Қазақстандық кәсіпкерлер Сианьда жалпы құны 98 млн АҚШ долларын құрайтын келісімге қол қойды
Сиань қаласында өткен сауда экономикалық миссия қорытындысы бойынша қазақстандық кәсіпкерлер $98 млн-ға келісімшарт жасасты, деп хабарлайды Қазақстан Республикасы Сауда және интеграция министрлігінің баспасөз қызметінен.
Өткен жылдың қорытындысы бойынша Қазақстан мен Қытай арасындағы тауар айналымы 6,8%-ға артып, $43,8 млрд-қа жетті. Өткен жылы ШЫҰ саммитінде екі ел басшылары бұл көрсеткішті $80 млрд-қа жеткізу міндетін қойған болатын.
2024 жылы Қазақстан мен Қытайдың Шэньси провинциясы арасындағы өзара тауар айналымы $382,3 млн-ды құрап, өткен жылдың сәйкес кезеңімен салыстырғанда ($157 млн) 2,4 есеге артты.
Қазақстан Республикасының Сауда және интеграция министрі Арман Шаққалиевтің Шэньси провинциясының әкімшілік орталығы Сиань қаласына бизнес-делегацияны бастап баруы - Оңтүстік-Шығыс Азия бағытындағы экспорттық жолда маңызды көлік-логистикалық торап болып саналатын Шэньси провинциясымен сауда-экономикалық және инвестициялық ынтымақтастықты одан әрі тереңдетуге ықпал етті.
Сапардың бірінші күні, 1 сәуірде, ҚКП партия комитетінің хатшысы, Шэньси провинциясы халық өкілдері жиналысының төрағасы Чжао Идэмен кездесу өтті.
Шанхай ынтымақтастық ұйымының отырысынан кейін әріптесіммен бірге бұл мақсатқа қалай қол жеткізуге болатынын талқыладық және бірлесіп парадигманы өзгерту қажет деген ортақ шешімге келдік. Тек сауда-саттықпен ғана шектелмей, инвестицияларға да көңіл бөліп, бірлескен өндірістерді іске қосуымыз керек. Осы арқылы тауар айналымын арттыру мүмкіндіктері кеңейеді. Біз өңірлендіру қағидатын қолдана бастадық", - деді Арман Шаққалиев.
Нәтижесінде, өткен жылы СИМ басшысы Қытайдың жеті провинциясына сапар жасап, әрқайсысында 3-4 ірі компания анықталып, қытайлық тараппен бірлесіп өзара сауда, өндірістік кооперация және инвестиция тарту бойынша тауарлар тізімі жасалды.
Чэнду қаласында қол жеткізілген келісімдер нәтижесінде тауар айналымын 50%-дан астамға, ал Нанкинде - 3,5 есеге арттырдық. Шэньси провинциясымен де ынтымақтастық кеңейеді деп сенемін. Біз $490 млн астам сомаға 16 түрлі өнім бойынша ұсыныс әкелдік. 30 күнге дейін визасыз режимнің енгізілуі туризм мен іскерлік байланыстардың дамуына үлкен серпін береді", - деп атап өтті ҚР Сауда және интеграция министрі.
Тараптар мемлекеттер арасындағы ынтымақтастық бірқатар бағыттарда, соның ішінде көлік секторында белсенді дамып келе жатқанын айтты. Өткен жылы Қазақстан арқылы Қытайдан Еуропаға шамамен 300 пойыз жөнелтілсе, 2025 жылдың алғашқы екі айында 111-ден астам пойыз жіберілген.
Сапардың екінші күні - 2025 жылдың 2 сәуірінде Сиань қаласында Қазақстанның сауда-экономикалық миссиясы (СЭМ) өтті. B2B-кездесулердің қорытындысы бойынша қазақстандық компаниялар $98 млн сомасына экспорттық келісімшарттарға қол қойды.
Бұл сауда миссиясы алғаш рет шетелдік мекеме - Қазақстан Республикасының Бас консулдығының базасында өткізілді. Екі жыл бұрын дәл осы ғимаратта Мемлекет басшысының қатысуымен қазақстандық тауарлардың шоурумы ашылған болатын. Миссияға Қазақстаннан 60-тан астам, Қытайдан 100-ден астам кәсіпкер қатысты.
Сауда-экономикалық миссия аясында QazTrade ұйымдастырған көрме үш қазақ киіз үйі форматында өткізілді. Онда негізінен азық-түлік саласындағы 50-ге жуық қазақстандық компания өз өнімдерін таныстырды. Ұн, майлы және дәнді дақылдар - Қытай нарығында жоғары сұранысқа ие. Бұл өнімдер Қазақстанның Қытайға бағытталған стратегиялық экспортының негізін құрайды және отандық өндірушілер үшін жаңа мүмкіндіктер ашуда.
СЭМ қорытындысы бойынша QazTrade Шэньси провинциясы Халықаралық саудаға жәрдемдесу комитетінің Сауда-өнеркәсіп палатасымен және AIJU Grain and Oil Industry Group компаниясымен ынтымақтастық туралы келісімдерге қол қойды. Бұл келісімдер Қазақстан мен Қытайдың бизнес өкілдері арасында тікелей байланыс пен тығыз әріптестік орнатуға мүмкіндік береді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
Алматыда қытайлық компанияның қатысуымен қоқыс өңдеу зауыты салынады
Алматы әкімі Ерболат Досаев Қытайдың жетекші Shanghai SUS Environment Co., Ltd. Компаниясының президенті Лонг Цзишэнменн кездесті, деп хабарлайды Алматы қаласының әкімдігінің баспасөз қызметінен.
Shanghai SU Environment Co., Ltd. - экология және энергетика саласындағы кешенді қызметтердің әлемдік басты жеткізушісі, қалдықтарды энергияға қайта өңдеу саласында (Waste-to-Energy) Қытайдағы нарық үлесінің 40% - ын қамтиды. Бүгінгі таңда компания бүкіл әлем бойынша жалпы өңдеу қуаты тәулігіне 110 мың тонна, жыл сайын 18 млрд кВт/сағ электр энергиясын өндірумен және 2,65 млн шаршы метрге дейінгі аумақты жылытуды қамтамасыз етумен 84 жобаны іске асырды. Генерация тиімділігі 26%-ды құрайды, бұл ең жақсы халықаралық стандарттарға сәйкес келеді.
SUS Environment зауыттарының айрықша ерекшелігі экологиялық қауіпсіздіктің жоғары стандарттары болып табылады. Компанияның кәсіпорындары зиянды шығарындыларды бақылауды қамтамасыз ететін көп сатылы сүзгісі бар түтін газдарын тазартудың озық жүйелерімен жарақтандырылады. Нысандардың айналасында екпелер, көгалдар мен ағаштар бар жасыл аймақтар құрылып, толыққанды эко-индустриалды парк құрады, бұл көршілес аудандардың тұрғындары үшін ыңғайсыздық деңгейін төмендетеді және қолайлы экологиялық ортаны қалыптастырады.
Кездесу барысында Алматыда 270 млн.АҚШ доллары сомасына тікелей шетелдік инвестицияларды тарта отырып, қазіргі заманғы қоқыс өңдеу зауытын салу мәселелері талқыланды. Зауыт тәулігіне 2000 тоннаға дейін қалдықтарды 60 МВт-қа дейін электр энергиясын өндірумен қайта өңдейтін болады, бұл Алматының ҚТҚ кәдеге жарату қажеттілігін жабады және 2029 жылға қарай қалдықтарды қайта өңдеу үлесін 80% - ға дейін жеткізуге мүмкіндік береді. Құрылысты 2025 жылдың күзінде бастау жоспарлануда. Қазіргі уақытта ҚР Үкіметімен инвестициялар туралы келісімге қол қою мәселесі пысықталуда.
Жобаның Бас мердігері ретінде әлемнің 110 елінде ірі инфрақұрылымдық жобаларды іске асыру тәжірибесі бар China Railway Construction Corporation (CRCC) мемлекеттік корпорациясының еншілес құрылымы - China Civil Engineering Construction Corporation анықталды. Құрылысқа сонымен қатар SUS Environment компаниясының жеке зауыттарында өндірілетін жабдықтар, соның ішінде торлы решеткалар және басқа да негізгі компоненттер қатысады.
Алматыда зауыт салу жөніндегі жобаны іске асырудан басқа, SUS Environment компаниясы кадрлар даярлау жөніндегі өңірлік оқу орталығын құру жөнінде бастама көтерді. Орталық экологиялық құзыреттерді дамытуға және озық технологияларды өңірге беруге жәрдемдесе отырып, Қазақстаннан, Орталық Азия елдерінен, Моңғолиядан, Ираннан және Ауғанстаннан жас мамандарды оқытуға бағдарланатын болады.
Жоба Алматының Шанхаймен стратегиялық әріптестігі аясында жүзеге асырылуда. Жаңа зауыт бүкіл Орталық Азияда электр энергиясын өндірумен қалдықтарды экологиялық кәдеге жарату саласында флагманға айналады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қаржыгерлер Қазақстан экономикасы 2025 жылы тұрақты өседі деп болжайды
2025 жылы Қазақстанның жалпы ішкі өнімінің (ЖІӨ) өсуі 4,9% деңгейінде күтілуде, одан кейін 2026 жылы 4,1%-ға дейін баяулайды, - делінген Азия даму банкінің (АДБ) жаңа есебінде.
Asian Development Outlook (Азия дамуына шолу) 2025 сәуірдегі шығарылымына сәйкес, 2025 жылы Қазақстанның экономикалық өсуінің жеделдеуі Теңіз кен орнында Future Growth Expansion жобасының іске қосылуының ықпалымен мұнай өндірудің болжамды ұлғаюына байланысты. 2026 жылы өсу қарқынының баяулауы салық саясатында күтілетін өзгерістер күшіне еніп, мемлекеттік шығыстар қысқарған кезде бюджеттік шоғырландыру аясында күтіледі. Төмен тәуекел факторларына жаһандық сын-қатерлердің ықтимал теріс салдары, сондай-ақ мұнай экспорты маршруттарындағы ықтимал үзілістер жатады
Қазақстан экономикасы тұрақты өсуді көрсетіп отыр. Осы қарқындарды сақтау үшін Ұлттық қорға тәуелділікті азайту мақсатында мемлекеттік қаржыны басқару жүйесін нығайту және бюджеттік басқарудың сапасын арттыру өте маңызды", - деп атап өтті АДБ Қазақстандағы өкілдігінің директоры Утсав Кумар. - "Бұл шаралар жеке секторды дамытуға арналған құрылымдық реформалармен қатар экономиканың сыртқы күйзелістерге төтеп беру қабілетін нығайтады".
Қатаң ақша-несие саясаты мен бағаның өсуіне ықпал ететін тұрақты валюта бағамының ықпалымен, инфляция 2025 жылы 8,2%-ға дейін және 2026 жылы 6,5%-ға дейін біртіндеп төмендейді деп күтілуде. Бюджет тапшылығы 2025 жылы ЖІӨ-нің 2,8%-на дейін аздап ұлғаяды деп болжануда, ал Үкімет ұсынған қосылған құн салығы ставкасының өсуі және салық жеңілдіктерінің саны қысқарған жағдайда 2026 жылы 1,7%-ға дейін қысқарады. Ағымдағы шоттың тапшылығы мұнай өндірудің өсуі аясында тауарлар экспортының көлемін ұлғайту есебінен қысқарады деп күтілуде.
Есепте Қазақстанның төтенше жағдайларға ден қоюға институционалдық дайындығын арттыру үшін табиғи апаттар қаупін азайту жөніндегі шараларды қаржыландыру стратегиясын әзірлеу қажеттігі атап көрсетілген. Тәуекелдерді басқарудың көп деңгейлі стратегиясы елдің қаржылық тұрақтылығын арттырады және үкіметті уақтылы көмек көрсету және қалпына келтіру жұмыстарын бастау үшін қажетті ресурстарға жылдам қол жеткізуді қамтамасыз етеді.
Өсім болжамдары 2 сәуірде АҚШ әкімшілігі жаңа тарифтерді енгізу туралы хабарландырғанға дейін жасалды, сондықтан базалық сценарий бұрын қолданылған тарифтерді ғана ескереді. Соған қарамастан, есептің сәуір айындағы шығарылымында Азия-Тынық мұхиты аймағындағы экономикалық өсуге жоғары тарифтердің ықтимал әсерін талдау ұсынылған.
Қазақстан 1994 жылы АДБ мүшесі болды. Содан бері Банк елге мемлекеттік секторды басқару, қаржы, энергетика, көлік және басқа салаларда жалпы сомасы 7,5 миллиард АҚШ долларынан асатын қарыздар, гранттар және техникалық көмек көрсетті.
АДБ ‒ Азия-Тынық мұхиты аймағында тұрақты, инклюзивті және өміршең өсуді қолдайтын жетекші көпжақты даму банкі. Күрделі мәселелерді бірлесіп шешу үшін ұйым мүшелерімен және серіктестермен ынтымақтаса отырып, АДБ өмір сүру сапасын жақсарту, сапалы инфрақұрылым құру және планетаны қорғау үшін инновациялық қаржы құралдары мен стратегиялық серіктестіктерді пайдаланады. Банк 1966 жылы құрылды және 69 мүше елге тиесілі, оның 49-ы аймағында орналасқан.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Ресей мен Қазақстан арасындағы өзара тауар айналымының көлемі $27,8 млрдқа дейін өсті
ҚР Премьер-министрі Олжас Бектенов Ресей Федерациясы Үкіметі төрағасының орынбасары - Үкімет Аппаратының басшысы Дмитрий Григоренкомен кездесу өткізді. Цифрландыру және жасанды интеллект, инвестициялар, инновациялық даму саласындағы бірқатар мәселелер талқыланды, деп хабарлайды Үкіметтің баспасөз қызметінен.
Мемлекет басшылары деңгейінде қол жеткізілген уағдаластықтарды іске асыру барысына назар аударылды. Қазақстан Президенті Қасым-Жомарт Тоқаев пен Ресей президенті Владимир Путиннің тұрақты байланыстарының нәтижесінде екіжақты өзара іс-қимыл деңгейі жоғары қарқынмен жалғасуда. 2024 жылдың қорытындысы бойынша өзара тауар айналымының көлемі шамамен 3%-ға өсіп, $27,8 млрд-ты құрады. Бұл ретте әрі қарай сауда-экономикалық және инвестициялық ынтымақтастық үшін айтарлықтай әлеует бар.
Кездесуге қатысушылар жасанды интеллектіні қолданушылардың қарқынды өсіп келе жатқанын айтып, цифрландыру саласындағы екіжақты әріптестік қатынастардың маңыздылығын атап өтті. Жаңа технологияларды енгізу үдерістерінде күш-жігерді біріктіру инновацияларды дамытуға, IT-кәсіпкерлер мен стартап-жобаларды қолдау шараларын қалыптастыруға, білікті мамандарды даярлауға, ақпараттық қауіпсіздік шараларын жетілдіруге серпін береді. Биыл Астанада Alem. ai халықаралық жасанды интеллект орталығының ашылуымен IT-мамандарға жаңа мүмкіндіктер пайда болады.
Жұмыс сапары аясында Дмитрий Григоренко Қазақстанның жетекші IT-алаңдарының, соның ішінде Astana Hub технопаркі және NU технопаркінің қызметімен танысады, онда бүгінде 1600-ден астам IT-компаниялар тіркелген, олардың 425-іне шетелдіктер қатысуда.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Қазақстан ЕО нарығына экспортты 2 миллиард доллардан астам сомма5а ұлғайтуға дайын - Тоқаев
Қасым-Жомарт Тоқаев "Орталық Азия - Еуропа Одағы" саммитіне қатысты, деп хабарлайды Ақорданың баспасөз қызметінен.
Мемлекет басшысы "Орталық Азия - Еуропа Одағы" саммитінде сөз сөйледі.
Президент ерекше қонақжайлық көрсеткен және саммитті жоғары деңгейде ұйымдастырған Өзбекстан Республикасының Президенті Шавкат Мирзиёевке алғыс айтты. Сонымен қатар көпжақты ынтымақтастықты нығайтуға әрдайым ниет танытқаны үшін Еуропалық Кеңес Президенті Антониу Коштаға, Еуропалық комиссия Президенті Урсула фон дер Ляйенге және Орталық Азия елдерінің басшыларына шынайы ризашылығын білдірді.
Қазақстан Президенті геосаяси дүрбелеңдер мен жаһандық сын-қатерлер белең алған кезеңде Орталық Азия мен Еуропа Одағы арасындағы ықпалдастықтың өзектілігі арта түскеніне назар аударды.
Қасым-Жомарт Тоқаев Орталық Азия мен Еуропа Одағының келешектегі күн тәртібіне қатысты өз ойын ортаға салды.
Президент, ең алдымен, сауда-экономикалық байланыстарды нығайтуға баса мән берген жөн деп санайды. Оның айтуынша, Қазақстан ЕО нарығына жалпы құны 2 миллиард доллардан асатын 175 тауар түрінің экспортын ұлғайтуға дайын.
Қасым-Жомарт Тоқаев еуропалық компанияларды осындай жаңа жобаларды қаржыландыру үшін "Астана" халықаралық қаржы орталығының алаңын пайдалануға шақырды.
Мемлекет басшысы энергетика саласын ынтымақтастықтың аса маңызды бағыты ретінде атады.
Қазақстан - Еуропаға көмірсутегін жеткізетін сенімді серіктестердің бірі. Еуропа Одағы шетелден импорттайтын мұнайдың 13 пайызға жуығы біздің елімізге тиесілі. Оның басым бөлігі Каспий құбыр консорциумы (КҚК) арқылы тасымалданады. Еуропа Одағы аталған консорциумның тұрақты әрі ұзақ мерзімді жұмыс істеуіне қолдау білдіріп отыр. Біз мұны жоғары бағалаймыз. Дегенмен шикізат тасымалдаудың балама жолдарын да дамытамыз. Қазақстан жаңартылатын қуат көздері мен экологиялық таза отын жобаларын жүзеге асыруға кірісті. Total, Eni, Svevind секілді бұрыннан келе жатқан серіктестерімізбен және басқа да еуропалық компаниялармен бірге жел, күн электр стансаларының қуатын арттырып, "жасыл" сутегі өндірісі жобасын қолға алдық. Бұдан бөлек, Қазақстан Өзбекстан және Әзербайжан елдерімен бірлесіп, "жасыл" энергияны Каспий теңізі арқылы Еуропа нарығына жеткізетін біртұтас электр желісін салу бойынша ірі жобаны бастады", - деді Президент.
Қасым-Жомарт Тоқаевтың пікірінше, сирек кездесетін минералдарды игеру саласындағы ынтымақтастықтың стратегиялық маңызы зор.
Бүгінде Қазақстанда Еуропа Одағы экономикасына қажетті 34 шикізаттың 19 түрі өндіріледі. Оның қатарында уран, титан, мыс, литий, кобальт, вольфрам және басқа да көптеген элементтер бар. Сонымен қатар еліміз Еуропалық қайта құру және даму банкімен арадағы келісім бойынша геологиялық барлау саласында бірлескен жобаларды іске асырып, кен игерудің озық тәжірибесін енгізіп жатыр. Бұл ретте Президент Астанада Сирек кездесетін металдарды зерттейтін аймақтық орталық құруды ұсынды. Аталған ғылыми мекеме кәсіпорындар мен инвесторларды игеруге болатын кеніштер, технологиялардың дамуы туралы өзекті ақпаратпен қамтамасыз етеді.
Мемлекет басшысы Орталық Азияның Шығыс пен Батыс арасында тиімді жеткізу тізбегі қалыптасқан транзит торабына айналуға мүмкіндігі бар деп санайды. Былтыр Транскаспий халықаралық көлік дәлізімен контейнер арқылы тасымалданған жүк көлемі 62 пайызға артып, 4,5 миллион тоннаны құраған. 2027 жылға қарай жүк көлемін он миллион тоннаға дейін жеткізу көзделіп отыр. Қасым-Жомарт Тоқаев Еуропа Одағының Орталық Азия өңіріндегі орнықты көлік байланысының дамуына оң септігін тигізіп отырған Global Gateway стратегиясына қолдау білдірді.
Қазақстан декарбонизация бастамаларын белсенді жүзеге асырып келеді. Президент еліміздің әлемдегі ядролық отынның 40 пайызға жуығын қамтамасыз ету арқылы таза энергия өндірісінде маңызды рөл атқаратынын айтты. Өткен жылы Қазақстанда Климаттың өзгеруі және жасыл энергетика бойынша Жобалық кеңсе ашылды.
Мемлекет басшысы цифрлық технология мен жасанды интеллектіні дамыту мәселесіне айрықша тоқталды.
Қазақстан аталған салаларға инвестицияны арттырды. Жыл басында Президент жанындағы Жасанды интеллект жөніндегі халықаралық консультативтік кеңестің негізі қаланды. Қазір елімізде 100 мың жоғары білікті IT-маман даярлауды көздейтін ауқымды бағдарлама басталды. Астанада Alem.ai жоғары технологиялар орталығын құру жұмыстары жүргізіліп жатыр. Ол инновацияны енгізумен, стартаптарды қолдаумен және осы салада зерттеулер жүргізумен айналысады. Бұдан бөлек, біз жасанды интеллект саласының дамуын жеделдету үшін Венчурлік қорды іске қостық. Еуропа Одағы Team Europe бастамасы арқылы Орталық Азия елдеріне цифрлық технологиялар саласындағы ынтымақтастықты өркендетуге көмек көрсетіп келеді. Қазақстан бұл бағытта тәжірибе алмасуға дайын. Осы орайда Astana Hub базасында "Орталық Азия - Еуропа Одағы" инновациялық кампусын ашуды ұсынамын", - деді Қасым-Жомарт Тоқаев.
Мемлекет басшысы Еуропа Одағы еліміздің ғылым және білім саласындағы маңызды серіктесі екенін атап өтті.
Мемлекеттеріміз Erasmus+, Horizon Europe бағдарламалары және тағы да басқа бастамалар аясында ынтымақтаса жұмыс істеп келеді. Қазақстанда отыздан астам шетелдік университеттің бөлімшелері ашылды. Бұл елімізде академиялық білімнің өркен жаюына ықпал етеді. Біз гранттар мен стипендиялар санын көбейтуге мүдделіміз. Мұндай бірлескен бағдарламалар бірқатар Еуропа елдерімен жүзеге асырылып жатыр. Жасанды интеллект, су ресурстарын басқару, биотехнология секілді маңызды салаларда маман даярлауға басымдық беретін "Орталық Азияға арналған Erasmus+" бағдарламасын әзірлеуді ұсынамыз", - деді Президент.
Мемлекет басшысы орнықты дамудың басты кепілі саналатын халықаралық қауіпсіздік пен тұрақтылықтың маңызына тоқталды. Оның айтуынша, Қазақстан теңгерімді сыртқы саясатты берік ұстанады және барлық мүдделі мемлекеттермен, негізгі халықаралық құрылымдармен, соның ішінде Еуропа Одағымен ынтымақтастықты кеңейтуге ниетті.
Президент жаһандық тұрақсыздық шиеленісе түскен кезеңде әлемдегі күрделі оқиғаларға баға беруде барынша байыптылық танытып, жауапкершілікпен қарауға шақырды. Сондай-ақ ол барлық елді БҰҰ Жарғысы мен жалпыға ортақ халықаралық құқық қағидаларын мүлтіксіз сақтау үшін барынша күш-жігер жұмылдыруға, сондай-ақ Бас хатшы Антониу Гутерриштің қызметіне қолдау білдіруге үндеді. Ұйымның құрылғанына 80 жыл толған сәтте мұның өзектілігі арта түседі.
Қасым-Жомарт Тоқаев Украинаға қатысты келіссөз процесіне қолдау білдірді.
Қазақстан кез келген қақтығыстың бейбіт жолмен шешілуін жақтайды. Сондықтан Украинаға қатысты келіссөздердің басталуын құптаймыз. Мәселенің күрделі екенін түсінеміз. Дегенмен шиеленіс оң шешімін табады деп үміттенеміз", - деді Президент.
Мемлекет басшысы БҰҰ Бас Ассамблеясы Алматыда Орталық Азия мен Ауғанстан үшін орнықты даму мақсаттары жөніндегі аймақтық орталықты құру туралы қарарды бірауыздан қабылдағанын айтып, жиын қатысушыларына Қазақстанның бастамасын қолдағанына ризашылық білдірді. Оның пікірінше, Орталық Ұйымның 2030 жылға дейінгі күн тәртібін ілгерілетуге, өңірдегі өзекті әлеуметтік, экономикалық және экологиялық мәселелерді шешуге елеулі үлес қосады.
Саммитте сондай-ақ Өзбекстан Президенті Шавкат Мирзиёев, Еуропалық Кеңес Президенті Антониу Кошта, Еуропалық комиссия Президенті Урсула фон дер Ляйен, Қырғызстан Президенті Садыр Жапаров, Тәжікстан Президенті Эмомали Рахмон, Түрікменстан Президенті Сердар Бердімұхамедов, Еуропалық қайта құру және даму банкінің президенті Одиль Рено-Бассо сөз сөйледі.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Экспорттың тек 4,8 пайызы ғана әсер етеді - СИМ АҚШ-тың Қазақстанға қатысты сауда баждарын енгізуі туралы түсініктеме берді
АҚШ тарапынан қабылданған жаңа сауда шараларын алдын ала талдау нәтижесінде, Қазақстаннан АҚШ-қа экспортталатын тауарларының елеулі бөлігіне қосымша тарифтердің әсері болмайтыны анықталды. Өйткені олар АҚШ әкімшілігінің нормативтік актілерінде көзделген ерекшеліктер тізіміне енгізілген, деп хабарлайды Қазақстан Республикасы Сауда және интеграция министрлігінің баспасөз қызметінен.
Қазақстан Республикасының Ұлттық статистика бюросының мәліметтері бойынша, 2024 жылдың нәтижесі бойынша Қазақстан мен АҚШ арасындағы тауар айналымы 4,2 млрд АҚШ долларын құрады, бұл өткен жылмен салыстырғанда 4%-ға артық (4,1 млрд АҚШ доллары). Қазақстанның АҚШ-қа экспорт көлемі 2024 жылы 30,6%-ға артып, 2,0 млрд АҚШ долларын құрады. АҚШ-тан Қазақстанға импорт көлемі 2,2 млрд АҚШ доллары болды.
Қазақстанның АҚШ-қа экспорт құрылымында негізгі орын алатын тауарлар - шикі мұнай, уран, күміс, ферросплавтар және басқа да тауарлар. Бұл санаттағы өнімдер АҚШ Президентінің "Тауарлар саудасындағы маңызды және тұрақты тапшылықты жою мақсатында өзара тарифтер арқылы импортты реттеу туралы" Жарлығы бойынша ерекшеліктер тізіміне енгізілген тауарлардың 92 % құрайды.
Қосымша баждар белгілі бір тауар топтарына қатысты енгізілетін болады. Бұл санаттағы тауарлардың экспорт көлемі былтыр 95,2 млн АҚШ долларын құрады. Олардың ішінде - фосфор (2024 жылы экспорт көлемі 15,9 млн АҚШ доллары), ферросилиций (12,7 млн АҚШ доллары), линзалар (4,1 млн АҚШ доллары), бидай клейковинасы (4 млн АҚШ доллары), аммоний нитраты (2,4 млн АҚШ доллары). Қабылданған тарифтік шаралар Қазақстанның АҚШ-қа жалпы экспортының тек 4,8%-ына ғана әсер етеді. Үкімет Қазақстанға қатысты қосымша баждарды қолданбау мүмкіндігін талқылау үшін АҚШ тарапымен консультациялар жүргізуге ниетті.
Қазақстан Республикасы 10 жыл бойы Дүниежүзілік сауда ұйымының (ДСҰ) мүшесі болып келеді және сыртқы сауда саясатын жүзеге асыруда ұйымның принциптерін қатаң ұстанады. АҚШ-пен екіжақты ынтымақтастық аясында Қазақстан халықаралық міндеттемелерге сәйкес саудада тең және кемсітушілікке жол бермейтін жағдайларды қамтамасыз етеді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.