Отандық фармацевтика өндірісінің көлемі 95 млрд теңгеге дейін артты
Былтырғы жылмен салыстырғанда өсім көрсеткіші 14,5%-ға артты
Үкімет отырысында ҚР денсаулық сақтау министрі Ақмарал Әлназарова отандық фармацевтикалық өнім өндірушілерді қолдау бойынша қабылданып жатқан шаралар туралы баяндады, деп хабарлайды Үкіметтің баспасөз қызметінен.
Денсаулық сақтау министрлігі дәрі-дәрмек импортын алмастыру бойынша жұмыстарын әрі қарай жалғастыруда. Бірінші жартыжылдықтың қорытындысы бойынша елімізде отандық фармацевтикалық өндіріс көлемі 95 млрд теңгені құрап, былтырғы жылмен салыстырғанда өсім көрсеткіші 14,5%-ға артты. Бүгінгі таңда, 4 мыңға жуық фармацевтикалық өнім жеткізу бойынша 35 отандық өндірушінің қатысуымен ұзақмерзімді 94 шарт жасалды. Жыл соңына дейін өзге 24 отандық өндірушімен ұзақмерзімді шарт жасалуы арқылы 1 412 дәрілік зат пен медициналық бұйымдардың жеткізілуі қарастырылуда. Алдағы 3 жылдың ішінде жасалған ұзақмерзімді шарттарда белгіленген көлемге кезең-кезеңімен шығу жоспарланып отыр.
Дәрілік заттар мен медициналық бұйымдар сатып алу кезінде отандық өндірушілерге басым түрде қолайлы жағдай жасалды. Соның нәтижесінде, биылғы 6 ай қорытындысы бойынша 29,5 млрд теңге көлемінде 196 дәрілік зат түрі жеткізілді. Келесі слайдта "Үздік - 10" отандық өндірушінің тізімі көрсетілген. Бірінші жартыжылдық қорытындысы бойынша Бірыңғай дистрибьютордың сатып алу шеңберінде олардың дайын өнімді шығару көрсеткіші ұлғайып, нәтижесінде жалпы өсімі 21%-ға артты", - деп мәлімдеді А. Әлназарова.
Елімізде дәрілік қауіпсіздігінің тұрақты әрі базалық деңгейін қамтамасыз ету мақсатында Денсаулық сақтау министрлігі Дүниежүзілік денсаулық сақтау ұйымы ұсынған кең таралған аурулар тізімінің негізінде басымдық беретін дәрілік заттар тізімін қалыптастырды. Нәтижесінде, 283 дәрілік зат іріктеліп алынды. Бүгінде аталған тізімдегі 107 дәрілік зат (37,5%) Қазақстан Республикасы аумағында өндіріледі. Алдағы уақытта қалған 178 дәрілік зат (62,5%) өндірісін жүргізу басымдыққа ие болады.
Ауылда денсаулық сақтауды жаңғырту" ұлттық жобасы шеңберінде алғашқы медициналық-санитарлық көмек көрсету нысандарын жобалау және салу кезінде отандық өндірушілердің медициналық техника өнімдері міндетті түрде енгізіліп, жарақтандыру көрсеткіші 72%-ды құрады.
Министрдің айтуынша, алдағы уақытта, отандық өндірушілерге одан әрі қолдау көрсету аясында Министрлік тарапынан келесі шараларды жүзеге асыру жоспарланған:
Отандық өндірушілердің медициналық техникасын сатып алу үшін "ҚазМедТех" АҚ базасында қаржылық лизинг механизмін қайта енгізу;
Отандық фармацевтикалық өнімдердің басекелестігін арттыру үшін құрамында спирті бар өнімдерді шығару кезінде пайдаланылатын этил спиртіне қосымша акциз төлеуден босату.
Айта кету керек, қазіргі кезде енгізілген қосымша акциз құнын төлеу салдарынан өзіндік бағасы артып, оның бәсекелестікке кері әсері тиюде.
Отандық өндірушілерді ынталандыру мақсатында әрі жергілікті заттармен қамту үлесін арттыру үшін Министрлік келесі шараларды іске асыратын болады:
- мемлекеттік сатып алу кезінде жергілікті қамту үлесі неғұрлым жоғары отандық тауар өндірушілер үшін жеңілдік тетігін қарастыру;
- оқшаулау тереңдігіне байланысты ұзақмерзімді шарттардың қолданылу мерзімін анықтау.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
12,8 мыңнан астам қазақстандыққа арнаулы әлеуметтік төлем тағайындалды
2024 жылғы 25 қарашадағы жағдай бойынша 12 835 азаматқа зиянды еңбек жағдайларында ұзақ уақыт жұмыс істеген адамдарға арналған арнаулы әлеуметтік төлем (бұдан әрі - АӘТ) тағайындалды, деп хабарлайды Қазақстан Республикасы Еңбек және халықты әлеуметтік қорғау министрлігінің баспасөз қызметінен.
Аталған төлемді тағайындауға жалпы 13 673 адам өтініш білдірген.
Екі көзден төленетін арнаулы әлеуметтік төлемге (республикалық бюджет және Бірыңғай жинақтаушы зейнетақы қоры) 3 151 адам жүгінді, оның ішінде 3 037 адамға тағайындалды.
Төрт қаржыландыру көзінен берілетін АӘТ (республикалық бюджет, Бірыңғай жинақтаушы зейнетақы қоры, жұмыс беруші және өмірді сақтандыру ұйымы) тағайындауға 10 522 адам өтініш білдіріп, оның 9 798-іне тағайындалған.
Сондай-ақ, 351 азамат сақтандыру компаниясымен зейнеткерлік аннуитет шартының жасалуын күтуде, 119 азамат СМС хабарламаға жауап бермеген. Міндетті шарттарды орындамағандықтан, 368 өтініш берушіге АӘТ тағайындаудан бас тартылды.
Өңірлер бойынша арнаулы әлеуметтік төлемдерді алуға өтініш білдіргендердің ең көп саны Қарағанды (2 көзден - 538 адам, 4 көзден - 1 835 адам), Қостанай (2 көзден - 340 адам, ал 4 көзден - 1 151 адам) және Шығыс Қазақстан (2 көзден - 283 адам, ал 4 көзден - 1 173 адам) облыстарында тіркелген.
Бұрын хабарланғандай 2024 жылдың 1 қаңтарынан бастап Қазақстанда зиянды еңбек жағдайларында ұзақ уақыт жұмыс істеген адамдарға арнаулы әлеуметтік төлем енгізілді.
Арнаулы әлеуметтік төлем тағайындау үшін 55 жасқа толу және Бірыңғай жинақтаушы зейнетақы қорында (бұдан әрі - БЖЗҚ) кемінде 7 жыл кәсіптік зейнетақы аударымдарының болуы міндетті шарттар болып табылады. Төлем зейнеткерлік жасқа дейін төленеді. Арнаулы әлеуметтік төлемдерді алу үшін еңбек жағдайлары зиянды жұмыстармен айналыспауға тиіс. Жұмыскерлер жеңіл жұмысқа ауыса алады, содан кейін олар жалақы мен төлем алады немесе демалысқа шығып, зейнетке шыққанға дейін арнаулы әлеуметтік төлем алады.
БЖЗҚ деректері бойынша арнаулы әлеуметтік төлемді тағайындау үшін міндетті шарттарды ескере отырып, оған 2024 жылы 37 мыңнан астам жұмыскер үміткер бола алады, жалпы төлемнің орташа мөлшері 208 мың теңгеден асады. Әрбір жұмыскер үшін төлем мөлшері БЖЗҚ-дағы жинақтарына байланысты болады.
Әлеуметтік кодекске сәйкес жұмыс берушілер кәсіптері мен қызмет түрлері Еңбек жағдайлары зиянды жұмыстармен айналысатын жұмыскерлердің, өндірістердің, жұмыстардың, кәсіптердің тізбесіне енгізілген жұмыскерлер үшін міндетті кәсіптік зейнетақы жарналарын аударады, олардың 2,3 мыңнан астам позициясы бар. Осылайша, арнаулы әлеуметтік төлемді экономиканың 17 саласында, оның ішінде тау-кен өндіру және өңдеу өнеркәсібінде және өзге де салаларда жұмыс істейтін қазақстандықтар ала алады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Алматыда Qazaq IT цифрландыру күні өтті
Өткен сенбі күні Алматыда Қазақстанның цифрландыру күніне арналған Qazaq IT Community Day форумы ұйымдастырылды. Іс-шараға 300-ден астам IT саласының өкілдері, оның ішінде талантты қазақстандық жастар қатысты. Форум Қазақстан Республикасы Цифрлық даму, инновациялар және аэроғарыш өнеркәсібі министрлігі, Алматы қаласы әкімдігі, Жасанды интеллект қауымдастығы, Women in Tech Kazakhstan, GDG және Women Techmakers ұйымдарының қолдауымен өтті, деп хабарлайды Алматы қаласы әкімдігінің баспасөз қызметінен.
Форумда жастар саясаты мен цифрландыруға қатысты негізгі тақырыптар талқыланды, себебі инновация мен адами капитал Қазақстанның цифрлық әлеуетін айқындайды.
Форумда айтылған басты мәселелер: Жасанды интеллект мамандарын даярлау:
2029 жылға қарай 1 миллион AI талантын дайындауымыз керек. Бұл AI мәдениетін қалыптастыру және инфрақұрылымды дамыту арқылы жүзеге асады", - деді ҚР Цифрлық даму, инновациялар және аэроғарыш өнеркәсібі министрінің бірінші орынбасары Қаныш Тулеушин.
- Жасанды интеллектті реттеу:
Егер біз қазір жасанды интеллектті реттеумен айналыспасақ, кейін онымен келісімге келуге мәжбүр боламыз", - деп атап өтті ҚР Мәжіліс депутаты Екатерина Смышляева.
- Қаланың қауіпсіздігі:
Алматы қаласында жер сілкінісі кезінде жедел хабар беру үшін цифрлық шешімдер енгізілуде.
Бұл Алматы үшін өте маңызды", - деп мәлімдеді Алматы қаласы цифрландыру басқармасының басшысы Олжас Жанабек.
- Технологиялық кәсіпкерлік:
Венчурлық инвестор Бахт Ниязов технологиялық кәсіпкерліктің маңыздылығы туралы баяндама жасады.
Мұндай платформалар жастар үшін үлкен мүмкіндік береді. Егер бүгін қатысушылардың арасынан кем дегенде екі стартап дүниеге келсе, бұл үлкен жетістік болмақ", - деді ол.
- Өңірлік университеттердің рөлі:
Қорқыт Ата атындағы Қызылорда университетінің өкілі Махмұт Томанов жасанды интеллект инфрақұрылымын дамытудағы өңірлік жоғары оқу орындарының рөлін атап өтті.
- Жасанды интеллектті дамыту:
Жасанды интеллект қауымдастығының өкілдері Қазақстанда ИИ дамыту бойынша жобалар, тәсілдер және мәселелер туралы баяндама жасады. Қауымдастықтың құрылғаны мемлекеттің бизнес-пен тиімді диалогын қамтамасыз етуге бағытталған. Бұл туралы қауымдастық төрағасының орынбасары Анар Төлеубаева айтты.
- Киберқауіпсіздік:
Киберқауіпсіздік және әлеуметтік инженерияға қарсы тұру сессиясында ГТС РК басқарма төрағасы Асқар Жүнісбек, ЦАРКА, QazTech, BAKOTECH, MSSP Global және басқа да компаниялардың сарапшылары әлеуметтік желілерде өзін-өзі ұстаудың негізгі ережелері мен интернеттегі қауіпсіздікті қамтамасыз ету құралдарын талқылады.
Кез келген күмәнді жағдайда ең алдымен ақыл мен логикаға сүйену керек", - деп атап өтті сарапшылар.
Биыл Qazaq IT Community үздік IT жобалар мен олардың авторларын жеті номинация бойынша марапаттады: Rising Star in IT 2024, Innovation Driver 2024, Social Impact in IT 2024, Tech Advancement of the Year 2024, Mobile App Innovator 2024, Strategic Team Leader, Web Mastermind 2024.
Жеңімпаздарға Cloupard компаниясы ұсынған 350 мың теңгелік гранттар табысталды. Толығырақ ақпаратты @qazaqitcom Instagram парақшасынан оқи аласыз. Байқауға барлығы 85 өтінім келіп түскен, олардың ішінен үздіктер таңдап алынды. Қазылар алқасында АО "Қазпошта", АО "Банк ЦентрКредит", АО "Қазақтелеком", Axiom Capital, Women in Tech Kazakhstan және басқа да ұйымдардың өкілдері болды.
Qazaq IT Community - Қазақстандағы ең ірі IT қауымдастық, оның құрамына 4 300-ден астам IT маманы кіреді. Қауымдастық қатысушылар үшін тегін іс-шаралар ұйымдастырады, олардың қатарында техникалық және тақырыптық митаптар, тау саяхаттары және басқа да шаралар бар.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Әкімдерге IT мамандарды қолдау үшін өңірлерде цифрлық инфрақұрылым құру жүктелді
Премьер-министр Олжас Бектеновтің төрағалығымен өткен Үкімет отырысында еліміздің цифрландыру саласын дамыту мәселелері қаралды, деп хабарлайды Үкіметтің баспасөз қызметінен.
Цифрлық даму, инновациялар және аэроғарыш өнеркәсібі министрі Жаслан Мәдиев Astana Hub жұмысының аясында IT-экспорт көлемін арттыру, цифрлық платформалардың қауіпсіздігін қамтамасыз ету және отандық стартаптарды іске асыру бағытында атқарылып жатқан жұмыстар туралы баяндады. Сондай-ақ "Терриконовая долина" IТ-хабының басшысы Сабир Ниязов, Arlan BioTech компаниясының басшысы Болат Сұлтанкұлов, ITS Partner Ltd компаниясының басшысы Марат Тастеміров баяндама жасады.
Қазақстан әлемде цифрландыру саласы дамыған ең озық 30 мемлекеттің қатарына кіреді және онлайн-қызметтер көрсету бойынша 8-орында. 2024 жылдың бірінші жартыжылдығында IT-қызмет экспорты $306 млн-ға дейін өсті. Жыл соңына дейін $600 млн-нан асады деп күтілуде. Жалпы 5 жыл ішінде отандық IT-қызметтердің экспорты 20 есеге ұлғайды. Елімізде роботтандыру және жасанды интеллект технологиялары орнықты дамуда, көптеген салаларда трансформация жалғасып жатыр.
Заңнамалық база қалыптастырылып, үнемі жетілдіріліп отырады. Цифрлық трансформация тұжырымдамасы қабылданды, сондай-ақ венчурлік нарықты және стартап-экожүйені дамыту үшін қолайлы экономикалық жағдайлар жасалды. Astana Hub технопаркі көптеген стартаптар үшін шын мәнінде инновациялық кластерге әрі ең негізгі әріптеске айналды. Бұл алаңда 1,5 мыңнан астам компания табысты жұмыс істеуде. E-commerce, BigData, GameDev, Fintech, MedTech пен басқа да серпінді жобалардың экспорттық әлеуеті жоғары. Олардың белсенді дамуы 2026 жылға қарай ІТ-өнімдер мен қызметтер экспортын $1 млрд-қа дейін өсіруге ықпал етпек.
Премьер-министр Үкімет алдағы уақытта да IT-технологиялар мен көрсетілетін қызметтер саласын белсенді қолдай беретінін атап өтті. Өңірлік акселерациялық бағдарламаларды және басқа елдердегі жаһандық әріптестік желіні дамыту саясатын одан әрі жалғастыру қажет.
Мемлекет басшысы 2029 жылы цифрлық технологиялардың экономикаға қосатын үлесін 1%-ға дейін, ал ІТ-қызметтердегі жергілікті үлесті кемінде 80%-ға жеткізу міндетін қойды. Оған қол жеткізуде IT-хабтар мен венчурлік қорлар басты драйверлерге айналуға тиіс. Соңғы алты жылда Қазақстанда венчурлік қаржыландыру көлемі 6 еседен астам өскен. Әрі қарай өсу үшін біз осы саладағы озық сарапшыларды тартуымыз керек. Бұл орайда білім беру бағдарламаларын дамытып, ірі бизнесті тарту және сауатты цифрлық инфрақұрылым құру жұмыстарына жете көңіл бөлу қажет. Цифрландыру, ІТ-саланы дамыту және киберқауіпсіздікті қамтамасыз ету жөніндегі міндеттерді іске асыру экономиканың дамуына ықпал етуге тиіс", - деп атап өтті Олжас Бектенов.
Президент қойған жасанды интеллектіні дамыту міндеттерін іске асыру аясында салалық заңнаманы жетілдіру бойынша белсенді жұмыс жүргізілуде. Келер жылы Астанада Жасанды интеллект орталығын ашу жоспарланып отыр. Бұл өз кезегінде жас таланттарды тарту нүктесіне айналуға тиіс. Цифрлық даму министрлігіне осы мәселені ерекше бақылауда ұстау тапсырылды.
IT-саланың жоғары білікті мамандарын даярлау басым міндет болып табылады. Astana Hub-та үздік халықаралық тәжірибе ескеріліп, қажетті жағдайлар жасалған. Цифрлық даму, Ғылым және жоғары білім, Оқу-ағарту министрліктеріне Astana Hub-пен және өңірлік хабтармен өзара тығыз байланыса отырып, одан әрі даму және оқыту тұжырымдамасын жасау тапсырылды. Осы ретте оқу бітірген мамандардың санын көбейту мақсат емес, олардың даярлық сапасына баса назар аудару қажеттігі аталып өтті. Үздік әлемдік әдістемелерді назарда ұстап, цифрлық білім мен дағдыларды арттыру тәсілдерін үнемі жаңартып тұру маңызды.
Сонымен қатар өңірлердегі цифрлық инфрақұрылымды қамтамасыз ету үшін бұл мәселелерге әкімдіктер тарапынан тиісті көңіл бөлінуі тиіс. Салалық министрлікке өңірлердің әкімдіктерімен бірлесіп, Astana Hub-ты дамыту, өңірлік хабтарды қолдау және IT саласында экспортқа бағытталған бағыттарды дамыту үшін қолайлы жағдайлар жасау бойынша шаралар қабылдау, сондай-ақ венчурлік қаржыландыруды қолдау жүйесіндегі тәсілдерді жаңарту тапсырылды.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
2025 жылдың сәуіріне дейін Арал теңізіне тағы 1,6 млрд текше метр су жіберіледі
2025 жылдың сәуіріне дейін Арал теңізіне шамамен 1,6 млрд текше метр су жіберу жоспарланып отыр. Бұл туралы Су ресурстары және ирригация министрі Нұржан Нұржігітов мәлімдеді. Министр азаматтарды қабылдап, Арал теңізін сақтау мәселесі туралы сұрақтарға жауап берді.
Айта кетейік, 2023 жылдың қазан айынан 2024 жылғы сәуірге дейін Арал теңізіне шамамен 1,3 млрд текше метр, ал жыл басынан бері 2 млрд текше метр су жіберілді.
Сондай-ақ, Солтүстік Арал мәселесі осы айдың басында Түркіменстанда өткен Орталық Азияның Мемлекетаралық су шаруашылығын үйлестіру комиссиясының (МСШҮК) 87-ші отырысының күн тәртібінде болды.
Жыл басынан бері Солтүстік Аралға шамамен 2 млрд текше метр су жіберілді. Бүгінгі таңда теңіздегі судың жалпы көлемі 22 млрд текше метрге жетті. Су дипломатиясы мен Орталық Азиядағы әріптестерімізбен тығыз жұмыстан бөлек, теңізді толтыруда су үнемдеу технологияларын енгізу де маңызды рөл атқарады. Жаңа технологияларды енгізудің нәтижесінде биыл Қызылорда облысының шаруалары 200 млн текше метрге жуық су үнемдеді. Бұл су Солтүстік Аралға жіберілді. Мәселе өте маңызды, біз оны жан-жақты қарастырып, үнемі бақылауда ұстаймыз",- деді Су ресурстары және ирригация министрі Нұржан Нұржігітов.
Еске сала кетейік, министр Түркіменстанда өткен көрші елдермен келіссөздер қорытындысы бойынша 1-ші сәуірге дейін Шардара су қоймасына 11 млрд текше метр су жіберу туралы келіскен болатын. Бұл еліміздің оңтүстік аймақтарына 2025 жылғы суару маусымы үшін қажетті су көлемін жинауға мүмкіндік береді.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.