Көк базар саудагерлері жалдау құнының айтарлықтай өсуіне алаңдаулы
Алматыдағы көк базарда жалға алу құнын екі есеге өсірмекші.
Алматы. 13 қазан. KAZAKHSTAN TODAY - Алматыдағы көк базарда жалға алу құнын екі есеге өсірмекші.
"Басшылық әбден басынды". Алматыдағы көк базар сатушылары бүгін осылай шу шығарды. Айтуларынша, базар әкімшілігі жалға алу құнын алдағы айдан бастап екі есеге өсірмек. Саудагерлер бұған келісіп отырған жоқ. Барлығының талабы – бұрынғы бағаны қалдыру. Алайда оларды тыңдар құлақ табылмады.
Бір жыл бұрын келдім мен осында, сонда біздің қатарда ешкім жоқ болатын. Қарамақарсы отырған әйел екеуміз ғана отырдық. Тоғыз шаршы метрге 7 мың төледім, енді кешелі бері 14 мыңға көтерді", - деді саудагер.
Аядай жерге айына 63 мың теңге төлеген Сәуле Пірматова енді жалға алу бағасын екі есеге көтергенін естіп ұнжырғасы түсті. Қазақы төсеніш, бұйымдар мен киімі тез өтпесе де, бұйыртқанына шүкіршілік етіп келген. Енді не істерін білмей әлек. Сәуле секілді бағаны негізсіз көтерген басшылыққа базынасын айту үшін басқа саудагерлер де жиналды.
1994 жылдан бері осы жерде сауда істейміз. Бірінші рет осындай болып жатыр. Жеті мыңды да көтере алмаймыз. 78400 жалға төлейміз, салы, медсақтандыру төлейміз. Әлеуметтік салық төлейміз, сонымен бәрі 100 мың теңгеден асып кетеді. Ал қазір менің жалға алғаным 180 мың болады, оны қалай шығарып беремін?", - дейді саудагер Тамара Қалибаева.
Көк базардың өзі екі бөліктен тұрады. Бергі жағында – жеміс-жидек, көкөніс. Арғы жағындағы жаңа павильонға киім-кешек саудалайтындар шоғырланған. Бүгін жараның бетін тайсалмай ашқан – екіншілері.
Әдетте абыр-сабыр болып жататын базар ішінде өлі тыныштық. Мұнда келіп жатқан, заттарды көріп жатқан адам жоқтың қасы. Енді жалға алу құнын екі есеге қымбаттатса, онда пайда емес, қып-қызыл шығынға батамыз дейді сатушылар.
Жаңа павильон дейді, бірақ ол жерде жарнама жолға қойылмаған, бутиктер тезтез ауысады. Өйткені адамның кіруі қамтамасыз етілмеген, ресепшн қойылмаған. Енді бағасын көтерсе, көп адамның қалтасына салмақ салады. Несие алған адамдар бар, олар аяқ астынан қазір қайда кетерін білмейді", - деді саудагер Сұлу.
Мәселенің мән-жайын түсіндірер деген базар әкімшілігі басында сырттай бақылаумен тұрған. Тіпті кейбіріне жақындап әңгімеге тартты. Тек камераны көре сала, "басқасы сөйлейді" деп, жауапкершіліктен ат-тонын ала қашты.
Сіз кім боласыз, әкімшіліктен бе?"
Иә, әкімшіліктен, бірақ бізде жалға алуға жауап беретін аға әкімші бар, сол кісі жауап береді".
Сол кеткеннен, базар әкімшілігі молынан кетті. Екінші қабаттағы кеңсесіне көтерілгенде есікті іштен тарс жауып алған.
Есік қаққанды естімегендер терезеден тарағанша сығалап тұрды. Ал шағымына жауап алмаған саудагерлер мұндай бассыздыққа жол бермеу үшін атақты көк базарды баяғыдай мемлекет өз балансына алсын дейді.
Мына жекеменшік иелерінен жалықтық, бәрін мемлекет өз қолына алсын. Біз бағаның көтерілуіне қарсымыз!"
Ақпарат көзі: ktk.kz
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
тақырып бойынша жаңалықтар
Алматыда жаңа жылдық шыршалар жәрмеңкесі ұйымдастырылды
Жаңа жыл жақындаған сайын Алматыдағы Панфилов көшесі қылқан жапырақтың иісі мен мерекелік көңіл-күйге толы нағыз қысқы базарға айналды. Жәрмеңке әркім үйіне жаңа жылдық шырша таңдай алатын алматылықтардың сүйікті орнына айналды, деп хабарлайды Алматы қаласы әкімдігінің баспасөз қызметінен.
Жәрмеңкеде сатып алушыларға биік шыршадан бастап шағын ыдыстағы ағаштарға дейін түрлі тауар ұсынылған.
Мен жыл сайын базардан шырша сатып аламын, бірақ биыл дәл осы жерден сатып алуды шештім, өйткені бағасы бірдей. Балалармен келіп шырша таңдап жатырмыз, пірәндіктерден дәм татып, жарқыраған қондырғылардың жанында суретке түстік. Мұндағы атмосфера керемет, шаршағаныңды ұмытасың, суық та сезілмейді. Жаңа жылдың жақындап қалғаны анық сезіледі", - деді Ерлан Қасымов.
Жәрмеңкеде классикалық қылқан жапырақ ағаштарымен қатар қармен көмкерілгендей сәнделген дизайнерлік шыршаларды да сатып алуға болады. Мұндағы ассортименттің молдығын қала тұрғындары ерекше атап өтуде.
Біз құрбымызбен жай ғана көріп қайтуға келген едік, бірақ қызығып, шырша, ойыншықтар мен гирляндалар сатып алдық. Енді бірге жиналып, шыршаны безендіріп, какао ішеміз. Мұнда сондай әдемі, жылы әрі жайлы, кеткің келмейді. Бұл жәрмеңке қаланың ең керемет орындарының біріне айналғанына сенімдімін", - деді студент Алина Әбілдаева.
Жәрмеңкенің безендірілуі ерекше әсер қалдырады: гирляндалар, жарқыраған шамдар, фотоаймақтар - мұның бәрі ғажайып мерекелік көңіл-күй сыйлайды. Әсіресе, қар басқан шаналар, жарқыраған аққалалар мен бұғының мүсіндері балаларды қуантады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
Алматыда 80 шыршаның шамы жағылды: қалада мерекелік шаралар бастау алды
Алматыда бір мезетте 80 жаңа жылдық шыршаның шамы жағылып, бұл мерекелік маусымның символдық басталуын көрсетті, деп хабарлайды Алматы қаласы әкімдігінің баспасөз қызметінен.
Абай алаңында Алматының басты жаңа жылдық шыршаның шамын жағу рәсімі өтті. Оның биіктігі 25 метр. Биыл мегаполис шыршасы алғаш рет классикалық стильде жасалып, қаңқалы емес, табиғи діңді болды. Шыршаны безендіру үшін алты метр гирлянда, түрлі-түсті шарлар мен жаңа жылдық ойыншықтар қолданылған.
Рәсімге ауа райы ертегідей ерекше атмосфера сыйлады: жаңа жылдық арудың айналасын сиқырлы қар қоршап тұрды, ал мамықтай аппақ қар ұлпалары мегаполистің басты шыршасын безендіріп тұрды.
8 мыңнан астам алматылық пен мегаполис қонақтары қазақстандық эстрада жұлдыздарының қатысуымен өткен керемет шоуды тамашалады.
Мен жас орындаушыларды қолдап, құттықтау үшін келдім. Шырша өте әдемі, бәрі тамаша ұйымдастырылған. Концерт те керемет өтті, ал қарлы ауа райы нағыз жаңажылдық көңіл-күй сыйлады", - деді мегаполис тұрғыны Сергей Дмитриевич.
Концерттік бағдарламаны "BS band" үрмелі оркестрі ашып, жаңажылдық әуендерден попурри орындады. Роза Рымбаеваның сахнаға шығуы ерекше мерекелік көңіл-күй сыйлады. Халық әртісі "Снег идет" және "Жұлдызды жаңа жыл" әндерін орындап, кешті жылулық пен жағымды эмоцияға толтырды.
Бүгін алматылықтар мен қала қонақтарына жаңажылдық көңіл-күйді Назым Әбілдина, Мәди Рымбаев, Динара және Балжан Бидаш сыйлады. Әсіресе жастар "ALPHA" тобы, Dakelot, "ASTRA" тобы, Малика YES және Adil өнерін асыға күтті.
Мен Жаңа жылды қатты жақсы көремін. Мұндай шаралар бақыт сыйлайды. Мұндай керемет мерекені ұйымдастырған әкімдікке алғысым шексіз. Жауған қар да ерекше атмосфера сыйлап, бәрі өте ертегідей болды", - деді Алматы тұрғыны.
Turar-дың "Жаңа жыл" әнімен қаладағы алғашқы жаңажылдық концерт аяқталып, көрермендерге мереке алдындағы керемет көңіл-күй сыйлады.
Ертегідегідей атмосфераны күймедегі Күлбике, Зімбір адам, бұғылар және басқа да кейіпкерлер бейнеленген көркем безендіру элементтері, жарқыраған фотоаймақтар мен жарық инсталляциялары толықтырды.
Айта кетейік, қаладағы барлық ауданда шырша жағу рәсімдері концерттер мен әртүрлі шаралармен бірге ұйымдастырылып, тұрғындар мен қонақтарға мерекелік көңіл-күй сыйлады.
Сондай-ақ бүгін Абай алаңында басты жаңа жылдық жәрмеңке ашылды. Ол 2025 жылдың 5 қаңтарына дейін жұмыс істеп, тұрғындар мен қонақтарға кәдесыйлар, қолөнер шеберлерінің бұйымдары мен мерекелік әшекейлер ұсынады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.
2024 жылғы 1 желтоқсанда 411 мыңнан астам адамға атаулы әлеуметтік көмек көрсетілді
2024 жылғы 1 желтоқсанда 77,6 мың отбасындағы 411,3 мың адамға атаулы әлеуметтік көмек (бұдан әрі - АӘК) тағайындалды. Биыл осы мақсатқа бюджеттен 54,7 млрд теңге қарастырылған, деп хабарлайды Қазақстан Республикасы Еңбек және халықты әлеуметтік қорғау министрлігінің баспасөз қызметінен.
Бұрын хабарланғандай, АӘК-нің негізгі мақсаты - ақшалай төлем түрінде қолдауды жүзеге асыру және отбасының еңбекке қабілетті мүшелерін жұмыспен қамтуға жәрдемдесудің белсенді шараларына тарту арқылы отбасын қиын өмірлік жағдайдан шығару.
АӘК мыналарды көздейді:
- табысы өңірлік ең төмен күнкөріс деңгейінің 70% - нан аспайтын азаматтарға тоқсан сайын әлеуметтік көмек тағайындау;
- табысы аз отбасылардағы 1 жас пен 6 жас аралығындағы әр балаға 1,5 АЕК (5 538 теңге) мөлшерінде ай сайынғы қосымша төлем беру. 2024 жылғы 1 желтоқсанға АӘК алушылар қатарынан мектеп жасына дейінгі 128,8 мың балаға 5,0 млрд. теңге сомасына қосымша төлем тағайындалды;
- жұмысқа орналастыру, өз ісін ашуға ниетті отбасыларға гранттар беру, біліктілікті арттыру курстарына жіберу (қажет болған жағдайда) және басқалар арқылы жұмыспен қамтуға жәрдемдесу.
Қазіргі уақытта қазақстандықтар АӘК тағайындауға өтінішті тұрғылықты жері бойынша мансап орталығында, ауыл округінің әкіміне сондай-ақ Электрондық үкімет порталы (egov.kz) арқылы бере алады.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.