“Ақша, әйтпесе жарамын!”: қарағандылық полицейлер кәмелетке толмаған жалған террористті ұстады. Танысымен жанжалдасып қалған мектеп оқушысы оның атынан жалған хабарлама жіберген. “City Mall” сауда орталығында бомба жасырылды деген жазба облыстық әкімдіктің электронды поштасына түсті, – деп хабарлайды Polisia.kz
Хатта қыз таныс құрбысының нөмірін жазып, бомбаны жармау үшін төлем талап еткен. Оқиға орнына дереу жеткен шұғыл қызмет өкілдері сауда үйінен 200-ден астам адамды эвакуациялап, ғимаратта тексеру жұмыстарын жүргізді. Алайда ешқандай жарылғыш зат табылған жоқ.
Іздестіру іс-шараларының нәтижесінде қарағандылық жедел уәкілдер хабарламада көрсетілген абоненттік нөмірдің иесін – 14 жасар қызды анықтады. Алайда одан әрі тексеру барысында хабарламаны онымен жанжалдасып қалған құрбысының жібергені анықталды.
Осыған ұқсас жайт Петропавлда болды. 102 пультіне “Dostyq Mall” сауда-ойын-сауық орталығында бомба жасырылғаны туралы хабар келіп түсті. Тез арада барлық қажетті шаралар қабылданды. Сауда орталығына келушілер мен жұмысшылар эвакуацияланды, оқиға орнына полиция, төтенше жағдайлар және басқа да мүдделі қызметтердің қызметкерлері келді.
Тексеру нәтижесінде жарылғыш зат табылған жоқ. Жедел-іздестіру іс-шаралары барысында полицейлер кәмелетке толмаған қала тұрғынын анықтады. Медициналық куәландыруға сәйкес 16 жастағы жасөспірім мас күйде болған.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.