Қазақстан Президенті Сингапурға барады
Сингапурға алдағы ресми сапарын ұйымдастыру мәселелері Мұхтар Тілеубердінің Халима Якубпен кездесуінде талқыланды.
СИНГАПУР. 17 ТАМЫЗ - Қазақстан Президенті Қасым-Жомарт Тоқаев Сингапурға ресми сапармен барады, деп хабарлайды KAZAKHSTAN TODAY ҚР Сыртқы істер министрлігінің баспасөз қызметіне сілтеме жасап.
Мемлекет басшысының Сингапурға алдағы ресми сапарын ұйымдастыру мәселелері Қазақстан Республикасы Премьер-Министрінің орынбасары - Сыртқы істер министрі Мұхтар Тілеубердінің Сингапур Республикасының Президенті Халима Якубпен Истана ресми резиденциясында кездесуінде талқыланды.
Тараптар елдеріміз арасындағы қатынастарды одан әрі нығайту және экономикалық байланыстарды кеңейту мәселелерін талқылады. М.Тілеуберді Сингапур басшысына Қазақстан Президенті Қасым-Жомарт Тоқаевтың ізгі тілектері мен сәлемін жеткізді.
Министр сұхбаттасын Конституцияға толықтырулар мен түзетулер енгізу бойынша елде өткізілген жалпыхалықтық референдумның нәтижелері, сондай-ақ Мемлекет басшысы Қ.Тоқаевтың "Жаңа Қазақстанды" құру бойынша саяси және экономикалық реформалары туралы егжей-тегжейлі таныстырды", - деп хабарлады ҚР СІМ баспасөз қызметі.
Х. Якуб ҚР Президентіне жылы лебізін білдіріп, Қазақстан мен Сингапур арасындағы сенімді диалог пен өзара қолдауға негізделген саяси диалог пен өзара тиімді серіктестіктің жоғары деңгейін атап өтті.
Сингапур Президенті Азиядағы бейбітшілікті, қауіпсіздік пен тұрақтылықты қамтамасыз етуге және жаһандық дінаралық диалогты ілгерілетуге ұмтылудағы, Нұр-Сұлтан қаласында өтетін Азиядағы өзара іс-қимыл және сенім шаралары жөніндегі кеңеске қатысушы елдердің алдағы саммиті және Әлемдік және дәстүрлі діндер лидерлері съезі шеңберіндегі Қазақстанның қызметін жоғары бағалады.
Сол күні СІМ басшысы М.Тілеуберді Сингапур Республикасы Премьер-Министрінің орынбасары – Қаржы министрі, Халықтық іс-қимыл партиясының төртінші буын (4G) командасының саяси көшбасшысы Лоуренс Вонгпен келіссөздер жүргізді.
Қазақстанның Сингапурмен ынтымақтастығының маңызды элементі көліктік, сауда-экономикалық және инвестициялық өзара іс-қимыл болып табылады. Осыған байланысты тараптар экономикалық кооперация жобаларын және өзара тиімді ынтымақтастық бағдарламаларын ілгерілету мәселелерін егжей-тегжейлі талқылады. Қазақстанның транзиттік әлеуетін кеңейтуге және өңдеу өнеркәсібі, ақпараттық-коммуникациялық технологиялар, құрылыс және қаржы салаларындағы Қазақстан-Сингапур кәсіпорындарының жобаларын дамытуға ерекше назар аударылды.
Сингапур тарапы "Астана" Халықаралық қаржы орталығының қызметі және Орталықтың негізгі бағыттарын дамыту бойынша қабылданып жатқан шаралар туралы хабардар етілді. Қазақстандық қаржы орталығы үшін капитал нарығын дамытудың сингапурлық тәжірибесін зерделеу өте маңызды екені атап өтілді.
Сонымен қатар, қазақстандық делегация екі күндік сапар аясында Сингапурдың ірі компанияларының басшыларымен бірқатар жемісті кездесулер өткізді. Делегация құрамында Индустрия және инфрақұрылымдық даму министрі Қайырбек Өскенбаев, "Астана" Халықаралық қаржы орталығының басқарушысы Қайрат Келімбетов, "Қазақстан темір жолы" ҰК" АҚ Басқарма төрағасы Нұрлан Сауранбаев және "Kazakh Invest" ҰК" АҚ Төрағасы Мейіржан Юсупов болды.
Келіссөздер барысында елдеріміз арасындағы экономикалық ынтымақтастықты ілгерілетуге, сондай-ақ әлеуетті жобаларды іске асыруға қатысты кең ауқымды мәселелер талқыланды. Сингапурлық компаниялар қазақстандық нарыққа және Қазақстанның инвестициялық мүмкіндіктеріне үлкен қызығушылық танытты.
Қала мен қалалық инфрақұрылымды кешенді дамытуға маманданған "Surbana Jurong" мемлекеттік инжинирингтік компаниясының басшылығымен Алматы қаласының солтүстік шекарасында серіктес қалаларды салу және дамыту жөніндегі "G4 City" бірегей инфрақұрылымдық жобасы талқыланды. Оны іске асыру бойынша сингапурлық компания отандық "Caspian Group"-пен тығыз ынтымақтастық орнатқан.
Бүгін "Surbana Jurong" 30-дан астам елде амбициялы жобалардың мастер-жоспарларын әзірледі және бүкіл әлем бойынша 100-ден астам өнеркәсіптік парктер құрды. "G4 City" жобасы Сингапурдан ғана емес, өңірдің басқа мемлекеттерінен де ауқымды инвестициялар мен инновациялық технологиялық шешімдерді тартуға арналған.
Жаһандық жеткізілімдер мен өніммен қамтамасыз етудегі тұрақты іркілістерді қоса алғанда, пандемияның әлемдік экономикаға зардаптары тараптардың жаңа экономикалық мүмкіндіктерді, өткізу нарықтарын және экспорттық бағыттарды іздеуін ескере отырып, Қазақстан мен Сингапур арасындағы экономикалық ынтымақтастық үшін жаңа перспективалар ашқанын атап өткен жөн.
Осы тұрғыда "Қазақстан темір жолы" ҰК" АҚ көлік тасымалдары саласындағы ірі жаһандық операторлардың бірі болып "PSA" (Port of Singapore Authority) компаниясымен ынтымақтастық туралы меморандумға қол қойды.
Қазақстандағы көлік-логистикалық тораптарды басқаруға "PSA International"-ды тарту құрлықтың екі жағы бойынша теңіз порттарының тұтас желісіне қолжетімділікті кеңейтуге, мультимодальдық тасымалдауды пайдалана отырып, жаһандық көлік-логистикалық тізбекке интеграциялауға және құрғақ порттарды басқару саласындағы инновациялық технологиялар мен үздік әлемдік практикаларды енгізуге ықпал етуге, ең бастысы ҚР өнімінің экспортын әлемдік нарыққа шығаруға айтарлықтай жеңілдетуге бағытталған.
Цифрландыру, ақылды қалалар құру, түрлі мемлекеттік процестерге инновациялар енгізу, сондай-ақ Үкіметтің цифрлық трансформациясы мәселелері Премьер-Министрдің офисі жанындағы Сингапурдың "Government Technology Agency of Singapore" технологиялық агенттігінің және "Crimson Logic" компаниясының басшылығымен кездесулер барысында талқыланған негізгі тақырыптар болды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
Түркістанда Ясауи кесенесі төңірегіндегі құрылыс жұмыстары шектеледі
Түркістанда Ясауи кесенесі төңірегіндегі құрылыс жұмыстары шектеледі, деп хабарлайды Төменгі палатаның баспасөз қызметінен.
Мәжіліс "Түркістан қаласының ерекше мәртебесі туралы" заң мен оған ілеспе түзетулерді екінші оқылымда қабылдады. Заңды Мемлекет басшысының тиісті тапсырмасын орындау мақсатымен Ұлттық экономика министрлігі әзірледі.
Мақсаты - Түркістанды Қазақстанның рухани-мәдени, тарихи және туристік орталығы ретінде қалыптастыру, тарихи-мәдени мұраны қорғау және рухани нысандардың бірегейлігін сақтау.
Заң аясында Қожа Ахмет Ясауи кесенесі қорғау аймағының шекарасынан 100 метр қашықтықта биіктігі жеті метрден асатын, сондай-ақ тарихи ескерткіштермен ауқымы, түсі және құрылыс материалдары бойынша үйлеспейтін нысандардың құрылысына тыйым салынады.
Сондай-ақ қолөнершілер шығындарының бір бөлігі - 10%-нан 25%-на дейінгі аралықта жергілікті бюджет есебінен өтеу қарастырылған.
Түркістан қаласы әкімдігіне 27 қосымша өкілеттік, ал мәслихатқа 7 өкілеттік беріледі.
Ілеспе түзетулер аясында Қазақстан Республикасының Жер кодексіне, "Қазақстан Республикасындағы сәулет, қала құрылысы және құрылыс қызметі туралы", "Тарихи-мәдени мұра объектілерін қорғау және пайдалану туралы", "Қазақстан Республикасындағы туристік қызмет туралы" заңдарына өзгерістер мен толықтырулар енгізіледі.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Астанада заңсыз тұрғызылған тұрғын үй кешені сүріледі
Елорданың Нұра ауданындағы Шыңғыс Айтматов көшесі, 49 мекенжайындағы өз бетінше басталған "Onyx-2" ТК-ның құрылысы тоқтатылды. Тұрғын үй кешені сүріледі, деп хабарлайды Астана қаласы әкімдігінің баспасөз қызметінен.
Елорда аумағында тұрғын үй кешендерін заңсыз салу фактілерін анықтау және жолын кесу Астана қаласы прокуратурасының үйлестіруімен жүргізіледі.
Тапсырыс беруші нысанда жерге тиісті құқықсыз, заңда белгіленген тәртіппен сараптамадан өткен жобалау-сметалық құжаттамасыз, техникалық және авторлық қадағалауларды сүйемелдеусіз және құрылыс-монтаждау жұмыстарын жүргізудің басталғаны туралы хабарламасыз құрылыс-монтаждау жұмыстарын бастаған, бұл өз кезегінде "Қазақстан Республикасындағы сәулет, қала құрылысы және құрылыс қызметі туралы" ҚР Заңының талаптарын бұзу болып саналады.
Осылайша, құрылыс салушыларға қатысты Қалалық орта сапасы мен бақылау басқармасы анықталған бұзушылықтарды жою және болдырмау бойынша шаралар қабылдауда.
Естеріңізге сала кетейік, нысандарды салу кезінде "Қазақстан Республикасындағы сәулет, қала құрылысы және құрылыс қызметі туралы" Заңы сақталуы тиіс.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Ақтөбеде шахтерлер мен жұмысшыларға берілетін жалақы қарызы 200 млн теңгеден асып жығылды
Ақтөбе облысы Хромтау аудандық прокуратурасымен "Оңтүстік шахта құрылыс" ЖШС-нің (бұдан әрі - ЖШС) 156 жұмысшыға 165 млн теңгеден астам жалақы төлемеу дерегі анықталды, деп хабарлайды мекемінің баспасөз қызметінен.
Прокуратураның үйлестіруімен құқық қорғау органдарының, жергілікті атқарушы және уәкілетті органдар басшыларының қатысуымен кеңес өткізілді. Бұл жиынға "ҚазХром" ТҰК" АҚ басшылығы мен ЖШС-тің құрылтайшысы да шақырылды.
Қабылданған шаралармен жалақы қарызы толығымен өтелді.
Басқа жағдайда, Шалқар аудандық прокуратурасымен "Ұлы Борсық" КМК-нің 519 қызметкерге 48 млн теңгеден астам жалақы қарызы анықталып, прокурорлық ықпал ету актісімен өтелді.
Осылайша, аталған кәсіпорындардағы 213 млн теңге болатын жалақы қарыздары өтеліп, жұмысшылардың құқықтары қалпына келтірілді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Алматы Мәслихаты құрылысқа қатаң шектеулер қоятын жаңа құрылыс ережелерін бекітті
Алматыда Мәслихаттың кезектен тыс сессиясында депутаттар қаланың жаңа құрылысы ережелерін бекітті. Бұл ережелер нүктелі құрылысқа, тау бөктерлерінің, жасыл аймақтар мен аулалардың игерілуіне жол бермеу мақсатында әкімдік тарапынан әзірленген. Бұған дейін құжат сарапшылармен және жұртшылықпен кеңінен талқыланған болатын, деп хабарлайды Алматы қаласы әкімдігінің баспасөз қызметінен.
Мәслихат депутаттарының алдында сөз сөйлеген Қалалық жоспарлау және урбанистика басқармасының басшысы Нұрлан Боранбаев жаңа ережелер құрылысқа қатаң шектеулер енгізуді, көппәтерлі тұрғын үйлерді қабылдауда мемлекеттік органдардың бақылауын күшейтуді, сондай-ақ сәулет-құрылыс бақылау органдарының функцияларын кеңейтуді қарастыратынын атап өтті.
Жаңа ережелер қандай шектеулерді көздейді?
Абай даңғылы мен Әл-Фараби даңғылы арасындағы құрылысқа биіктік шектеуі белгіленді: барлық үлгідегі ғимараттардың биіктігі 9 қабаттан және 35 метрден аспауға тиіс.
Ерекшелік тек қоғамдық маңызы бар, сәулет-урбанистикалық негіздемесі бар, жобалық шешімдердің орнықтылығы мен экологиялық талаптарға сай, энергия үнемдеу және ресурс үнемдеу технологияларын қолдану арқылы салынатын бірегей нысандарға ғана жасалады.
Сондай-ақ, жаңа ережелер сейсмикалық қауіпті аймақтар мен тау бөктерлеріндегі ШААЖ, әл-Фараби даңғылы, Саин мен Жандосов көшелерінің оңтүстігіндегі құрылыс тәртібін реттейді:
- Тау бөктеріндегі, соның ішінде еңіс бұрышы 15 градустан асатын аумақтарда құрылыс салуға тыйым салынады;
- Бұрын қабылданған ғимараттардың биіктігі 12 метрден және 3 қабаттан аспауға тиіс деген шешім бекітілді (қоғамдық-мәдени нысандардан басқа);
- Қайта құру кезінде террасалар мен техникалық қабаттарды қайта жабдықтауға тыйым салынады.
Бұған қоса, қаланың барлық аумағында III санаттан төмен емес тұрғын үй салу талабы бекітіледі және әр пәтерге кемінде 1 автотұрақ орнын қарастыру қажет.
Нүктелі құрылысқа жол бермеу және рекреациялық аймақтарды сақтау жөніндегі шаралар
Алматыда тұрғын кварталдар мен аулаларда нүктелі құрылыстың салыну мәселесі өзекті болып отыр. Бұрын заңнамалық тұрғыда жасыл аймақтар мен ауладағы балалар алаңшаларында құрылыс салуға тыйым болмаған жағдайда, жаңа ережелерде мұндай құрылысқа қатаң тыйым салынады.
Сонымен қатар, қаланың орталық магистральдарында, әлеуметтік нысандар мен адамдар көп жиналатын орындардың маңында жанармай құю бекеттері мен техникалық қызмет көрсету орталықтарын салуға тыйым салынады.
Табиғи қорларды және аулалық рекреациялық аймақтарды сақтау мақсатында құрылыс аумағын кеңейту үшін табиғи ландшафтты өзгертуге, тау бөктерлеріндегі жыралар мен жылғаларды жабуға, тау бөктерін кесуге тыйым салынады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
2024 жылдың басынан бері 18 мыңнан астам этникалық қазақ қандас мәртебесін алды
2024 жылы 18 035 этникалық қазақ тарихи отанымен табысып, қандас мәртебесін алды. Жалпы 1991 жылдан бері республикаға 1 млн 146 мың этникалық қазақ оралды, деп хабарлайды Қазақстан Республикасы Еңбек және халықты әлеуметтік қорғау министрлігінің баспасөз қызметінен.
Жыл басынан Қазақстанға келген қандастардың 45,4% - Қытайдан, 38,9% - Өзбекстаннан, 6% - Моңғолиядан, 5,8% - Түрікменстаннан, 2,7% - Ресейден және 1,3% басқа елдерден.
Осы жылғы 1 желтоқсандағы жағдай бойынша еңбекке қабілетті жастағы этникалық қоныс аударушылар саны 57,1%-ды, еңбекке қабілетті жастан кіші 33,4%-ды және зейнеткерлер 9,5%-ды құрайды.
Еңбекке қабілетті жастағы қандастардың ішінен білім деңгейі бойынша 17,5%-ы жоғары білімді, 25%-ы орта кәсіби білімді, 54,7%-ы жалпы орта білімді, және 2,8%-ының білімі жоқ.
Қоныс аударған этникалық қазақтар республиканың түрлі өңірлеріне қоныстанды.
Сонымен бірге, қандастарды қоныстандыру үшін келесідей еңбек күші тапшы өңірлер анықталды: Ақмола, Абай, Қостанай, Павлодар, Шығыс және Солтүстік Қазақстан облыстары.
Қоныстандыру өңірлерінде 2024 жылға арналған қандастарды қабылдау квотасы 3 033 адамды құрайды. Биылғы 1 желтоқсандағы жағдай бойынша қоныстандыру өңірлеріне 2 961 қандас қоныс аударды.
Жоғарыда аталған өңірлерде қоныстанған қандастарға көшуге субсидия түрінде мемлекеттік қолдау шаралары ұсынылады - бір мезгілде отағасына және отбасының әрбір мүшесіне 70 АЕК (258,4 мың теңге) мөлшерінде; тұрғын үй жалдауға және коммуналдық қызметтерге ақы төлеуге - бір жыл ішінде 15-тен 30 АЕК (55,3-ден 110,7 мың теңгеге дейін) мөлшерінде.
Жыл басынан бері 2 624 қандасқа түрлі қолдау шаралары көрсетілді. Атап айтқанда, 794 адам тұрақты жұмысқа орналастырылды.
Сонымен қатар, ерікті қоныс аударудың тиімділігін арттыру мақсатында азаматтар мен қандастарды еңбек күші тапшы өңірлерге қоныс аударуға қатысатын жұмыс берушілерді қолдау бойынша институционалдық шаралар қабылданды. Тұрғын үй сатып алу, салу үшін немесе ипотекалық тұрғын үй қарыздары бойынша бастапқы жарнаның бір бөлігін жабу үшін экономикалық ұтқырлық сертификаты тұрғын үй құнының 50%-ы немесе бір отбасына 4,28 млн теңгеге дейін мөлшерінде біржолғы өтеусіз және қайтарымсыз негізде енгізілді. Осы жылғы 1 желтоқсанындағы жағдай бойынша 2 449 адам сертификат алды.
Естеріңізге сала кетейік, өткен жылда пилоттық режимде Қазақстан елшіліктері арқылы "бір терезе" қағидаты бойынша қандас мәртебесін беру тетігі іске асырылды. Пилоттық жоба шеңберінде елімізге бару, жұмыс орны, тұрғын үй беру мүмкіндіктері туралы мәселені шешуге және республика аумағына кірмей-ақ қандас мәртебесін алуға болады. Бүгінгі таңда этникалық қазақтардан жаңа форматта 22 666 өтініш қабылданды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Энергетика министрі Алмасадам Сәтқалиев Алматы қаласының тұрғындарымен кездесу өткізді
Энергетика министрі Алмасадам Сәтқалиев Алматы қаласының тұрғындарымен кездесу өткізді, деп хабарлайды ҚР Энергетика министрлігінің баспасөз қызметінен.
Кездесу барысында министр қала тұрғындарын мұнай-газ және энергетика салаларын дамыту жөніндегі ведомствоның қабылдаған шаралары туралы хабардар етті.
Алматы қаласын газдандыру деңгейі 100 % құрайды, бүгінде 2 млн. жуық адам газбен қамтылған.
Алматы облысы мен Алматы қаласының электр станциялары ағымдағы жылы ішкі тұтыну көлемі 11,7 млрд. кВтсағ болатын 6,7 млрд. кВтсағ электр энергиясын өндірді.
АлЭС" АҚ станцияларының негізгі жабдықтарының орташа физикалық тозу деңгейі 73-пен 85% арасындағы деңгейді құрайды.
Алатау Жарық Компаниясы" АҚ өңірлік электр желілік компаниясының өз активтерінде 8 528 км кабельдік және әуе электр беру желілері бар. Кәсіпорын теңгерімінде 2 748 кіші станция бар. Электр желілік шаруашылықтың физикалық тозуы 88,8 %-ды құрайды.
АлЭС" АҚ электр станцияларының күрделі жөндеулері бекітілген графикке сәйкес орындалып жатыр.
2024 жылы 1,8 млрд.теңге сомасына жөндеу жұмыстары жүргізілді.
2022-2023 жылдармен салыстырғанда негізгі жабдықтың апаттылығы төмендегені байқалады. Қаланың экологиялық мәселелерін шешу шеңберінде "АлЭС" АҚ ЖЭО-ны газға ауыстыру жобасы іске асырылуда.
Алматы ЖЭО-2-ні газға толық ауыстыруды 2026 жылы аяқтау жоспарлануда. Жобаны іске асыру зиянды заттар шығарындыларын ЖЭО-2 жылына 37,3-тен 2,7 мың тоннаға дейін төмендетуге мүмкіндік береді", - деді министр.
Өңірдегі газ тапшылығын жабу бойынша мәселелер пысықталуда.
Бүгінгі таңда Алматы қаласы мен Алматы облысы бойынша ең жоғары кезеңдерде газды тұтыну сағатына 800 мың текше метрге дейінгі көрсеткішті құрайды, бұл оңтүстік өңірдегі газ құбырының қолданыстағы схемасы мен жай-күйі кезіндегі ең жоғары көрсеткіш болып табылады.
Алматы ЖЭО газдандыруды ескере отырып, өңір бойынша газ тұтынудың өсуі таяу болашақта сағатына 2 млн.м3 дейін күтіледі.
Алматы қ. ЖЭО газ көліктік инфрақұрылымымен қамтамасыз ету мақсатында "Қазақстан-Қытай" және "Алматы-Байсерке-Талғар" магистральдық газ құбырлары арасында TIP-04 көпірін, "Алматы-Байсерке-Талғар" магистральдық газ құбырының 2-ші желісін, ЖЭО-2 және ЖЭО-3 үшін АГТС салу бойынша жобалау-сметалық құжаттаманы әзірлеу жүргізілуде.
Айтылған барлық мәселелер Үкіметтің тұрақты бақылауында", - деп түйіндеді министр.
Кездесуге қатысушылар өздерін қызықтырған барлық сұрақтарын қойып, оларға толық жауап алды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Жасанды интеллектіні қолдану бойынша ашық әрі қауіпсіз жағдай жасау басты мақсат
ҚР Премьер-министрі Олжас Бектеновтің төрағалығымен өткен Үкімет отырысында қоғамдық өмірдің барлық саласына жаңа цифрлық технологиялар мен жасанды интеллектіні енгізу мәселесі қаралды. Бұл бағытта атқарылып жатқан жұмыстар туралы цифрлық даму, инновациялар және аэроғарыш өнеркәсібі министрі Жаслан Мәдиев баяндады, деп хабарлайды Үкіметтің баспасөз қызметінен.
Цифрлық үкімет кеңсесінде Премьер-министрге отандық цифрлық шешімдерді іске асыру барысы көрсетілді. Цифрлық даму, инновациялар және аэроғарыш өнеркәсібі министрі Жаслан Мәдиев "Әлеуметтік әмиян", "ОТӨ тізілімі", "Онлайн-нотариус" жобаларын, азаматтар өтініштерін жүйелеуге арналған e-Otinish платформасын және басқа да жобаларды таныстырды.
Олжас Бектенов экономиканы ынталандыру үшін цифрлық орта құрудың маңызды екенін баса айтты. Озық елдердің барлығы цифрландыру мен жасанды интеллектіні дамытуға жаппай инвестиция салып, өз стратегияларын жасауда. Цифрлық технологиялар бізде қазірдің өзінде өнеркәсіп, экология, денсаулық сақтау, білім беру, жұмысқа орналастыру, әлеуметтік және құқықтық қолдау, салық секторы мен бизнес-ортада белсенді қолданылып келеді.
Мемлекет басшысы мемлекеттік басқару жүйесіндегі цифрлық трансформация экономика мен қоғамдық өмірдегі өзгерістерге жәрдем беруге тиіс екенін атап өтті. Нейрондық желілер арқылы біз тәуекелдерді және төтенше жағдайларды болжап, олардың алдын аламыз. Сондай-ақ проактивті түрде әрекет етуге мүмкіндігіміз бар. Цифрлық трансформация кезінде жаңа цифрлық шешімдерді интеграциялау жұмысын жүргізуіміз керек. Бұл жұмыстардың барлығы Жасанды интеллектіні дамытудың 2029 жылға дейінгі тұжырымдамасы мен Жасанды интеллект туралы жаңа заң аясында жалғасады", - деп атап өтті Олжас Бектенов.
Премьер-министр Цифрлық даму, инновациялар және аэроғарыш өнеркәсібі министрлігіне өңір әкімдерімен бірге 2025 жылы мемлекеттік органдардың қызметкерлерін жасанды интеллект құралдарына оқыту жөнінде шаралар қабылдауды тапсырды. Ғылым және жоғары білім министрлігі жасанды интеллект бойынша білім беру бағдарламалары мен курстарын дайындауы керек.
Жасанды интеллектіні одан әрі дамыту үшін мемлекеттік органдардың ақпараттық жүйелеріндегі деректер қорының қолжетімділігі бойынша бірыңғай тәсілдер әзірлеуге ерекше назар аударылды. Цифрлық даму министрлігіне мүдделі мемлекеттік органдармен және әкімдіктермен бірлесіп, ақпараттардың дер кезінде беріліп, өзекті әрі дұрыс болуын қамтамасыз ету үшін деректерді жинау, сақтау және қорғау жұмыстарын регламенттеу тапсырылды.
Жасанды интеллектіні қолдану бойынша ашық әрі қауіпсіз жағдай жасау мақсатында оны пайдалануды реттейтін заңнамалық шаралар мен нормативтік құқықтық актілерді қабылдау керек. Премьер-министр дербес деректерді қорғау, киберқауіпсіздік, жасанды интеллектіні қолдану арқылы қабылданған шешімдер үшін жауапкершілік мәселесіне баса назар аударды.
Халықтың жасанды интеллект саласындағы жаңалықтардан хабардарлығының төмендігін ескере отырып, Цифрлық даму, инновациялар және аэроғарыш өнеркәсібі министрлігіне қолданыстағы цифрлық шешімдерді одан әрі жетілдіру және оларды пайдалану туралы жұртшылықты ақпараттандыру міндеті қойылды.
Сонымен қатар Цифрлық даму министрлігіне мүдделі мемлекеттік органдармен және әкімдіктермен бірлесіп, цифрлық технологиялар мен жасанды интеллект құралдарын енгізіп, іске асырып жатқан өндіріс орындар қолдаудың нақты шараларын әзірлеу тапсырылды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.