Екі өңірдің әкімдіктері азық - түлік қауіпсіздігін бірінші орынға қоймай отыр - Жұманғарин
Сурет: Depositphotos
Үкіметте вице-премьер Серік Жұманғариннің төрағалығымен өткен кеңесте өңірлерге әлеуметтік маңызы бар азық-түлікті жедел жеткізу мен оның құны талқыланды, деп хабарлайды ҚР Премьер-министрінің баспасөз қызметінен.
Вице-премьер Серік Жұманғарин әлеуметтік азық-түлік өнімдерін өңірлерге жеткізу мерзімін қысқартуға мүмкіндік беретін кез келген шешім қабылдау туралы ҚТЖ ҰК АҚ-ға бір апта бұрын берген болатын. Әлеуметтік азық-түлік бағасын тұрақтандыру жөніндегі кезекті кеңесте атқарылған жұмыстың нәтижелері туралы «ҚТЖ – Жүк тасымалы» ЖШС бас директоры Владимир Петров мәлімдеді.
Айтылған мәліметтер бойынша, 2023 жылдың 9 айында Қазақстанға ауыл шаруашылығы жүктерінің импорты 2,1 млн тоннаны құрады.
«Тек қазан айының өзінде 341 мың тонна астық жөнелтілетіні айтылып, оның 190 мың тоннасы келісілген. Бұл ретте негізгі жоспар бойынша бастапқыда 58 мың тонна астық қаралса, 132 мың тоннасы Сауда министрлігімен және Астық өңдеушілер қауымдастығымен қосымша пысықталды. Келісілген тізімде жоқ өтініш берушілердің 151 мың тоннасына өтінімдер қабылданбады. 10,1 мың тонна ұн әкелуге қатысты барлық өтінімдер 100%-ға орындалды. Әлеуметтік азық-түлік өнімдері бойынша осындай жағдай – 145 мың тонна көлеміндегі ӘМАТ импортына қатысты барлық өтінімдер орындалды. Өтінімдер бір тәулік ішінде мақұлданады», — деді В. Петров.
Сонымен қатар қазан айының басынан бері ел ішінде астық, ұн және әлеуметтік азық-түлік тауарларын тасымалдау бойынша артта қалушылық байқалады. Астық бойынша жоспарлар 76%-ға, ұн бойынша – 72%-ға, көкөністер бойынша – 94%-ға, күнбағыс майы бойынша – 23%-ға орындалды. Жалпы, осы күндері ел ішінде 619 мың тонна көлеміндегі әлеуметтік өнімдерді тасымалдау жоспары болса, 181,9 мың тоннаға тапсырыс орындалды.
«Темір жол бөлімшелерінің барлық басшыларына бірінші кезекте вагондар азық-түлік өнімдерін жеткізуді қамтамасыз етуі қажет, өтініштерді бір тәулік ішінде қарау тапсырылды. Тәулік бойы кезекшілік белгіленді», — деп деп атап өтті «ҚТЖ–Жүк тасымалы» ЖШС бас директоры.
Жалпы, Ұлттық статистика бюросының мәліметі бойынша, негізгі азық-түлік тауарларының жалпы баға индексі 4 ай бойы төмендегеннен кейін маусымаралық кезеңде апта сайынғы өсім 0,1%-ды құрады. Бұл негізінен тауық жұмыртқасы бағасының маусымдық өсуіне байланысты болды (1,3%). Сондай-ақ қарақұмық (0,7%) және ұн (0,5%) бағасының шамалы өсімі тіркелді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
Президент Қазақстан әйелдерін 8 наурыз мерекесімен құттықтады
Мемлекет басшысы 8 наурыз - Халықаралық әйелдер күніне арналған марапаттау рәсімінде сөз сөйледі, деп хабарлайды Ақорданың баспасөз қызметінен.
Президент салтанатты іс-шараға жиналған барша қауымды көктем мерекесімен шын жүректен құттықтап, әлемге сүйіспеншілікпен қарайтын, жан-жағына жақсылық шарапатын сыйлап жүретін әйелдер қауымына жылы лебізін жеткізді.
Әйел бір қолымен бесікті тербетсе, бір қолымен әлемді тербетеді" деген сөз бекер айтылмаған. Әйел - шаңырақтың шырағы, ұлттың ұйытқысы. Ана - тіршілік пен берекенің бастауы, адамзат бойындағы бар ізгіліктің қайнар көзі. Ананың аялы алақаны мен шексіз мейірімі әр үйге жылылық береді. Салт-дәстүріміз бен ана тіліміздің бүгінгі күнге жетуі де, ең алдымен, аналардың арқасы. Өмірдің мәні де, тіршіліктің сәні де - сіздер! Сондықтан, бүгінгі мейрамда барша ер-азаматтар өздеріңізге ақ тілегін арнап, ықылас-ілтипатын білдіріп жатыр. Солардың ішінде мен де Мемлекет басшысы ретінде әйелдерге тілегімді, лебізімді айтып тұрмын", - деді Қасым-Жомарт Тоқаев.
Мемлекет басшысы халқымызда ерлік пен елдіктің туын биік ұстаған арулар аз емес екенін алға тартып, олардың есімі ел шежіресіне алтын әріппен жазылғанын айтты.
Тұмар мен Бопай ханымдардың, Домалақ ана, Зере және Ұлпан аналардың, Әлия, Мәншүк, Хиуаз секілді батыр қыздарымыздың аты ел жадында. Сіздерді ақылы мен ажары, даналығы мен даралығы келіскен қазақ әйелінің ізбасары деуге болады. Әйелдер қауымы күрделі кезеңдерде аянбай еңбек етті, Отанымыздың өсіп-өркендеуіне белсене атсалысты. Ұрпақ тәрбиесі - ұлт тәрбиесі. Бүгінде сіздер санасы сергек, ойы азат ұрпақ өсіріп, Отанымыздың өркен жаюына айрықша үлес қосып келесіздер. Қазақстанның сан түрлі салада жетістікке жетуіне қыз-келіншектеріміз мол еңбек сіңіруде. Бүгін Ақордаға шақырылған әйелдер арасында Отанымызға әр салада еңбек сіңірген білікті мамандар бар. Мен баршаңызға зор алғыс айтамын!" - деді Президент.
Қасым-Жомарт Тоқаевтың пікірінше, аналары алаңсыз қоғамда балалар да бақытты өмір сүреді. Бұл ретте Президент елімізде әйелдердің құқығын қорғау, оларды қолдау бағытында жүргізіліп жатқан игі істерге айрықша тоқталды.
Ана мен баланың жағдайы дұрыс болса, әлеуметтің жағдайы да дұрыс болады. Сондықтан болашағын ойлаған ел, ең алдымен, әйелдердің жағдайын жақсартуды ойлайды. Мемлекетіміз әйелдерді барынша қорғауға және жан-жақты қолдауға баса мән береді. Осы бағытта нақты жұмыстар атқарылып жатыр. Менің тапсырмаммен отбасы институтын нығайтуды көздейтін маңызды шаралар қабылданды. Барлық аймақта қиын жағдайға тап болған отбасыларға қолдау көрсететін орталықтар ашылып жатыр. Көп балалы аналарды қолдаудың ұлттық моделі қалыптасты. Соның арқасында жыл өткен сайын көп балалы отбасылардың саны артып келеді", - деді Мемлекет басшысы.
Президент қазір әйелдер түрлі салада табысты еңбек етіп жүргенін атап өтті.
Мемлекеттік қызметшілердің жартысынан көбі - әйелдер. Білім беру, денсаулық сақтау саласындағы мамандардың 70 пайыздан астамы да - әйелдер қауымы. Сондай-ақ олар төтенше жағдайлар, қорғаныс және құқық қорғау органдарында табысты жұмыс істеп жүр. Көптеген әйелдер лауазымды қызметтер атқарады, Сіздердің араларыңызда да табысты басшылар аз емес. Қыз-келіншектер бизнесте де жетістікке жетіп жүр. Бойларыңыздағы мақсаткерлік пен жасампаздық қуаты ең батыл бастамаларыңызды жүзеге асыруға көмектесіп келеді. Берік азаматтық ұстанымдарыңызды танытып, қоғамдық жұмысқа да жан-жақты атсалысасыздар. Маңызды бастамалар мен халыққа қажетті әлеуметтік жобаларды іске асырып жүрсіздер. Қай іспен айналыссаңыздар да жауапкершілікпен қарап, ұдайы оң нәтижеге қол жеткізіп келесіздер. Әлемдік додаларда топ жарып, еліміздің абыройын асқақтатып жүрген аруларымыз да бар. Біз қажырлы еңбегімен, ерен ерлігімен танылған қыз-келіншектерді мақтан тұтамыз. Тәуелсіздік жылдары өз саласының үздігі атанған 8 әйелге "Қазақстанның Еңбек Ері" атағы берілді", - деді Мемлекет басшысы.
Осы орайда Президент биыл елімізде "Жұмысшы мамандықтары жылы" деп жарияланып, білікті мамандардың мәртебесін көтеру үшін белсенді жұмыс жүргізіліп жатқанына назар аударды.
Мысалы, мемлекеттік марапаттар жүйесіне жаңадан тоғыз құрметті атақ енгізілді. Бүгін осындай екі марапатты алғаш рет тапсырылады. "Қазақстанның еңбек сіңірген құрылысшысы" атағы еңбек ардагері Ольга Шелудькоға беріледі. Ал өндіріс озаты Майра Ерманова "Қазақстанның еңбек сіңірген өнеркәсіп қайраткері" атанып отыр. Осындай нағыз еңбек адамдарына бүкіл ел болып құрмет көрсетіп, оларды жан-жақты дәріптеуіміз керек. Жұмысшы мамандықтары жылының түпкі мәні де - осы", - деді Қасым-Жомарт Тоқаев.
Салтанатты жиында Мемлекет басшысы еліміздің дамуына елеулі еңбек сіңірген, өз саласында жоғары жетістікке жеткен бір топ әйел азаматқа мемлекеттік наградалар табыстады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Абай облысында жасөспірімді ұрып-соғу фактісі бойынша қылмыстық іс қозғалды
Абай облысында жасөспірімдер арасындағы жанжал ерекше бақылауға алынды: жәбірленушіге жан-жақты көмек көрсетілуде, деп хабарлайды облыстық полиция департаментінен.
Абай облысында орын алған соңғы оқиғаға байланысты қылмыстық іс қозғалды. Жанжалға қатысқан барлық тараптар анықталып, ата-аналарымен бірге полиция бөліміне жеткізілді.
Қазіргі уақытта жәбірленуші жасөспірімге ерекше назар аударылуда - ол арнайы орталықта мамандардың бақылауында. Психологтар мен бала құқықтары жөніндегі уәкіл оған қажетті қолдау көрсетіп, оқиғадан кейінгі эмоционалдық әсерлерді жеңуге көмектесуде. Білікті мамандар жасөспірімнің психологиялық жағдайын қалпына келтіру үшін жұмыс жүргізіп жатыр.
Оқиғаға қатысы бар жасөспірімдерге қатысты тиісті шаралар қабылданатын болады. Ертең кәмелетке толмағандардың құқықтарын қорғау жөніндегі облыстық комиссияның отырысы өтеді, онда әрбір қатысушының әрекеті жеке қаралып, қажетті шешімдер қабылданады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
СҚО-да 88 елді мекен ауыз сусыз отыр
Солтүстік Қазақстан облысында 7,4 мың тұрғыны бар 88 ауылдық елді мекен таза ауыз сумен қамтамасыз етілмеген, деп хабарлайды Inform.kz.
Солтүстік Қазақстан облыстық қоғамдық кеңестің биылғы алғашқы отырысында өңір елді мекендерін сумен қамту мәселесі көтерілді. Жол картасы бойынша биыл бұл мәселе толық шешілуі тиіс. Мәселен сумен жабдықтау нысандарын салуға және жаңғыртуға даму бюджеті аясында шамамен 11,7 млрд теңге бөлінген. Бұл ақшаға 37 ауылға су тартылады. ҚР Су ресурстары және ирригация министрлігі су шаруашылығы комитетінің желісі бойынша 5 ауылға таза су келмек және 46 ауылға кешенді модульдер блогы орнатылады.
- Қазіргі уақытта республикалық бюджеттен 15,1 млрд теңге сомасында қаржы бөлу мәселесі пысықталып жатыр. Елді мекендер ішіне сумен жабдықтау желілерін тарту топтық су құбырларының инфрақұрылымын ауыл шекараларына дейін жеткізу жөніндегі жоспарлармен сәйкестендірілуі тиіс. Облыстық бюджетті кезекті нақтылауда бірінші кезектегі шығыстар бойынша бюджеттің шығыс бөлігін ұлғайту керек, атап айтқанда, облыс тұрғындарын таза ауыз сумен қамтамасыз етуге қаражат бөлу ұсынылады, өйткені бұл маңызды әлеуметтік бағыт. Осыған байланысты, облыстың энергетика және тұрғын үй-коммуналдық шаруашылық басқармасы бойынша 2 160 млн теңгеге ұлғайтуды ұсынамыз, - дейді СҚО қаржы басқармасының басшысы Наталья Дышкант.
Жоба бойынша Айыртау ауданына ғана сумен жабдықтау үшін 598,1 млн теңге керек. Бұл ауданда 11 елді мекен таза сусыз отыр. Тайынша ауданына 765,7 млн, Шал ақын ауданына 710,9 млн, Есіл ауданына 67,1 млн және Мамлют ауданына 18,2 млн теңге керек.
Бұған дейін СҚО-да былтыр суда қалып, шіри бастаған 1130 га ағаш жиналғандығын жазған едік.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Катонқарағай ауданында жұмыс уақыты бір сағатқа кері шегерілді
Сурет: Depositphotos
Шығыс Қазақстан облысындағы Катонқарағай ауданында жұмыс уақыты бір сағатқа кері шегерілді, деп хабарлайды Inform.kz.
Катонқарағай ауданында мемлекеттік және әлеуметтік мекемелерде пилоттық режимде жаңа жұмыс кестесі енгізілді.
Енді аудандағы 40 мекеме аптасына бес күн сағат 08:00-ден 17:30-ға дейін жұмыс істейді. Түскі үзіліс 12:00-ден 13:30-ға дейін. Мұндай жұмыс режиміне көшу туралы шешім тұрғындармен болған талқылаулардан кейін қабылданып отыр.
Желтоқсан айында ауданға бір топ облыстық басқармалар басшылары келіп, соның ішінде Өрел, Аршаты, Берел, Жамбыл және тағы басқа жиыны 18 елді мекенде кездесулер өткізді. Сол кездесулер барысында жұмыс күнінің басталуын таңғы сағат 08:00-ге ауыстыру жайы сөз етілді.
- Жаңа жұмыс уақыты климаттық жағдайлар мен жергілікті тұрғындардың өмір ырғағын ескере отырып, өнімділіктің артуы мен өңірдің дамуына ықпал етеді. Сондықтан тұрғындардың пікірлері ескерілді, - деп хабарлады аудандық ішкі саясат бөлімінен.
Катонқарағайлықтар да бұл жұмыс кестесінің өздеріне қолайлы екенін айтып жатыр.
Еске салсақ, бұған дейін Катонқарағай ауданының халқы мал соятын қасапхана таппай, қиналып отырғаны жайлы жазғанбыз.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.