05.07.2024, 22:42 47856

"Самұрық-Қазынаның" инклюзияны қолдау кабинеттері 150 ерекше балаға білім алу мүмкіндіктерін ұсынады

Самұрық-Қазынаның" инклюзияны қолдау кабинеттері 150 ерекше балаға білім алу мүмкіндіктерін ұсынады, деп хабарлайды Қордың баспасөз қызметінен.

Қор қолдауымен 1 қыркүйекке қарай Астананың бес мектебінде инклюзияны қолдау кабинеттері ашылады. Сыныптар "Charity Samruk Marathon 2024" қайырымдылық марафонында жиналған қаражатқа жабдықталады.

Жоба №22, №36, №59, №76, №97 мектептерді қамтып, 150-ге тарта баланың білім алуына жағдай жасалады. Дәл осы мектептерде ерекше қажеттілігі бар балалардың саны көп және құрал-жабдық пен әдістемелік жәрдемге мұқтаж.

Сыныптар төрт бөлек бөлмеден тұрады: логопед, дефектолог, психолог кабинеттері және қыш шеберханасы. Сонымен қатар, әр мектепте жеке емдік дене шынықтыру кабинеті болады. Мұғалімдер де қажетті дайындықтан өтеді.

Бүгін "Samruk-Kazyna Trust" КҚ бас директоры Альфия Адиева барлық мектепті аралап, жөндеу және басқа да ұйымдастыру-әзірлік жұмыстарының барысымен арнайы танысты.

Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.

тақырып бойынша жаңалықтар

04.10.2024, 16:53 631

"Жайлы мектеп": Атырау облысында алғашқы екі мектеп ашылды

Бүгін қалада "Жайлы мектеп" ұлттық жобасы аясында салынған екі мектеп пайдалануға берілді. Алмалы ауылдық округі Береке ауылында 1200 орындық №47 орта мектеп, Сарыөзек ықшамауданында 300 орындық №46 орта мектеп ашылды,- деп хабарлайды облыс әкімінің баспасөз қызметі.

Білім ордаларының ашылу салтанатына облыс әкімі Серік Шәпкенов қатысып, тұрғындарды жаңа мектептердің ашылуымен құттықтады.

Мемлекет басшысы Қасым-Жомарт Кемелұлы Тоқаев орта білімнің сапасы табысты ұлт болудың тағы бір маңызды шарты екенін айтып, әр оқушының сапалы білім алуына, жан-жақты дамуына қолайлы жағдай жасауды тапсырды. Бүгін есігін ашатын білім ордасында шәкірттердің барлық пәнді оқып-үйренуіне, ұстаздардың шығармашылықпен айналысуына толық жағдай жасалды. Бұл мектепте мұғалім мен оқушының, мектеп пен ата-ананың байланысы артып, білімді де талантты, санасы сергек, ойы ұшқыр, бәсекеге қабілетті жас ұрпақ тәрбиеленіп шығарына сенім мол",-деді С.Шәпкенов.

Жаңа мектептерде екі ауысымда оқитын 3000 балаға 120-дан астам ұстаз білім береді.

Баласын мектепке жетектеген ата-аналардың арасында Береке ауылының тұрғыны Ханшайым Көпбергенова бар. Ол сегіз немересін де №47 білім ордасына орналастырыпты. Әжейдің қуанышында шек жоқ, себебі енді немерелері заманауи жарақталған мектепте білім алады.

Бүгін көптен күткен мектеп ашылды. Оның құрылысы басталып, аяқталғанға дейін куә болдық. Енді балаларды қабылдап жатыр. Мен де, басқа ата-аналар да дән ризамыз, себебі бұған дейін немерелерім осы ауылдағы мектепте оқыды, бірақ орын саны тапшы еді. Бүгін сол мәселе шешілгендей, жаңа мектепке орналасып жатырмыз. Балаларымыздың зейіні ашылсын. Еліміздің мақтанышы болсын",-деді Х.Көпбергенова.

Мектептерге Жедел басқару орталығына қосылған бейнебақылау камералары орнатылып, ерекше білім беруді қажет ететін балалар үшін кедергісіз орта қалыптастырылды. Бастауыш және жоғарғы сынып оқушылары үшін бөлек блоктар салынған.

Мектеп аумағы 2 жүгіру жолағымен, баскетбол, волейбол алаңдарымен, теннис кортымен, ойын және workout алаңдарымен жабдықталған.

Мектеп ғимаратында 2 спорт зал, бастауыш және жоғары сынып оқушыларына арналған екі асхана, 260 орындық акт зал және кітапхана бар.

Сонымен қатар психолог, логопед, медициналық кабинеттерімен, заманауи үлгідегі оқу сыныптарымен, физика, химия зертханаларымен және STEM кабинеттерімен жарақталған.

Жайлы мектеп" ұлттық жобасы аясында осы жылдың соңына дейін тағы үш мектеп пайдалануға беріледі.

2025 жылдың аяғында жайлы мектептердің саны 12-ге жетіп, 12 мыңнан астам оқушы сабаққа барады.

25.09.2024, 18:52 6656

Қазақстан мен Әзербайжанның Ұлттық кітапханалары ынтымақтастық туралы меморандумға қол қойды

Бүгін Қазақстан мен Әзербайжанның Ұлттық кітапханалары арасында ынтымақтастық туралы меморандумға қол қою рәсімі өтті. Құжат - кітапханалық-ақпараттық қызметті одан әрі дамыту, халықаралық жазба әдебиеттерді алмасу және екі ел арасындағы мәдени байланыстарды нығайтуға негіз болады, деп хабарлайды ҚР Мәдениет және ақпарат министрлігінің баспасөз қызметінен.

Іс-шараның маңызды сәттерінің бірі - Әзербайжан әдебиеті бұрышының ашылуы. Әдеби бұрышта классикалық және заманауи әдебиеттің 250-ден астам басылымы, ел мемлекеттілігінің қалыптасу тарихы, әзербайжан халқының салт-дәстүрлері мен әдет-ғұрыптары туралы шығармалар ұсынылған. Соның ішінде ақын және ойшыл Мұхаммед Физули, Мырза Фатали Ахундов, Гусейн Джавиди, жазушы Анар кітаптары және тағы да басқа танымал тұлғалардың туындылары бар.

Сондай-ақ Әзербайжанның халық жазушысы Эльмира Ахундованың Гейдар Әлиев пен академик Зарифа Әлиеваның 100 жылдығына арналған "Зарифа және Гейдар Алиевтер. Мәңгілік махаббат" кітабының таныстырылымы өтті.

Кітапта автор өз кейіпкерлерінің балалық шақтан ересек жасқа дейінгі бүкіл өмір жолын баяндап, олардың жеке өмірі, бала тәрбиесі және аталған көрнекті жұптың басына түскен сынақтары туралы әңгімелейді.

Салтанатты шараға Әзербайжан Мәдениет министрі Адиль Керимли, ҚР МАМ Архив, құжаттама және кітап ісі комитеті төрағасының орынбасары Роллан Құспан, Түркі мәдениеті мен мұрасы қорының президенті Ақтоты Райымқұлова, Әзербайжан Ұлттық кітапханасының бас директоры Керим Тахиров, шетелдік дипломатиялық миссиялардың өкілдері, Қазақстанның ғылыми және шығармашылық зиялылары, ЖОО студенттері мен магистранттары қатысты.

20.09.2024, 13:05 10721

Астанада білім беру ұйымдарының қауіпсіздігі пысықталды

Астана қаласы Білім басқармасының ұйыдастыруымен қаланың барлық жекеменшік, мемлекеттік білім беру ұйымдарының бірінші басшыларына "Білім беру мекемелерінің жәй күйі және жалпы қауіпсіздігі" тақырыбында жиналыс өтті, деп хабарлайды Астана қаласы әкімдігінің баспасөз қызметінен.

Іс-шара №103 орта-мектептің базасында басқарма басшысының орынбасары Н.Еламановтың төрағалығымен ұйымдастырылды.

Жиналыстың негізгі мақсаты - білім беру ұйымдарында қауіпсіздік шараларын жақсарту, қызметкерлер мен оқушылардың қауіпсіздігін қамтамасыз ету әдістеріне үйрету, сондай-ақ қауіп-қатерлердің алдын алу.

Бұл жиынға Астана қаласының Төтенше жағдайлар департаментінің және Полиция департаментінің өкілдері қатысты.

Жиналыс барысында "Білім беру нысандарындағы терроризмге қарсы қауіпсіздік","Адамдар көп шоғырланған нысандарда, атап айтқанда білім беру нысандарында өрт қауіпсіздігі нормаларын сақтау" тақырыбында баяндама оқылып бейнекамераларды ЖБО-ға қосу, ЖБО дабыл түймесі мен жедел әрекет ету тобының жұмыс істеуі, турникеттер арқылы өткізу режимінің жұмыс істеуі, объектінің терроризмге қарсы қорғалуы паспортының болуы, автоматты өрт дабылының жұмыс істеуі бойынша бірқатар ұсыныс берілді.

Осы бағытта басқарма мұндай іс-шараларды тұрақты түрде өткізетін болады.

13.09.2024, 13:10 16101

Түркістан облысында білім беру сапасын арттыру мәселелері қадағалануда

ҚР Премьер-Министрінің орынбасары Тамара Дүйсенова Түркістан облысына жұмыс сапарымен барып, білім беру сапасын арттыру мәселелері бойынша кеңес өткізді, деп хабарлайды Үкіметтің баспасөз қызметінен.

Вице-премьер Түркістан қаласындағы "Жаңа қала" шағын ауданында "Жайлы мектеп" ұлттық жобасы шеңберінде салынып жатқан жаңа оқу орнының құрылысымен танысты. Мұнда тұрғын үй құрылысының белсенді жүруі мектептерге жүктемені арттыруда. Сол себепті де ұлттық жоба аясындағы мектептердің бірін осында салу туралы шешім қабылданды. Жаңа білім ошағының құрылыс жұмыстары аяқталуға жақын. 2 мың орындық нысан қазан айында пайдалануға беріледі деп жоспарланып отыр. Қазір өңірде бес мектеп үш ауысымда жұмыс істеп тұр. Бұл мәселе ұлттық жоба аясында жаңа мектептер салу арқылы шешілмек.

Балалардың алаңсыз білім алуына барлық жағдай жасалуы керек. Мұғалімдерге, олардың біліктілігіне ерекше назар аударған жөн. Балаларымыздың заманауи жабдықталған мектептерде білім алуы үшін осы ұлттық жоба басталды", - деді Тамара Дүйсенова.

Сонымен қатар вице-премьер №28 мектепке де барып, білім беру саласындағы цифрлық шешімдермен танысты. "Алақан" жүйесі оқушыларға биометриялық бақылау арқылы ғимаратқа кіруге, асхана мен кітапхананы пайдалануға мүмкіндік береді. Тамара Дүйсенова балалардың жеке деректерінің қорғалуы қажеттігіне ерекше назар аударды.

Облыста мектеп оқушыларын тегін тамақтандыруды қамтамасыз ету үшін "Әлеуметтік әмиян" механизмін енгізу бойынша белсенді жұмыстар жүргізілуде. Вице-премьер бұл шара ата-аналарға тиісті үрдісті онлайн режимде бақылауға мүмкіндік беретінін, ал бюджет қаржысы нақты көрсетілген қызмет үшін төленіп, мақсатты жұмсалуын қамтамасыз ететінін атап өтті.

ҚР Премьер-Министрінің орынбасарына мектепке дейінгі білім беруді ваучерлік қаржыландыру жобасы таныстырылды. Бұл жағдайда ата-аналар балаларын балабақшаға емес, жергілікті бюджеттен бөлінген ваучерлерге кезекке қояды.

Бұдан бөлек, вице-премьердің төрағалығымен өңірдегі мектептер мен колледждер басшыларының қатысуымен білім сапасын арттыру мәселелері бойынша кеңес өтті. Өңірде Президенттің тапсырмаларын орындау шеңберінде мектептермен кешенді жұмыс жүргізілуде. Халықаралық және ішкі зерттеулер нәтижелері бойынша білім беру нысандары 3 санатқа бөлінді. Әр санат үшін KPI анықталды.

Айта кетейік, Түркістан облысында 280-ден астам мектеп "Нысаналы мектептер" ретінде белгіленген. Бұл мектептердің мұғалімдерін үш деңгейлі оқыту қарастырылған. Олар министрлік жанындағы институттардан әдістемелік көмек алады.

Сондай-ақ кеңесте техникалық және кәсіптік білім беру саласын трансформациялау бойынша қабылданатын шаралар туралы айтылды. Атап айтқанда, жан басына қаржыландыру нормативі қайта қаралып, базалық және ынталандырушы бөлікке бөлінеді. Халықаралық стандарттарды енгізген және түлектерін жоғары жалақы төленетін жұмыс орындарына жұмысқа орналастырған колледждер жоғары қаржылай қолдау ала алады.

13.09.2024, 13:06 16316

Тоқаев білім министріне балалардың қауіпсіздігін қамтамасыз ету жөнінде тапсырма берді

Қасым-Жомарт Тоқаев Оқу-ағарту министрі Ғани Бейсембаевты қабылдады, деп хабарлайды Ақорданың баспасөз қызметінен.

Мемлекет басшысына еліміздегі мектепке дейінгі, орта, техникалық және кәсіптік білім беру салаларын дамыту мақсатында қабылданып жатқан шаралар жөнінде мәлімет берілді.

Ғани Бейсембаев Президентке өткен жылы 137 мың оқушыға арналған 154 жаңа мектеп ашылғанын баяндады. Бұл 29 үшауысымды, 12 апатты мектептің мәселесін шешкен. Жаңа оқу жылында 365 мың оқушыға есептелген 221 білім ошағын пайдалануға беру жоспарланып отыр. Мектептерді пәндік кабинеттермен жабдықтау көрсеткіші 2 есе артып, интернеттің сапасы жақсарған.

Оқу-ағарту министрі тәрбие жұмыстары басым бағыттардың бірі болып қала беретінін айтты. "Адал адам - Адал еңбек - Адал табыс" жалпыұлттық құндылықтарына негізделген "Біртұтас тәрбие" бағдарламасы қолға алынды.

Мемлекет басшысына орта білім сапасын арттыру туралы айтылды. Мектеп оқулықтары толықтай цифрлық форматқа көшірілген. Қазақстан атынан халықаралық олимпиадаларға қатысқан әрбір екінші оқушы жүлделі орындарға ие болып жүр. Былтыр ел оқушылары 58 алтын медаль жеңіп алған.

Президентке техникалық және кәсіптік білім беру жүйесін трансформациялау, инклюзивті және арнайы оқытуды дамыту жөніндегі жобалар таныстырылды.

Кездесу соңында Мемлекет басшысы Оқу-ағарту министріне саланы одан әрі жетілдіру және балалардың қауіпсіздігін қамтамасыз ету бойынша бірқатар тапсырма берді.

06.09.2024, 13:13 21996

Жаңа мектеп оқулықтарының жобалары талқылауға шығарылды

2025-2026 оқу жылы қолданысқа енгізілетін 4-сыныптарға арналған оқулықтар қоғамдық талқылауға шығарылды, деп хабарлайды ҚР Оқу-ағарту министрлігінің баспасөз қызметінен.

Ол үшін Білім мазмұнын сараптау орталығының сайтындағы "Оқу әдебиеттерін қоғамдық талқылау" бөліміне өту керек", деп нақтылап көрсетті министрліктен.

Талқылауға мұғалімдер, ата-аналар, қоғамдық ұйымдардың өкілдері мен мектеп оқулықтарының сапасына бей-жай қарамайтын барлық азаматтар қатыса алады. Сайтта келесі пәндер бойынша оқулықтардың мазмұнымен танысуға болады: "Орыс тілі" (оқыту қазақ тілінде жүргізілетін мектептер үшін); "Еңбекке баулу", "Бейнелеу өнері", Шет тілдері (ағылшын, неміс, француз), сондай-ақ "Цифрлық сауаттылық" бойынша электронды оқулық нұсқалары.

Барлық келіп түскен сын-ескертпелер, мен оқулықтардың сапасы мен мазмұнын жақсартуға қатысты ұсыныстар сараптама барысында ескеріледі. Талқылау биылғы жылдың 30 қыркүйегіне дейін жалғасады.

Атап өту керек, қолданыстағы заңнама бойынша бүгінде оқулықтар сараптаманың бес кезеңінен өтеді: ғылыми-педагогикалық сараптама, оқулықтарды пилоттық мектептерде сынақтан өткізу, қоғамдық-педагогикалық талқылау, пәндік сарапталық комиссияның қарауы. Қазіргі уақытта аталған оқулықтар қоғамдық талқылаумен қатар, еліміздің бірнеше өңірлерінде 31 пилоттық мектепте сынақтан өтуде.

Ғылыми-педагогикалық сараптамаға ғалымдар мен біліктілік санаты "зерттеуші педагогтен" төмен емес практик-мұғалімдер тартылады. Сарапшылар арнайы оқу курсынан өтіп, сарапшы сертификатын алған және республикалық сарапшылар базасына енген. Осындай жоғары талаптар сынақ және пәндік сарапталық комиссия қатысушыларына да қойылады.

Пәндік сараптама комиссиясының шешімімен сараптаманың барлық кезеңдерінен өткен оқулықтар мектептерде пайдалану үшін және Қазақстан Республикасының Оқу-ағарту министрлігі бекітетін оқулықтар тізбесіне енгізу үшін ұсынылатын болады.

04.09.2024, 15:56 24891

30 жас қазақстандық "Тәуелсіздік ұрпақтары" грантының иегері атанады

30 жас қазақстандық "Тәуелсіздік ұрпақтары" грантының иегері атанады, деп хабарлайды ҚР Мәдениет және ақпарат министрлігінің баспасөз қызметінен.

ОКҚ-да өткен брифингте "Тәуелсіздік ұрпақтары" жобасының жаңашылдығы мен ережелері туралы айтылды. Оған ҚР Мәдениет және ақпарат министрлігі Жастар және отбасы істері комитетінің төрағасы Қайрат Қамбаров, 2022 және 2023 жылғы "Тәуелсіздік ұрпақтары" грантының иегерлері Жандос Ақтаев және Арайлым Серікбай қатысты.

2021 жылдан бастап "Тәуелсіздік ұрпақтары" гранты Мемлекет басшысының бастамасымен дарынды жастарды мемлекеттік қолдау мақсатында беріліп келеді.

Грант мөлшері - 3 млн теңге. Оған конкурстық негізде 14 жастан 35 жасқа дейінгі (34 жыл қоса алғанда) қазақстандықтар үміткер бола алады.

Брифинг барысында Қайрат Қамбаров волонтерлікті қолдау үшін 2024 жылдан бастап қосымша "Волонтерлік" бағыты қарастырылғанын айтты.

Осылайша, аталған грант 6 бағыт бойынша беріледі. Оның ішінде "Ғылым", "Мәдениет", "Ақпараттық технологиялар", "Бизнес", "Медиа", "Волонтерлік" бағыттары бар.

Конкурсқа өтінімдерді қабылдау 5 тамыздан 6 қазанға дейін жалғасады.

Сондай-ақ, "Тәуелсіздік ұрпақтары" грантының иегерлері өз бастамалары туралы айтып берді.

Мысалы, Жандос Ақтаевтың жобасы қолжетімді тілде халықтың базалық құқықтық сауаттылығын арттыруға арналған ақпараттық контент құру.

2023 жылғы "Тәуелсіздік ұрпақтары" грантының иегері Серікбай Арайлым грант қаражатына "Ғылым" бағыты бойынша заманауи жасыл агротехнологиялар пайдаланылған "EcoTagam" инновациялық отандық экоөнімдер орталығын ашты.

Дарынды жастардың жаңа идеялары мен түрлі жобаларын іске асыру мақсатында "Тәуелсіздік ұрпақтары" гранты 2029 жылға дейін беріледі деп жоспарланған.

02.09.2024, 18:14 27351

Астанада тағы 15 мектеп ашылды. Оның 9-ы - жайлы мектептер

Елордада білім күні 28 000 оқушы орнына арналған 15 жаңа мектеп ашылды. Оның 9-ы "Жайлы мектеп" ұлттық жобасы аясында салынған. Мектептер жаңа технологиялар мен жаңа талаптарға сай жабдықталған, деп хабарлайды Астана қаласы әкімдігінің баспасөз қызметінен.

Жайлы мектептер салудың негізгі мақсаты - оқушыларға арналған жаңа орындар ашу, үш ауысымды оқытуды және оқушы орындарының тапшылығын жою. Естеріңізге сала кетейік, оқу орындары Мемлекет басшысының тапсырмасы бойынша "Жайлы мектеп" ұлттық жобасын іске асыру аясында салынып жатыр.

Оқу орындарының ашылуына ҚР Премьер-Министрінің бірінші орынбасары Роман Скляр, ҚР Премьер-Министрінің орынбасары Тамара Дүйсенова, Астана қаласының әкімі Жеңіс Қасымбек, Оқу-ағарту министрі Ғани Бейсембаев қатысты.

Оқу орындары 15 жаңа жайлы мектеп ашу есебінен екі ауысымда 28 мың оқушы орнын құруға мүмкіндік берді.

Мәселен, 9 жайлы мектеп мына мекенжайларда орналасқан: Көктал елді мекені, Ұлытау-Наурыз көшелерінің қиылысы; А. Байтұрсынов көшесі, №9 үй ауданы ("Highvill" ТК); Тельман елді мекенінің оңтүстік тұсы (Бағыстан); С-189 және 12-207 көшелері (Земляничная көшесі); Төле би және Е758 көшелері (Сеул және Зеленый квартал ТК ауданы); Орынбор және №37 көшелері ("SOHO" ТК ауданы); Мәңгілік Ел даңғылы және Е497 көшесі (мешіт ауданы); Қабанбай батыр даңғылы мен Сығанақ көшесінің қиылысы ("Поколение" ТК); Төле би - 24 көшелері (Барыс Арена).

Елордада қазір 188 мектеп жұмыс істейді, оның 110-ы - мемлекеттік, 71-і - жекеменшік және 7-еуі республикалық мектеп, жалпы 282 150 оқушы қамтылған.

Желтоқсан айында тағы 8 мектеп (6-ауы - жайлы мектеп, 2-еуі - жекеменшік мектеп) пайдалануға беріледі.

Осылайша, 1 қыркүйекте пайдалануға берілген мектептер есебінен үш ауысымда оқитын бес мектептің (№27, 41, 71, 79, 89), тығыздалған төрт (№17, 59, 67, 75) мектептің мәселесі шешілді.

Жаңа оқу жылында Астанада бірінші сыныпқа 28 000 бала барды. Қала мектептерінде барлығы 282 мыңнан астам оқушы оқиды.

"Самұрық-Қазынаның" инклюзияны қолдау кабинеттері 150 ерекше балаға білім алу мүмкіндіктерін ұсынады

тақырып бойынша жаңалықтар

Ең көп оқылғаны

Өзекті

Қазақстанда Алатау қаласын дамыту жөніндегі Жобалау кеңсесі іске қосылды