Елордада 525 балабақша бар, оның 100-і мемлекеттік, 422-і жеке және үшеуі ведомстволық. Қалада орын тапшылығын болдырмау үшін тағы 6 мектепке дейінгі мекеме салу жоспарлануда. Бұл туралы ӨКҚ брифингінде Астана қаласы білім басқармасының басшысы Қасымхан Сенғазыев мәлімдеді, деп хабарлайды Астана қаласы әкімдігінің баспасөз қызметінен.
Балаларды мектепке дейінгі тәрбиемен және оқытумен қамтуды ұлғайту мақсатында 2023 жылы 10 214 орынға мемлекеттік тапсырыс орналастырылды, 2024 жылы 10 000-нан аса орынға жоспарлануда.
Сондай-ақ орын тапшылығын жою мақсатында тағы 60 балабақша салу жоспарлануда. Қазірдің өзінде 10 мекеменің жер учаскелері анықталып, жобалық жұмыстар басталды.
Осы оқу жылының басынан бері мектепке дейінгі білім беру ұйымдарында тәрбиеленетін жекелеген санаттағы 10 250 балаға алғаш рет тегін тамақтану ұйымдастырылды. 4 балабақшада эмоционалды-ерікті саласы бұзылған және мінез-құлық бұзылыстары (аутизм) бар балаларға арналған инклюзияны қолдау кабинеттері ашылды.
Сонымен қатар 2024 жылы 4 шағын орталықта инклюзияны қолдау кабинеттері ашылады", - деді Сенғазыев.
Жергілікті бюджет қаражаты есебінен 54 балабақшада шағын сәулет нысандары мен балалар алаңдары жаңартылды. Биыл да бұл жұмыс жалғасады.
Соңғы үш жылда 24 білім беру ұйымына күрделі жөндеу жүргізілді. Ал биыл 13 білім беру мекемесінде жоспарлануда. Олардың қатарында №12 "Қарлығаш" балабақшасы, №25 "Таңшолпан" балабақшасы, №46 "Самал" балабақшасы, №74 "Дәурен" балабақшасы және т. б. бар.
Сонымен қатар балабақшаларда тәрбиешілердің кәсіби құзыреттілігін арттыру бойынша ауқымды жұмыстар жүргізілуде.
Мәселен, 2024 жылы мектепке дейінгі білім беру ұйымдарының 1500 тәрбиешісі біліктілікті арттыру курстарынан өтеді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.