03.12.2024, 16:32 13176

Арыс қаласының әкімі тағайындалды

Қазақстан Республикасының жергілікті мемлекеттік басқару және өзін-өзі басқару туралы" Қазақстан Республикасы Заңының 23-1 бабына сәйкес Қазақстан Республикасы Президенті Әкімшілігінің және Арыс қаласы мәслихатының келісімімен, Түркістан облысы әкімінің өкімімен Түркістан облысы, Арыс қаласының әкімі болып Маңқараев Қайсар Зәкірұлы тағайындалды, деп хабарлайды Түркістан облысы әкімінің баспасөз қызметінен.

Түркістан облысының әкімі Дархан Сатыбалды жаңа әкімді қала активіне таныстырып, бірқатар тапсырма жүктеді.

Бүгін қаладағы кадрлық өзгерістерге байланысты жиналып отырмыз. Арыс қаласының әкімі қызметін атқарып келген Гүлжан Мамытқызы басқа жұмысқа ауысуына байланысты, қызметінен босатылды. Гүлжан Мамытқызы өзін білікті басшы ретінде таныта білді және қаланың дамуына өз үлесін қосты. Алғысымызды білдіреміз. Бүгін қалаға жаңа әкім тағайындалып отыр. Облыстың бағыты - өндіріс және жаңа жұмыс орындарын ашу, инвестиция тарту, экономиканы көтеріп, халықтың әл-ауқатын жақсарту. Қайсар Зәкірұлына осы бағытта белсенді жұмыс істеуді тапсырамын. Логистикалық әлеуеті жоғары Арыстың мүмкіндіктерін толық пайдаланып, өндірісі дамыған қалаға айналдыру қажет. "Таза Қазақстан" бағдарламасын жүзеге асыру, аймақты абаттандыру да маңызды", - деген Дархан Сатыбалды басым бағыттарды белгілеп берді.

Қайсар Маңқараев 1979 жылы, 9 сәуірде дүниеге келген. Білімі - жоғары. Мамандықтары: бухгалтерлік есеп және аудит, құқықтану. Мемлекеттік қызметтегі еңбек өтілі: 16 жыл, 9 ай. Еңбек жолын 2000 жылы бастап, Шымкент қаласында, "Береке" ЖШС-інде кассир, менеджер, экономист болып жұмыс істеген. 2004 жылдан бастап Қазақстан Республикасы Қаржы министрлігінің Астана қаласы бойынша дәрменсіз борышкерлермен жұмыс жөніндегі комитеті басқармасының дәрменсіз кәсіпорындарға мониторинг бөлімінің жетекші маманы болды.

Ал 2005-2010 жылдары аралығында Қазақстан Республикасының Экономикалық және сыбайлас жемқорлыққа қарсы күрес жөніндегі агенттігі органдарында еңбек еткен. 2010-2016 жылдар аралығында "Қазақстан Республикасы Парламенті шаруашылық басқармасының әкімшілік ғимараттар дирекциясы" республикалық мемлекеттік қазыналық кәсіпорны директорының орынбасары, "Орал" әлеуметтік-кәсіпкерлік корпорациясы ұлттық компаниясы" акционерлік қоғамында басшылық лауазымдарында, Орал қаласы әкімінің орынбасары болып жұмыс атқарды. 2016-2022 жылдар аралығында Батыс Қазақстан облысының экономика және бюджеттік жоспарлау басқармасының басшысы, Нұр-Сұлтан қаласы әкімінің кеңесшісі, Нұр-Сұлтан қалалық стратегиялық және бюджеттік жоспарлау басқармасының басшысы болды. 2022 жылдан бері Астана қаласының экономика және бюджеттік жоспарлау басқармасының басшысы болып қызмет атқарып келді.

Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.

тақырып бойынша жаңалықтар

03.12.2024, 16:47 12306

СҚО "Ауылда денсаулық сақтауды жаңғырту" Ұлттық жобасы аясында 46 алғашқы медициналық-санитарлық көмек көрсету нысанының құрылысы жоспарланған

Солтүстік Қазақстан облысында "Ауылда денсаулық сақтауды жаңғырту" Ұлттық жобасы аясында 46 алғашқы медициналық-санитарлық көмек көрсету нысанының құрылысы жоспарланған, оның ішінде 18 фельдшерлік-акушерлік пункт, 5 дәрігерлік амбулатория және 23 медициналық пункт бар, деп хабарлайды Үкіметтің баспасөз қызметінен.

2023 жылы республикалық бюджет есебінен 8 нысанның құрылысы аяқталып, қолданысқа берілді. Олардың қатарында: Кладбинка ауылындағы медициналық пункт (Жамбыл ауданы), Якорь және Прибрежное ауылдарындағы дәрігерлік амбулаториялар (Қызылжар ауданы), Қарақоға және Возвышенка ауылдарындағы дәрігерлік амбулаториялар (М. Жұмабаев атындағы аудан), Тахтаброд және Привольное ауылдарындағы ФАП (Ғ. Мүсірепов атындағы аудан), сондай-ақ Лобаново ауылындағы дәрігерлік амбулатория (Айыртау ауданы) бар.

Мысалы, Айыртау ауданы Лобаново ауылында ұлттық жоба аясында жаңа дәрігерлік амбулатория салынды. Бұл ауыл тұрғындары үшін үлкен жаңалық, өйткені бұрын медициналық қызметкерлер кабинеттері тар ескі ғимаратта жұмыс істеген. Жаңа амбулатория 1,6 мың тұрғынды қамтитын 4 ауылдың тұрғындарына қызмет көрсетеді. Енді ауыл тұрғындары медициналық көмекті жайлы жағдайда ала алады. Медициналық нысан қажетті медициналық жабдықтармен және кадрлармен толық қамтылған. Тұрғындарға көмек көрсету үшін жалпы практика дәрігері, фельдшер, акушер, медбикелер мен әлеуметтік қызметкер жұмыс істейді. Жергілікті тұрғындар достық қарым-қатынастағы қызметкерлердің арқасында өздерінің денсаулығы сенімді қолда екенін қуанышпен атап өтуде.

Тағы бір мысал - Қызылжар ауданы Прибрежное ауылында салынған жаңа дәрігерлік амбулатория тәулігіне 25 қабылдауға арналған. Ескі ғимараттан айырмашылығы, онда тек бір жалпы тәжірибе дәрігері қабылдаған, жаңа амбулатория заманауи жабдықтармен жабдықталып, тағы бір маман тартылды. Ауыл тұрғындарына жаңа амбулаторияда бастапқы медициналық көмектің барлық түрлері көрсетіледі.

Қалған 38 нысанның 27-сі 1 желтоқсанға дейін қолданысқа берілді, ал 11-і 15 желтоқсанға дейін аяқталуы жоспарланып отыр. Жүзеге асырылып жатқан жоба Солтүстік Қазақстан облысындағы 38 мың ауыл тұрғынын қажетті инфрақұрылымға және сапалы қызметке қол жеткізуін қамтамасыз етуге бағытталған.

03.12.2024, 16:25 12976

Активтерді қайтару комитеті мен Интерпол ынтымақтастық туралы келісті

Бас покуратураның Активтерді қайтару жөніндегі комитеті мен Ішкі істер министрлігінің Интерпол Ұлттық Орталық Бюросы Ынтымақтастық туралы меморандумға қол қойды, деп хабарлайды Қазақстан Республикасы Бас прокуратурасының Активтерді қайтару жөніндегі комитетінің баспасөз қызметінен.

Оның мақсаты - тараптардың кәсіби, сарапшылық, ақпараттық әлеуеті мен тәжірибесін тиімді пайдалану үшін серіктестік тетіктері мен ынтымақтастық нысандарын анықтау.

Бұл құжат қызметкерлердің біліктілігін арттыруға, қолда бар ақпаратпен алмасуға, заңсыз иемденілген активтерді іздеу және мемлекетке қайтару саласындағы екіжақты ынтымақтастықты кеңейту мен тереңдету мүмкіндігін талдауға бағытталған.

Тараптар жақын арада активтерді ашу, пайда болуын растау және қайтару тәжірибесімен және практикасымен алмасу бойынша алғашқы бірлескен іс-шараны өткізу туралы келісімге қол жеткізді.

Меморандум екі ведомство арасындағы жұмыстың тиімділігін арттыруға және өзара әрекеттесуді нығайтуға ықпал етеді.

Қазақстан Республикасының атынан Активтерді қайтару жөніндегі комитет Интерполдың "Күміс бюллетень" және "Күміс хабарлама" активтерді іздеу және қайтарудың жаңа құралын енгізу бойынша жұмыс тобының мүшесі атанып, оның қызметіне белсенді қатысуда.

02.12.2024, 17:44 32076

2025 жылдың басынан бастап балалы отбасыларға төленетін барлық жәрдемақы мөлшері 6,5%-ға индекстеледі

2025 жылдың басынан бастап балалы отбасыларға төленетін барлық жәрдемақы мөлшері 6,5%-ға индекстеледі, деп хабарлайды ҚР Экономика министрлігінің баспасөз қызметінен.

Мемлекеттің барлық әлеуметтік міндеттемелері толық көлемде орындалып жатыр және одан әрі қарай да орындала береді. Бұл - Үкімет жұмысының басым бағыттарының бірі", - деп атап өтті Премьер-министрдің орынбасары - ұлттық экономика министрі Нұрлан Байбазаров брифингте.

Атап айтқанда, биыл қаңтардан бастап барлық зейнетақы мен жәрдемақылар жыл сайын инфляция деңгейін ескере отырып индекстелуде. 2025 жылдың 1 қаңтарынан бастап ынтымақты зейнетақы 8,5%-ға, әлеуметтік жәрдемақылар мен базалық зейнетақы 6,5%-ға индекстеледі.

Мемлекет басшысының тапсырмасы бойынша базалық зейнетақының мөлшерін кезең-кезеңімен арттыру жалғасып жатыр.

2025 жылға арналған республикалық бюджетте 42 түрлі әлеуметтік төлемдер бойынша 6 трлнтеңгеден астам қаражат қарастырылған, бұл 2024 жылмен салыстырғанда 12,5%-ға көп.

Республикалық бюджеттен және Мемлекеттік әлеуметтік сақтандыру қорынан 2 млн-ға жуық қазақстандық отбасы жәрдемақылар мен әлеуметтік төлемдер алады.

2025 жылдың басынан бастап балалы отбасыларға төленетін барлық мемлекеттік жәрдемақы мөлшері 6,5%-ға индекстеледі. Балалы отбасыларға арналған жәрдемақыларды төлеуге 2025 жылға арналған республикалық бюджетте 875,1 млрдтеңге қарастырылған. Аз қамтылған азаматтарды әлеуметтік қолдау атаулы әлеуметтік көмек көрсету арқылы жалғасады. 2023 жылдың 1 қарашасындағы жағдай бойынша 76 мың отбасы немесе 403 мың адам АӘК алды. АӘК көрсетудің жаңа тәсілдерін азаматтардың шығыстарын ескере отырып қайта қарау шеңберінде бұл көмек Цифрлық отбасы картасы және мемлекеттік әрі мемлекеттік емес ұйымдардың жүйелерімен интеграциялау арқылы трансформацияланады", - деп атап өтті Нұрлан Байбазаров.

Бұдан бөлек, 2024 жылдың 1 қыркүйегінен бастап Қазақстанда стипендия көлемі: бакалавриат бойынша 20%-ға, магистранттар мен докторанттарға 15%-ға өсті. Ғылыми ұйымдар қызметкерлерінің жалақысы 18%-ға артты, 2025 жылдан бастап 17%-ға көбейеді.

02.12.2024, 17:25 37271

Қостанайда есірткіге қарсы форум өтті

Қостанай қаласындағы Жастар сарайында облыстық полиция департаментінің ұйымдастыруымен ауқымды форум өтті, - деп хабарлайды Polisia.kz.

Бұл шара мыңнан астам оқушы мен студенттің басын қосып, жастардың есірткі қылмысының алдын алудағы белсенді рөлін айқындауға арналды. Іс-шара бағдарламасы ерекше мазмұнға толы болды. Алдымен қатысушылар арнайы техника, криминалистикалық зертхана және жауынгерлік қару-жарақ қойылған көрмені тамашалады. Бұл көрме Полиция департаментінің есірткіге қарсы күресте қандай құралдар мен әдістерді қолданатынын айқын көрсетті.

Біз қызметіміздің жұмысын ашық көрсету арқылы жастарға есірткі мәселесінің ауқымын түсіндіргіміз келеді. Олар бұл мәселеге бейжай қарамай, оның шешімінің бір бөлігі бола алатынын сезінулері керек", - деді Қостанай облысы полиция департаменті бастығының орынбасары Нұрбол Сәден.

Форум барысында жастар арасында есірткі қылмысының алдын алу және құқық бұзушылықтың салдары туралы мәселелер кеңінен талқыланды. Талқылауға Қостанай облысы әкімінің орынбасары Ринат Мұхаметқалиев, облыстық мәслихат депутаты Махаббат Жұтаев, психикалық денсаулық орталығының психолог-наркологы Гүлсім Бисімбаева және пара пауэрлифтинг бойынша жаттықтырушы Дмитрий Царенко қатысты.

Студенттер есірткімен күрес шаралары және қылмыс үшін қарастырылатын жазалар туралы белсенді сұрақтар қойып, талқылауға қатысты.

Есірткі - тек денсаулыққа қауіп төндіріп қана қоймай, заң бұзушылыққа алып келетін ауыр мәселе. Жастар осыны түсініп, өз өмірлеріне жауапкершілікпен қараулары тиіс", - деп атап өтті Қостанай облысы әкімінің орынбасары Ринат Мұхаметқалиев.

Форум аясында "Есірткіге қарсы үздік бейнеролик" байқауының жеңімпаздары марапатталды. Байқауға қатысқан 30 жұмыстың ішінен үздіктер таңдалып, үшінші орынды Қазтұтынуодағы Қостанай жоғары колледжінің студенті Бекзат Құбжасаров, екінші орынды Қостанай гуманитарлық колледжінің студенті Шыңғыс Шелдебаев, ал бірінші орынды Гуманитарлық колледждің студенті Константин Щербинин иеленді. Барлық жеңімпаздарға естелік сыйлықтар табысталды.

Біз студенттерді мұндай байқауларға қатысуға белсенді түрде ынталандырамыз. Бұл жастардың өзекті мәселелерді көтеріп қана қоймай, олардың шешімін іздеуге де атсалысуын қамтамасыз етеді", - деді Константин Щербинин.

Сонымен қатар студенттер жеңіл ақша табуға итермелейтін есірткі қылмысының түрмеге алып келетін салдары туралы бейнероликтер тамашалады. Форумның ерекше сәті - есірткі іздеуге маманданған бельгиялық овчарка Тесланың жұмысы болды. Студенттер жасырған заттарды Тесла әп-сәтте тауып, көрермендерді тәнті етті.

Іс-шара соңында есірткісіз жарқын болашаққа шақыратын музыкалық композициялар орындалып, жастарға салауатты өмір салтын ұстануға деген ынта-ықылас ұялатты. Бұл форум жастардың әлеуметтік жауапкершілігін арттырып, есірткіге қарсы күресте олардың белсенді рөл атқаруына түрткі болды.

02.12.2024, 17:23 32631

"Қаражанбасмұнай" АҚ Бас директоры тағайындалды

Қаражанбасмұнай" АҚ (ҚМГ еншілес кәсіпорны) Директорлар кеңесінің шешімімен Бас директор - Басқарма төрағасы лауазымына Сәрсенбай Нұрпейіс Мизанбайұлы тағайындалды, деп хабарлайды "ҚазМұнайГаз"-дың баспасөз қызметінен.

Жаңа басшыны ұжымға "ҚазМұнайГаз" ҰК АҚ Басқарма төрағасының орынбасары Бекзат Абайылданов таныстырды.

Нұрпейіс Сәрсенбай 1972 жылы Маңғыстау облысы Шебір ауылында дүниеге келген. Ол Ақтау политехникалық институтын "Мұнай және газ кен орындарын игеру. Тау-кен инженері" мамандығы бойынша, сондай-ақ Халықаралық бизнес академиясын "Менеджмент" мамандығы бойынша бітірген. Іскерлік әкімшілендіру магистрі дәрежесіне ие.

Еңбек жолын 1994 жылы Қаламқас кен орнында мұнай және газ өндіру операторы болып бастаған. Әр жылдары шебер, технолог, цех басшысының орынбасары, ОИТҚ басшысының орынбасары, цех басшысы, "Қаламқасмұнайгаз" өндірістік басқармасының басшысы қызметтерін атқарған.

Жаңа лауазымға тағайындалғанға дейін "Маңғыстаумұнайгаз" АҚ Бас директорының әкімшілік және әлеуметтік мәселелер жөніндегі орынбасары қызметін атқарды.

02.12.2024, 17:19 32711

Үкімет азық-түлік бағасын одан әрі тұрақтандыру шараларын талқылады

Үкіметте вице-премьер Серік Жұманғариннің төрағалығымен өткен кеңесте жеміс-көкөніс өнімдерін сақтау және өндіру және әлеуметтік азық-түлік өнімдерінің бағасын тұрақтандыру үшін қажетті шаралар кешені қаралды, деп хабарлайды Үкіметтің баспасөз қызметінен.

Өнімді сақтау - көкөніс қоймаларын салу және жаңғырту жөніндегі кешенді жоспарды іске асыру арқылы жүзеге асырылады. Жүргізілген түгендеу қорытындысы бойынша елімізде 901 сақтау нысаны жұмыс істейді, оның ішінде жалпы сыйымдылығы 1 млн 186 мың тонна көкөніс қоймасының саны - 580, картоп қоймасы - 257 (499,7 мың тонна), жеміс-жидек қоймасы - 67 (136,3 мың тонна).

Биыл Маңғыстау облысында 40 мың тоннаға, Түркістан облысында 56 мың тоннаға, Павлодар облысында 20 мың тоннаға, Қызылорда облысында 4 мың тоннаға және Қарағанды облысында 2,8 мың тоннаға сақтау нысандары іске қосылды. Жалпы сыйымдылығы 115,1 мың тонна болатын қойма тағы 5 облыста салынуда. 7 облыста 97,9 мың тонналық жобалар инвесторлардың қаржыландыруын күтуде", - деп мәлімдеді ауыл шаруашылығы вице-министрі Азат Сұлтанов.

Биыл 2,9 млн тонна картоп, 1,1 млн тонна пияз, 498 мың тонна қырыққабат, 474 мың тонна сәбіз жиналды. Бұл еліміздің тұрғындарының қажеттілігі деңгейінен едәуір асып түседі. Бұл ретте Ресей Федерациясы мен Беларусь тарапынан 150 мың тонна картоп, 80 мың тонна пияз, басқа да көкөністер мен алмаларды келісімшартпен алуға сұраныс бар.

Біз ел тұрғындарының сұранысы көлемінен едәуір жоғары көкөніс өнімдерін жинадық, көршілес елдерімізден, Ресейден және Беларусьтен көкөністерге сұраныс бар. Біздің фермерлерге артық өнімді экспортқа өткізуге мүмкіндік беру керек. Ауыл шаруашылығы министрлігі әкімдіктер деңгейінде келесі мәселені пысықтауы қажет: фермерлер тұрақтандыру қорларындағы қорды қоспағанда экспортқа қанша көкөніс сатуға және келісімшарт ұйымдастыруға дайын", - деді Серік Жұманғарин.

Сондай-ақ кеңесте "Кең дала-2" бағдарламасы бойынша 2025 жылғы көктемгі дала жұмыстарын қаржыландырудың басталуы талқыланды.

Айта кету керек, бұл мақсатқа өтеу мерзімі 2026 жылғы 1 наурызға дейін белгіленген фермерлер үшін жылдық 5%-бен 700 млрд теңгеге дейін, оның ішінде 140 млрд теңгесі - бюджет қаражатын, 560 млрд теңгесі - нарық қаражатын жұмсау жоспарлануда. Осылайша, мемлекеттік қаржыландырудың нарыққа қатынасы 1:4 құрайды. Ерте қаржыландыру фермерлерге егіс науқанын уақтылы бастау үшін барлық қажетті заттарды, соның ішінде тыңайтқыштарды алдын ала сатып алуға мүмкіндік береді.

Нарық қаражатының алғашқы 100 млрд теңгесін біз 2024 жылдың 1 желтоқсанынан бастап ерте қаржыландыруды бастау үшін 28 қарашада тарттық. 30 қарашада ауыл шаруашылығы өндірушілерінен 85 млрд теңгеге 695 өтінім келіп түсті, оның басым бөлігі - 55 млрд теңгеге 686 өтінім - тікелей қаржыландыру арқылы, яғни АКК филиалдары арқылы, ӘКК арқылы 22,6 млрд теңгеге 6 өтінім және екінші деңгейдегі банктер арқылы 7,3 млрд теңгеге үш өтінім. Қазір жұмыста 20,6 млрд теңгеге 146 өтінім бар. 29 қарашада ерте қаржыландыру басталды, 2,3 млрд теңгеге 48 қарыз алушы несиелендірілді. Жұмыс жалғасуда", - деп атап өтті Аграрлық несие корпорациясы төрағасының орынбасары Қайрат Сапулатов.

Сонымен қатар кеңесте әлеуметтік азық-түлік бағасын одан әрі тұрақтандыру шаралары талқыланды. Қараша айының қорытындысы бойынша жылдық мәнде инфляцияның 8,5%-дан 8,4%-ға дейін баяулауы байқалды. Осы жылдың 11 айында инфляцияның негізгі құрамдас бөліктері - азық-түлік және азық-түлік емес тауарлар, ақылы қызметтер арасында - азық-түлік тауарларына ең төменгі өсім (4,4%) тіркелді.

Өткен аптаның қорытындысы бойынша ӘМАТ бағасының орташа индексі 0,2-ге, негізінен - тауарлардың көкөніс тобына өсті. Вице-премьер республикалық маңызы бар қалалар мен өңірлердің әкімдіктеріне сауда және интеграция министрлігімен бірлесіп, ел тұрғындарын қолжетімді бағамен өнімдермен қамтамасыз ету үшін ауыл шаруашылығы жәрмеңкелерінің санын көбейтуді жүктеді. Сондай-ақ Ауыл шаруашылығы министрлігіне қажет болған жағдайда тұрақтандыру қорларынан көкөніс қорларын ерте брондауды қарастыруды тапсырды.

02.12.2024, 10:21 38126

Мүгедектікті белгілеу бойынша 86 мыңнан астам өтінім сырттай форматта қаралды

2023 жылы 76,4 мыңнан астам өтінім сырттай форматта қаралды

2024 жылдын басынын бастап мүгедектік тобын белгілеу үшін медициналық-әлеуметтік сараптама жүргізудің сырттай форматы бойынша пилоттық жобаны іске асыру шеңберінде Қазақстанның барлық өңірлерінен 86 мыңнан астам өтінім қаралды. Бүгінде сырттай форматта куәландыру 30 нозологиялық нысан бойынша жүргізіледі, деп хабарлайды Қазақстан Республикасы Еңбек және халықты әлеуметтік қорғау министрлігінің баспасөз қызметінен.

2023 жылы 76,4 мыңнан астам өтінім сырттай форматта қаралды, бұл куәландырудан өткен мүгедектігі бар адамдардың жалпы санының 30,4%-ын құрайды.

Бұған дейін хабарланғандай, Ұлттық қоғамдық сенім кеңесінің VI отырысында Мемлекет басшысы ерекше қажеттіліктері бар адамдар үшін барынша қолайлы жағдай жасауды, олардың инстанциялар мен қағазбастылық бойынша жүруін, сондай-ақ көрсетілетін қызметті берушілердің көрсетілетін қызметті алушылармен байланысын болдырмауды тапсырды.

Осы тапсырманы орындау мақсатында ҚР Еңбек және халықты әлеуметтік қорғау министрлігі Денсаулық сақтау мен Цифрлық даму, инновациялар және аэроғарыш өнеркәсібі министрліктерімен бірлесіп Қазақстанның барлық 20 өңірінде пилоттық режимде медициналық-әлеуметтік сараптама (бұдан әрі - МӘС) жүргізудің сырттай форматы бойынша жобаны іске асыруда.

Мүгедектік тобын белгілеу жөніндегі қызметті алу үшін өтініш берушіге тұрғылықты жері бойынша емханаға жүгіну және қажетті тексеруден өту қажет, қалған процестер ақпараттық жүйелерді интеграциялау есебінен оның қатысуынсыз өтеді.

Сырттай куәландыруға көшу:

- әкімшілік және бюрократиялық кедергілерді жояды;

- МӘС сараптамалық шешімдерінің ашықтығын қамтамасыз етеді;

- мүгедектікті белгілеу және мүгедектігі бар адамдарды әлеуметтік қорғау шараларын анықтау бойынша қызметтерді үйден шықпай-ақ алуға мүмкіндік береді;

- көрсетілетін қызметті алушының көрсетілетін қызметті берушімен тікелей байланысын болдырмайды, сол арқылы сыбайлас жемқорлық тәуекелдерін азайтады.

Арыс қаласының әкімі тағайындалды

тақырып бойынша жаңалықтар

Ең көп оқылғаны

Өзекті

Билік өкілдері Корея аумағындағы қазақстандықтарды сабырлы болуға шақырды