Абай облысының кәмелетке толмағандардың істері жөніндегі мамандандырылған ауданаралық соты Семей қаласында құрбыларын соққыға жыққан жасөспірімдердің ата-аналарына қатысты әкімшілік істерді қарады, деп
хабарлайды соттың баспасөз қызметінен.
Сот оларды балаларды тәрбиелеу жөніндегі ата-аналық міндеттерін тиісінше орындамағаны үшін кінәлі деп танып, Қазақстан Республикасы Әкімшілік құқық бұзушылық туралы кодексінің (ҚР ӘҚБтК) 127-бабына сәйкес тиісті әкімшілік жазалар тағайындады.
Сот қаулысымен: азамат Л.А., 5 тәулікке әкімшілік қамаққа алынды.
Азаматтар Д.М., М.Т., Т.А. және А.Қ. әрқайсысына 78 640 теңгеден айыппұл салынды.
Еске сала кетсек, бұған дейін Абай облысының кәмелетке толмағандардың істері жөніндегі мамандандырылған ауданаралық соты кәмелетке толмаған құқық бұзушыларды девиантты мінез-құлықты балаларға арналған мамандандырылған білім беру ұйымдарына жіберу туралы азаматтық істерді қараған болатын.
Сонымен, сот шешімдерімен: Л.М.(2011 ж.т.) 6 айға ерекше режимдегі Облыстық арнайы мектеп-интернатына жіберілді. Оған екі қылмыстық құқық бұзушылық жасағаны негіз болды, олар бойынша қылмыстық жауапкершілікке тартылатын жасқа толмағандықтан сотқа дейінгі тергеп-тексерулер тоқтатылды.
Ш.Е. (2008 ж.т.) қоғамдық тәртіпті жүйелі түрде бұзып, оқудан жалтарғаны үшін, 4 ай мерзімге Серебрянск қаласындағы девианттық мінез-құлықтағы балаларға арналған облыстық арнайы мектеп-интернатына орналастырылды.
Аталған білім беру мекемесіне 4 ай мерзімге бірнеше рет құқық бұзушылық жасаған М.А.(2012 ж.т.) да жіберілді.
Бұл ретте сот В.М. (2012 жылы туған), Е.С. (2014 жылы туған) және Т.С.-ны (2014 ж.т.) арнайы оқу мекемелеріне жіберу туралы арыздарды қанағаттандырудан бас тартты.
Шешім В.М.-ның жүйелі бұзушылықтары болмағанына, ал қалған екеуі мамандандырылған білім беру ұйымдарына орналастыру үшін қажетті жасқа толмағандарына байланысты қабылданған (мамандандырылған оқу орындарына орналастыру заң бойынша 11 жастан бастап ғана мүмкін болады).
Барлық сот шешімдері тәрбие жұмысын жүргізу және кәмелетке толмағандар арасындағы құқық бұзушылықтың одан әрі алдын алу мақсатында қабылданды.
Қажет болған жағдайда жасөспірімдердің арнаулы оқу орындарында болу мерзімі мекемелер әкімшілігінің өтінішхаты бойынша ұзартылуы мүмкін.
