Мәжіліс депутаты Асхат Аймағамбетовтің айтуынша, бізге оларды жабумен немесе емдеумен емес алдын алу және көмек көрсету мәселесімен айналысу маңызды, деп хабарлайды Inform.kz.
Бүгін Мәжілістің Әлеуметтік-мәдени даму комитетінде психология қызметінің проблемалары мен шешу жолдары қаралып жатыр.
- Бұл тақырып 2024 жылдың қыркүйегінде бекітілген. Бірнеше ай өткен соң соңғы оқиғаға қаншалықты маңызды екеніне көзіміз жетіп отыр. Психологиялық денсаулық мәселесі маңызды, әсіресе пандемиядан кейін, смартфонның әсерімен одан сайын күрделене түсті.
Еуропа мемлекеттерін қарайтын болсақ, оларда біршама зерттеу өткізілді, содан психологиялық денсаулықтың қаншалықты ушығып бара жатқанын көріп отырмыз.
Біздің елде психологиялық зерттеулер жеткіліксіз. Психологиялық қызмет құқықтық тұрғыдан толығымен реттелмеген, - деді Асхат Аймағамбетов Мәжіліс комитетінің отырысында.
Халық қалаулысының айтуынша, психологиялық қызмет көрсетудің тиісті нормалары бар, бірақ олшашыраңқы.
- Әртүрлі заңдарда, министрліктердің әртүрлі ережелерінде қарастырылған, бірақ жүйелі реттелген заң жоқ. Көп мемлекетте арнайы заңнама бар.
Жалпы, психиатрия, психология, психотерапия қызметін көбісі шатастырады, бәрі бірдей көрінеді, бірақ өзіндік ерекшеліктері бар.
Психикалық ауытқуы бар жандарға көрсетілетін көмек көлемі қандай, дәрі-дәрмекке қол жеткізу мәселесі күн тәртібінде тұр. Кейбіреулер психикасында ауытқуы бар адамдарды бөлек ұстап, жабу керек деп жатыр, бұл - дұрыс емес. Бізге оларды жабумен немесе емдеумен емес алдын алу және көмек көрсету мәселесі маңызды, - дейді депутат.
Айта кетейік, елімізде мінез-құлқы психикалық бұзылған (ауытқуы бар) 204 408 адамбар. Оның ішінде 44 781-і - кәмелет жасына толмаған балалар мен жасөспірімдер.
Сондай-ақ психикалық ауытқуы бар адам қандай жағдайда мәжбүрлеп емдеуге жіберілетіні туралы жазған едік.
Еске сала кетсек, елордада жасөспірім лифті ішінде баланы пышақтап тастаған еді. Кейін белгілі болғандай пышақпен шабуылдаған жасөспірім арнайы есепте тұрған.
Дәрігерлер зардап шеккен балаға дереу ота жасап, психологиялық көмек көрсетті.
Қазір баланы пышақтаған жасөспірім психиатриялық стационарда.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.