04.07.2024, 15:21 62301

Үкіметте жемшөп өндірісін дамыту мәселелері талқыланды

2024 жылы жемшөп дақылдарына арналған егіс алқабы 3,4 млн гектардан асты, бұл 2023 жылмен салыстырғанда 314 мың гектарға артық. Алайда, өңірлерде жемшөп сапасын жақсарту және егіншілік деңгейін арттыру бойынша жұмыстар күтіп тұр. Бұл мәселелер Премьер-Министрдің орынбасары Серік Жұманғариннің төрағалығымен өткен Үкімет отырысында талқыланды, деп хабарлайды Үкіметтің баспасөз қызметінен.

2023 жылы ҚР Ауыл шаруашылығы министрлігі ғылыми тәсілді қолдана отырып, Жемшөп өндіру саласын дамытудың 2025 жылға дейінгі жол картасын өзектендірді. Мақсаты 2028 жылға қарай жемшөп дақылдарының егіс алқаптарын 3,6 млн гектарға дейін кеңейту арқылы ауыл шаруашылығыда жалпы өнімінің көлемін екі есеге арттыру. 2024 жылы 3,4 млн гектардан астам жерге жемшөп дақылдары егілді.

Жемшөп дақылдары егілген алқаптың 74%-ы көпжылдық шөптердің үлесіне, 26%-ы біржылдық дақылдарға тиесілі, олардың көктемгі егісі мал шаруашылығының қажеттілігі үшін пішен мен сүрлем дайындауды қамтамасыз етеді. Өңірлерде шөптерді жаңарту, шабындық пен жайылым жерлерді жақсарту бойынша жұмысты күшейту қажет, соның салдарынан мал азығында әлі де шөп пен жемшөп, яғни қарапайым жем басым. Бұл ретте барлық өңірде Үлкен жоба шеңберінде тауарлы-сүт фермаларының құрылысы жүріп жатыр, олар үшін пішен, жүгері, сүрлем дайындау қажет", - деп атап өтті ауыл шаруашылығы вице-министрі Аманғали Бердалин.

Қазіргі уақытта республика бойынша пішенмен қамтамасыз ету 45%-ды, ал сүрлеммен қамтамасыз ету 72%-дан аспайды. Жалпы, 2024 жылы 25,5 млн тонна шөп, 1,6 млн тонна пішен, 4,6 млн тонна сабан, 5,7 млн тонна құнарлы жем және 2 млн тонна сүрлем дайындау жоспарланған.

Бізде жер жеткілікті, бірақ ұтымды игерілмейді. Өңірлердің алдына жемшөп өндіру бойынша нақты міндеттер қою керек. Жол картасын әр өңір үшін 2-3 жылға арналған жемшөп дақылдары жөніндегі жоспармен толықтыру қажет", - деп тапсырды Серік Жұманғарин.

Сондай-ақ өңірлердің әкімдіктеріне мал азығы дақылдары үшін суармалы жер көлемін кеңейтуге, жемшөп дақылдарының тұқым шаруашылығын дамытуға, пайдаланылатын жайылымдық жердің өнімділігін арттыруға баса назар аудара отырып, егіншілікті әртараптандыру тапсырылды.

Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.

тақырып бойынша жаңалықтар

05.07.2024, 22:40 30956

Қазақстанда БҰҰДБ-ның 200-ден астам жобасы жүзеге асырылды

Премьер-Министрдің орынбасары - ұлттық экономика министрі Нұрлан Байбазаров Астанада Қазақстандағы БҰҰ Даму Бағдарламасының (БҰҰДБ) тұрақты өкілі Катаржина Вавьерниамен кездесу өткізді, деп хабарлайды Үкіметтің баспасөз қызметінен. БҰҰДБ қызметі БҰҰ-ға мүше елдердің экономикалық дамуына жәрдемдесуге бағытталған. ҚР Үкіметімен, қоғамдық ұйымдармен, бизнес-сектормен, БҰҰ агенттіктерімен және басқа серіктестермен серіктестікте Қазақстанда құны $200 млн асатын 200-ден астам жобаны жүзеге асырды. Олардың ішінде шағын және орта бизнесті, жасыл энергетиканы, ауыл шаруашылығын, экотуризмді және басқа да бағыттарды дамытуға бағытталған жобалар бар. Кездесу барысында Нұрлан Байбазаров еліміздің 2025 жылы Нью-Йоркте өтетін Жоғары деңгейдегі Саяси форумда орнықты даму мақсаттарын іске асыру жөніндегі үшінші Ерікті ұлттық шолуды ұсынуға дайындығы туралы да хабардар етті "Орнықты даму мақсаттарына қол жеткізу Қазақстанның ұлттық басымдығы саналады. Біз мемлекетіміздің тұрақты дамуына бағытталған оңтайлы шешімдерді іздеу үшін әртүрлі алаңдарда мақсаттарды іске асыру мәселелерін талқылауға көп көңіл бөлеміз. Ерікті шолу еліміздің негізгі жетістіктерін, сын-қатерлері мен туындайтын проблемаларды объективті түрде айқындайды", - деп толықтырды Н. Байбазаров. Сондай-ақ Қазақстан БҰҰДБ-мен ынтымақтастықты одан әрі нығайтуға, атап айтқанда, БҰҰДБ-ның 202-ге арналған Елдік бағдарламасын табысты іске асыруға мүдделі екендігі атап өтілді.

05.07.2024, 22:39 31161

Қазақстанда ЭЫДҰ өкілдігін ашу ұсынылды

Қазақстан Премьер-Министрінің орынбасары - ұлттық экономика министрі Нұрлан Байбазаров Экономикалық ынтымақтастық және даму ұйымы (ЭЫДҰ) Еуразия бөлімінің басшысы Уильям Томпсонмен кездесті, деп хабарлайды Үкіметтің баспасөз қызметінен. Тараптар ұйымның ұсынымдарын имплементациялау барысын, ҚР Үкіметі мен ЭЫДҰ Хатшылығының 2025 жылға дейінгі бірлескен іс-қимыл жоспарын іске асыру, сондай-ақ ЭЫДҰ-ның Еуразиялық бәсекеге қабілеттілік бағдарламасы аясындағы ынтымақтастық мәселелерін талқылады. Кездесуде Қазақстанда ЭЫДҰ өкілдігін ашу бастамасы айтылды. Бүгінде ұйымның аймақтық кеңселері Қытайда, Индонезияда, Украинада және Грекияда жұмыс істейді. Уильям Томпсон ЭЫДҰ-ның Қазақстанмен өзара іс-қимылдың оң тәжірибесін атап өтті. Ұсынымдарға сәйкес елімізде бірқатар саяси және экономикалық өзгерістер жүргізілді: инвестициялық омбудсмен институты енгізілді, бюджет қаражатының жұмсалуына парламенттік бақылау күшейтілді, елдің 2060 жылға дейінгі төмен көміртекті даму стратегиясы әзірленді, жауапты бизнес жүргізу жөніндегі ұлттық байланыс және Жоғары аудиторлық палата құрылды. Билікті орталықсыздандыру процесі басталды - аудандар мен облыстық маңызы бар қалалардың әкімдерін тікелей сайлау енгізілді. "Еліміз ЭЫДҰ-ның 15 жылдан астам тұрақты серіктесі әрі Орталық Азияда оның ұсынымдарын имплементациялау бойынша көшбасшы. 2025 жылы Қазақстан осы беделді халықаралық ұйымға толыққанды мүше ретінде кіру үшін өтінім беруге ниетті. ЭЫДҰ-мен әрі қарайғы ынтымақтастығымыз мемлекетіміздің әлеуметтік-экономикалық және құқықтық аспектілерінің дамуына оң әсер ететініне сенімдіміз", - деп атап өтті Нұрлан Байбазаров.

05.07.2024, 17:22 37386

Қытай Қазақстанға "Қазсушар" мамандарын даярлауға және су үнемдеу технологияларын енгізуге көмектесуге дайын

Қытай Қазақстанға "Қазсушар" мамандарын даярлауға және су үнемдеу технологияларын енгізуге көмектесуге дайын, деп хабарлайды ҚР Су ресурстары және ирригация министрлігінің баспасөз қызметінен.

Төрағасы Си Цзиньпиннің Қазақстанға мемлекеттік сапары аясында Су ресурстары және ирригация министрі Нұржан Нұржігітов бірқатар қытайлық ірі компаниялармен кездесу өткізді.

Министр ең алдымен Қытай азаматтық инженерлік-құрылыс корпорациясының вице-президенті Цзян Игаомен кездесті. Компания Қазақстанда 2017 жылдан бері жұмыс істейді. Қазіргі уақытта ҚАИҚК Жамбыл облысындағы ирригациялық арналарды, дренаж жүйелері мен құрылыстарды реконструкциялауды қоса алғанда, ауқымды 5 жобаны іске асырып жатыр.

Тараптар суару жүйелерін цифрландыру және осы бағыттағы екіжақты ынтымақтастықты талқылады. ҚАИҚК өкілдері Қазақстанның су саласын цифрландыру және автоматтандыру бойынша жаңа жобаларға қызығушылық танытты.

Цифрлық технологиялар дақыл түрлеріне, климатқа және аумаққа байланысты суды дәл және уақтылы бөлуді қамтамасыз ете отырып, су ресурстарын басқарудың тиімділігін айтарлықтай арттыруға мүмкіндік береді. Бірлескен күш-жігер, ресурстар мен тәжірибені пайдалана отырып алдымызда тұрған мақсаттарға қол жеткізе алатынымызға сенімдімін", - деді Нұржан Нұржігітов.

Одан кейін министр CITIC Gonstruction компаниясының президенті Цзяньцян Янмен кездесіп, су үнемдеу технологияларын енгізу мәселесін талқылады. Қытайлық кәсіпкерлер Қазақстанда су үнемдеу жүйелерін шығаруға дайын екендіктерін білдірді.

Нұржан Нұржігітов өз кезегінде жаңа су қоймаларын салу және қолданыстағы су қоймаларын реконструкциялау, сондай-ақ Алматы мен Жетісу облыстарындағы суару жүйелерін жаңғырту жөніндегі министрліктің жоспарлары туралы айтып берді.

Сондай-ақ, министр Power China компаниясының президенті Тань Сяофэнмен кездесті. ҚР Су ресурстары және ирригация министрлігі мен Power China қазақстандық су шаруашылығы мамандарын Қытайда біліктілік арттыру курстарынан өтеді деп келісті.

Сонымен қатар, Нұржан Нұржігітов қытайлық компанияға "Қазсушар" кәсіпорнымен ынтымақтастық туралы Меморандумға қол қоюды ұсынды. Power China басшылығы болса жаңа су қоймаларының құрылысына қатысуға ниет білдірді. Бұл мәселені егжей-тегжейлі талқылау алдағы уақытта жұмыс тобы деңгейінде жалғасады.

Power China Қазақстанда бұрыннан табысты жұмыс істеп келеді. Компания біздің елімізде бірнеше ауқымды жобаны жүзеге асырды, сондықтан біз өзара тиімді ынтымақтастыққа ниеттіміз. Бұл біздің бірлескен жобаларымызды ғылыми сүйемелдеуді тиімдірек етеді", - деді Нұржан Нұржігітов.

Министрдің China Energy International Group компаниясының басқарма төрағасы Лю Цзэсянмен кездесуінде Қазақстанның су қоймаларында су электр станцияларының құрылысы талқыланды. Қытайлық кәсіпкерлер аталған жобаға қызығушылық танытты. Тараптар бұл мәселені толығырақ талқылауға келісті.

China Energy International Group өкілдері Қазақстанның су саласын цифрландыру және автоматтандыру жобаларына қатысуға ниет білдірді. Сонымен қатар, қытайлық компания елімізде ағынды суларды тазарту қондырғыларын орнатуға дайын.

05.07.2024, 11:58 42421

Қазақстанда сейсмологиялық саланы дамытудың кешенді жоспары қабылданды

Қазақстанда Сейсмология саласын дамытудың 2024-2028 жылдарға арналған кешенді жоспары қабылданды, деп хабарлайды Үкіметтің баспасөз қызметінен.

Мемлекет басшысының тапсырмасын орындау мақсатында Сейсмология саласын дамытудың 2024-2028 жылдарға арналған кешенді жоспары бекітілді. Үкіметтің тиісті қаулысына ҚР Премьер-Министрі Олжас Бектенов қол қойды.

Құжат еліміздің сейсмологиялық қауіпсіздігін нығайту бойынша ауқымды шараларды іске асыруды көздейді. Олардың ішінде мониторингті айтарлықтай күшейту, ғимараттар мен құрылыстардың сейсмикалық төзімділігін қамтамасыз ету, жаңа цифрлық технологияларды енгізу, кадрларды даярлау деңгейін арттыру және т. б. бар.

Осылайша, 15 сейсмикалық аудандастыру картасы әзірленетін болады, бұл еліміздің сейсмикалық қауіпті өңірлеріндегі жер сілкінісі ошақтарының 70%-ын болжауға мүмкіндік береді. Сондай-ақ олар аталған аумақтардағы ғимараттар мен құрылыстарды паспорттауға және жаңа құрылыс нормаларын әзірлеуге негіз болады.

Паспорттау ең осал құрылыс объектілерін анықтауға мүмкіндік береді, оларға қатысты бірінші кезекте сейсмикалық қауіптілігін төмендету шаралары қолданылады. Оның ішінде: сейсмикалық күшейту, құнды жабдықтарды қорғау немесе шығару, мақсатын өзгерту және басқалары бар.

Сонымен қатар 285 сейсмикалық стансаны орнату, сондай-ақ қолда бар 70 стансаны жөндеу және жарақтандыру көзделген. Бұл Алматы облысында және еліміздің басқа да сейсмоқауіпті өңірлерінде сейсмикалық қауіпті сапалы болжауға мүмкіндік береді. Өз кезегінде қажетті әрекет ету шаралары жедел қабылданатын болады.

Бұдан басқа, ғимараттардың құрылысы мен жұмыс істеуіне бақылауды күшейту, мониторинг әдістерін жақсарту, сейсмология саласындағы мамандарды заманауи жабдықтармен және техникалық құралдармен қамтамасыз ету жоспарлануда.

Жалпы алғанда, Кешенді жоспарды іске асыру нәтижесінде сейсмикалық қауіпті аумақтардағы азаматтардың, құрылыстар мен инфрақұрылымның қорғалу деңгейі айтарлықтай күшеюі тиіс. Сондай-ақ жер сілкінісі болған кезде мемлекеттік органдар мен бейінді ұйымдар тарапынан ден қою жүйесі жетілдірілетін болады.

04.07.2024, 17:24 60306

Алматыда 1951 жылы салынған ескі ғимараттың орнына заманауи Оқушылар үйі ашылады

Алматыда 1951 жылы салынған ескі ғимараттың орнына заманауи Оқушылар үйі ашылады, деп хабарлайды Алматы қаласы әкімдігінің баспасөз қызметінен. Жамбыл көшесі, 170а үй мен Байзақов көшесінің бұрышындағы мекенжайда орналасқан №2 Оқушылар үйі 1951 жылы салынған әрі моральдық және техникалық жағынан ескі, оқушыларға қосымша білім беру қызметтерін ұсынудың заманауи талаптарына сай емес. Осыған байланысты, "Svoi Dom" ЖШС (құрылыс салушы - "Акбарис Construction" ЖШС) компаниясы бизнестің әлеуметтік жауапкершілігі аясында өз қаражаты есебінен жаңа заманауи Оқушылар үйін салу жөніндегі жобаны іске асыруды бастады. Компания 1951 жылы салынған ескі екі қабатты ғимаратты бұзуға кірісті, жалпы ауданы 1415,5 ш.м. сыйымдылығы 1350 адам, мұнда 2023-2024 оқу жылында 1896 оқушы білім алды. Оқушылардың жаңа үйі сол учаскеде салынады, екі қабатты ғимараттың жалпы ауданы 2047 шаршы метрді, жертөле - 410 шаршы метрді құрайды. Мұнда тиісінше шығармашылықпен айналыса алатын 6-18 жас аралығындағы балалар саны қазіргі 1350 адамнан 3500 бала мен жасөспірімге дейін артады. Бұл ретте өрт, сейсмикалық қауіпсіздік, бейнебақылау жүйелерімен жарақтандыру және мобильділігі төмен балалар мен жасөспірімдер үшін қолжетімділік талаптары ескерілетін болады. Оқушылардың жаңа үйін жабдықтау балалар шығармашылық орталықтарының заманауи талаптарына сай жүргзіледі. Робототехника, ІТ, хореография, сурет салу, шығармашылықтың басқа түрлері бойынша үйірме жұмыстарына арналған жайлы кабинеттер, сондай-ақ мектеп сыныптарында ойын алаңдары, амфитеатр және бассейн қарастырылған. Аумақ абаттандырылып, көгалдандырылады, спорт алаңы қарастырылады. Жобаны іске асыру мерзімі-2025 жылғы қаңтар.

04.07.2024, 17:20 60541

Бозымбаев еліміздің батыс өңірлерін дамытудың шұғыл шаралар топтамасын әзірлеу жөнінде кеңес өткізді

Президенттің Ақтөбе, Атырау, Батыс Қазақстан және Маңғыстау облыстарының әлеуметтік-экономикалық дамуының шұғыл шаралар топтамасын әзірлеу жөніндегі тапсырмасын орындау аясында вице-премьер Қанат Бозымбаев аталған төрт өңірдің әкімдерінің және барлық министрлік өкілдерінің қатысуымен кеңес өткізді, деп хабарлайды Үкіметтің баспасөз қызметінен.

Ұлттық экономика министрлігінің ағымдағы ахуалды талдау деректері бойынша батыстағы өңірлер үшін сын-тегеурін - мұнай өндірудің төмендеуі жағдайында экономиканы әртараптандыру.

Дегенмен, батыста халық санының тұрақты өсуі байқалуда. Болжамдарға сәйкес, 2030 жылға дейін ондағы халық саны 10%-ға - 3,1 млн-нан 3,4 млн адамға дейін өседі. Бұл үрдіс жаңа жұмыс орындарын құру қажеттілігін туғызады. 2024-2030 жылдар кезеңінде еңбек нарығына шамамен 138 мың адам келеді деп күтілуде. Премьер-Министрдің орынбасары оларды жұмыспен қамтамасыз ету жөнінде тиісті тапсырмалар берді.

Сонымен қатар кеңес барысында бейінді министрліктер өз бағыттары бойынша, оның ішінде өңірлік инфрақұрылымды дамыту бойынша жүргізіліп жатқан жұмыс туралы есеп берді. Өнеркәсіп және құрылыс министрлігінің деректері бойынша 2025 жылға дейін өңірлерді сумен қамтамасыз ету мәселесі толығымен шешіледі. Қазіргі таңда кәріз-тазарту құрылыстары бойынша жобалар іске асырылуда.

Салалық министрліктер мен әкімдіктер қабылдап жатқан шараларға қарамастан, осы бағыттағы жұмысты күшейту қажеттігі байқалады.

Вице-премьер атап өткендей, сумен қамтамасыз етуді, су бұруды, электрмен және жылумен жабдықтауды қаржыландыру, сондай-ақ өңірлерде жол салу мәселелері басым сипатқа ие болуы тиіс.

Бізге Орал және Атырау қалаларының әуежайлары үшін ашық аспан мәртебесін кеңейте отырып, рейстер санын ұлғайту қажет. Ең жоғары жүктеме кезеңінде вагондардың маусымдық тапшылығын жою, халықаралық әуежайларды, теміржол вокзалдары мен стансаларды жаңғырту қажет. Ал ауылдық жолдардың сапа деңгейін 90%-ға дейін жеткізу керек", - деп тапсырды вице-премьер.

Сондай-ақ Қанат Бозымбаев батыс өңірлердегі экологиялық проблемаларды шешуге ерекше назар аударуды тапсырды. Денсаулық сақтау саласында сұранысқа ие мамандар үшін тұрғын үйге жеңілдікпен несие берудің өңірлік бағдарламасын әзірлеу тапсырылды.

Мемлекеттік органдар мен әкімдіктерге проблемаларды жедел және сапалы шешу үшін жүйелі шаралар мен жаңа бастамалар бойынша нақты ұсыныстар беруді тапсырамын. Біз еліміздің батыс өңірінің тұрғындарының әл-ауқатын жақсарту үшін бір ай ішінде шұғыл шаралар топтамасын әзірлеуіміз керек", - деді Қанат Бозымбаев.

04.07.2024, 13:25 64401

Екі жеке меншік субұрқақтың иесі оларды Алматының коммуналдық меншігіне беруге дайын

Екі жеке меншік субұрқақтың иесі оларды Алматының коммуналдық меншігіне беруге дайын, деп хабарлайды Ақорданың баспасөз қызметінен. 26 маусымда басталған "Алматы Жазы" қалалық акциясы аясында мегаполисте қалалық субұрқақтар тазартылып, жуылып, жаңартылып жатыр. Қазір коммуналдық меншіктің балансындағы 66 субұрқақтың 60-ы ретке келтірілді, қалған 6-ы жаңғыртылуда. Жеке аумақта орналасқан субұрқақтар да тазартылды. Электр аспаптарының, жарықтандырудың, қондырмалар мен бүріккіштердің жұмысы бойынша субұрқақ жабдығына тексеру жүргізіледі. Сонымен қатар, заманауи жаяу жүргіншілерге арналған субұрқақтарды күтіп-баптау жұмыстары жүргізілуде, оның 13-і қаланың коммуналдық меншігінде. Олар қалпына келтіріліп, функционалдылық сақталып, эстетика жақсартылады. "Аудандық әкімдіктер мен "Eco Almaty" ЖШС жүргізетін түсіндіру жұмыстары аясында жеке субұрқақтарға тиісті жағдайда тұрақты техникалық қызмет көрсету және күтіп ұстау қажеттілігі туралы мәселелер белсенді талқылануда. Жеке субұрқақтарды коммуналдық меншікке беру мүмкіндігіне ерекше назар аударылады. Бұл олардың тұрақты жұмыс істеуін және қалалық ортаны жақсартуды қамтамасыз етуге мүмкіндік береді", - деді "Eco Almaty" ЖШС өкілі Жәнібек Кенжалиев. Көбінесе жеке аумақта орналасқан субұрқақтардың жағдайы мәз емес, қараусыз қалған, жұмыс істемейді немесе иесінде қаражаттың болмауына байланысты күрделі жөндеуді қажет етеді. Жүргізілген түсіндіру жұмыстарының нәтижесі бойынша екі жеке субұрқақтың иесі - "Шәкен Айманов атындағы "Қазақфильм" ұлттық киностудиясы" АҚ және "Столичный" ТҮК нысандарын коммуналдық меншікке беруге дайын екендіктерін білдірді. Алматыда барлығы 150 субұрқақ бар, оның ішінде 66-ы коммуналдық және 84-і жеке аумақта орналасқан. "Алматы Жазы" науқаны аясында жеке субұрқақтар қалалық нысандармен қатар ретке келтіріледі. 6 шілдеде аяқталатын "Алматы Жазы" науқаны "Таза Қазақстан" жалпы республикалық акциясы аясында іске асырылатын "Алматы - біздің ортақ үйіміз" науқанының жалғасы болып табылады. Ол қалалық инфрақұрылым мен қоғамдық мүлікке ұқыпты қарауды қалыптастыруға, сондай-ақ ел арасында экологиялық мәдениетті арттыруға бағытталған.

Ең көп оқылғаны