Қасым-Жомарт Тоқаев бүгін туған күнін атап өтуде
Сурет: telegram/БОРТ №1
Қазақстан Президентінің туған күніне байланысты шет мемлекеттердің басшыларынан, парламент төрағаларынан, үкімет басшыларынан және шетелдік мемлекеттік органдардың, халықаралық ұйымдар мен дипломатиялық миссиялардың, коммерциялық мекемелердің жетекшілерінен, шығармашылық және ғылыми зиялы қауым өкілдерінен құттықтаулар келіп жатыр.
Атап айтқанда, Ресей Президенті Владимир Путин, ҚХР Төрағасы Си Цзиньпин, Түркия Президенті Режеп Тайип Ердоған, Беларусь Президенті Александр Лукашенко, Қырғызстан Президенті Садыр Жапаров, Түрікменстан Халық Мәслихатының төрағасы Гурбангулы Бердімұхамедов, Корея Республикасының Президенті Юн Сок Ёль, Ресей Үкіметінің төрағасы Михаил Мишустин, Ресей Федералды Жиналысы Федерация Кеңесінің төрағасы Валентина Матвиенко, Ресей Федерациясы Мемлекеттік Думасының төрағасы Вячеслав Володин, Еуразиялық экономикалық комиссия алқасының төрағасы Михаил Мясникович, Түркі мемлекеттер ұйымының Бас хатшысы Бағдат Әміреев, ТМД Атқару комитетінің төрағасы – Атқарушы хатшысы Сергей Лебедев, ТМД-ға мүше мемлекеттердің Парламентаралық Ассамблеясы Кеңесінің Бас хатшысы Дмитрий Кобицкий, Ұжымдық қауіпсіздік шарт ұйымының Бас хатшысы Станислав Зась және басқалар құттықтау жеделхаттарын жолдады.
Сонымен қатар Қасым-Жомарт Тоқаевты туған күнімен Өзбекстан Президенті Шавкат Мирзиёев, Түрікменстан Президенті Сердар Бердімұхамедов, Тәжікстан Президенті Эмомали Рахмон және Әзербайжан Президенті Ильхам Әлиев телефон арқылы құттықтады.
Құттықтаулар әлі де келіп түсіп жатыр.
Қасым-Жомарт Кемелұлы Тоқаев 1953 жылы 17 мамырда Алматы қаласында туған. Әкесі – Кемел Тоқайұлы Тоқаев (1923-1986) Ұлы Отан соғысының ардагері, белгілі жазушы, қазақ әдебиетінің детективті-шытырман оқиғалы жанрының негізін қалаушы. Шешесі – Тұрар Шабарбаева (1931-2000) Алматы шет тілдері педагогикалық институтында қызмет еткен.
Қ.К.Тоқаев 1975 жылы Мәскеу мемлекеттік халықаралық қатынастар институт бітірген. КСРО-ның Қытай Халық Республикасындағы елшілігінде диплом алдындағы тағылымдамадан өткен. 1983-1984 жылдар аралығында Бейжің лингвистика институтында тағылымдамадан өтті. 1992 жылы Ресей Федерациясы Сыртқы істер министрлігінің Дипломатиялық академиясын тәмамдады.
Еңбек жолын 1975 жылы КСРО-ның Сыртқы істер министрлігінде бастап, Кеңес Одағының Сингапур Республикасындағы елшілігіне жұмысқа жолданған. 1979 жылы КСРО Сыртқы істер министрлігінің аппаратына оралады. 1984-1985 жылдар аралығында КСРО Сыртқы істер министрлігінде қызмет атқарып, кейіннен Кеңес Одағының Қытай Халық Республикасындағы елшілігіне жіберілді. Онда 1991 жылға дейін екінші хатшы, бірінші хатшы және кеңесші лауазымдарында қызмет істейді.
1992 жылы Қазақстан Республикасының Сыртқы істер министрінің орынбасары болып тағайындалады. 1993 жылы Қазақстан Республикасының Сыртқы істер министрінің бірінші орынбасары болды. 1994 жылы еліміздің Сыртқы істер министрі болып тағайындалады. 1999 жылғы наурызда Қазақстан Республикасы Премьер-Министрінің орынбасары болды. 1999 жылғы қазанда Парламенттің келісімі бойынша Қазақстан Республикасы Президентінің Жарлығымен Премьер-Министр болып тағайындалды. 2002 жылғы қаңтарда Қазақстан Республикасының Мемлекеттік хатшысы – Сыртқы істер министрі болды.
2003-2007 жылдары – Қазақстан Республикасының Сыртқы істер министрі. Бұл қызметте жаһандық ядролық қару-жарақты таратпау үдерісіне белсенді атсалысты.
2007 жылғы қаңтарда Қазақстан Республикасы Парламент Сенатының Төрағасы болып сайланды. 2008 жылы Қазақстан Парламентінің жоғары палатасының спикері ретінде ЕҚЫҰ Парламенттік ассамблеясының вице-президенті болып сайланды.
2011 жылғы наурызда БҰҰ Бас хатшысының орынбасары, БҰҰ-ның Женевадағы бөлімшесінің Бас директоры, сондай-ақ Қарусыздану жөніндегі конференцияда БҰҰ Бас хатшысының жеке өкілі болып тағайындалды. Сонымен қатар Қарусыздану жөніндегі конференцияның Бас хатшысы лауазымын атқарды. ТМД-ның және Шанхай ынтымақтастық ұйымының Сыртқы істер министрлері кеңесінің төрағасы болып сайланды.
2013 жылғы 16 қазанда Қазақстан Республикасы Парламент Сенатының Төрағасы болып қайта сайланды. 2019 жылғы 20 наурызда Қазақстан Республикасының Президенті ретінде ант қабылдады.
2019 жылы 9 маусымда өткен кезектен тыс Президент сайлауында 70,96 пайыз дауыс жинап, Қазақстан Республикасының Президенті болып сайланды. 2019 жылы 12 маусымда ҚР Конституциясының 42-бабына сәйкес ант беріп, ресми түрде сайланған Президент ретінде Мемлекет басшысының лауазымына кірісті.
Саламатты өмір салтын ұстанады. Көркем шығармаларды, саяси және мемуарлық бағыттағы әдебиеттерді оқығанды ұнатады.
Президенттің бүкіл өмірбаянын мына жерден оқуға болады.
KAZAKHSTAN TODAY редакциясы Қасым-Жомарт Кемелұлын туған күнімен құттықтап, оған зор денсаулық, бақ-береке және қажырлы еңбегінде Қазақстан халқы тарапынан жан-жақты қолдау тілейді!
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
12,1 млн га пайдаланылмай жатқан және заңнаманы бұза отырып берілген жерлер 2022 жылдан бастап мемлекетке қайтарылды
12,1 млн га пайдаланылмай жатқан және заңнаманы бұза отырып берілген жерлер 2022 жылдан бастап мемлекетке қайтарылды, деп хабарлайды Қазақстан Республикасы Ауыл шаруашылығы министрлігінің баспасөз қызметінен.
Бұл жұмыс ҚР АШМ ЖҚК және "AMANAT" партиясы жанындағы "Жер аманаты" комиссиясымен бірлесіп жүргізілді.
Қажетті шаралар қабылданғаннан кейін жер пайдаланушылар 3,7 млн га аумақта жерді игеруге кірісті.
Мемлекеттік меншікке қайтарылған жерлердің 4,8 млн гектары бүгінгі күні қайта бөлінді.
Сонымен қатар, пайдаланылмай жатқан және заңсыз берілген жерлерді алып қою жөніндегі жұмыс комиссиясы республикалық комиссия ретінде қайта құрылды. Оның негізгі міндеті - жерлерді ауыл халқының қажеттіліктері үшін қайта бөлуге және жер ресурстарын ұтымды пайдалануға бақылау жасау.
Сондай-ақ, қазіргі уақытта Президенттің тапсырмасына сәйкес, салық төлеуді, инвестиция тартуды және ауылдық аумақтарды дамытуға ықпал ететін қолданыстағы ауыл шаруашылығы өндірушілері мен ауыл шаруашылығы өнімдерін қайта өңдеушілер үшін жер пайдалану құқығын жалғастыру мәселесі пысықталуда.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстан Үкіметі, Ұлттық Банк және Стати тараптары дауды реттеуді аяқтады
Қазақстан Республикасының Үкіметі, Қазақстан Республикасының Ұлттық Банкі және Стати тараптары, Tristan Oil жетекші кредиторларының қолдауымен және келісімімен, Қазақстандағы мұнай-газ активтері туралы ұзақ мерзімді дауды реттеу үдерісін сәтті аяқтады, деп хабарлайды Қазақстан Республикасы Әділет министрлігінің баспасөз қызметінен.
Қол қойылған Түпкілікті реттеу туралы келісім барлық ағымдағы дауларды болашақта оларды қайта бастау құқығынсыз тоқтату үшін негіз болып табылады. Келісімнің нақты шарттары құпия болып табылады.
Бұл реттеу және барлық тараптар үшін әділ шешу жолын іздеу мақсатында Қазақстан Республикасы қабылдаған тәсіл, бұл ел инвестордың құқықтары сақталатын орын болып табылатынын атап көрсетеді. Біз Президент Қасым-Жомарт Тоқаевқа шетелдік инвесторлардың Қазақстан туралы түсінігін өзгертудегі көшбасшылығы үшін алғыс айтамыз. Біз болашақта жаңа жобалармен жұмыс істеуді асыға күтеміз", деді CEO Argentem Creek Partners өкілі Дэниел Чапман.
Argentem Creek Partners - Стати тараптарының инвестициялық құралы Tristan Oil Limited-тің кредиторлары болып табылатын нақты қорлардың инвестициялық басқарушысы.
Ұзақ дау аяқталғаннан кейін Қазақстанда экономиканы дамыту үшін, оның ішінде инвестициялар тарту арқылы, қосымша мүмкіндіктер пайда болады. Бұл ретте, мен бұрын атап өткендей, республикалық бюджеттен реттеу шеңберінде қаражат пайдаланылмады", деп мәлім етті Қазақстан Республикасының Әділет министрі Азамат Есқараев.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстан Азиядағы өзара іс-қимыл және сенім шаралары кеңесіндегі төрағалығын аяқтады
Қазақстан Азиядағы өзара іс-қимыл және сенім шаралары кеңесіндегі төрағалығын Әзербайжанға тапсырды, деп хабарлайды ҚР СІМ баспасөз қызметінен.
Азиядағы өзара іс-қимыл және сенім шаралары кеңесінің (АӨСШК) 7-ші Сыртқы істер министрлерінің отырысы онлайн форматта өтіп, оның барысында Қазақстан Республикасы ұйымдағы төрағалығын ресми түрде Әзербайжан Республикасына тапсырды.
Іс-шара барысында ҚР Премьер-Министрінің орынбасары - Сыртқы істер министрі Мұрат Нұртілеу Қазақстанның төрағалығы кезіндегі АӨСШК-тің негізгі жетістіктерін атап өтіп, ұйымның төрт жылдық жұмысын қорытындылады.
Атап айтқанда, 2022 жылғы қазанда Астанада өткен АӨСШК 6-шы Саммитінің қорытындысы бойынша іске қосылған трансформация үдерісіне ерекше назар аударылды. 2023 жылғы қыркүйекте қабылданған Трансформация жөніндегі жол картасына сәйкес, Қазақстан төрағалығы Кеңес Жарғысының жобасын әзірлеп, келістіру үдерісін бастады. Аталған кезеңде Қазақстан Талдау орталықтар форумы, Даналар кеңесі және АӨСШК қоры сияқты үш жаңа органның ашылуына бастамашылық етті.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстанда заңдылықты өрескел бұзғаны үшін екі судья жазаланды
Жоғары Сот Кеңесі жанындағы Сот жюриінің кезекті отырысы өтті, деп хабарлайды Қазақстан Республикасы Жоғары Сот Кеңесінің баспасөз қызметінен.
Отырыста 3 судьяға қатысты 3 тәртіптік іс қаралды.
Қарау қорытындысы бойынша Сот жюриімен заңдылықты өрескел бұзғаны үшін 2 судьяға қатысты ескерту түрінде тәртіптік жаза қолданылды. 1 судьяға қатысты тәртіптік іс жүргізу жасалған тәртіптік теріс қылығының елеусіз болуына байланысты тоқтатылды.
Сот жюриінің шешімдері заңды күшіне енген жоқ, өйткені тәртіптік жаза қолданылған судьялар оларға Жоғары Сот Кеңесіне шағымдануға құқылы.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Монополистер жылумен және электрмен жабдықтау саласындағы міндеттемелері орындалмаған үшін қазақстандықтарға 5,4 млрд теңге қайтарады
Монополистер жылумен және электрмен жабдықтау саласындағы міндеттемелері орындалмаған үшін қазақстандықтарға 5,4 млрд теңге қайтарады, деп хабарлайды Ranking.kz.
Уәкілетті орган - ҚР ҰЭМ Табиғи монополияларды реттеу комитеті (ТМРК) осы есептерді талдайды және ТМС тарифте көзделген жаңарту немесе дамыту міндеттемелерін орындамаған жағдайда, тұтынушыларға игерілмеген қаражатты қайтарып, уақытша өтемдік тарифті (УӨТ) енгізеді.
Сумен жабдықтау және су бұру саласындағы тарифтерді төмендету түрінде қазақстандықтарға қанша қаражат қайтарылатыны туралы да толық баяндаған едік.
Бүгін біз жылумен және электрмен жабдықтау саласына тоқталамыз. Ағымдағы жылы табиғи монополиялар субъектілерінің 2023 жылға арналған есептері талданды, оның қорытындысы бойынша 108 ТМС үшін жылумен және электрмен жабдықтау қызметтеріне жалпы сомасы шамамен 5,4 млрд теңгеге уақытша УӨТ бекітілді, оның 4,2 млрд теңгесі жылумен жабдықтау саласына, ал 1,2 млрд теңгесі электрмен жабдықтау саласына тиесілі.
Демек, дәл осы сомалар қазақстандықтарға тарифтерді төмендету түрінде қайтарылады. Толығырақ ақпараттық кестеде берілген.
Айта кетерлігі, ағымдағы жылы сумен жабдықтау және су бұру үшін УӨТ көрсеткіштері былтырғыдан едәуір жоғары, ал жылумен жабдықтау және электрмен жабдықтау саласында, керісінше, көрсеткіш төмендеді. Мұндай бақылау монополистерді тәртіпке салады, сондай-ақ тұтынушылардың құқықтарын қорғауға және сапалы қызмет көрсетуге ықпал етеді.
Тағы бір айта кетерлігі, жылумен және электрмен жабдықтау саласындағы күрделі инвестиция көлемі өсуде: ағымдағы жылдың он айында көрсеткіш 871,2 млрд теңгені құрады, ал бір жыл бұрын дәл осындай кезеңде 853,6 млрд теңгені құраған болатын, толық 2023 жыл үшін сектордағы күрделі инвестиция рекордтық мөлшер - 1,2 трлн теңгеге жетті.
Күрделі инвестиция өсімі - жылу мен электр өткізгіш инфрақұрылымын жаңарту және дамыту, сектордағы қуаттылықты жаңарту және кеңейту, сондай-ақ жалпы азаматтардың коммуналдық саладағы қауіпсіздігін қамтамасыз ету үшін аса қажетті фактор.
Бұл орайда сектордағы өнеркәсіптік өндіріс халықтың артып келе жатқан қажеттіліктеріне сәйкес өсуде. Мәселен, ағымдағы жылдың он айында электр энергиясын өндіру, беру және тарату құны 1,8 трлн теңгені құрады, бір жыл бұрын бұл көрсеткіш 1,6 трлн теңгеге тең болды. 2023 жылдың он айында жылумен жабдықтау (жылыту және ауаны кондиционерлеу үшін бу, ыстық су беру) құны 332,7 млрд теңгеге жетті, мұның алдындағы көрсеткіш 255,5 млрд теңгеге тең болды.
Өткен жылы (толық бір жыл) электрмен жабдықтау саласындағы көрсеткіштер шамамен 2 трлн теңгені, ал жылумен жабдықтау секторында 350,5 млрд теңгені құрады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Алматыда бірден екі құрылыс нысаны бұзылады
Алматыда сот шешімі бойынша екі тұрғын үй бұзылады. Бұл Нұр - Алатау шағын ауданы К. Тауасарлұлы көшесі, 71/21 мекенжайдағы бір учаскеде орналасқан 3 қабатты үйлер. Бұл туралы Алматының қала құрылысын бақылау басқармасынан хабарлады.
Жоспардан тыс тексеру барысында рұқсат беру құжаттарының толық пакетінің жоқтығы анықталды, нәтижесінде меншік иелеріне (жеке тұлғаға) қатысты әкімшілік шаралар қабылданды.
Көп ұзамай басқарма Бостандық аудандық сотына нысандарды бұзу туралы талап арыз берді. 2023 жылдың 29 қыркүйегінде сот екі үйді бұзу туралы шешім қабылдады. 2024 жылғы 31 қаңтарда Алматы сотының қаулысымен аудандық соттың шешімі өзгеріссіз қалды.
Кейін сот шешімі әділет департаментіне келіп түсті, онда атқарушылық іс қозғалды.
Бөлшектеуді меншік иелері сот орындаушыларының қатысуымен ерікті түрде бастайды.
Айта кетейік, Алматыда қала әкімі Ерболат Досаевтың құрылысқа бақылауды күшейту жөніндегі тапсырмасы аясында өткен жылдың басынан бері 62 құрылыс нысаны, оның ішінде "Мечта", "KHAN", "Алма Гарден" тұрғын үй кешендері және басқалары толығымен немесе ішінара бұзылды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.