Төтенше жағдайлар министрлігі мен Өнеркәсіп және құрылыс министрлігінде кадрлық өзгерістер орын алды
Төтенше жағдайлар министрлігі мен Өнеркәсіп және құрылыс министрлігінде кадрлық өзгерістер орын алды Алматыда қала тұрғындары мен құрылыс салушылар арасында келіспеушілік күшеюде
Алматының Дарабоз шағын ауданында бос жер қалмаған. Бір-біріне иін тірескен көп қабатты үйлердің арасында көлік қоятын орын жоқ. Шағын аудандағы соңғы бос жер теліміне әу баста "сауда орталығын саламыз" деген құрылыс компаниясы уәдесінен жалтарып, көп қабатты екі үй салмақ. Ал оған қарсы тұрғындардың наразылығын жергілікті билік те, құрылыс компаниясы да тыңдайтын емес.
Дарабоз шағын ауданы мен құрылыс компаниясы арасындағы дау мына тұрған қоршаулы жер телімінен басталған. Әу баста сауда орталығы салынады деген аумаққа құрылыс компаниясы көп қабатты екі үй салмақшы. Онсыз да құмырсқаның илеуіндей қаптап кетті деген көп қабатты үйлердің арасында көлік қоятын жер мен балалар ойнайтын алаңдар жетіспейді дейді жұрт", - деді тілші Аршын Кемелжан.
Тұрғындардың айтуынша, бой көтергеніне 4-5 жыл болған шағын ауданда 42 үй бар. Ал адам саны 10 мыңнан асады. Тығыз орналасқан шағын ауданда емхана, мектеп, балабақша атымен жоқ.
Құрылыс компаниясы болса әр шаршы метрден табыс табудың қамында", - дейді дарабоздықтар.
Алатау ауданының әкіміне және қалалық әкімшілікке барып өз пікірімізді айтқанбыз. Олар бізбен ешқандай санаспады. Мына жердегі Эксклюзивтің басшылары енді 42 үй аздай, тағы да 2 үйді салғалы жатыр 12 қабаттан", - дейді қала тұрғыны Орынкүл Омарова.
Осы мәселеге байланысты қала әкімдігіне сауал жолдадық. Әкімдік өкілінің айтуынша, 2016 жылғы жобада сауда кешені болған. Алайда 2021 жылы құрылыс жобасы қайта қаралыпты. Нәтижесінде 15 мың шаршы метрлік сауда кешенінің орнына көп қабатты қос үй мен 1200 шаршы метрлік шағын сауда орталығы салынбақ. Оған қоса 200 орындық автотұрақ болады.
"Әкімдік тұрғындардың талабын ескереміз" дейді.
Қазіргі уақытта мердігер мекемесіне нұсқама бердік, хаттама бердік қазіргі кезде. Халықтың наразылығына байланысты жобасын қайта қарап, халықтың ұсынысына енгізу үшін, халықтың пікірін тыңдап тағы қарауға. Қазіргі кезде олар құрылыс жұмыстарын тоқтатқан", - деді қалалық жоспарлау және урбанистика басқармасы басшысының орынбасары Еркебұлан Сембаев.
Әкімдік қызметкері қазір құрылыс тоқтап тұр дегенімен іс-жүзінде жұмыс қызып жатыр. Тұрғындар бізге ауыр техникалардың күні-түні дамыл таппай жатқанын таспалап жіберді. Одан бөлек Дарабозда мектеп, балабақша мәселесі әлі шешім таппаған.
Бір сыныпта 35-36 баладан. Енді мен қазір апайына айтсам: "Бізде неге көп, мүлдем уақыт бөле алмайды ұстазымыз деген, неге?" десем, "бізде басқа амал жоқ, қабылда" деп айтып жатыр акиматтан келген балалардың барлығын, білім сапасы да төмен. Балабақшаға біз деген алыстан тасимыз, өйткені жақын жерде балабақша жоқ", - деді қала тұрғыны Назерке Ынтымақова.
Қаланың басқа аудандарында да бір-біріне жақын салынып жатқан биік үйлер көп. Оларға тұрғындар наразы. Мысалы, әл-Фараби даңғылының бойындағы Адмирал, Достықтың бойындағы High Garden клубты үйі, Абай-130 тұрғын үй кешендерінің құрылысына алматылықтар қарсы шыққан еді.
БЛИЦ:
- Көрініп тұрған әдемі тауларымыз көрінбей қалды. Оның үстіне ешқандай үйге жақын жерде балабақша, мектептер жоқ қой. Құры үй сала бергенде не пайда?
- Абайдан жоғары мынадай дәуді салма деді ғой, 5 қабат болды. Неге салып жатыр сондай дәуді, дұрыс емес.
Зәулім үйлер көбейген сайын тұрғындар мен құрылыс компанияларының арасындағы келіспеушілікте жиілеп барады. Күні кеше құрылысқа қарсы заңсыз митингтің бірі адам өлімімен аяқталды. Көшені жауып алған наразы топтағы адамның бірі мен көлік жүргізушісі сөзге келіп, соңы қайғылы жағдайға әкеп соқты.
Ақпарат көзі: 24.kz
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
Алматыда жаңа жылдық шыршалар жәрмеңкесі ұйымдастырылды
Жаңа жыл жақындаған сайын Алматыдағы Панфилов көшесі қылқан жапырақтың иісі мен мерекелік көңіл-күйге толы нағыз қысқы базарға айналды. Жәрмеңке әркім үйіне жаңа жылдық шырша таңдай алатын алматылықтардың сүйікті орнына айналды, деп хабарлайды Алматы қаласы әкімдігінің баспасөз қызметінен.
Жәрмеңкеде сатып алушыларға биік шыршадан бастап шағын ыдыстағы ағаштарға дейін түрлі тауар ұсынылған.
Мен жыл сайын базардан шырша сатып аламын, бірақ биыл дәл осы жерден сатып алуды шештім, өйткені бағасы бірдей. Балалармен келіп шырша таңдап жатырмыз, пірәндіктерден дәм татып, жарқыраған қондырғылардың жанында суретке түстік. Мұндағы атмосфера керемет, шаршағаныңды ұмытасың, суық та сезілмейді. Жаңа жылдың жақындап қалғаны анық сезіледі", - деді Ерлан Қасымов.
Жәрмеңкеде классикалық қылқан жапырақ ағаштарымен қатар қармен көмкерілгендей сәнделген дизайнерлік шыршаларды да сатып алуға болады. Мұндағы ассортименттің молдығын қала тұрғындары ерекше атап өтуде.
Біз құрбымызбен жай ғана көріп қайтуға келген едік, бірақ қызығып, шырша, ойыншықтар мен гирляндалар сатып алдық. Енді бірге жиналып, шыршаны безендіріп, какао ішеміз. Мұнда сондай әдемі, жылы әрі жайлы, кеткің келмейді. Бұл жәрмеңке қаланың ең керемет орындарының біріне айналғанына сенімдімін", - деді студент Алина Әбілдаева.
Жәрмеңкенің безендірілуі ерекше әсер қалдырады: гирляндалар, жарқыраған шамдар, фотоаймақтар - мұның бәрі ғажайып мерекелік көңіл-күй сыйлайды. Әсіресе, қар басқан шаналар, жарқыраған аққалалар мен бұғының мүсіндері балаларды қуантады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Алматыда 80 шыршаның шамы жағылды: қалада мерекелік шаралар бастау алды
Алматыда бір мезетте 80 жаңа жылдық шыршаның шамы жағылып, бұл мерекелік маусымның символдық басталуын көрсетті, деп хабарлайды Алматы қаласы әкімдігінің баспасөз қызметінен.
Абай алаңында Алматының басты жаңа жылдық шыршаның шамын жағу рәсімі өтті. Оның биіктігі 25 метр. Биыл мегаполис шыршасы алғаш рет классикалық стильде жасалып, қаңқалы емес, табиғи діңді болды. Шыршаны безендіру үшін алты метр гирлянда, түрлі-түсті шарлар мен жаңа жылдық ойыншықтар қолданылған.
Рәсімге ауа райы ертегідей ерекше атмосфера сыйлады: жаңа жылдық арудың айналасын сиқырлы қар қоршап тұрды, ал мамықтай аппақ қар ұлпалары мегаполистің басты шыршасын безендіріп тұрды.
8 мыңнан астам алматылық пен мегаполис қонақтары қазақстандық эстрада жұлдыздарының қатысуымен өткен керемет шоуды тамашалады.
Мен жас орындаушыларды қолдап, құттықтау үшін келдім. Шырша өте әдемі, бәрі тамаша ұйымдастырылған. Концерт те керемет өтті, ал қарлы ауа райы нағыз жаңажылдық көңіл-күй сыйлады", - деді мегаполис тұрғыны Сергей Дмитриевич.
Концерттік бағдарламаны "BS band" үрмелі оркестрі ашып, жаңажылдық әуендерден попурри орындады. Роза Рымбаеваның сахнаға шығуы ерекше мерекелік көңіл-күй сыйлады. Халық әртісі "Снег идет" және "Жұлдызды жаңа жыл" әндерін орындап, кешті жылулық пен жағымды эмоцияға толтырды.
Бүгін алматылықтар мен қала қонақтарына жаңажылдық көңіл-күйді Назым Әбілдина, Мәди Рымбаев, Динара және Балжан Бидаш сыйлады. Әсіресе жастар "ALPHA" тобы, Dakelot, "ASTRA" тобы, Малика YES және Adil өнерін асыға күтті.
Мен Жаңа жылды қатты жақсы көремін. Мұндай шаралар бақыт сыйлайды. Мұндай керемет мерекені ұйымдастырған әкімдікке алғысым шексіз. Жауған қар да ерекше атмосфера сыйлап, бәрі өте ертегідей болды", - деді Алматы тұрғыны.
Turar-дың "Жаңа жыл" әнімен қаладағы алғашқы жаңажылдық концерт аяқталып, көрермендерге мереке алдындағы керемет көңіл-күй сыйлады.
Ертегідегідей атмосфераны күймедегі Күлбике, Зімбір адам, бұғылар және басқа да кейіпкерлер бейнеленген көркем безендіру элементтері, жарқыраған фотоаймақтар мен жарық инсталляциялары толықтырды.
Айта кетейік, қаладағы барлық ауданда шырша жағу рәсімдері концерттер мен әртүрлі шаралармен бірге ұйымдастырылып, тұрғындар мен қонақтарға мерекелік көңіл-күй сыйлады.
Сондай-ақ бүгін Абай алаңында басты жаңа жылдық жәрмеңке ашылды. Ол 2025 жылдың 5 қаңтарына дейін жұмыс істеп, тұрғындар мен қонақтарға кәдесыйлар, қолөнер шеберлерінің бұйымдары мен мерекелік әшекейлер ұсынады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
2024 жылғы 1 желтоқсанда 411 мыңнан астам адамға атаулы әлеуметтік көмек көрсетілді
2024 жылғы 1 желтоқсанда 77,6 мың отбасындағы 411,3 мың адамға атаулы әлеуметтік көмек (бұдан әрі - АӘК) тағайындалды. Биыл осы мақсатқа бюджеттен 54,7 млрд теңге қарастырылған, деп хабарлайды Қазақстан Республикасы Еңбек және халықты әлеуметтік қорғау министрлігінің баспасөз қызметінен.
Бұрын хабарланғандай, АӘК-нің негізгі мақсаты - ақшалай төлем түрінде қолдауды жүзеге асыру және отбасының еңбекке қабілетті мүшелерін жұмыспен қамтуға жәрдемдесудің белсенді шараларына тарту арқылы отбасын қиын өмірлік жағдайдан шығару.
АӘК мыналарды көздейді:
- табысы өңірлік ең төмен күнкөріс деңгейінің 70% - нан аспайтын азаматтарға тоқсан сайын әлеуметтік көмек тағайындау;
- табысы аз отбасылардағы 1 жас пен 6 жас аралығындағы әр балаға 1,5 АЕК (5 538 теңге) мөлшерінде ай сайынғы қосымша төлем беру. 2024 жылғы 1 желтоқсанға АӘК алушылар қатарынан мектеп жасына дейінгі 128,8 мың балаға 5,0 млрд. теңге сомасына қосымша төлем тағайындалды;
- жұмысқа орналастыру, өз ісін ашуға ниетті отбасыларға гранттар беру, біліктілікті арттыру курстарына жіберу (қажет болған жағдайда) және басқалар арқылы жұмыспен қамтуға жәрдемдесу.
Қазіргі уақытта қазақстандықтар АӘК тағайындауға өтінішті тұрғылықты жері бойынша мансап орталығында, ауыл округінің әкіміне сондай-ақ Электрондық үкімет порталы (egov.kz) арқылы бере алады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.