Президент мұнай тасымалдау көлемін ұлғайту үшін Ақтау және Құрық теңіз порттарының қуатын арттыру туралы мәлімдеді
Тоқаевтың айтуынша, "біз үшін қазіргі әлемдік нарықтағы ахуалды ескеріп, Транскаспий бағдарын одан әрі дамыту өте маңызды".
Сурет: Depositphotos
Ақтау. 7 қараша. KAZAKHSTAN TODAY - Маңғыстау облысының жұртшылығымен кездесуде Қазақстан Президенті Қасым-Жомарт Тоқаев өңірдің көліктік-логистикалық және инвестициялық әлеуетін арттыру туралы айтты, деп хабарлайды Ақорданың баспасөз қызметі.
Маңғыстау – географиялық тұрғыдан ұтымды жерде орналасқан өңір. Біз бұл өлкені әлемдік деңгейдегі көлік-транзит торабына айналдыруымыз керек. Портты қала Ақтау – Қазақстанның теңізге шығатын қақпасы. Жаһандық логистикалық жүйе қайта қалыптасып жатқан қазіргі кезде Каспий теңізінің маңызы күрт арта түсті. Порттың инфрақұрылымын дамыту үшін инвестиция тартуды, контейнерлік және көлік-логистикалық хаб құруды көздеп отырмыз", - деді Қасым-Жомарт Тоқаев.
Оның айтуынша, "біз үшін қазіргі әлемдік нарықтағы ахуалды ескеріп, Транскаспий бағдарын одан әрі дамыту өте маңызды".
Осы мәселе бойынша серіктес елдермен өзара түсіністік бар. Ақтау және Құрық порттарының қуатын арттыратын болдық. Бұл олардың өткізу мүмкіндігін жетілдіріп, мұнай тасымалдау көлемін жылына 20 миллионға дейін жеткізу үшін қажет", - деді Президент.
Сонымен қатар, Президент автомобиль жолдарының сапасын жақсартуға ерекше мән берді. Ол бұған дейін "Бейнеу-Шалқар" тас жолы құрылысының маңыздылығы жөнінде айтқанын еске салды.
Жұмыс өте баяу жүріп жатыр. Үкіметке құрылысты бастау үшін қажетті құжаттарды жедел дайындауды тапсырамын", - деді Тоқаев.
Оның айтуынша, өңір тұрғындары облыстық деңгейдегі жолдың сапасы жөнінде жиі шағым айтады.
Үкімет әкімдікпен бірлесіп, "Ақтау – Форт-Шевченко", "Таушық-Шетпе" жолдарын жөндеуге келесі жылдан бастап кірісуі керек. Жол сапасы – әр аймақтың даму деңгейін айқындайтын басты көрсеткіштің бірі. Азаматтар дамудың нәтижесін жиналыстарда емес, күнделікті өмірде көріп, сезінуі қажет. Сондықтан экономиканың тұрақты дамуына тың серпін беру үшін облыстың инвестициялық әлеуетін арттырған жөн", - деді Президент.
Оның пікірінше, "Ақтау теңіз порты" арнайы экономикалық аймағының қызметі бұған мол мүмкіндік туғызып отыр. Бұл аймақ – инвестиция тарту, өнім өндіру, салық төлеу көрсеткіштері бойынша республикада ең үздік үш аймақтың бірі.
Бұған дейін мен арнайы экономикалық аймақтарда бос жатқан жер телімдерін инфрақұрылыммен қамтамасыз етуді тапсырдым. Осы жұмысты жандандырамыз. Үкімет арнайы экономикалық аймақтардың жұмыс істеу мерзімін ұзартуы қажет деп есептеймін. Қазақстан шетелдік әріптестермен инвестициялық ынтымақтастықты дамытып келе жатыр. Соның бірі – "Жасыл" сутегін өндіру және тарату орталығын" салу жобасы", - деп атап өтті Тоқаев.
Ол өткен аптада Еуропа кеңесінің Президенті Шарль Мишель біздің елге ресми сапармен келгенін еске салды. Сол кезде Қазақстан мен "Неміс-Швед" компаниясы арасында инвестиция туралы тиісті келісімге қол қойылды. Инвестор Маңғыстау облысында "жасыл" сутегі өндірісін іске қосуды жоспарлап отыр.
Сондай-ақ, күніне 255 мың текшеметр су тұшытатын зауыт, 40 гигаватт жаңғыртылатын қуат көздері стансасын салу жоспарда тұр. Осы жоба жүзеге асырылса, құрылыс кезінде 3500, ал нысан іске қосылған кезде 1800 тұрақты жұмыс орнын ашуға мүмкіндік туады. Өз мамандарымыз оқытылып, даярланады. Тиісті инфрақұрылым салынады. Инвестор өзіне жүктелген әлеуметтік міндеттемелерін орындайды.
Мемлекет басшысы аймақтың дамуына кешенді әлеуметтік-экономикалық әсерін тигізетін осындай жобалар көп болуы керек екенін атап өтті.
Қазір бүкіл әлемде инвестиция үшін бәсеке күшейді. Біздің еліміз өз әлеуетін толық пайдаланып, инвестициялық ахуалды жақсартуға мықтап кірісуі керек. Тағы да қайталап айтамын: Үкімет пен әкімдер бірлесіп, бұл мәселеге баса назар аударуға тиіс", - деп түйіндеді Тоқаев.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
Энергетика, өнеркәсіп және цифрлық технологиялар: ЕАДБ Қазақстанға 1 миллиард доллардан астам инвестиция салуды көздеп отыр
Мемлекет басшысы Еуразиялық даму банкінің басқарма төрағасы Николай Подгузовты қабылдады, деп хабарлайды Ақорданың баспасөз қызметінен.
Президентке халықаралық қаржы институтының жұмыс нәтижесі мен алдағы жоспары жөнінде баяндалды. Еуразиялық даму банкі (ЕАДБ) Қазақстан экономикасына былтыр 1,4 миллиард доллар қаржы салған, ал инвестиция портфеліндегі қазақстандық жобалардың үлесі 60 пайызға жеткен.
Қазақстан Республикасы бойынша 2022-2026 жылдарға арналған стратегия аясында аталған банк елімізге 3,8 миллиард доллар инвестиция құюды жоспарлаған болатын. Қасым-Жомарт Тоқаевқа бұл меже мерзімінен бұрын орындалғаны туралы мәлімет берілді. Биыл банкке жалпы сомасы 4,5 миллиард доллардан асатын жобалар ұсынылды. Еуразиялық даму банкі энергетикалық нысандарды жаңғырту және жаңартылатын энергия көздерін, көлік және логистика салаларын дамыту бағыттарына, соның ішінде республикалық маңызы бар жолдарды жөндеуге, инфрақұрылым нысандары құрылысына, өнеркәсіп және цифрлық технологияларға қатысты жобаларға 1 миллиард доллардан астам инвестиция салуды көздеп отыр.
Николай Подгузовтың айтуынша, ЕАДБ серіктестермен және көпжақты ұйымдармен тығыз қарым-қатынаста жұмыс істеп, сондай-ақ өздері ұйымдастыратын халықаралық іс-шаралар арқылы Қазақстанның қаржы нарығын дамыту және инвестиция тарту ісіне белсенді атсалысуға ниетті.
Мемлекет басшысы банктің Қазақстан экономикасын дамытуға қосқан үлесін жоғары бағалап, ынтымақтастықты одан әрі нығайтуға бейіл екенін растады.
Еуразиялық даму банкі - инвестициялық қызметін Еуразия кеңістігінде жүргізетін көпжақты даму банкі. Оның штаб-пәтері Алматы қаласында орналасқан. 2025 жылы ЕАДБ портфеліне жалпы инвестиция сомасы 16,5 миллиард доллар болатын 305 жоба енді. Банк өз жұмысында көлік инфрақұрылымы, цифрландыру, жасыл энергетика, ауыл шаруашылығы, өнеркәсіп және машина жасау салаларындағы интеграцияға тиімді әсер ететін жобаларға басымдық береді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Жаз өте ыстық болады: премьер-министр өрт қаупі жоғары маусымға дайындалуды тапсырды
ҚР Премьер-министрі Олжас Бектеновтің төрағалығымен өткен Үкімет отырысында өрт қаупі жоғары кезеңге дайындық мәселесі қаралды, деп хабарлайды Үкіметтің баспасөз қызметінен.
Ірі өрттерді болдырмау жөніндегі шаралар туралы Экология және табиғи ресурстар министрі Ерлан Нысанбаев, ТЖМ бөлімшелерінің өрт қаупі жоғары кезеңге дайындығы туралы Төтенше жағдайлар министрі Шыңғыс Әрінов, ғарыштық мониторинг және өрттерді болжау жүйелері жөніндегі жұмыс туралы - цифрлық даму, инновациялар және аэроғарыш өнеркәсібі министрі Жаслан Мәдиев баяндады.
Экология және табиғи ресурстар министрлігінің деректері бойынша еліміздің мемлекеттік орман қорының ауданы 31 млн га құрайды, оның ішінде орманмен жабылған - 13,9 млн га. Бүгінде елімізде орман өрттерін ерте анықтау жүйелерімен қамту 1,3 млн га құрайды. Жыл басынан бері жалпы ауданы 4,4 мың гектардан асатын 25 өрт тіркелді.
Ерлан Нысанбаев орман шаруашылықтарының биылғы жылдың өрт қаупі жоғары кезеңіне дайындық дәрежесіне жүргізілген тексерулердің нәтижелері туралы баяндады. Биыл 10 сәуірдегі жағдай бойынша Ақтөбе, Атырау, Шығыс Қазақстан, Жамбыл, Батыс Қазақстан, Қостанай, Павлодар, Солтүстік Қазақстан және Түркістан облыстарының орман мекемелері, сондай-ақ "Семей орманы" резерваты дайын болмады. Облыс әкімдіктеріне анықталған кемшіліктерді жоюға және техниканы толық жауынгерлік даярлыққа келтіруге ұсыныстар жолданды.
Премьер-министр әкімдіктердің назарын өрттерді сөндіру кезінде жедел ден қою және өзара іс-қимыл жасау үшін мемлекеттік органдардың іс-қимылдарының жаңа алгоритмін орындау қажеттігіне аударды.
Осы ережелерді сақтамауына байланысты Павлодар облысы мен Абай облысының жауапты ведомстволарына биылғы жылдың алғашқы өрттері кезінде экология және табиғи ресурстар министрлігіне, ТЖМ және ІІМ-ге тиісті шаралар қабылдап, жаза қолдану арқылы тергеу жүргізу тапсырылды.
Олжас Бектенов Қазгидрометтің ыстық және құрғақ жаз туралы болжамын ескере отырып, өрт қаупі жоғары кезеңдегі барлық қызметтердің жедел және үйлестірілген жұмысының маңыздылығын атап өтті. Маусымға дайындық жұмыстарын жандандыру қажет аймақтар аталды.
Тексеріс көрсеткендей, Табиғи өрттердің алдын алу және жою жөніндегі іс-шаралар жоспары барлық өңірде бірдей тиісті деңгейде іске асырылып отырған жоқ. Жамбыл, Қостанай, Түркістан, Ақтөбе, Қарағанды, Абай, Жетісу және Ұлытау облыстарындағы елді мекендердің айналасынан минералды белдеу жасау жұмыстары басталмаған. Далалы жерлерде, орманда өрт шығатын болса, бұл ауылдарға тікелей қауіп төнеді. Батыс Қазақстан, Қостанай, Қарағанды, Ұлытау облыстарында елді мекендердің аумағын қураған шөптер мен қоқыстардан тазарту жұмыстары әлі күнге дейін жүргізілмеген. Одан бөлек, Ақтөбе, Павлодар, Қызылорда, Атырау, Батыс Қазақстан, Қостанай, Түркістан, Солтүстік Қазақстан және Жамбыл облыстарының орман мекемелері өрт қаупі жоғары кезеңге дайын емес. Осыған байланысты өңір әкімдеріне биылғы маусымға дайындық жұмыстарын күшейтуді және бұл мәселені тікелей бақылауға алуды тапсырамын", - деп атап өтті Олжас Бектенов.
Отырыс қорытындысы бойынша Премьер-министр бірқатар міндеттер жүктеді. Төтенше жағдайлар министрлігіне Экология және табиғи ресурстар министрлігімен және басқа да мүдделі мемлекеттік органдармен бірлесіп, мамыр айының соңына дейін табиғи өртке қарсы республикалық командалық-штабтық оқу-жаттығуларын өткізуді тапсырды.
Оқу-жаттығуларда трансшекаралық өртті сөндіру және көрші мемлекеттердің қызметтерімен өзара іс-қимыл мәселелерін пысықтау керек. Өрт қаупі жоғары өңірлерде мемлекеттік авиацияның өрт сөндіруге арналған тікұшақтарының кезекшілігін ұйымдастыру мәселесін қараңыздар. Орман алқаптары мен ашық жерлерді шолып шығу үшін ұшқышсыз ұшу аппараттарын пайдалану керек", - деді Олжас Бектенов.
Экология министрлігі әкімдіктермен бірлесіп табиғат қорғау және орман шаруашылығы мекемелерін әрі қарай жарақтандыру жөніндегі жұмысты жалғастырады. Сондай-ақ Цифрлық даму, инновациялар және аэроғарыш өнеркәсібі министрлігімен, "Қазақтелеком" компаниясымен бірлесіп, өртті ерте анықтау және өрттердің өршу жағдайын, оны сөндіру алгоритмдерін модельдеу жүйелерінің қамту ауқымын ұлғайтады. Тиісті жоспар-кестені әзірлеу және оны Үкіметте бекіту, орындалуын қамтамасыз ету жөнінде тапсырма берілді.
Әкімдіктердің алдына елді мекендерде өрт сөндіру бекеттері мен ерікті өртке қарсы құралымдарды ұйымдастыру бойынша жұмысты жалғастыру міндеті қойылды. Өңірлерде әуе кемелерін тарту үшін жанар-жағармай материалдарының қажетті қорларын қамтамасыз ету, өрт сөндіру көліктері мен тікұшақтарға қажетті су көздерін дайындау қажеттігі атап өтілді. Ұйымдастыру мәселелерін биылғы 10 мамырға дейін шешу тапсырылды.
Ішкі істер министрлігі өрт қаупі жоғары кезеңде орман алқаптарында демалуға тыйым салу жөнінде шаралар қабылдауы, рейдтер мен бақылау жүргізу кестесін жасауы қажет. Өрт қауіпсіздігі талаптарын бұзғандардың барлығын жауапкершілікке тарту міндеті қойылды.
Төтенше жағдайлар, экология және табиғи ресурстар, мәдениет және ақпарат министрліктеріне, әкімдіктерге ел арасында өрт қауіпсіздігі талаптарын сақтау туралы түсіндіру жұмыстарын жандандыру тапсырылды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Алатау ауданында 119 СЕСН бұзылды
Алматының Алатау ауданында заңсыз орналастырылған стационарлық емес сауда нысандарын (СЕСН) сүру жұмыстары қарқын алды. Өз бетінше орнатылған СЕСН-дерді жою науқаны Алматы әкімі Ерболат Досаевтың тапсырмасы аясында қолға алынған, деп хабарлайды Алматы қаласының әкімдігінің баспасөз қызметінен.
Бүгінгі таңда Алатау ауданында 119 заңсыз СЕСН мен 40 күш өлшеу құрылғысы бұзылды. Атап айтқанда, соңғы күндері Мәдениет, Саялы және Әйгерім шағын аудандарында заңсыз дүңгіршектер алынып тасталды.
Жергілікті тұрғындар бұл бастаманы қолдайды. "Енді ауламыз кеңейіп, таза болып қалды, бұрын бұл дүңгіршектер ретсіздік тудырып, жүріп-тұруға кедергі келтіретін", - дейді Саялы шағын ауданының тұрғыны.
Қаланың заңсыз нысандардан ауқымды түрде тазартылуы Алматының сәулеттік келбетін жақсартуға, тұрғындардың қауіпсіздігін қамтамасыз етуге және қолайлы қалалық орта қалыптастыруға бағытталған. Бүгінде мемлекеттік қордың жерінде орналасқан 360 СЕСН мен 274 күш өлшеуіш алынып тасталды
Бұзу жұмыстары жалғасуда, ал қала әкімдігі кәсіпкерлерді сауда нысандарын орналастыру кезінде белгіленген нормалар мен ережелерді сақтауға шақырады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.