Алматыда алаяқтардың нөмірлерді ауыстыру үшін пайдаланатын "Sim-Box" жабдығы тәркіленді, деп хабарлайды ҚР Бас прокуратурасының баспасөз қызметінен.
Алматы қаласының құқық қорғау органдары мен байланыс операторлары арасында жасалған меморандум шеңберінде прокуратураның үйлестіруімен "Киберпол" бөлімшесінің қызметкерлері "Sim-Box" жабдығын пайдалану фактісін анықтады.
Сәтбаев көшесіндегі офистердің бірінен күдіктіден 3 "Sim-Box" құрылғысы тәркіленді.
Жабдық слоттарынан қазақстандық және ресейлік ұялы байланыс операторларының 80-нен астам SIM-картасы табылды.
Sim-Box" жабдығын алаяқтар жаппай қоңыраулар шалу, хабарламалар тарату және абоненттік нөмірлерді ауыстыру үшін пайдаланады.
Аталған факті бойынша абоненттік құрылғының сәйкестендіру кодын өзгертуге мүмкіндік беретін бағдарламаларды заңсыз пайдалану туралы сотқа дейінгі тергеп-тексеру басталды (ҚР ҚК-нің 213-бабы).
Бұл соңғы айдағы осындай құрал-жабдықтардың екінші рет анықталуы.
Алматы қаласының прокуратурасы азаматтарды қырағылық сақтауға шақырады. Егер сізде осындай жабдықты қолдану туралы ақпарат болса, дереу құқық қорғау органдарына хабарлаңыз.
Сондай-ақ жеке деректердің құпиялылығын сақтау қажеттігін еске саламыз: кіру кодтарын, парольдерді және банк карталарының деректемелерін бөгде адамдарға бермеңіз.
Ақпаратты пайдаланған жағдайда Kazakhstan Today ақпараттық агенттігіне гиперсілтеме жасау міндетті. Kazakhstan Today Ақпараттық агенттігінің материалдарына авторлық құқық.