын реттеу процесінің сәтті аяқталғаны туралы хабарлайды.
Реттеу нәтижесінде Қазақстан Ұлттық Банкі Стати тараптарының Қазақстан Республикасы Ұлттық қорының активтеріне қойған талаптарынан бас тартуына және Швецияда қамтамасыз ету шараларының ықпалында болған Қазақстан Республикасы Ұлттық қорының активтерін өз иелігіне қайтаруға қол жеткізді.
Бұл Қазақстан Республикасы Ұлттық қорының ұзақ мерзімді кірістілігін жақсарту үшін жағдай жасауға ықпал ететін операциялық икемділікті арттыруға және әлеуетті инвестициялық серіктестердің барынша кең ауқымын тартуға жаңа мүмкіндіктер ашады.
Түпкілікті реттеу туралы келісімнің нақты шарттары жасырын болып табылады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.